1, 2. ¿Nire köböire Jesús tä ni buke kä nengwane, aune ñobätä ütiäte krubäte kukwe ye mikadre gare jai?

JA NGWAI käkwe kukwe ne tikani obisina bäri kri nikwe yei debe biankäre: “Ja mräkätre, kukwe tä nemen bare tibätä ye ngwane tita nemen ja di ribere, ye erere kräke kukwe tikani täräkwatabätä ye nükani bäbera ti kisete ye ñaka niena törö tie”. ¿Kukwe ye erere namanina bare mäbätä? Bäsi ni jökräbätä kukwe ye erere namanina bare. Aune ni ñaka rabadre nikenkä kukwe yebätä.

² Mrö ja üaire bianta nie kä debe näre te ye tä mike gare Jesús tä Ji dokwäre konkrekasionte, aune tä bämike niarata nitre buke käbämikani kwe ye erere. ¿Nire köböire tä nuainne? Niara rükaita yebätä blitabare kwe angwane niebare kwe “ni klabore ie tö ngwan raba bätä töbätä” (TNM) ye mikai kwe mrö ja üaire bien nitre gwi “bukakäre kätä nüke ye näre te” (TNM) (mäkwe ñäkä  Mateo 24:45-47 yebätä). * Ni klabore ie tö ngwan raba ye köböire Jesús tä nitre ja tötikaka kwe buke kä krüte näire. Ütiäte krubäte nikwe ni klabore ye mikadre gare kwin jai, ñobätä ñan aune ye aibe köböire ni raba nemen dite ja üairebiti aune ja mäke kwin Ngöböbe (Mat. 4:4; Juan 17:3).

3. ¿Kukwe meden mikani gare täräkwata sribebarera yebätä ni klabore ie tö ngwan raba bätä töbätä yebätä?

³ ¿Kukwe bämikani ni klabore ie tö ngwan raba bätä töbätä yebätä ye raba nüke gare ño nie? Täräkwata sribebare nikwe yebätä kukwe ne mikani gare: Ni klabore ie tö ngwan raba ye Jesukwe kädekani Pentecostés kä 33 yete nitre gwi jie ngwankäre; nitre kristiano jökrä dianinkä nänkäre kä kwinbiti käkwe nünanbare Kä tibienbätä kä ye näire ja känenkäre ye nämene ni klabore ye bämike. Ne madakäre, ni itire itire dianinkä nänkäre kä kwinbiti ye arabe nämene “nitre gwi” bämike, aune kä 1919 ni klabore ie tö ngwan raba ye Jesukwe kädekani “jondron jökrä kwe ngübabitikäre”, ye abokän jondron jökrä Gobran Ngöbökwe tä Kä tibienbätä.  Akwa, ja tötikabare nguseta, töbikatariba kwin kukwe yebätä, aune orasion nuainbare krubäte, ye köböire kukwe mrä namani gare nie Jesukwe kukwe niebare ni klabore ie tö ngwan raba bätä töbätä yebätä, aune ye ererebätä ja töi ükadrete (Prov. 4:18). Kukwe bämikani yebätä ani ja tötike, aune nita tö ngwen nüna kä kwinbiti o nüna kä tibienbätä yei, akwa kukwe ye tä dre driere nie ye ani mike gare jai.

4-6. ¿Ñobätä ni raba niere Jesukwe kukwe bämikani ni klabore ie tö ngwan raba yebätä ye jatani nemen bare 1914 ye bitikäre?

⁴ Bersikulo mada tä Mateo kapitulo 24 tä mike gare nie, kukwe bämikani ni klabore ie tö ngwan raba bätä töbätä yebätä ye ñaka namani bare Pentecostés 33 ye ngwane, ñakare aune nemen bare kä krüte näire. Biblia tä kukwe ye mike gare ño ye ani mike gare jai.

⁵ Jesús “rabairata nunbe aune kukweta ükaninte ye rabaira krüte” ye mikani gare kwe angwane kukwe bämikani kwe ni klabore ie tö ngwan raba bätä töbätä yebätä (Mat. 24:3, TNM). Kukwe rabai bare nieta Mateo 24:4-22 ye ñaka namani bare bengwairebe. Kena namani bare kä 33 nemen 70, aune ketebukäre tä nemen bare kä jökräbiti tibien ni näire. ¿Ne tä mike gare Jesukwe kukwe bämikani ni klabore ie tö ngwan raba yebätä ye rabai bare ketebu jatäri? Ñakare.

⁶ Kukwe nieta Mateo 24:29 ye tä mike gare Jesús blitabare kukwe rabai bare ni näire yebätä (mäkwe ñäkä Mateo 24:30, 42, 44 yebätä). Niarakwe blitabare ja tare nikadi kri krubäte yebätä angwane niebare kwe “Ni Kä Nebtä Ngobo abko jatadi tuen [...] mütabti” ye nitre nünanka Kä tibienbätä käkwe tuadi. Ye bitikäre kukwe ne mikani gare kwe, ne kwe nire nire käkwe nünandre kä krüte näire rabadre ja ngwen mokre: “Ti mun Dänkien jatadita ñongwane, ye abko gare ñakare munye [...], aisete mun tädi ngibiare ngäbti ñakare angwane, batibe rükadita”. * Kukwe meden rabai bare kä krüte näire yebätä Jesús nämene blite angwane kukwe bämikani kwe ni klabore ie tö ngwan raba yebätä. Ye medenbätä, ni raba niere kukwe niebare ni klabore ie tö ngwan raba yebätä ye jatani nemen bare kä 1914 ye bitikäre, aune ye näire kä krüte ye kömikani. ¿Ñobätä ni raba kukwe ye niere?

7. ¿Kukwe meden ütiäte namani bare nura öta käi jatani ye ngwane, aune ñobätä?

⁷ Jesukwe kukwe ngwanintari yebätä töbike: “¿Nire abokän erametre, ni klabore ie tö ngwan raba bätä töbätä[?]”. Nitre ñaka kukwe ye ngwanintari jai siklo kena yete. Kukwe ja tötikara käne yete mikaba gare jai, nitre apóstol nämene kukwe ñan tuabare nuainne aune nämene nitre mada mike kukwe ñan tuabare nuainne arato, kukwe nuain nämene kwetre ye nämene bämike tuare Ngöbö nämene bentre (Hech. 5:12). Ye medenbätä, nire kädekani Jesukwe obeja kwe jie ngwankäre ye nitre ñaka nämene ngwentari jai. Akwa, kukwe ye erere ñaka nämene nemen bare kä 1914 yete. Kä ye ngwane nura ngwä öta jatani. Aune kä nükani nura käme diankakäre mento trigo yebätä (Mat. 13:36-43). Nura öta käi nükani ye ngwane, nitre kwati kristiano ñaka metre nämene ja bien nänkä Jesús jiebiti. Ye medenbätä, kukwe ütiäte ne mikadre gare: ¿ñokänti trigo o nitre kristiano dianinkä nänkäre kä kwinbiti rabadre nüke gare nitre madai? Jesukwe kukwe bämikani ye raba kukwe ye mike gare. Mrö ja üaire tädi krubäte nitre kristiano dianinkä nänkäre kä kwinbiti yekwe.

8. ¿Ñobätä ni klabore ie tö ngwan raba bätä töbätä ye ngätäite nitre kristiano dianinkä nänkäre kä kwinbiti aibe rabadre?

⁸ Ni klabore ie tö ngwan raba ye ngätäite nitre kristiano dianinkä nänkäre kä kwinbiti tä nüne Kä tibienbätä ye aibe rabadre. Niaratre ye kädekata “blitaka Ngöböbe ni mda mda diäre” aune “jändrän kuinkuin nuenbare kri krübäte [...] ye abko [...] [tätre] mike gare ni mda mdaye abkokäre. [Niaratre] nämane nüne kä ikote  Ngöbö okwä bäre mento, akwa Ngöbö ara jire käkwe [...] käräbareta nüne kä trä kuin bä nuäre jen kwe te” (1 Ped. 2:9). Ye medenbätä, nitre “blitaka Ngöböbe ni mda mda diäre” ye tä kukwe metre driere ja mräkätre tä kukwebätä bentre yei (Mal. 2:7; Apoc. 12:17).

9. ¿Nitre kristiano dianinkä nänkäre kä kwinbiti ye jökrä ni klabore? Mä raba mike gare.

⁹ Nitre kristiano dianinkä nänkäre kä kwinbiti tä nüne Kä tibienbätä, ¿ye jökrä ni klabore? Ñakare. Nitre jökrä dianinkä nänkäre kä kwinbiti ye ñaka tä mrö ja üaire bien ja mräkätre kä jökräbiti yei. Trigo ye ngätäite ja mräkätre dianinkä nänkäre kä kwinbiti ye ruäre tärä kädekani ni sribikä konkrekasionte o ni umbrere. Niaratre tä kukwe driere ju ju te aune tätre dirire konkrekasionte bätä obisina bäri kri tä kukwe ükete ye tätre kain ngäbiti, akwa niaratre ñaka tä ja mräkätre kä jökräbiti tibien buke mrö ja üairebiti. Ne madakäre, nitre dianinkä nänkäre kä kwinbiti ye ngätäite meritre töi bobre tärä, abokän töi ñaka ji ngwanbätä konkrekasionte (1 Cor. 11:3; 14:34).

10. ¿Nire abokän ni klabore ie tö ngwan raba bätä töbätä?

¹⁰ Ye medenbätä, ¿nire abokän ni klabore ie tö ngwan raba bätä töbätä? Kirabe, nitre braibe yebiti Jesukwe nitre kwati bukani, ye erere arato ni klabore ye ja mräkätre dianinkä nänkäre kä kwinbiti abokän tädi mrö ja üaire bien Kristo rükaita ye ngwane. Kä krüte näire, ja mräkätre abokän ni klabore ie tö ngwan raba ye tätre sribire gwairebe obisina bäri kri nikwe yete. Kä nengwane, ni klabore ye abokän Nitre Braibe Konkrekasion Jökrä Ngübabitikä Testiko Jehovakwe. Erametre, ni klabore ye nitre braibe tä sribire jabe, akwa blitata “ni klabore” yebätä angwane blitata ni itibe ye kwrere. Kukwe ne tä mike gare, Nitre Braibe Konkrekasion Jökrä Ngübabitikä tätre sribire gwairebe ni itibe kwrere, ye abokän tätre sribire keteitibe kukwe ükatekäre.

11, 12. a) ¿Ni klabore ie tö ngwan raba bätä töbätä kädekani sribi meden ketebu nuainkäre? b) ¿Ñongwane Jesukwe ni klabore ie tö ngwan raba kädekani nitre gwi jie ngwankäre, aune nire nire dianinkä kwe?

¹¹ Jesukwe kukwe bämikani ni klabore ie tö ngwan raba bätä töbätä yebätä, ye ngwane kädekani kwe kukwe ketebu ñaka ja erebe nuainkäre. Kena kädekani nitre gwi jie ngwankäre, aune ketebukäre kädekani jondron jökrä bökänkäkwe ngübabitikäre. Kukwe bämikani ye rabadi bare kä krüte ne näire, ye medenbätä ni klabore ye kädekani sribi ketebu nuainkäre kä 1914 ye bitikäre, kä ye ngwane Kristo namani Reire.

¹² ¿Ñongwane Jesukwe ni klabore kädekani nitre gwi jie ngwankäre? Kukwe ye mikakäre  gare jai, ani blite chi kukwe namani bare kä 1914 nura öta käi näire yebätä. Nibira gare nie ye erere, kä ye näire nitre kwati nämene ja ñäkäninbiti jene jene ye nämene ja bien kristiano arato. ¿Nitre ye meden abokän dianinkä Jesukwe aune kädekani kwe ni klabore ie tö ngwan raba? Kukwe ngwantarita ye namani gare niara nükani Rün kwe yebe templo tuinbiti ye ngwane, templo ye abokän kukwe ükaninte Ngöbökwe ne kwe niara mikadre täte, kukwe ye namani bare kä 1914 yete nükebe kä 1919 kömikani ye näire (Mal. 3:1). * ¡Nitre braibe ja Tötikaka Bibliabätä nämene ja ngwen metre aune nämene Jehová aune Kukwe kwe tarere krubäte ye kwani ie ye käi namani jutobätä! Erametre, nämene ja töi ükadrete nitre yei kukwe ruärebätä, akwa bätäninte ye ngwane töi bobrebiti ja tuanimetre kwetre töi ükadrete (Mal. 3:2-4). Nitre braibe ja Tötikaka Bibliabätä nämene ja ngwen metre ye käkwe bämikani niaratre ye trigo bökän. Kä 1919 kukwe ja üaire jataninta nirien, ye ngwane ja mräkätre ie kukwe gare nämene dianinkä nänkäre kä kwinbiti ye Jesukwe ükaninkrö ne kwe rabadre ni klabore ie tö ngwan raba bätä töbätä, aune kädekani kwe nitre gwi jie ngwankäre.

13. ¿Nire mada tä nitre gwi ye ngätäite aune ñobätä ye nie raba?

¹³ ¿Nire nire abokän nitre gwi? Niaratre ye abokän bukata. Kä krüte kömikani ye ngwane nitre dianinkä nänkäre kä kwinbiti aibe nämene nitre gwi bämike. Ye bitikäre, nitre gwi ye ngätäite obeja kwati mada namani arato. Niaratre tä gwairebe “ki kwatibe teri jökrä” aune tätre näin Kristo jiebiti (Juan 10:16). Ni klabore ie tö ngwan raba tä mrö ja üaire bien “kätä nüke ye näre te” ye nitre dianinkä nänkäre kä kwinbiti aune obeja mada tä kwete arato. Akwa, ¿Nitre Braibe Konkrekasion Jökrä Ngübabitikä kä nengwane tä kädekani ni klabore ie tö ngwan raba bätä töbätä ye nitre gwi arato? Niaratre tä mrö ja üaire ribere jai arato, ye medenbätä itire itire tätre mike gare töi bobrebiti niaratre ye nitre gwi, nitre kristiano erametre mada ye erere.

14. a) ¿Ni klabore ie tö ngwan raba yei sribi meden mikani gare, aune tätre jondron meden meden ngübare? b) ¿Jesukwe kukwe meden niebare ni klabore ie tö ngwan raba bätä töbätä mikakäre mokre? (Recuadro “Sribikä moto käme ye abko rabadre töbike” mikadre ñärärä.)

¹⁴ Jesukwe sribi kri mikani ni klabore ie tö ngwan raba bätä töbätä ye kötärä. Nitre klabore o sribikä kädrieta Bibliabätä ye bökänkä nämene jondron jökrä kwe tuenmetre ngübadre ie (Luc. 12:42). Ye erere arato, ni klabore ie tö ngwan raba bätä töbätä yei nitre jökrä Jehová mikaka täte ye mikani gare. Arato, ngwian o jondron mada mada nikwe, kukwe drieta, kukwe ükateta gätä kri kräke aune tärä keta kabre sribeta kukwe  driekäre, ja tötikakäre kaibe o gätäte, sribi jökrä ye niaratre tätre ngübarebiti. Ni klabore tä jondron keta kabre bien kukwe ja üairebiti ye nitre gwi tä ribere jai.

15, 16. ¿Ni klabore ie tö ngwan raba ye Jesukwe kädekai ñongwane jondron jökrä kwe ngübabitikäre?

¹⁵ ¿Ñongwane Jesukwe ni klabore kädekai “jondron jökrä kwe ngübabitikäre”? Jesukwe niebare: “¡Bökänkä rükadreta [o nota tä niere, “jatani nüke”] ye ngwane, kwandre ye erere nuainne ie angwane, kä rabai juto ni klabore yebätä! Erametre tita niere munye: Kädekai kwe jondron jökrä kwe ye ngübabitikäre” (Mat. 24:46, 47, TNM). Mike ñärärä Jesús rükadreta aune ni klabore kwandre ie “ye erere nuainne” ye abokän tädre jankunu mrö ja üaire bien nitre gwi yei ye ngwane kädekai kwe jondron jökrä kwe ye ngübabitikäre. Ne tä mike gare niara ñaka ni klabore kädekai sribi ketebu ye nuainkäre bengwairebe. Akwa, ¿ñongwane Jesukwe ni klabore ie tö ngwan raba bätä töbätä kädekai jondron jökrä kwe ngübabitikäre aune nuaindi ño kwe? Kukwe ngwantarita ne mikakäre gare jai, ni rabadre kukwe ketebu mike gare jai: kena, Jesús rükadi ñongwane aune ketebukäre jondron medenbätä blita nämene ye mikadre gare jai.

¹⁶ ¿Jesús rükadi ñongwane? Bersikulo mada kapitulo ye arabe känti tä blite kukwe yebätä. Ngwenta törö jai bersikulo mada tä niere Jesús “jatadita”, ye tä mike gare niara rükadi kä mrä nete kukwe ükatekäre (Mat. 24:30, 42, 44). * Ye medenbätä, kukwe bämikani ni klabore ie tö ngwan raba yebätä, känti nieta Jesús rükadita kukwe ye rabai bare ja tare nikadi kri krubäte ye näire.

17. ¿Dre dre abokän jondron Jesukwe?

¹⁷ ¿Dre dre abokän “jondron jökrä” Jesukwe? Niara ñaka nämene blite jondron jökrä kwe tä Kä tibienbätä ye aibebätä. Erametre niara tä kädekani kri kä kwinbiti. Niarakwe niebare: “Kä  käinta se amne kä temen ne Ngöbökwe mikani gare jökrä tie” (Mat. 28:18; Efes. 1:20-23). Kä 1914 niara kädekani Gobrankäre ye abokän jondron kwe arato, aune nitre dianinkä nänkäre kä kwinbiti ye mikai kwe gobrane jabe (Apoc. 11:15).

18. ¿Ñobätä kä rabai juto Jesubätä ni klabore ie tö ngwan raba ye kädekakäre jondron jökrä kwe ngübabitikäre?

¹⁸ ¿Kukwe ye kätä dre mike gare? Ja tare nikadi kri krubäte näire Jesús jatai Kukwe Ükatekäre, ye ngwane ni klabore kwandi ie mrö ja üaire bien nitre gwi yei kätä nüke ye näre te. Aune kä rabai juto niarabätä ni klabore ye kädekakäre jondron jökrä kwe ngübabitikäre. Nire nire tä dianinkä ni klabore ie tö ngwan raba ye rabaira nüne kä kwinbiti aune rabaira reire Kristo ben ye ngwane Jesukwe kädekai ye erere.

19. ¿Ni klabore ie tö ngwan raba käkwe nünain kä kwinbiti ye jondron bäri ütiäte rabai kwetre nitre mada dianinkä ye ngwä?

¹⁹ ¿Ni klabore ie tö ngwan raba nünain kä kwinbiti ye jondron bäri ütiäte rabai kwetre nitre mada dianinkä nänkäre kä kwinbiti ye ngwä? Ñakare. Nitre braibe ie nüna kä kwinbiti ye käbämikani kena, akwa raba nemen nitre madakwe arato. Ñodre, Jesús murie keta jämi känenkri kukwe niebare kwe nitre apóstol ni jätä biti iti ja ngwanka metre yei yebätä töbike (mäkwe ñäkä Lucas 22:28-30 yebätä). Nitre ja ngwanka metre yei kukwe kwin käbämikani kwe. Jesús rabai Reire ye ngwane niaratre gobrandi ben. Akwa, kä nikani ta ye bitikäre mikani gare kwe nitre 144.000 ye jökrä rabai reire niarabe kä kwinbiti (Apoc. 1:1; 3:21). Ye erere arato, Mateo 24:47 tä mike gare niarakwe käbämikani nitre braibe dianinkä nänkäre kä kwinbiti, abokän ni klabore ie tö ngwan raba, ye kädekai kwe jondron jökrä kwe ngübabitikäre. Erametre nitre 144.000 ye jökrä kädekai gobrankäre kä kwinbiti Kristobe (Apoc. 20:4, 6).

20. ¿Ñokäre Jesukwe ni klabore ie tö ngwan raba kädekani, aune ni töita dre nuainbätä?

²⁰ Jesukwe kukwe ükaninte siklo kena ye erere täbe nuainne: tä nitre kwati buke ni klabore ie tö ngwan raba ye köböire. Niarakwe ni klabore ye kädekani ne kwe kä krüte näire nitre ja tötikaka, nitre nänkä kä kwinbiti aune obeja mada yekwe mrö ja üaire tädre jankunu “kätä nüke ye näre te” (TNM). ¡Nita debe bien krubäte mrö yebätä! Ye medenbätä, ni tö ja mräkätre dianinkä nänkäre kä kwinbiti abokän ni klabore ie tö ngwan raba bätä töbätä ye dimikai ye ni rabadre bämike käre (Heb. 13:7, 17).