1. Ni klabore nieta Romanos 12:11, ¿ye ñobätä ñaka ja erebe ni mikata klabore nüke gare nitre ie yebe?

NI KRISTIANO tä klabore ye ñaka ja erebe ni mikata klabore jai nüke gare nitre ie yebe. Ni klabore ye abokän nuainta tare aune küdretabätä tä nemen ruin nitre kwati ie. Akwa, nitre klabore nieta Ngöbö Kukweibätä ye abokän Bökänkä töi kwin krubäte. Apóstol Pablo nitre kristiano siklo kena nübaibare sribire “Jehová kräke ni klabore kwrere”, aune nämenentre Jehová tarere yebätä nuaindre kwetre niebare kwe ietre (Rom. 12:11, TNM). ¿Nita nemen ño klabore? ¿Dre nuaindre ne kwe ni ñaka rabadre klabore Satana aune nitre kä nebätä kisete? ¿Nitre klabore Ngöbö mikaka täte metre yekwe dre kwin rabai?

2. a) ¿Dre nämene ni klabore töi mike ñaka ja mikamana kwäre? b) ¿Ni klabore olo mrükaka nämene ye nämene dre mike gare?

² Jehovakwe kukwe biani nitre Israel ie ye tä mike gare nie ja mikadre ño klabore niara kräke ie tö. Nitre Judea mika nämene klabore kä kwä ti te ye bitikäre mika nämene kwäre (Éx. 21:2). Akwa, ni klabore nämene bökänkä tarere aune tö nämene sribi nuain jankunu kräke angwane, Kukwe biani Ngöbökwe ye nämene tuenmetre nuainne. Bökänkä nämene niken ngwena jukwebätä o jukwe köräbätä; aune nämene olo mrükekä jondron juda ngrinebiti (Éx. 21:5, 6). ¿Ñobätä olo mrükaka nämene? Ni mada kukwe nuadre aune kukwei mikadre täte ye mika nämene gare kukwe hebreore yebiti. Ye medenbätä, nitre klabore olo mrükaka nämene, ye nämene bämike tö nämene bökänkä mikai täte aune sribi nuain jankunu kräke. Ñokäre nikwe ja dianinkä Jehová kräke ye kukwe ne tä ni dimike mike nüke gare jai: ni tädre juto biare niara mikakäre täte tare nikwe yebätä.

3. ¿Ñobätä nita ja denkä mento Ngöbö kräke?

³ Ni jämi ja ngökö ñöte ye känenkri nikwe ja töi mikani sribire Jehová kräke, rabakäre klabore kwe. Nikwe ja dianinkä mento kräke, ye ngwane nikwe mikani gare ie ni tö namani mikai täte bätä niara töi ye nuain. Nikwe kukwe ye nuaindre ye ni mada ñaka niebare nie. Ne madakäre, monsotre bati tä ja denkä  mento Ngöbö kräke aune tä ja ngökö ñöte ja töi jeñebiti, ñaka kä mikakäre juto jerekäbe rünbätä. Ye erere, nita ja denkä mento ñobätä ñan aune Jehová ni Bökänkä kä kwinbiti ye tare nikwe. Apóstol Juan tikabare: “Ngöbö tareta ye abokän ne gärätä: kukwe kwe ye nikwe mikadre täte” (1 Juan 5:3, TNM).

4. ¿Ñokänti nita nemen klabore “kukwe era metre nuenkäre”?

⁴ Jehovata ni tuenmetre nemen klabore ja kräke, ¡yebätä nita debe bien krubäte! Jesús ja nire biani ni ütiäre ie nita tödeke ye ni mikani kwäre ngite yebätä. Ni täbe ngite akwa nikwe ja töi mikani Jehová aune Jesús mike täte aune mike tuin jai ni Bökänkä ye kwrere. Pablo tärä tikani Ngöbö diebiti yebätä kukwe ye mikani gare metre kwe: “Mun krütanina ben gwaire, aisete munkwe töbikadi ñakare mda kukwe kämekämenbtä abko munkwe nütü jabtä, akwa munta nünenta ketetibe Kristo Jesube Ngöbökrä”. Ye bitikäre, nitre ye mikani mokre kwe: “Ñobtä ñan angwane nita ja mike klabore ni bkänkä kräke, ye ngwane ni tärä nebe biare ni ye kukwei mikakäre täte, aisete nita sribire ni bkänkä ye kräke angwane, nita niara kukwei mike täte. Ye kwrere arato kukwe kämekäme tä ni dänkiene ye abko käta ni mike mente kärekäre Ngöböye. Akwa nita ja mike klabore Ngöbö kukwei kuin mikakäre täte, ye ngwane nita ngite ñakare mda Ngöböta niere [...]. Akwa mtare tita kuin niere Ngöböye munbtä, ñobtä ñan angwane käne mun ngämi tödeke Jesubti, känenkri mun nämane klabore kukwe kämekäme kräke, akwa mtare kukwe kuin diribare nunkwe, erere munkwe kani ngäbti amne munta mike täte ja töi ngöi jökrä [...]. Käne kukwe kämekäme nämane mun dänkiene, akwa Ngöbökwe mun tikaninte amne mun mikanina sribikäre jakrä kwe kukwe era metre nuenkäre” (Rom. 6:11, 16-18). “Munta mike täte ja töi ngöi jökrä” niebare Pablokwe, ¿ye nü gare nie? Nita ja denkä mento ye tä mike gare ni tö Jehová mikai täte ja brukwä tätebiti. Niara abokän Ngöbö kukwe metre nuainkä, aisete nita ja denkä mento ye ngwane nita nemen klabore “kukwe era metre nuenkäre”.

5. ¿Kukwe meden ben nita ja tuin mantre jetebe, aune ñobätä?

⁵ Nita ja denkä mento Ngöbö mikakäre täte, akwa kukwe kri tä nemen ni jiete. Kukwe ketebu ben nita ja tuin. Kena, ngite tä nibätä yebe nita ja tuin. Pablo nämene kukwe ye erere ben ja tuin arato: “Akwa ti töite nete abko Kukwe Biani Ngöbökwe Moiséye ye tä nebe tuen kuin nuäre nuendre tie, akwa tibtä nete abko kukweta nakenkä mda mda käta ti töi miketa bä jene, ye abko kukwe käme tä ti töibtä, ye mdeita nebe tie abko käta rüre jändrän kuin ti tö nuein yebe, aisete ni ngite kä teri ñan raba kwäräbere au, ye kwrere jire tita kukwe kämekäme kisete” (Rom. 7:22, 23.) Ni ngite aune ni töita kukwe käme nuainbätä, kukwe yebe nita ja tuin mantre jetebe. Yebätä, apóstol Pedro tä mäträre nibätä: “Ngöbökwe mun ngite dianinkä mento munbtä käkwe mun tikaninte, akwa ye köböire munkwe ñan bika kuin, kukwe kämekäme nuenkäre janknu tiebe. Akwa ni klabore Ngöbökwe käkwe nünandre ño, ye kwrere munkwe nüna” (1 Ped. 2:16).

6, 7. ¿Satana tä dre nuainne ne kwe jondron kä nebätä rabadre tuin bä nuäre nie?

⁶ Ketebukäre, chokalitre tä kukwe nuainne kä nebätä yebe nita ja tuin. Satana tä kä ne gobraine, ye tä kukwe keta kabre dätere ni mikakäre ñaka ja ngwen metre Jehová aune Jesús yei. Tö ni mikai klabore jai yekäre tä kö okwä keta kabre mike ni jiete (mäkwe ñäkä Efesios 6:11, 12 yebätä). Tä jondron kä nebätä ye mike tuin bä nuäre nie, kukwe yebiti tä ni nuinte. Apóstol Juan ni mikani mokre: “Nire nire tä jändrän Ngöbö rüere tarere, ni ye abko ñan tä ni Rün Ngöbö tarere, ñobtä ñan angwane jändrän jökrä kämekäme Ngöbö rüere ye abko tä kite ñakare ni Rün Ngöbökri, akwa jändrän jökrä kä nebtä tä Ngöbö rüere [...] abko krörö: ja mika gure bati bati bätäkä ngwarbe abko mdeita nebe nie. Erere arato, jändrän tä nebe tuen kuin ni okwäye abko mdeita nebe nie amne, nita jändrän bkäne amne nita dre dre nuene, yebtä nita bike kri” (1 Juan 2:15, 16).

⁷ Kä nengwane, nitre jökrä tö jondron tuai bäri krubäte jakwe. Ngwian tädre krubäte nikwe ye aibe köböire nüna raba kä jutobiti, kukwe ye Satana tä mike nitre töite. Ye medenbätä, kä jondron rürübäinkäre krikri sribeta krubäte. Jondron keta kabre ütiäte aune jondron ja näkwitakäre tädre nikwe,  ye kwin krubäte mikata gare televisionte, radiote aune jondron mada mada yete. Ni nübaita niken basare kä kwin krubäte känti, ñodre parque, kä jondron nire ngübakäre yekänti, kä ye erere känti nitre ñaka kukwebätä tä niken siba. Nita nikren angwane “mäkwe ja di ngwan nünankäre kwin” ye aibe tuata tikani nikwe. Ye abokän nikwe nünandre nitre mada tä nüne ye erere.

8, 9. ¿Dre raba nemen bare nibätä, aune ñobätä kukwe ye tare krubäte?

⁸ Nitre nämene konkrekasionte abokän namani ja töi mike nitre mada ye kwrere, yebätä Pedro blitabare aune niebare kwe: “Jondron bä nuäre krubätebiti näintre ja ükete, nebiti ja nemen ruin ño ñakare ietre. Akwa niaratre abrä jondron ngwäri ni mikaka iko iko kwrere; näin blite ni ngökakäre kä ngwiane nuäre jabätä kwärä, tä mröre munbe keteitibe näire”, aune niebare kwe arato: “Niaratre tä blite kwin bä nuäre, akwa ne brä ngwarbe tökare. Nitre ngätä krübärie käme bätätre, ne köböite niaratre tä näkwite ja ie jondron käme nuain muko. Nitre tä nüne käme ngätäite, nitre ne käkwe kämikaninanka metre akwa. Niaratre tä niere nitre ie krörö: Mun raba nemen kwäre. Akwa niaratre dirikä, ne arabe ñakare tä kwäre, ñobätä ñan aune niaratrekwe ja biani jondron käme ie abokän kisete. Ñobätä ñan aune ni ganain näin ni madakwe, ne abrä ñakare kwäre; ñobätä ñan aune ni mada näin ni ganaine, ne abrä nemen ni ye bökänkä” (2 Ped. 2:13, 18, 19, Ngöbö Täräe [NGT], tärä okwä ükaninte).

⁹ “Jändrän tä nebe tuen kuin ni okwäye” abokän ie ni töta nemen, jondron ye ñaka raba ni mike kwäre, ñakare aune tä ni mike klabore Diablu ye kisete (1 Juan 5:19). Kukwe ne tä nemen bare metre: ni töi raba nemen krubäte jondron kä nebätä jiebiti ye raba ni mike klabore jai, aune ñaka raba nemen nuäre ni kräke tuanmetrekäre.

10, 11. ¿Satana tä metrere nire nire nuinte, aune ñobätä ja tötika kwela krite ye raba kukwe tare mike kisete?

¹⁰ Satana Ngöbö rüe käkwe kukwe nuainbare jardín Edén yete, ye erere nitre ie kukwe ñaka gare krubäte ye niara tö töi kwitai aune tä metrere monsotre bati ye nuinte. Monsotre bati aune nitre mada mada ja mikadre klabore Jehová kräke ye abokän ñaka mate kwin Satanabätä. Ni jökrä tä ja denkä mento ye Satana ñaka tö tuai Ngöbö mike täte aune ja ngwen metre.

¹¹ Ni klabore käkwe ja tuanimetre olo mrükadrekä yebätä ani bliteta. Kena namani tare ie, akwa yebiti ñaka namanina tare ie aune olo mrükaninkä ye aibe tä namani ie bämikakäre rabai klabore käre. Ye erere arato, monsotre bati kräke tä nemen tare aune ñaka nuäre kukwe kwin diankäre nuaindre jai. Ja tötikadre kwela krite ye köböire kä rabai juto nibätä ye Satana tä mike nitre töite, akwa ni kristiano rabadre ngwen törö jai kukwe mada köböire kä raba nemen juto nibätä. Jesukwe niebare: “Nire nire  ie gare tä kukwe ja üaire ribere jai yebätä kätä juto” (Mat. 5:3, TNM). Ni ja dianinkä mento Ngöbö kräke ye tä nüne sribikäre niara kräke, aune ñaka Satana kräke. Nita kukwe Jehovakwe tarere aune töbiketaribätä rare bätä dibire (mäkwe ñäkä Salmo 1:1-3 yebätä). * Akwa, nire nire tä ja töi mike ja tötike kwela krite yei kä ñaka nemente krubäte töbikatarikäre aune kukwe ja üaire ribeta kwetre jai ye nuainkäre.

12. ¿Monsotre kwati yei kukwe meden tä diandre jai?

¹² Pablo tärä tikani kena nitre kristiano Corinto ie ye ngwane niebare kwe: “Ma nämane ni klabore ni mdakwe angwane, ma käräbare Ngöbökwe jakrä, yebtä makwe ñan töbika dikaro”. Ye bitikäre kukwe ne niebare kwe mäträkäre: “Akwa ma rabadreta tikaninte raba tuen mae ne ngwane, makwe ñan tuametre niken ja bäre” (1 Cor. 7:21). Siklo kena yete ni nitre klabore bökänkä nämene ni kristiano klabore mike ja tare nike krubäte. Ye medenbätä, bäri kwin niaratre ñaka ja mikadre jankunu klabore. Kä nengwane, juta keta kabre känti ribeta monsotre ie ja tötikadre kwetre kä kitata nuäi ietre ye erere te. Ye bitikäre monsotre ye itire itire dre dre diain nuaindre jai ye tä nemen gare ietre, ye ngwane raba sribi köbö täte Ngöbö kräke den nuaindre jai. Akwa, niaratre ja töi mikai ja tötike jankunu kwela krite angwane ñaka raba sribi Ngöbö kräke ye nuainne (mäkwe ñäkä 1 Corintios 7:23 yebätä).

13. ¿Ja tötika meden köböire kukwe kwin tä nemen nitre Jehová mikaka täte yekwe?

¹³ Pablo nitre kristiano Colosas ye mikani mokre: “Munkwe mokre jabti, ñobtä ñan angwane ni ruäre tä näin kukwe ngwarbe dirire. Kukwe mikanintbe ngwarbe kira abko tätre dirire amne, kukwe ye tä kite üai käme di kri käta gobrane kä nebtä yekri abko tätre dirire mun ngökakäre, aisete munkwe ñan ja ngwian nain ietre” (Col. 2:8). Nitre kwati töbätä kä nengwane ye tä “kukwe mikanintbe ngwarbe kira” driere. Ja tötika kwela krite yekänti käre kukwe ye drieta, akwa kukwe drieta ye ñaka tä nitre tötike sribikäre kwin, aune kukwe nemen bare mantre jetebe yebe ja tuadre ño kwetre ye ñaka gare ietre. Akwa, nitre Jehová mikaka täte abokän tä ja tötike braibe ne kwe rabadre ja töi mike sribi Ngöbökwe nuainne aune nüne jondron braibebiti. Pablo kukwe niebare Timoteo ie ne niaratre tä mike ütiäte jai: “Nita nüne metre Ngöbö ngwärekri amne jändrän ño ño tä nikwe, ye käi tätre nuäre nibtä, ye abko bäri ütiäte. Ne mden aisete, mrö tärä kwetadre nie amne dän amne ju tärä nikwe, ye abko käi rabadre nuäre nibtä” (1 Tim. 6:6, 8). Ja tötikata kwela krikri te ütiäre täräkwata bianta nitre ie ne kwe rabadre sribire, ye ni kristiano ñaka känene, ñakare  aune tä kä denkä bäri jai kukwe driekäre ne kwe nitre mada rabadre ja tötikaka Kristo yebe (mäkwe ñäkä 2 Corintios 3:1-3 yebätä). *

14. Filipenses 3:8 tä niere erere, ¿Pablo namani klabore Ngöbö aune Kristokwe ye namani tuin ño ie?

¹⁴ Töbike apóstol Pablo yebätä. Kukwe biani nuaindre nitre Judea ie, yebiti ni dirikä ütiäte kädeka nämene Gamaliel käkwe niara tötikani. Ye abokän ja tötikata kwela krite kä nengwane ye kwrere. ¿Niara namani klabore Ngöbö aune Kristokwe ye namani tuin ño ie? ¿Aune ja tötikani kwe kwela krite ye namani tuin ño ie? Niara arabe tä niere: “Ti Dänkien Kristo Jesu rükadre gare bäri kuin tie ne abko bäri ütiäte tikrä. Ye mden kisete, jändrän jire jökrä mda mda, ye tuen ütiäte ñakare tie”. Aune niebare kwe arato: “Aisete niara kräke tikwe jändrän jökrä tuanimetre ja jiebti. Jändrän jökrä ye mden abko tuen jändrän ngwarbe rä kure kwrere tie, aisete tita mikete” (Filip. 3:8). Monsotre kristiano aune nitre rüne kukwebätä käkwe ja töi mikai Pablo erere angwane ye käkwe dimikai kukwe kwin den ja käne ja tötika yebätä (üai mikani ye mikadre ñärärä).

15, 16. ¿Jehovakwe juta ükaninte ye tä ni tötike ño, aune ñokäre?

¹⁵ ¿Ja tötika kwela krite yekänti dre nuainta? Monsotre ja tötikaka kwela krite ye tätre ja mike gure ngwarbe aune tätre dö ñain (Efes. 2:2.) Akwa, Jehovakwe juta ükaninte tä ja tötika bäri ütiäte driere nie konkrekasionte. Ni jökrä raba ja tötike kwin bämän kratire kratire Kwela Sribi Ngöbökwe Kräke yete. Ne madakäre, (Kwela nitre Brare Kaibe tötikakäre Bibliabätä) ye tä ükaninte nitre brare kaibe tä sribi prekursor nuainne kräke aune nitre prekursor gure kräke (Kwela nitre Kristiano Gure tötikakäre Bibliabätä) ye tä ükaninte arato. Jehovakwe juta ükaninte tä ni tötike ye tä ni dimike Ngöbö ni Bökänkä kä kwinbiti ye mike täte.

¹⁶ Arato ni raba kukwe ütiäte “känene” tärä Índice de las publicaciones Watch Tower bätä CD-ROM Watchtower Library yete. Ni tötikata yebiti ni dimikata Jehová mike täte. Ye köböire ni raba nitre dimike ja mäketa Ngöböbe (2 Cor. 5:20). Ne kwe nitre ye rabadre dirire nitre madai (2 Tim. 2:2).

17. ¿Ja tötika bäri kwin dianta jai ye köböire dre kwin tä nemen nikwe?

¹⁷ Jesús kukwe bämikani ngwian yebätä, ye ngwane niebare kwe nitre nibu klabore ie tö ngwan raba yei kwin niebare bökänkäkwe. Ye bitikäre bökänkä nübaibare jabe kä ngwen juto jabätä aune sribi mada bäri kri biani kwe ietre (mäkwe ñäkä Mateo 25:21, 23 yebätä). Kä nengwane ja tötika bäri kwin ye diain jai angwane kä rabai juto nibätä aune kukwe kwin rabai nikwe arato. Ñodre, Michael nota kwin ganainbare jai, yebätä nitre profesor niara tötikaka käkwe nübaibare gätäbätä ne kwe niara rabadre niken jankunu ja tötike kwela krite ye kädriekäre ben. Akwa, Michael ja töi mikani ja tötike braibe sribi ruäre nuainkäre, ye käkwe nitre profesor töi mikani ñan krütare. Kä nikani braibe ta angwane namanina sribire aune namani sribi prekursor nuainne arato. ¿Kukwe kwin juani jabäre kwe raba ruin mäi? Niara tä niere: “Ti tötikani sribi prekursor nuainkäre aune kä nengwane ti tötikani sribikäre ni umbrere konkrekasionte, ye bäri ütiäte ti kräke. Kukwe kwin keta kabre aune sribi biani tie ye bäri kwin tikwe ngwian ganaindre ere jai ye ngwä. Ti ñaka ja töi mikani niken ja tötike kwela krite, ¡yebätä kätä juto krubäte tibätä!”.

18. ¿Ñobätä ni raba niere Ngöböta ni tötike ye bäri kwin?

¹⁸ Ngöböta ni tötike ye bäri kwin, ñobätä ñan aune ye tä ni dimike sribire ni klabore kwrere Jehová kräke aune töita ño ye tä mike gare nie. Arato tä ni dimike nemen kwäre ni nämene “klabore kukwe käme kisete” yebätä (Rom. 8:21, TNM). Akwa, bäri ütiäte nita ni Bökänkä kä kwinbiti Jehová tarere ño ye nikwe bämikadre drieta kwe nie (Éx. 21:5).