Kä 1985 yete kä rababa krire kwäjätä tibiti, ye ngwane monsotre juta Camboya rükaba ja tötikakäre siba kwela te ti nämä ja tötike kä Columbus (Ohio, Estados Unidos) yekänti. Monsotre ye iti ie kukwe inglere nämä gare kwati kubu. Nitre mika nämene ja tare nike, murie ketani aune ngitiani ye nämä üai ngwen jabe ye niarakwe mikaba tuare tie. Ti rababa töbike monsotre kia yebätä angwane ti rababa kite muen dibire. Kä Bä Nuäre käbämikata aune nitre krütanina gaikröta ye ti törbaba kädriei ben, akwa ti nämä blite kukwe inglere yebiti bentre ye ñan nämä nüke gare ietre. Ti nämä monsore akwa tikwe ja töi mikaba ja kite kukwe Camboya yebätä Jehová mikakäre gare ietre. Tikwe ja töi mikaba kukwe nuainne ye köböire tikwe kukwe mada ütiäte nuaindi ja känenkäre ye ñan nämä gare jire tie.

Ñaka rababa nuäre ti kräke blite kukwe Camboya yebiti. Tikwe kukwe niedre ño jatäri ye ni mada ñaka nämä niekäre tie. Bobu, tikwe ja töi mikaba ñaka ja kite jankunu kukwe yebätä, akwa Jehovakwe ti dimikaba ti rün aune ti meye yebiti. Ye bitikäre, nitre ti tötikaka kwelate aune monsotre ja tötikaka tibe ye rababa ti töi mike ja tötike kwin ne kwe ti rabadre ngwian ganainne bäri. Akwa, ti tö nämä sribi prekursor nuain, aisete tikwe ja töi mikaba ja tötike braibe kwelate ne kwe sribi nuainta ora braibe te ye kwandre tie aune ti rabadre sribi prekursor nuainne. Ti nämä ngedenkä kwelate angwane ti nämä niken kukwe driere nitre ruäre sribi prekursor nuainkä yebe. Monsotre tö nämä ja kitai kukwe inglere yebätä, yei ti nämä kukwe inglere driere arato, aune ye köböire kukwe kwin rababa tikwe ja känenkäre.

Kä rababa kwäjätä biti kwä ti tibiti angwane, kä Long Beach (California, Estados Unidos) yekänti ja ükakrö nämene braibe nitre blite kukwe Camboya yebiti ye rababa gare tie. Ti rikaba kä yekänti angwane ti kitaba ñäke kukwe Camboya yebätä. Ti ja tötikaba ünä kwelate angwane, tikwe sribi prekursor ye dianba nuaindre jai aune nitre blite kukwe Camboya yebiti nämä nüne nun bäre yei ti rababa kukwe driere. Kä rababa kwäjätä biti kwä kwä tibiti angwane, ti törbabara näin juta Camboya yekänti. Kukwe tare nuain nämä jankunu juta yete, nitre 10 millones nämene nüne yete akwa nitre braibe ie kukwe kwin Gobran Ngöbökwe yebätä ye kukwe nuabare ye nämä gare tie. Kä ye näire, konkrekasion keteitibe nämä juta yete, abokän känti nitre ni jätä biti nimä aibe nämä kukwe driere. Ti janama kena juta yete angwane, kä nämä kwäjätä biti kwä ökän tibiti, aune kä rikaba kubu ta ye bitikäre ti rikabata nüne juta yekänti. Ti rababa sribire ora braibe te kukwe kwitakäre aune dirikäre kukwe inglere yebiti ne kwe ti rabadre ngwian ganainne kukwe driekäre jankunu. Ja känenkäre tikwe ja mäkäteba, aune ja ngwai ye töi nämä ti erere arato sribi Ngöbökwe nuainkäre. Nitre kwati nünanka Camboya ye nunkwe dimikanina ja denkä mento Ngöbö kräke.

Ti tö “dre dre ie” ye erere Jehovakwe bianina tie (Sal. 37:4). Nitre mada dimikadre ja tötike Ngöböbätä ye bäri kwin ja tötika mada kwelate ye kräke. Kä niena kwäjätä biti kwä ti tibiti nünanbätä Camboya, aune käne nitre ni jätä biti nimä kukwe driekä nämä ja ükökrö, akwa kä nengwane konkrekasion ye niena keta jätä biti ketebu aune nitre ja ükaninkrö braibe ketabokä tä krire ja ükökrö. (Jason Blackwell tä mike gare)