María Isabel monso bati nünanka juta Chile San Bernardo yekänti tä kukwe driere kä jutobiti. Niara aune mräkätre ye kite nitre mapuche yekri; niaratre nämene sribire kwin köböire konkrekasion blite mapudungún ye ükaninte keteiti.

Täräkwata 2.000 sribebare nitre blite kukwe mapudungún ye nübaikäre Kristo ja nire biani Ngwanta Törö jai ye kräke, aune gätä ye nuaindi kukwe ye arabebiti mikani gare angwane, dre nuaindre täräkwata ye döräikäre yebätä María Isabel namani töbike. Monsotre Testiko kukwe driebare monsotre mada nänkä kwelate ben aune profesor yei, köböire kukwe kwin namani bare ye nükani törö ie. Blitabare kwe rün bätä meyebe, aune dre nuaindi kwe täräkwata ye döräikäre kwelate yebätä niarakwe töbikadre niebare kwetre ie. ¿Ja töi mikani dre nuainne?

Niara tuandremetre täräkwata nitre nübaikäre ketekä jite jukwebätä ye ribebare käne kwe. Nitre ji ngwanka kwelate käkwe tuanimetre nuainne aune kwin krubäte niebare kwetre ie. Bati, monsotre kädekaninte dekä kwelate ye ngwane, täräkwata nitre nübaikäre yebätä ni ji ngwanka käne käkwe blitabare micrófono yebiti.

Biti, María Isabel permiso käräbare nitre profesor yei nänkäre salón kwatire kwatire yete. Permiso biani ie ye ngwane monsotre meden mapuche nämene salón kwatire kwatire ye nämene ngwentari. Niara tä niere: “Ti nämä nütüre monsotre mapuche ni jätä o ni jätä biti nirike aibe nämä kwelate, akwa nämä kwati rababa gare tie. ¡Tikwe täräkwata 150 döräiba!”.

Meri mada ie täräkwata ye tuani ketaninkä jite jukwebätä angwane, nire raba kukwe mada mike gare ie ngwanintari kwe. Monso chi merire kä kwäjätä biti yekänti jänikani angwane, töi ñan namani krütare. María Isabel niebare kötare kwärä: “Niara nütübare ni umbre känti jänrikadi”. Täräkwata nitre nübaikäre biani kati kwe meri ie aune blitabare jötrö ben, ye bitikäre nämene nüne medente ngwanintari kwe ie, ne kwe rikadre känti rün bätä meye ben blitakäre bäri Gobran Ngöbökwe yebätä. Jesús ja nire biani Ngwaninta Törö jai ye ngwane meri ye aune nitre grebiti ni ti mapuche nükani gätä yebätä. Nitre ni gre tä kukwe driere nitre blitaka kukwe mapudungún yei yebätä kä namani juto krubäte. ¡Kä nengwane ni niena kwati konkrekasion yete!

Monsotre nänkä kwelate nibe o sribi muko nikwe nübaikäre kukwe kädrieta ni jökrä kräke, gätä kri köbömä nuainta o Jesús ja nire biani Ngwanta Törö jai ye kräke, ¿ni raba nuainne ye erere? Nikwe kukwe känändi tärä sribeta yebätä angwane, nitre mada dre nuainbare ye rabai gare nie aune ye ni dimikai kukwe ükete kwin. Arato, üai deme kärädre Jehovai ne kwe kä jürä ñaka rabadre nibätä blitakäre niarabätä nitre madabe (Luc. 11:13). Nikwe kukwe ükaite jai angwane, kukwe kwin raba nemen bare aune ye kä mikai juto krubäte nibätä.