Täräkwata Ni Mikaka Mokre sribeta mrä mrä ye mätä tuinte angwane, ¿bäbe mäkwe kukwe ye erere niebarera jai o nitre madai? Jondron üai bä nuäre bämikata aune üai diankata mikata täräkwatabätä ye kräke sribita krubäte aune ñaka mikata ngwarbekäre. Jondron üai ye tä ni mike töbike aune tä mate kwin nibätä. Arato, ye kwin krubäte ja ükatekäre Ja Tötikata Ni Mikaka Mokre yebätä aune blitakäre gätäte.

Kukwe ükaninte keteitire keteitire ja tötikakäre yete jondron üai bämikata, aune ñobätä ye tä mikani, yebätä mä rabadre kä denkä jai töbikatarikäre. ¿Tä dre mike gare? ¿Kukwe nieta kena aune texto dianinkä ja tötika kräke ye tä dre mike gare? Ye bitikäre, jondron üai mada mikadre ñärärä aune ye tä dre mike gare kukwe ükaninte ja tötikakäre yebätä aune mä raba nuainne ño ye mäkwe ngwantari jai.

Ja Tötikata Ni Mikaka Mokre yebätä ye nire tä jie ngwen ye rabadre nitre ja ükaninkrö nübaire blite jondron üai bämikani keteitire keteitire yebätä, aune ye tä dre driere kukwe ja tötikara yebätä o tä mate ño niaratre yebätä ye niedre kwetre. Ruäre ngwane, kukweta tikani jondron üai bämikani ye ken aune mikata gare bäri párrafo mada yebätä, párrafo medenkänti blita raba jondron üai bämikani yebätä ye ni ja tötika jie ngwanka käkwe niedi. Ye erere nuaindre angwane kukwe kwin raba nemen nitre jökrä kwe, ñobätä ñan aune sribita krubäte jondron üai mikakäre täräkwatabätä ye raba kukwe Ngöbökwe mike gare bäri kwin nie.

Eteba käkwe kukwe ne mikani gare: “Kukweta tikani kwin ja tötikakäre yebätä tita ñäke ünä angwane jondron üai bämikani ye tä kukwe ütiäte miketa törö tie”.