MONSOTRE kwati Testiko tätre ja töi mike jondron ruäre tuenmetre kukwe driekäre bäri, ye tä kä mike juto nibätä (Mat. 6:22). ¿Dreta nemen kwetre aune kukwe meden ben tätre ja tuin? Ja mräkätre ruäre tä sribire México yebätä ani blite kukwe ye mikakäre gare jai.

Dustin aune Jassa, nünanka Estados Unidos käkwe ja mäkäninte enero kä 2007. Kä nikani braibe ta angwane niaratre töi nämene barco kökai nünankäre te ye erere namani kwetre. Barco ye nämene kä Astoria (Oregón, Estados Unidos) yekänti, juta ye bä nuäre aune nemenkä océano Pacífico ye ken, kä ye ngudrere aune kri krikri tä yete bätä ngutuäbiti nieve krubäte. Dustin tä niere: “Kä bä nuäre yebätä nun okwä nämene mate.” Dustin aune muko kwe nämene nütüre nämene tö ngwen Jehovai aune nüne jondron braibebiti, ñobätä ñan aune nämene nüne barco 8 metros (26 pies) yete, arato niaratre nämene sribire ora braibe te, nämene ja ükökrö konkrekasion blite kukwe madabiti, aune ruäre ngwane nämene sribi prekursor ausiliar nuainne. Ye bitikäre namani gare ietre niaratre nämene ja ngökö. Dustin tä mike gare: “Nun ñaka nämä sribire konkrekasionte, ñakare aune nun nämä kä denkä krubäte jai barco ükatekäre. Nunkwe sribi Jehovakwe mikadre käne yekäre nunkwe kukwe ükadrete rükaba gare nunye”.

 Jassa tä niere: “Ti nämä kaibe ye ngwane tikwe nünanbare México, aune ti nämä konkrekasion inglere yete. Tikwe sribibare kwin yete, yebätä ti törbaba näinta bobukäre”. Ja mräkätre ja namene kä madakänti nüra ngwä ükökrö kädrieta täräbätä, yebätä Dustin aune Jassa ñäkäbare gwairebe, ne kwe töi rabadre nänbätä kä madakänti (Juan 4:35). Dustin ie tä törö “niaratre yebätä kä namani juto ye erere nun torbaba ja tuai arato”. Ja ketamuko kwetre nämene nüne México käkwe niebare ietre, nitre ükaninte braibe nämene ja di ribere ye ngwane Dustin aune muko kwe ja töi mikani sribi kwetre tuenmetre, barco kwe rürübäine aune nikanintre kä yekänti.

Dustin aune Jassa nikani nüne juta Tecomán (Colima) yete; kä ye nemenkä océano Pacífico ye ken, 4.300 kilómetros (2.700 millas) kä Astoria mötörikri. Dustin tä mike gare: “Murie tibo aune kä kätäkwäre yete nun ñaka rababara nüne, nün rikaba mada nüne kä ngire aune limon krubäte yekänti”. Niaratre yei sribi ñaka kwani kenabe, bätä ngwian ñaka nämene krubäte kwetre, yebätä nämene aro mumame kwete bobu köbö kwatire kwatire. Jassa tä niere: “Nun törbaba mrö mada kwetai angwane, nitre ja tötikaka Bibliabätä nunbe nämä mango, baran, kekema aune limon bien krubäte nunye”. Kä nikani ta angwane, kwela känti nitre tötika nämene blite kukwe madabiti yekänti sribi kwani ietre, kwela ye nämene Taiwán, akwa niaratre nämene sribi ye nuainne Internet yebiti. Ngwian ganainta kwetre yebiti tätre nüne köbö kwatire kwatire.

¿Niaratre tä nüne kä jutobiti? Tätre mike gare: “Nunkwe ja töi mikani nüne nete ye namani bäri kwin nun kräke. Nunta ja kete bäri kwin Jehovabe aune nüne bäri kwin jabe. Nunta kukwe driere, nunta ja tötike gätä kräke bätä nitre ja tötikaka Bibliabätä dimikadre ño ye nunta kädriere jabe, nunta jondron jökrä ye nuainne gwairebe. Ne madakäre, kukwe nämä nun töi nike yebätä nun ñaka niena töbike.” Dustin aune Jassa tä kukwe ne niere mrä: “Salmo 34:8 tä käbämike: ‘Jehová mike gare jai aune niara töi kwin ye rabadre gare nie’, kukwe ye metre ye rababa gare kwin nunye”.

Ja mräkätre aune ja ngwaitre 2,900 biti bäri, ruäre gure aune ruäre kaibe ja töi mikani niken México nitre ribeta Gobran Ngöbökwe kukwei driekäre yekänti. Niaratre ruäre kä nämene gre o gre ketebubiti. ¿Ñobätä nitre Testiko kwati tä juto biare sribi ye nuainkäre? Kukwe ye ngwantaribare ietre angwane niaratre blitabare kukwe ketamäbätä. ¿Kukwe meden niebare kwetre?

Jehová aune nitre mada tareta. Kä namani 18 Leticia yebiti angwane ja ngökani ñöte kwe. Niarata niere: “Tikwe ja diandrekä Jehová kräke ye ngwane ti rabadre sribire ja brukwä tätebiti aune ja nire tätebiti  kräke ye nämä gare tie. Ti törbaba kä diankä bäri jai sribikäre ja di tätebiti bämikakäre ti nämä niara tarere krubäte” (Mar. 12:30). Hermilo ja mäkäninte Leticia ben, akwa kä nämene kwä gre niarabiti angwane nitre ribe nämene kukwe driere yekänti nikani. Niarata niere: “Nitre tare tikwe ye tikwe bämikadre yekäre ti rabadre dimike kukwe ja üaire yebiti ye rükaba gare tie.” (Mar. 12:31.) Ye medenbätä, nikani mento juta Monterrey yebätä, kä yekänti nämene sribire bancote, jondron nämene krubäte kwe aune nämene nüne kwin, akwa nikani nüne juta bäri chi känti.

Nünankäre kä jutobiti käre. Leticia ja ngökani ñöte ye bitikäre, nikani kukwe driere kä madakänti sö krati prekursora ben. Niara tä mike gare: “Ti töi ñan rababa krütare. Nitre rababa Gobran Ngöbökwe kukwei nuin ye kä mikaba juto tibätä. Sö krati rikaba ta angwane tikwe nieba jai: ‘¡Ti tö ne nuain käre!’”. Kukwe ye erere namani bare ja ngwai Essly yebätä. Niara nämene kaibe aune kä nämene kwä gre närebiti. Ja mräkätre nämene niken kukwe driere kä madakänti yebätä kä nämene nemen juto ye tuani kwe ye käkwe töi mikani niken nitre ribe nämene kukwe driere yekänti. Niara jatani ünä angwane nitre testiko ruäre ja töi mikani sribi ye den ja käne ye namani gare ie. Niarata niere: “Kä nämene juto niaratre ngwärebätä ye ti nämä tuin, aune ti törbaba ja tuai ye erere”. Ja ngwaitre kwati käkwe nuainbare Essly erere. México yekänti ja ngwaitre kaibe 680 biti bäri tätre kukwe driere nitre ribeta kukwe driekäre yekänti. ¡Tätre kukwe kwin bämike nitre jökrä kräke!

Nünankäre kwin aune tö ngwankäre kukwe kwin yei. Essly ngedianinkä colegiote ye ngwane beca driebare ie ja tötikakäre kwela krite. Monsotre mada namani niere ie rabadre beca ye kain ngäbiti aune rabadre “nüne jäme”. Kukwe yebiti nämene mike gare niara rikadre kwela krite, ja tötikadre kwe sribi kwin känänkäre, karo kökadre kwe jai bätä rikadre basare kä madakänti. Akwa niarakwe ñaka kukwe ye nuainbare. Essly tä mike gare: “Ja ketamuko kwati tikwe kukwebätä nikani jondron ye jiebiti, aune rababa gare tie sribi Ngöbökwe ye ñaka jatani tuin ütiäte ietre. Niaratre nämä jondron kä nebätä känene bäri jai angwane töi ñaka nämä nemen jäme aune jondron ñaka nämä nemen bare kwin ietre ye rababa gare tie arato. Ti abokän nämä bati yebätä ti törbaba sribi nuain bäri Jehová kräke.”

Kukwe ükaninte ja tötikakäre jötrö ngwarbe yete Essly ja tötikani ye köböire sribi kwani ie aune nämene sribi prekursor nuainne, ye bitikäre nikani nüne nitre ribe nämene Gobran Ngöbökwe kukwei driekäre yekänti. Arato ja kitani kwe blite kukwe otomí aune tlapaneco yebiti. Kä komä te Essly kukwe driebare kä mente känti, ye medenbätä niarata niere: “Nitre ribe nämene kukwe driekäre yekänti ti rikaba ye ti mikaba tö ngwen kukwe kwin ie aune  kätä juto tibätä. Tita ja mäke bäri kwin Jehovabe”. Phillip aune Racquel töita ye erere arato. Kä grebiti kwäjätä bäri niaratre yebiti. Niaratre tä gure metre aune käi Estados Unidos. Tätre kukwe ne niere: “Kä nengwane kukwe keta kabre tä nakainkä käbiti tibien aune nitre kwati ñaka nüne jäme. Akwa, kä ruärekänti nitre kwati töta nemen kukwe Bibliabätä kukwe nuai ye kätä nun mike tö ngwen kukwe kwin ie. ¡Ja di ngwanta kukwe driere ye ñaka nuainta ngwarbe!”.

Nitre ribeta Gobran Ngöbökwe kukwei driekäre yekänti ja mräkätre tä niken ye ngwane tätre ja tuin kukwe keta kabre ben. Ngwian ñaka tä nemen krubäte ietre nünankäre, ye medenbätä niaratre rabadre ja töi mike nüne nitre nünanka kä yekänti erere. Verónica, sribi prekursor nuainkä aune kukwe drie gare kwin ie tä kukwe ne niere: “Ti nämä mrö rien aune rürübaine brai, ruäre ngwane ti nämä dän rürübäine aune nitre mada dokwä druen tikekä. Kä nengwane tita ju ni madakwe yete kä ükete aune nitre rüne rabadre blite ño monso kwetre ben ye tita driere ietre”.

Nitre nünanka juta madate ye töi ñaka ja erebe aune kukwe jene jene nuainne, aisete ja ngwandre niaratre ye erere ye ñaka nuäre, aune nünandre mente nitre blitaka kukwe madabiti yekänti ye bäri ribi. Kukwe ye erere namani bare Phillip aune Racquel yebätä, niaratre nikani nüne nitre blitaka náhuatl yekänti. Phillip tä niere: “Nitre ye nämene kukwe jökrä nuainne jene”. ¿Dre käkwe niaratre dimikani? “Nitre náhuatl nämä nüne jäme jabe, nämä kukwe metre niere aune mantiame yebätä nunkwe ja töi mikaba.” Racquel tä mike gare: “Nun nämä Jehová mike täte gwairebe ja mräkätre nünanka yete yebe, ye köböire kukwe keta kabre rababa gare nunye”.

Mä tö nänbätä kukwe driere kä mente känti, akwa ¿dre nuaindre mäkwe? Ja mräkä ja namene kukwe driere kä madakänti tätre niere nikwe ja di ngwandre jondron ruäre tuenmetre aune jondron tä nuäi nikwe yebiti kä tädre juto nibätä (Filip. 4:11, 12). ¿Dre mada nuain raba? Leticia tä niere: “Sribi ruäre abokän tikwe nuaindre käre ye ti ñaka nämä kain ngäbiti, ñobätä ñan aune ñongwane ti törbadre näin kä mada känti ye tikwe nuaindre”. Hermilo tä mike gare: “Dän bätädrete, bäsökadre aune mrö riadre yebätä tikwe ja kitaba”. Verónica tä niere: “Ti nämä nüne ti mräkätre ben ye ngwane ti nämä niaratre dimike kä ükete gwita, aune mrö brai aune ñaka ni mike bren rien yebätä tikwe ja kitaba. Arato tikwe ja töi mikaba ñaka jondron kitekä ngwarbe”.

Levi aune Amelia nünanka Estados Unidos, kä niena kwä kwä niaratre tä gure metre. Orasion nuainbare bökän kwetre aune dre nämene niaratre töibätä ye mikani gare kwetre ye käkwe dimikani niken kukwe driere México. Levi tä niere: “Kukwe driekäre kä kwati näre kä madakänti yekäre nunkwe ngwian ribedre nuäi yebätä nunkwe blitaba, ye bitikäre nunkwe nieba Jehovai nun dimikadre kwe, ne kwe ngwian rabadre ye näre nunkwe”. Sö nikani ruäre ta angwane ngwian ribe nämene kwetre jai ye erere ükaninkrö kwetre, aisete nikanintre kä madakänti kukwe driere. Levi tä niere: “Nunkwe orasion nuainba Jehovai ye kani ngäbiti kwe, aune nunkwe dre ribeba ie ye erere rababa nuaindre nunye.” Amelia tä niere: “Nunkwe nuadi kä kwati aibe te nun rababa nütüre, akwa kä nibira kwä kükü nunbiti nete aune nun ñan töita kä mikakabätä. Jehovata nun ngübare ye nüke gare kwin nunye. Köbö kwatire kwatire niara töita kwin nun kräke ye nüke gare nunye arato”.

Oradre ye namani ütiäte Adam aune Jennifer kräke. Niaratre käi Estados Unidos aune tätre gure metre, bätä tätre kukwe driere México kukwe inglere yebiti. Kukwe ne nuain raba niaratre tä niere: “Ni ñaka rabadre ngübare kukwe jökrä rabadre ükaninte kwin nie. Ni tö näin sribire kä madakänti ye niedre Jehovai aune nikwe dre ribebare ye erere ja di ngwandre nuainne. Jondron ruäre tuanemetre aune medente mä tö näin kukwe driere ye mikadre gare sukursal tä juta yekänti yei, mäkwe ngwian ribedre nuäi jai nänkäre yebätä mäkwe töbika, biti ye erere mäkwe nuain”. * Kukwe ne erere nuaindre angwane jukwe kri tikadi mä käne aune mäkwe nünain kä jutobiti bätä jondron ja üaire rabai krubäte mäkwe.