¿Täräkwata Ni Mikaka Mokre sribeta mrä mrä jatäri yebätä mäkwe ñäkäbarera? Ye erere ngwane mä raba kukwe ngwantarita ne mike gare metre:

¿Ñongwane Jesukwe blitabare “üai kämekäme [...] nämane kitani ngite” yebe? (1 Ped. 3:19.)

Jesús ganinkröta ye bitikäre, kukwe meden tare rabai bare nitre üaire käme yebätä ye niebare kwe ietre. Kukwe ükaite bentre ye niarakwe mikani gare ietre (15/6, página 23).

¿Ja mikata gure bobukäre ye ngwane kukwe meden ketamä nuaindre ne kwe nünandre kwin jabe?

Ñaka ni muko käne mikadre tuin bäri ütiäte jai ni muko tä nibe yebiti ta, nitre ja ketaka nibe ye nikwe dimikadre ne kwe ja ketadre ño ni muko yebe ye rabadre gare ietre aune nikwe ñaka töbikadre ni muko käne ñaka ja ngwani metre nie yebätä ni ñaka tö ngwain ni muko tä nibe ie (1/7, página 9 aune 10).

¿Ñongwane Jesukwe kukwe ükaite “obeja” aune “kabra” yebe? (Mat. 25:32.)

Ja tare nikadi kri krubäte ye ngwane Jesukwe kukwe ükaite nitre kä jökräbiti tibien yebe, nitre kukwe ngwarbe mikaka täte gaite ye bätäräbe niarakwe nuaindi (15/7, página 6).

¿Ñongwane nitre kristiano nura käme kwrere rabadi ja muaire krikribe aune tu ngöbe rabadi? (Mat. 13:36, 41, 42.)

Kukwe ne rabai bare ja tare nikadi kri krubäte ye näire, niaratre ñaka kwärbedi ye rükai gare ietre angwane rabaitre ja muaire (15/7, página 13).

¿Ni klabore ie tö ngwan raba bätä töbätä yebätä Jesukwe kukwe niebare ye ñongwane namani bare? (Mat. 24:45-47.)

Ye ñaka namani bare Pentecostés 33 ye ngwane, ñakare aune jatani nemen bare kä 1914 ye bitikäre. Kä 1919 ni klabore ye kädekani nitre gwi jie ngwankäre, ye abokän nitre kristiano jökrä bukata kukwe ja üairebiti (15/7, página 21 nemen 23).

¿Ñongwane Jesukwe ni klabore ie tö ngwan raba bätä töbätä kädekai jondron jökrä kwe ngübabitikäre?

Kukwe ye rabai bare ja känenkäre, ja tare nikadi kri krubäte näire, ni klabore ie tö ngwan raba ye rabaira nüne kä kwinbiti ye ngwane (15/7, página 25).

¿Nitre kädrieta Bibliabätä nämene ja ngwen käme o ñaka nämene ütiäte yebätä kä diandrekä Bibliabätä?

Ñaka töbikadre ye erere. Nitre kwati ja ngwani käme aune nitre kwati ja ngwani kwin abokän kädekate ñaka Bibliabätä (Rut 4:1-3; Mat. 26:18). Biblia tä ángel nibu ja ngwanka metre aibe kädekete (1/8, página 10).

Ngöbö diebiti nitre 230 Testiko nänkä gata kokwäre nämene kä Sachsenhausen yekänti namani nire akwa, ¿dre mada niaratre dimikani?

Niaratre ye nämene di nekä, mrö nike aune bren, akwa käre nämenentre ja dimike kwärikwäri (15/8, página 18).

¿Nitre Israel nikani ñö Jordan yete ta rabakäre Kä Käbämikani ietre yekänti ye tä ni dimike ño?

Ñö ye nämene kri, akwa Jehovakwe ñö kri ye ketaninkä köböire juta kwe ye nikani kä nötare yete ta. Kukwe ye niaratre mikani tö ngwen aune tödeke bäri, aune ye erere tä ni dimike kä nengwane arato (15/9, página 16).

¿Jondron bä bätäkä ngwarbe kädrieta Bibliabätä ye tä dre mike gare?

Jondron bä ño ye tä mate ño nibätä ye gare kwin Ngöböi, bätä tä kukwe ütiäte ngwenta törö nie ye gare ie arato (1/10, página 14 aune 15).

¿Nitre obeja ngübaka ni kükü aune nitre ji ngwanka ni kwä yebätä kukwe mikani gare Miqueas 5:5 ye tä nemen bare ño ni näire?

Nitre obeja ngübaka ni kükü aune nitre ji ngwanka ni kwä kädrieta Miqueas 5:5 ye abokän nitre umbre konkrekasionte, niaratre tä juta Ngöbökwe dimike ja tuakäre kukwe rabai bare ja känenkäre yebe (15/11, página 20).

¿Kukwe medenbätä nita Ngöbö ribere jai?

Niarakwe ni jie ngwandre aune kukwe ükadrete kwe ni kräke ye nita ribere jai. Ngöbö tö ni tuai nüne kä jutobiti, aisete tä ni dimike aune kukwe käbämikata kwe Bibliabätä ye mikai nemen bare metre kwe (1/12, página 4 nemen 6).