PASCAL ririabare kä bobre juta Costa de Marfil yekänti, niara tö nämene nünain bäri kwin. Nämene ja meta tarere aune juta medenkänti niara raba ganane ja meta yebiti aune ngwian ganainne ere ye nämene ngwentari jai. Kä namani 25 niarabiti angwane namani töbike kä Europa yekänti raba kukwe ye erere nuainne. Akwa, pasaporte bätä täräkwata mada ñaka nämene kwe nänkäre juta yete, niara törbadre rabai juta yete angwane rikadre gore.

Kä 1998, kä nämene 27 Pascal yebiti angwane ja töi mikani niken kwe. Juta Ghana käi nämene krüte yekänti ta nikani, arato juta Togo aune Benín yekänti ta nikani bätä namani kä kädekata Birni Nkonni, juta Níger yekänti. Kä bäri käme yekänti ta namani nändre ie. Kä ngwitärikri ye kokwäre niara rikadre angwane kä ngwarbe nötare Sahara yekänti ta rikadre karote, aune rabadre Mar Mediterráneo yekänti angwane rikadre rute rabakäre Europa. Niara tö nämene ye nuainne, akwa kukwe ketebu namani bare juta Níger yekänti käkwe niara ketaninbätä.

Kena, ngwian ñaka namanina ie nänkäre jankunu. Ketebukäre, ni kädekata Noé namani gare ie, ni ye nämene sribi prekursor nuainne aune namani kukwe Bibliabätä driere ie. Kukwe namani gare Pascal ie ye matani brukwäte aune ye käkwe töi kwitani. Niara tö nämene jondron ie ja kräke ye ñan namanina tuin bäri ütiäte ie kukwe ja üaire yebätä, aune diciembre kä 1999 niara ja ngökani ñöte. Niara tö nämene debe biain Jehovai yebätä kä 2001 ja töi mikani kwe sribi prekursor nuainne juta Níger yekänti, kä ye arabe känti kukwe metre namani gare kenanbe ie. ¿Ja ruin ño ie kukwe diani kwe jai yebätä? “Ti raba kukwe meden kwin nuainne ja nire yebiti erere tita nuainne”, niebare kwe.

Ja töi mikata kukwe ja üaire nuainne ye tä kä mike juto nibätä ye ñan gare Pascal aibe ie. Kukwe ye erere nuainkäre ja mräkätre ruäre kä Europa yete nikani África nitre kukwe driekä ribeta bäri Gobran Ngöbökwe kukwei mikakäre gare yekänti. Ja mräkätre 65 näre abokänbiti kä nämene 17 aune ruäre biti kä nämene 70 nünanka Europa nikani África occidental yekänti juta jene jene te, ñodre, nikanintre Benín, Burkina Faso, Níger aune Togo. * ¿Dre niaratre töi mikani kukwe ye nuainne aune ja ruin ño ietre?

Anne-Rakel, käi Dinamarca tä mike gare: “Ti rün aune ti meye sribibare misionero juta Senegal. Käre nämä blite kä jutobiti sribi misionero nuainbare kwetre yebätä, aune sribi ye ti tö nämä nuain arato”. Kä nikanina kwäjätä biti kwärike ta, ye ngwane kä nämene gre näre niarabiti aune nikani nüne juta Togo yekänti, kukwe driekäre konkrekasion blite kisebiti yebe. ¿Ja töi mikani kwe kukwe nuainne ye matani ño nitre madabätä? Niara tä niere: “Kä rikaba ta angwane ti eteba aune ti ngwai bäri mrä ti kräke jataba nüne juta Togo yekänti arato”.

 Aurele, ja mräkä käi Francia abokänbiti kä niena 70, tä niere: “Kä nikani kwärike ta yete ti jubilabare, yebätä kukwe rababa ketebu nuaindre tie: keteiti, tikwe nünandre jäme Francia Kä Bä Nuäre ye ngübakäre o tikwe sribi Ngöbökwe nuaindre bäri”. Ja töi mikani kwe sribi Ngöbökwe nuainne bäri. Ye medenbätä, kä nikanina komä ta niara nikani nüne Benín muko kwe, Albert-Fayette yebe. Aurele tä niere: “Nunkwe ja töi mikani kite kä nekänti sribikäre Jehová kräke ye sribi kwin diani nunkwe jai”. Kä mikani kötare ja ngwärebätä kwe kukwe ne niekäre: “Kä ruäre mren kräbäre känti nunta kukwe driere ye Kä Bä Nuäre kwrere”.

Clodomir aune muko kwe Lysianne nämene Francia nikani nüne Benín, ye käi nikanina kwäjätä biti kwä ti ta. Kenanbe niaratre nämene mräkätre aune ja ketamuko kwetre uliere krubäte, aune ja ñaka rabai ruin kwin ietre nüne yete namani nütüre. Akwa, biti ñaka namani töbike krubäte aune namanintre nüne kä jutobiti. Clodomir tä niere: “Kä kwäjätä biti kwä ti nikanina ta aune kä kwatire kwatire yete nunkwe ni iti dimikanina kukwe metre kain ngäbiti”.

Sébastien aune Johanna tä gure, niaratre nämene nüne Francia nikani nüne Benín kä 2010. Sébastien tä niere: “Sribi tä nuaindre krubäte konkrekasionte. Tita sribire nete ye abokän ti tötikata sribi Ngöbökwe nuainkäre kä raire te ye kwrere”. ¿Nitre nünanka yete töita ño? Johanna tä mike gare: “Nitre tö kukwe metre ye mikai gare krubäte jai. Nunta niken kukwe driere ye ngwane ji ngrabare nitre tä kukwe Bibliabätä ngwentari nunye aune tätre tärä kärere nunye”. ¿Ja kwitani kwetre nünankäre yete ye köböire ja ruin ño ietre? Sébastien niebare: “Nunta ja mäke bäri kwin. Tita kukwe driere mantre jetebe ti mukobe ye tä kä mike bäri juto tibätä”.

Eric aune muko kwe Katy, tätre sribi prekursor nuainne kä ngwitärikri juta Benín, kä yekänti nitre ñaka nüne krubäte. Kä kwäjätä nikanina ta yete niaratre nämene nüne Francia, ye ngwane kukwe tikani täräkwatabätä känti blita nämene nitre kukwe driekä ribeta yebätä niaratre nämene ñäke aune nämene kukwe ngwentari nitre sribikä köbö täte yei. Kukwe ye niaratre töi mikani niken nüne juta madate, aune kä 2005 ye ngwane nuainbare kwetre. Nitre namani bäri kwati kukwe metre kain ngäbiti ye tuani kwetre. Eric tä niere: “Kä kubu nikanina ta yete nitre kukwe driekä ni ökän aibe nämene nitre ükaninkrö braibe Tanguiéta yete, akwa kä nengwane nun niena grebiti ni jätä. Dominko kratire kratire yete nitre 50 aune 80 tä nüke gätäbätä. Nitre tä nirien kukwe ja üairebiti ye käita juto nunbätä aune ye keta ñaka raba jondron mada yebätä”.

¿Nitre tä niken nüne juta madate tä ja tuin kukwe medenbe? Anne-Rakel ngwai kädekata Benjamin, kä niena  33 niarabiti. Ni iti nämene sribi misionero nuainne juta Togo, ye namani gare Benjamin ie kä 2000 yete juta Dinamarca yekänti. Benjamin ie kukwe ne törö: “Ti tö nämä ja mikai sribi prekursor nuainne tikwe nieba ye ngwane niarakwe nieba tie: ‘Mä raba sribi ye nuainne juta Togo yete, ¿yebätä mä tärä töbike?ʼ.” Benjamin tä niere jankunu: “Kä ye ngwane kä jämi nemen gre tibiti, akwa ti ngwai nibu nämä sribire kä yekänti, yebätä rababa nuäre ti kräke nänkäre yete”. Töbikabare kwe kukwe yebätä biti nikani nüne kä yekänti. Akwa, kukwe mada nämene niara kisete, blitadre kukwe francés yebiti ye ñaka nämene gare jire ie. Benjamin tä mike gare: “Sö rikaba krä ti ta yete ñaka rababa nuäre ti kräke, ti jataba krire kukwe niere kwati kubu”. Kä nikani ta ye ngwane jatani blite bäri kwin, kä nengwane tä sribire sukursal Benín yekänti, Departamento de Envíos aune Computadoras yebätä.

Eric aune Katy abokänbätä blitanina. Konkrekasion blite kukwe madabiti nämene Francia, ye niaratre nämene dimike jämi niken Benín ye känenkri. ¿Niaratre nämenena konkrekasion madate, aisete ye erere rabadre sribire kä África yekänti? Katy tä niere: “Ju kwin nünankäre ye ñaka kwanba drekebe nunye. Ju känti ñotra ñaka nämä aune ñö kwin ñaka nämä yete nunkwe nünanba sö kabre te”. Eric tä mike gare: “Nitre nünanka nun bäre nämä musika ngö mike kri nükebe kä raire deu. Nikwe ja töi mikadre kukwe ngübare bätärekä aune ñaka töbike krubäte”. Niaratre nibu tä mike gare: “Kä känti krire kukwe drieta yekänti nunta sribire ye abokän bäri ütiäte jondron tuanimetre nunkwe ye kräke”.

Michel aune Marie-Agnès, niaratre tä gure. Niaratre käi Francia arato. Kä nämene bäsi gre ketamä niaratre yebiti angwane nikani nüne Benín, ye käi nikanina kwärike ta. Kenanbe kä jürä namani niaratre yebätä. Michel tä niere: “Nitre ruäre nämä niere nunye nun rikadre nüne kä yekänti angwane kukwe tare raba nemen bare nunbätä. Jehová ñaka nun dimike ye rabadre gare nunye akräke kä jürä rabadre bäri nunbätä. Ye medenbätä, nunkwe ja töi mikaba niken kä yekänti sribire Jehová kräke aune niara nämä nunbe nun dimikakäre ye nämä gare nunye”.

Nitre kukwe driekä ribeta yekänti nitre tä niken nüne kukwe driekäre, niaratre yei gare ni rabadre ja mike juto känenkri. Kukwe ye nuainkäre kä diandrekä jai kukwe ükatekäre känenkri, ñaka jondron ribedre krubäte, ngwian ükadrekrö aune tö ngwandre Jehovai (Luc. 14:28-30).

Sébastien abokänbätä blitanina, tä niere: “Nun jämi niken kä madakänti ye känenkri Johanna aune ti, nunkwe ngwian ükakröba kä kubu te. Nunkwe ja töi mikaba ñaka ngwian kitekä krubäte jondron ja näkwitara aune jondron meden nun ñaka ribere jai yebätä”. Kukwe  driekäre jankunu juta madate niaratre tä niken Europa sribire sö ruäre te aune ye köböire niaratre raba sribi prekursor ye nuainne juta Benín sö ja käne yete.

Meritre kaibe gre nikani nüne África occidental kukwe driekäre, ye ngätäite Marie-Thérèse tä siba. Juta Francia yekänti niara nämene sribire bus ngwen, akwa kä 2006 niarakwe kä käräbare jai sribi nuain nämene kwe yekänti ne kwe rabadre kä kwati te sribi prekursor nuainne juta Níger yekänti. Niara tö nämene kukwe nuain erere namani nuainne ye nükani gare ie. Niara tä mike gare: “Ti rükabata Francia angwane tikwe nieba jefe tikwe ie, niara raba ora tikwe sribikäre ye kwite, aune rababa tuin kwin ie; kä nengwane tita sribire mayo nemen agosto bus ngwen juta Francia yete, aune septiembre nemen abril tita sribi prekursor ye nuainne Níger”.

Nire tä Gobran Ngöbökwe mike käne yei rabadre gare tä dre dre ribere jai ye erere Jehovakwe biain ietre (Mat. 6:33). Meri kaibe kädekata Saphira nünanka Francia aune kä niena grebiti kwäjätä niarabiti, niara tä sribi prekursor nuainne juta Benín. Kukwe namani bare niarabätä ye ani mike gare jai. Kä 2011 nükaninta sribikäre Francia ngwian ükakrökäre jai ne kwe rabadre sribire jankunu kä kwä tikäre juta África yekänti. Niara tä niere: “Tikwe sribidre mrä köbö bierne yete, akwa ti tö nämä rabai bämän krobu juta Francia yete aune tikwe sribidre köbö jätä ne kwe ngwian rabadre tikwe nünankäre kä kwati juta Benín yete. Tikwe oraba Jehovai aune tikwe kukwe ye mikaba gare ie. Kä ñaka rikaba raire ta angwane nitre sribi bianka käkwe blitaba tibe teléfono yebiti, ne kwe ni iti täte tikwe sribidre bämän krobu”. Lune, Saphira nikani sribi driebare ie ye nuainkäre ne kwe ni täte niarakwe sribidre ye käkwe kitadre sribi ye nuainbätä. “Ja eteba iti nämä köbö jätä ribere jai nänkäre Kwela nitre Sribikä Prekursor kräke yete ye rababa gare tie. Jefe kwe käkwe niebare ie niarakwe ni iti känäin sribikäre ja täte angwane köbö jätä ye biain kwe ie. Niara ye ja di käräbare Jehovai arato, aune nun nibu kukwei kani ngäbiti kwe.”

Nitre ruäre nikani nüne kukwe driekäre kä África occidental käkwe kä ye mikani tuin jai juta kwe ye kwrere. Nitre mada nikani kukwe driekäre ye nuabare kä braibe te aune jataninta ja käite. Nitre ye täbe sribi nuainne kwin ja käite. Niaratre ie nükani gare sribidre Jehová kräke ye tä kä mike juto erametre nibätä.