Nüna nämene ño siklo XX kä San Francisco (Estados Unidos) yekänti, ye mika nämene tuare película ngö ñakare kädeka nämene A Trip Down Market Street (Paseo por la calle Market) yete, ye nitre kwati tö nämene tuai krubäte. Nitre película ye grabaka käkwe cámara nuäre kwitadrete kisebiti ketaninkä jondron karo kwrere nämene näin kwinta cable ngrabare yebätä, ne kwe dre dre nämene nemen bare ji ngrabare ye rabadre grabare. Carreta, karo, nitre periódico döräikä o nitre mada nämene niken jondron kökö o sribi mada nuainne ja kräke ye üai tä película yete.

Kä nengwane película ye tuadre angwane, película ye grababare abril 1906 yete rabadre ruin nie, ñobätä ñan aune köbö 18 abril yete dobo kri nakaninkä aune kä nukwani kri käkwe nitre kwati murie ketani, bäsi juta ye juani ngwarbe jökrä kwe arato. Ne madakäre, nitre ruäre üai tä película yete yei kä namanina braibe nünankäre raba ruin nie. Scott Miles sribibare arato película yebätä tä niere: “Nikwe película ye tuadre angwane, nitre ye ja tare nikai krubäte ye ñaka gain jabätä raba tuin nie, aune yebätä raba nemen tuin bobre nie”.

Nitre nünanka ni bäre ye nemen tuin bobre nie arato. Nitre ye töita sribi kwetre ye aibe nuainbätä mantre jetebe, kukwe tare köböra nemen bare ye ñaka gare ietre: nitre käme kä nebätä aune tätre nüne ño kä nengwane ye gaite. Dobo kri rakaikä ñongwane ye mika ñaka raba gare jire, akwa kä nengwane kätä nie ni mada mikakäre mokre, nitre mikai ja ngie nuin Jehovakwe yebätä. Nita kä ükete jai kukwe driekäre ju ju te bämän kratire kratire, akwa ¿ni raba ja di ngwen bäri ni mada mikakäre mokre?

Jesús nämene blite nitre jökrä nämene kwen ie yebe, ñodre ni ngwian käräkä gobran kräke yebe aune nikani ja düke chi ñänä ruäre ye ngwane, meri iti nükani ño okwäkänti yebe blitabare kwe (Luc. 19:1-5; Juan 4:5-10, 21-24). Jesús nämene ja töi mike ja düke, akwa kä jutobiti nämene kukwe ükete jai kukwe driekäre nitre madai arato. Niara ñan nämene ja di ngwen braibe sribi ye nuainkäre, ñakare aune nämene ja di ngwen krubäte ñobätä ñan aune ni mada nämene tuin bobre ie (Mar. 6:30-34). ¿Jesús erere nitre kwati kukwe driekä tä dre nuainne kä jutobiti?

Ju kri mente kwin känti ni tuanmetre ñaka niken yete Melika tä nüne. Nitre kwati juta madate tä nüne niara bäre ye jökrä ja tötikaka kwelate aune nitre ye  kä ñaka tikani täräbätä aune nitre yekwe celular tärä akwa número kwetre ye ñaka tä tikani täräbätä aune ñaka tä mikani kä nitre kan ngäbitikäre yekänti. Aisete kä nitre kan ngäbitikäre yekänti Melika tä kukwe ja üaire ye kädriere nitre ben aune tä nuainne elevador yekänti arato. Niara tä niere: “Ye kä kukwe driekäre tie”. Tärä keta kabre sribebare kukwe jene jenebiti ye Melika tä ngwen käre jabe, ye köböire tä täräkwata kia aune täräkwata Ni Mikaka Mokre o ¡Despertad! ye bien nitre nünanka bäre yei. Ne madakäre, tä Internet jw.org ye mike tuare ietre. Ye köböire Melika tä nitre kwati tötike Bibliabätä.

Sonia, tä sribire clínica yete, niara tä ja di ngwen kukwe driere ni jökrä ie arato. Niara ja töi mikani kukwe driere nitre jökrä sribi muko kwe yei. Käne, niara kä dianinkä jai töbikakäre dre nämene ütiäte nitre itire itire ye kräke aune nämene dre dre ribere jai yebätä. Biti niara nikani nitre ye itire itire känene nämenentre mröre ñänä ruäre ye ngwane, blitakäre bentre kukwe ja üaire yebätä. Ye köböire, ja tötika Bibliabätä kömikani kwe nitre nibu ben. Akwa, kä nitre kan ngäbitikäre clínica yete, yekänti nitre nüke yei niara tö kukwe driei arato, käta nemente chi ie ja dükakäre ye ngwane.

Ni iti namaninte nire dobo kri nakaninkä kä 1906 ye näire käkwe niebare “kukwe tare krubäte ñan rababare bare juta madabätä abokän erere namani bare”. Akwa köbö te Ngöbökwe kukwe ükaite “nire nire ie [niara] gare ñakare” yebe, ye rabai bäri kukwe tare krubäte namanina bare yebiti ta (2 Tes. 1:8). Erametre, Jehová tö nitre tuai ja brukwä aune ja töi kwite aune nitre Testiko kwe kätä kukwe kwin driere ye niaratre kadre ngäbiti ie tö (2 Ped. 3:9; Apoc. 14:6, 7).

Ni rabadre nitre mada ye dimike ne kwe kä ño te niaratre tä nüne kä nengwane ye rükadre gare ietre, aune ñaka töi rabadre ja aibebätä, ñakare aune rabadre Jehová känene (Sof. 2:2, 3). Sribi muko nikwe, nitre nünanka ni bäre aune nita sribi nuainne ja kräke ye ngwane nire ngwandre nie, ¿yei ni raba kukwe driere? ¿Nikwe ja di ngwain bäri ni mada mikakäre mokre?