NUN ni jätä jai aune jondron nire ngüba nämä o jondron kwetadre nöka nämä ti rünkwe Ostrobotnia Septentrional, Finlandia yekänti nun ngübabare. Nun nämä chi ye ngwane Rüba kri Bobukäre kä jökräbiti tibien yete nunkwe ja tare nikaba krubäte. Rü kri nuainba ye ken nun ñaka nämä nüne, akwa kukwe tare nuainba ye nun mikani ulire krubäte. Juta Oulu aune Kalajoki yekänti bomba kita nämä ye ngwane kä trä nämä nemen tuin tain kwinta deu nunye. Avión rükäre ye jutuadre kwite kwinta nunye angwane nunkwe ja ükadre ye nun rün drieba nunye. Ye medenbätä kä ye ngwane nun ngwai bäri umbre, Tauno, käkwe blitaba nunbe kä bä nuäre rabai Kä tibienbätä, känti kukwe käme nuain ñaka rabaira yebätä angwane, kukwe ye mataba nun brukwäte.

Taunobiti kä nämene 14 angwane ñäkäbare kwe nitre ja tötikaka Bibliabätä täräi yebätä köböire kukwe drieta Bibliakwe ye namani gare ie. Aune rü nuainbare ye ngwane, ñaka ja mikani kwe rükäre ñobätä ñan aune kukwe ye käme namani gare ie Kukwe Ngöbökwe yebätä ja tötikabare kwe ye köböire. Ye medenbätä kitani ngite, aune kä yekänti mikani ja tare nike krubäte. Akwa ye niara töi mikani bäri Jehová mike täte, biti mikaninta kwäre ye ngwane, namani kukwe driere bäri kä jutobiti. Niara kukwe kwin bämikani nun kräke ye nun töi mikaba näin gätä nuain nämä nitre Testiko käkwe nun ken yebätä. Nun nämä nemen gätä kri yebätä arato, ye nuainkäre nun nämä sribire ja dibiti ngwian ükakrökäre debe näre jai nänkäre gätäbätä: nun nämä dän dike nitre nünanka nun bäre kräke, nun nämä cebolla nökö, aune jondron mada kwetadre tomate kwrere nun nämä ükökrö arato. Sribi nämä nuaindre krubäte nunye kä jondron nire ngüba käi o jondron kwetadre nöka käi yekänti, aisete nun nämä köbö denkä jene jene jai nänkäre gätä kri yebätä, ñobätä ñan aune ñaka nämä nemen nuäre nun kräke nänkäre gwairebe gätä kri yebätä.

Kukwe namani gare nunye Jehovabätä aune niara töita dre nuainbätä namani gare nunye ye nun töi mikaba niara tarere bäri, aune ye köböire, nunkwe ja diankaba niara kräke. Kä 1947 yete, nunkwe ja dianinkä Ngöbö kräke ye mikakäre gare ni jökrä ie nunkwe ja ngökaba ñöte (Annikki yebiti kä nämä 15 aune Aili yebiti kä nämä 17). Kä ye arabe te nun eteba Saimi ja ngökaba ñöte. Ne madakäre, nunkwe nun eteba Linnea tötikaba Bibliabätä, niara nämä gure. Niara aune mräkä kwe ye käkwe ja mikani testiko Jehovakwe arato. Nunkwe ja ngökaba ñöte ye bitikäre, nunkwe ja töi mikaba sribi prekursor (auxiliar) ye nuainne nane nane köbö nämä nemente ngwarbe nunye yete.

Kä 1955 yete nun rikaba nüne juta Kemi yekänti, juta ye nämä bäri ngwitärikri. Nun nibu nämä sribire köbö täte ja kräke, akwa nun tö nämä sribi prekursor ye nuaindi. Ngwian ñaka rabai nünana nunye ye jürä nämä nunbätä, aisete nunkwe ja töi mikaba ngwian ükökrö nun jämi sribi prekursor nuainne ye känenkri. Ye ngwane ja eteba nämä sribi prekursor nuainne kädrite kena yekwe blitaba nunbe. Niarakwe kukwe nieba nunye yebiti mikaba nüke gare kwe nunye, ñaka jondron rabadre ere nunkwe o nun mräkä rabadre nun dimike ye aibe köböire nun raba sribire köbö täte Jehová kräke. Metrere nun rabadre tö ngwen ni Rün kä kwinbiti yei ye bäri ütiäte.

 Kä ye ngwane ngwian rababara ükaninkrö debe näre nunye sö krobu kräke. Aisete mayo kä 1957 yete nunkwe kä jüräbe kwärä sribi prekursor ye käräba nuaindre jai sö krobu te kä Pello, Laponia yekänti. Sö krobu rikaba ta angwane, ngwian ükaninkrö nunkwe ye nämä täte nunye, ye medenbätä nunkwe sö krobu käräbata jai sribi prekursor nuainkäre. Sö ye krütabata angwane kukwe ye erere rababata bare nunbätä: ngwian ye nämä täte nunye. Ye ngwane Jehovakwe nun ngübai rababa gare metre nunye. Ye bitikäre, kä nikanina gre ketebu biti kwäjätä ta nunbiti yete nunkwe sribi prekursor nuainbare, akwa ¡ngwian ükaninkrö nunkwe jai ye täbe nunye! Kukwe jökrä kwin namanina bare nun kräke yebätä nunta töbiketa angwane, ruin nunye, Jehová nämene nun kani kisebiti aune nämene niere nunye: “Ñaka kä jürä ngwan jabätä. Erametre akwle tikwe mä dimikai” (Is. 41:13).

Kä 1958 yete, ni ni tuabitikä konkrekasionte käkwe ribeba ne kwe nun kädekadre sribi prekursor especial nuainkäre kä Sodankylä (Laponia) yekänti. Kä ye ngwane, ni Testiko nämä itibe yete, ye ja eteba abokän ie kukwe metre namani gare, akwa ñaka tä nemen bare käre ye kwrere. Monso kwe ye nikani juta kri Finlandia, Helsinki yekänti, monsotre ja tötikaka kwelate yebe. Monsotre ja tötikaka kwelate ye nämene näin ji ngrabare ye ngwane, ja eteba umbre käkwe täräkwata Ni Mikaka Mokre ye biani monso chi nämene näin köre yei, aune biandre kwe meyei ribebare kwe ie. Ye erere niarakwe nuainbare, aune meye ie nükani gare jötrö kukwe metre kwani ie.

Kä jondron sribekäre kribiti yebiti kwin kwarto nämä ye nunkwe käräba jai gätä nuainkäre. Gätä nuain jataba kena nunkwe ye ngwane, ja eteba nünanka kä yekänti, ngängän kwe aune nun aibe nämä nemen gätäbätä. Kukwe nämene dianinkä köbö ye kräke yebätä nun nämene ñäke gwairebe. Ye bitikäre, ni brare iti nämene ja tötike Bibliabätä nitre Testiko ben ye rükaba sribire kä jondron sribekäre kribiti yekänti. Niara aune mräkätre kwe rababa ja ükökrö nunbe gätäbätä. Ja känenkäre, niara aune muko kwe ye käkwe ja ngökaba ñöte, aune niara rababa gätä jie ngwanka. Nitre brare sribikä yete ye ruäre jataba ja ükökrö gätäbätä aune kukwe metre Bibliabätä ye kan ngäbitiba kwetre. Kä rikaba ruäre ta ye bitikäre nun braibe nämä ja ükökrö ye ririaba bäri angwane konkrekasion rababa.

Nun nämä näin mente krubäte ye ñaka nämä nuäre nun kräke kukwe driekäre. Kä moren yete nun nämä näin gürere, bicicletabiti aune nun nämä niken ru mrente yebiti nitre tuinbiti. Bicicleta ye nämä  kwin krubäte nun kräke, ñobätä ñan aune nun nämä nikenbiti gätä kri yebätä o nun rün aune nun meye nämä nüne mente krubäte yekänti nun nämä nikenbiti arato. Kä ñüre ye ngwane nun nämä niken bus yete nitre nämä nüne yekänti aune biti kä yekänti nun nämä näin gürere kukwe driere ju ju te. Nitre nünanka kä yekänti ye nun nämä tuinbiti jökrä angwane, ye bitikäre nun nämä niken gürere kä mada känti nitre nämä nüne yekänti. Nieve ye nämä nemen krubäte aune carretera ye ñaka nämä nemen kwin nänkäre. Mädä nämä jondron jäke ja jiebiti ye tä jiebiti käre nun nämä niken. Ruäre ngwane nitre nämene niken käne ye tä gate nämä nieve yekwe, aune kä nämä kite moren ye ngwane ji nämä nemen därebe krubäte aune tibo aisete ñaka nämä nemen nuäre nänkäre jötrö nun kräke.

Kä nämä nemen tibo krubäte ye nämä nun mike dän nga kwin krubäte kä tibo kräke kite jabätä. Nun nämä niken media ngetobo ngwena jai aune media nga nun nämä niken ngwena krobu o krämä jai bätä bota arato. Bota ye nga, akwa nieve nämä niken te, aisete nun nämä nemen gwi kalera yekänti angwane, nun nämä bota tikete ja ngotobätä nieve ye diankakäre te. Dän nga kwin krubäte kä tibo kräke nämä nunbätä ye kä nämä ngösöi nieve yebätä angwane nämä nemen niere aune, kä nämä nemen bäri tibo angwane, nieve ye nämä nikrenkä ribibätä banikwata ye kwrere. Meri iti käkwe nieba nunye: “Kä jürä ñaka munbätä nänkäre kä käme krubäte nekänti, tödeka tä krubäte munkwe raba ruin tie”. Nunkwe nänba 11 kilómetros (7 millas) bitibäri niara gwirete.

Nun nämä näin mente krubäte, yebätä käre nun nämä kübien nitre mada gwirete. Kä nämä kite de ye ngwane, nun nämä kä kärere jai kübiakäre. Ju ñaka nämä kwin, akwa nitre ye töi jäme aune mantiame. Niaratre ye ñaka nämä kä aibe bien kübiakäre nunye, ñakare aune nämä mrö bien nunye arato. Käre nun nämä kübien reno, alce aune oso kwata yebiti. Aune ruäre ngwane nun nämä kübien ju kwin te. Ñodre, ju kri mikani mente kwin yekänti meri iti rikaba nun ngwena, känti kwarto nitre ka ngäbitikäre ye nämä dianinkä nun kräke yete jän bä nuäre aune kutu kwin ngwen tärän dikani kräbäre nämä. Nitre nämä nun kain ngäbiti ja gwirete yebe nun nämä blite Bibliabätä nemen kä raire te deu. Bati, nitre nämä nun kain ngäbiti ja gwirete ye käkwe kübiaba kwarto ye kwäräkri aune nun abokän käkwe kübiaba kwarto mada yete. Nun nämä blite bentre kukwe ja üaire yebätä kä drünente nememe ora kena dekä, ñobätä ñan aune ni brare ye aune muko kwe nämä kukwe mada ngwentari bäri jatäri nunye.

Kä Laponia ye ñaka kwin nura nökara, akwa bä nuäre krubäte, aune kätä nemen ño ye ererebätä bä ye tä nikwite. Akwa nitre nämä Jehová tarere ye nämä nemen bäri kwin nun kräke. Nitre tö kukwe mikai gare metre jai ie nun nämä kukwe driere ye ngätäite nitre sribikä kribätä ye nämä nüke sribi käi kribätä yekänti. Ruäre ngwane, nun, nibu merire kia, nämä niken ju kia sribebare känti nitre brare krikri nämä kwati krubäte yekänti, niaratre nämä kä jutobiti kukwe Bibliabätä aune tärä drie nämä nunkwe ye kain ngäbiti.

Kukwe keta kabre kwin namani bare nunbätä. Bati bus nun mikateba ñobätä ñan aune kä bus ngüba käi yekänti reloj nämä krötaninte minutos krä rike. Aisete  nunkwe ja töi mikaba niken bus mada yete abokän rikaba nun ngwena, kukwe drie ñaka nämä jire ye käi känti. Ju kena te nun rababa yekänti meri bati nun ka ngäbitiba abokän käkwe nieba nunye: “Mun nüra nete, tita mun ngübare”. Niara eteba tötikani Bibliabätä nunkwe, yei niebare kwe, nun rikadre niara känti köbö ye arabe te. Akwa kukwe juani kwe nun kräke ye ñaka namani gare jire nunye. Niarakwe ja tötika Bibliabätä kömikani aune mräkätre nünanka niara bäre yekwe nuainbare arato. Kä rikaba braibe ta, ye bitikäre nunkwe nitre ja tötikaka nunbe ni jätä biti nibu ükakröba keteitibe. Ye ngwane ja känenkäre, nitre ja mräkäre ye kwati krubäte käkwe ja mikanina testiko Jehovakwe.

Kä 1965 yete nun juanba konkrekasion Kuusamo yekänti, kä ye nemenkä mötörikri, aune nun täbe sribire kä yekänti. Kä ye ngwane, konkrekasion yete nitre kukwe driekä nämä braibe. Ne madakäre, kä yekänti nitre ñaka tö nämä kukwe drie nämä nunkwe ye kain ngäbiti, ñobätä ñan aune niaratre nämäna kukwe madabätä bätä ñaka nämä ja mäke nitre Testiko yebe. Akwa yebiti ta, nitre kwati nämä Biblia mike ütiäte jai, ye köböire niaratre tö nämä kukwe meden mikai gare jai yebätä nun nämä blite bentre. Bätärekä jatäri nitre ye jataba gare nunye, aune kä rikaba kubu ta ye bitikäre rababa bäri nuäre nun kräke ja tötikakäre Bibliabätä bentre.

Nun di ñaka niena kukwe driekäre köböiti, akwa nunta kukwe driere mantre jetebe. Nun nurä käkwe Aili dimikaba, ye köböire niara ja kitaba karo gwanbätä aune kä 1987 yete kä rababara 56 niarabiti ye ngwane licencia bianba ie aune kä nämä krubäte kukwe driekäre nunye yekänti rababa nuäre kukwe driekäre nun kräke. Ne madakäre, Ju ja Ükarakrö sribeba yekänti cuarto sribeba abokän känti nun rikaba nüne ye rababa kwin krubäte nun kräke.

Nitre ririabarera krubäte kukwebätä nun okwäbiti ye tä kä mike juto nunbätä. Kä Finlandia ngwitärikri yekänti nun rababa kukwe driere köbö täte ye ngwane, nitre kukwe driekä nämä braibe jene jene kä kri krubäte yete. Kä nengwane konkrekasion niena keta kabre abokän känti circuito niena keteiti. Bä kabre, gätä kri nuainta yete ja mräkätre tä nüke küde ngökö nunye aune nun täte törö munye tä ngwentari nunye. Nun nämene nemen niaratre gwirete mräkätre tötike Bibliabätä ye ngwane niaratre ruäre nämene chi. ¡Nura ja üaire nökani kä kwati krubäte te nunkwe ye gwä namani! (1 Cor. 3:6.)

Kä 2008 yete kä rikaba gre ketebu biti kwäjätä ta nunbiti sribi prekursor especial nuainbätä. Nunta debe bien krubäte Jehovai ñobätä ñan aune nunta ja di mike kwärikwäri kä ngwankäre nüke jai sribi kwin krubäte ne nuainkäre. Nunta nüne jondron braibebiti, akwa käre jondron tä nunkwe nünankäre (Sal. 23:1). ¡Ngwarbe nunkwe ja töibikabare krubäte! Jehová käbämikani ne erere, kä nikanina kwati ta ye jökrä te niarakwe nun mikanina dite: “Erametre tikwe mä mikai bäri dite. Tikwe erametre mä dimikai. Jän, erametre ti kise kukwe metre nuainkäre yebiti mätä nakani dime tie” (Is. 41:10).