Juta Kenia yekänti nitre prekursor nibu nübaibare näin gwä ye ngwane ni brare chi jutuabare jänbiti ietre ye käkwe töi mikani ñan krütare. Niara ngrabare aune küde oto chi krubäte. “Nitre ngüre bren rabai nen bura kwrere” Ngöböta käbämike niebare ie ye ngwane, kä namani kötare ngwärebätä (Is. 35:6).

Nitre prekursor yei namani gare Onesmus därebare krä mitro krubäte, bren ye kädekata osteogénesis imperfecta, kä nengwane kä niena bäsi 40 niarabiti. Niara krä mitro krubäte yebätä raba nötöbätä jötrö ngwarbe. Bren ye kräkäi ñaka jire, yebätä täi käre ja tare nike silla de ruedas yete namani nütüre.

Onesmus ja tötika Bibliabätä kani ngäbiti. Akwa, meye ñaka tö namani tuai näin gätäbätä, ñobätä ñan aune raba juruaine tare aune rabadre bäri bren nämene ruin ie. Ye medenbätä, ja mräkätre konkrekasionte nämene kukwe grabare aune niara nämene kukwe nuin ja gwirete. Akwa nämene ja tötike Bibliabätä sö krärikekäre angwane, tö namani näin gätäbätä kukwe tare yebiti ta niebare kwe.

¿Janamene gätäbätä yebätä namani bäri bren? Ñakare. Niara tä niere: “Ti nämä ja tare nike krubäte ye jataba nekä tie gätäte rababa ruin tie”. Kukwe kwin nämene kräke namani gare ie yebätä ja namani ruin kwin ie. Ja namani ruin kwin ie ye tuani meyekwe angwane kä jatani jutobätä yebätä ja tötika Bibliabätä kani ngäbiti kwe arato. Meye nämene niere “Ngöbö mikadre täte ye kräkä kwrere kräke”.

Kä nikani braibe ta angwane Onesmus kädekani kukwe driekäre. Ja känenkäre ja ngökani ñöte kwe, aune matare tä sribire ni sribikä konkrekasionte. Niara ñaka raba jondron nuainne jire ngüre aune kise yebiti, akwa tö namani sribi nuain bäri Jehová kräke. Tö namani prekursor ausiliar ye nuaindi, akwa ja ñaka namani törö ie täräkwata ye biankäre. ¿Ñobätä? Ñobätä ñan aune ni mada rabadre käre silla de ruedas ye gitekä niara ngwankäre ye nämene gare ie. Kukwe ye mikani gare kwe ja mräkätre ie angwane, niaratre käkwe dimikai niebare kwetre. Ye köböire, Onesmus sribi prekursor ausiliar ye nuainbare.

Tö namani prekursor regular ye nuaindi angwane, namaninta töbike kukwe ye arabebätä. Akwa, bati textobätä ja tötikata mantre jetebe ye käkwe dimikani nuainkäre. Texto ye nämene dianinkä Salmo 34:8 yebätä, aune yete nieta: “Jehová mike gare jai aune niara töi kwin ye rabadre gare nie”. Töbikataribare kwe texto yebätä, ye bitikäre ja töi mikani kwe prekursor regular nuainne. Matare tä kukwe driere köböbokä bämän kratire kratire aune tä nitre ruäre tötike Bibliabätä ye tä nirien kukwe ja üairebiti. Kä 2010 janamene Kwela nitre Sribikä Prekursor kräke yete. Ni iti nämene dirire kwelate ye käkwe niara tuaninbiti kena, ye käi mikani juto krubäte niarabätä.

Niara rün aune meye krütanina, akwa niarata dre ribere mantre jetebe jai yebätä ja mräkätre konkrekasionte tä dimike. Jondron kwin tä matare kwe yebätä debe bianta krubäte kwe aune “nitre nünanka ye ñaka käkwe niedi iti: ‘Ti bren’”, niara tä köbö ye ngübare kä jutobiti (Is. 33:24).