“NÄNTA ja gwirete, mä mräkä känti, angwane jondron kri nunien mäbätä Ngöbökwe, ye mäkwe nie jökrä. Arato mä miri tuin ño bobre Ngöbökwe jai, ye mäkwe nie”, niebare Jesukwe ni iti tö namani näin jiebiti ie. Sureste mar Galilea yekri nämenentre juta Gadara ye ken. Jesukwe kukwe niebare ye tä mike gare ni kä tibienbätä töita ño ye nükani gare ie: kukwe meden tuin ütiäte nie ye nita kädriere ni mräkätre yebe (Mar. 5:19, Ngöbö Täräe [NGT], tärä okwä ükaninte).

Kä nengwane, nitre nünanka kä jökrä känti töita ye erere nita tuin, akwa kä ruäre känti nitre töi bäri ye erere aune kä ruäre känti nitre töi ñaka ye erere. Yebätä, nire tä ja mike Jehová Ngöbö metre mikakäre täte ye ngwane, töta nemen kukwe mikata täte kwe ye mikai gare mräkätre kwe yei. Akwa, ¿nuaindre ño kwe? Mräkätre tä kukwe madabätä o ñaka Ngöbö mike era jai akwa, ¿niaratre raba kukwe Ngöbökwe ye mike nemen ño brukwäte? Biblia tä kukwe kwin niere nie.

Siklo kena yete, Jesús ye Mesías namani gare käne Andrés ie. ¿Nirei mikani gare drekebe kwe? “Andrekwe ja eteba Pedro ye känäntaribare jondron jökrä känenkri, angwane niebare kwe ie: Mesía kunina nun ie. Mesía ne meden kädekata Gobran kri.” Biti nikani Pedro ngwena Jesús nämene yekänti, aune ye köböire Pedro namani siba ja tötikaka Jesube (Juan 1:35-42, NGT).

Kä nikani kwä ti ta ye bitikäre, Pedro nämene Jope ye ngwane, rikadre Cesarea ngwitärikri Cornelio ni nitre rükä jie ngwanka ye gwirete niebare ie. ¿Pedro namani ye ngwane nire nire nämene yete? Biblia tä niere: “Cornelio nämene [Pedro aune nitre nämene näin ben] [...] ngübare, gwaire mräkätre kwebe, aune nitre ja ketamuko kwin kwebe”. Ye köböire, Cornelio käkwe mräkätre mikani Pedro kukwe nuin  aune tuanimetre kwe ja töi mike akwle kukwe ye kain ngäbiti (Hech. [Sribebare] 10:22-33, NGT).

¿Andrés aune Cornelio ja töi mikani ño mräkätre kräke ye tä dre driere nie?

Andrés aune Cornelio mräkätre yei kukwe rabadre gare ja töbiti ye ñaka nütübare kwetre. Andrés nikani akwle eteba känti ne kwe Jesús rabadre gare ie, aune Cornelio abokän käkwe mräkätre kwe ükaninkrö keteitibe Pedro kukwe nuakäre. Akwa nitre nibu yekwe ñaka mräkätre mikani ja dibiti ja mike kristiano. ¿Ye tä dre driere nie? ¿Ni raba ja töi mike ño nitre ye erere? Ni raba kukwe ruäre ütiäte kädriere ni mräkätre ben, ni raba kukwe mada nuainne ne kwe kukwe metre Bibliabätä ye rabadre gare ietre o ni raba ja mräkätre mada kukwebätä nibe mike gare ietre. Akwa tö dre diain nuaindre jai yebätä nikwe mikadre tuin ütiäte jai, nikwe ñaka töi mikadre jene aune nikwe ñaka mikadre ja dibiti Ngöbö kukwei ye kain ngäbiti. Nikwe niaratre dimikadre ño ye rabadre gare nie yekäre, kukwe namani bare Jürgen aune muko kwe Petra nünanka Alemania yebätä ye ani mike gare jai.

Petra ja tötikani Bibliabätä nitre testiko Jehovakwe ben aune ja ngökani ñöte kwe. Jürgen nämene nitre rükä jie ngwen aune Petra ja mikani kukwebätä ye ñaka namani debe kräke kenanbe. Akwa kä nikani ta ye bitikäre nitre Testiko tä kukwe metre Bibliabätä driere ye nükani gare ie. Yebätä ja dianinkä kwe Jehová mikakäre täte arato, aune kä nengwane tä kädekani ni umbre konkrekasionte. ¿Dre nuaindre Ngöbö kukwei mikakäre nemen ni mräkä tä kukwe madabätä ye brukwäte nieta kwe?

Jürgen tä niere: “Ñaka mika ja dibiti kukwe mikata täte mäkwe ye kain ngäbiti aune ñaka kukwe mika gare krubäte ie. Mäkwe nuain ye erere angwane ñan törbai kukwe metre kain ngäbiti. Bäri kwin mäkwe Ngöbö kukwei ye mikadre gare nane nane ie. Ja mräkätre mada abokänbiti kä ja näre niarabe aune dre tuin kwin ie niara erere ye mäkwe mika gare ie aune ye käkwe dimikai arato. Ye köböire raba ja töi kwite”.

Apóstol Pedro aune Cornelio mräkätre käkwe kukwe Bibliabätä ye kani ngäbiti bengwairebe. Akwa, nitre mada nünanbare siklo kena yete ye abokän käkwe ñaka kani ngäbiti bengwairebe.

Jesús mräkätre kwati käkwe niara mikani tuin era jai kukwe driebare kwe ye ngwane. Ñodre, apóstol Santiago aune Juan ye Jesús etebakrä raba ruin nie aune, Salomé, niaratre meye ye abokän Jesús meyekrä (o meyereta). “Meritre mada nämene näin kwati arato. Kä nämene jondron jakwe bien Jesús [aune nitre apóstol kwe]” ie nieta, meritre ye ngätäite Salomé nämene siba nütüta arato (Luc. 8:1-3, NGT).

Akwa, Jesús mräkätre mada ñaka tödekabare kenanbebiti. Jesús ja ngökani ñöte ye bitikäre kä nikani kwati ta ye ngwane, bati nitre kwati ja ükaninkrö gwi niara kukwe nuakäre. Biblia tä niere: “Kukwe ne nükani gare Jesús mräkä ie, angwane jatani känti abokän kwe Jesús jänrikadre kwetre gäre, ñobätä ñakare angwane kä nikwitekä Jesubiti, niebare kwetre”. Ye bitikäre, niara näin kä medenkänti ye etebatre ngwanintari ie angwane, ñaka mikani gare kwe ietre. ¿Ñobätä ñaka mikani gare kwe ietre? Ñobätä ñan aune “Jesu etbakantre abko ñan nämane tödeke bti” (Mar. 3:21, NGT; Juan 7:5).

¿Jesús ja töi mikani ño mräkätre kräke ye tä dre driere nie? Kä nikwitaninkäbiti niebare nitre ruäre yekwe angwane ñaka namani rubun. Murie ketani aune ganinkröta ye bitikäre, mräkätre dimikani kwe, ñodre, ja mikani tuare kwe eteba Santiago ie. Ja mikani tuare kwe Santiago ie ye köböire Santiago aune etebatre mada yei nükani gare metre niara abokän Mesías. Nitre apóstol aune nitre mada Ngöbö mikaka metre täte nämene ja ükaninkrö kä teri Jerusalén yebiti Ngöbökwe üai deme mikani nemen ye ngwane, niaratre nämene nitre ye ngätäite arato. Ja känenkäre, Jesús eteba mada kädeka nämene Judas, aune Santiago  kisete sribi ütiäte mikani (Hech. 1:12-14; 2:1-4; 1 Cor. 15:7).

Siklo kena ye erere arato, kä nengwane ni mräkätre ruäre tä nuin raire biti tätre ja töi mike ji niken ni ngwena ja nire kokwäre ye den jai. Ñodre, Roswitha töi nämene kwatibe kukwe católico yebätä, ye ngwane kä 1978 muko kwe ja mikani testiko Jehovakwe. Kukwe mika nämene täte kwe ye nämene tuin metre ie yebätä niara ja mikani muko kwe rüere. Akwa kä jatani niken ta ye ngwane jatani ja töi kwite. Nitre Testiko tä kukwe metre driere ye nükani gare ie, aune kä 2003 yete ja ngökani ñöte kwe. ¿Dre niara töi kwitani? Muko kwe nämene ja ngwen kwin yekwe töi kwitani: niara nämene ja mike rüere akwa muko kwe ñaka nämene nemen rubun kräke, ñakare aune nämene ngübarebätä bätärekä ne kwe ja töi kwitadre kwe. ¿Roswitha tä kukwe meden niere? “Ni mada ngübadrebätä bätärekä ye köböire dimika raba.”

Monika ja ngökani ñöte kä 1974 yete, ye bitikäre kä nikani kwäjätä ta angwane monsotre nibu kwe ja mikani Testiko. Hans niara muko ñaka ja mikani niara nämene kukwe mike täte ye rüere, akwa kä 2006 yete ja ngökani ñöte kwe. Kukwe nikanina ta yebätä tätre töbiketa angwane, ¿dre nuaindre nieta kwetre? “Käre mäkwe Jehová mika metre täte aune kukwe mikata täte mäkwe ye mäkwe ñaka mika ngwarbe jai.” Hans nämene tare mräkätrekwe ye nämene käre bämike ie yekwe dimikani arato. Aune Hans kukwe metre kadre ngäbiti yei nämenentre tö ngwen.

Kukwe metre ye Jesukwe bämikani ñö ja nire kärekäre bianka nie ye kwrere (Juan 4:13, 14). Ni tö ni mräkätre tuai ñö ngwenbrere aune kwin dimikakäre ye ñain. Nikwe ñaka mikadre ja dibiti ñö ñain krubäte ne kwe ñö ñaka gitiadrebiti. Kukwe mikata täte nikwe ye nikwe mikai gare ño ietre ye ererebätä ja rabai ruin dimikani ietre o ñö gitiai bititre rabai ruin ietre. Biblia tä niere “ni kukwe kwin nuainkä ye tä töbiketari kwin ja brukwäte blitakäre” aune “ni töbätä yei kukwe nüke gare kwin ja brukwäte ye tä bämike ja kadabiti, aune ja kadakwata yebiti tä ni mada töi kwite”. ¿Kukwe nieta ne ni raba nuainne ño? (Prov. 15:28; 16:23.)

Meri tö brare tuai kukwe mikata täte kwe ye kain ngäbiti ye tä “töbiketari kwin [...] blitakäre”, ye abokän, kukwe meden niedre kwe yebätä tä töbike aune ñaka tä blite biarebe. Ja ñaka rabadre ruin bäri ie o töi bäri kwin muko kwe yebätä ie. Yebätä, töbikai kwin käne kwe blitakäre ye matai kwin muko kwe yebätä aune nünain jäme kwe ben. Meri ie “kukwe nüke gare kwin [...] tä bämike ja kadabiti” ye rabadre ngwentari jai: “¿Ñongwane ti muko tä jäme blitakäre ben? ¿Töta nemen kukwe meden kädriei? ¿Nemen ñäke kukwe medenbätä? ¿Kukwe mikadre gare jai jondron keta kabrebätä, kukwe gobrankwe o jadaka yebätä töita? ¿Tikwe dre nuaindre töi mikakäre Bibliabätä aune ño tikwe mikadre tuin ütiäte jai ja ruin ño ie bätä tä töbike ño yebätä?”.

Kukwe mikata täte nikwe ye mikadre nemen ni mräkätre ñaka Testiko brukwäte yekäre nikwe kukwe mikadre gare nane nane ietre ye ñan aibe ngörä. Nita kukwe meden mike gare ye ererebätä nikwe nünandre.

Jürgen kädrite käne ye tä niere: “Kukwe nieta Bibliabätä ja jie ngwankäre ye erere nikwe nuaindre mantre jetebe. Nita kukwe ye erere nuainne metre ye ni mräkätre ñaka kukwebätä käkwe ñaka niei kukwere akwa rükai gare kwin nibätä ietre”. Hans muko ja ngökani ñöte ye bitikäre kä nikani gre biti kwäjätä ta angwane Hans ja ngökani ñöte, niara tä kukwe ne niere arato: “Ja ngwandre käre ni kristiano erere. Ye köböire ni mräkätre ñaka Testiko yei rükai gare nita kukwe metre ye ererebätä ja ngwen mantre jetebe”. Nita kukwe mike täte yebätä ni ñaka kukwe ruäre nuainne nitre mada erere ye rabadre nüke gare ni mräkätre yei, akwa ñaka kukwe käme yebätä, ñakare aune kukwe kwin ye aibebätä.

Meritre abokän muko kwe ñaka näin kukwebätä ben yei apóstol Pedro kukwe ütiäte ne niebare: “Ne kwrere arato mun merire [...] käkwe ja kwäräi mikadre kri ja kräke, abokän kwe nitre ruäre ñan Ngöbö kukwei mike täte, ne ganain raba mun merirekwe, ja mikata kwin munkwe yebiti; aune ñakare ganandre munkwe ja kukwebiti; mun tä ja mike kwin deme, aune mun tä ni brare jakwe mike täte, nitre brare munkwe, käkwe tuai ngwane. Ja mikadre bä nuäre munkwe, ne abrä ñakare jondron ja bätäritabiti, ñan ja dokwä ükadrete jondron kwin kwinbiti, aune ñakare orobiti, aune ñakare dängutu bä nuärebiti. Akwa  ja mikadre bä nuäre munkwe, ne abrä ja teribiti, ja brukwäbiti, aune ja murie jäme aune kukwebebiti, ne abrä ñan rikare ngwarbe, aune ne abrä bäri ütiäte kri Ngöbö ngwärekri” (1 Ped. 3:1-4, NGT).

Meri kukwebätä tä ja ngwen kwin yebiti raba muko kwe töi kwite niebare Pedrokwe. Kä 1972 yete Christa ja ngökani ñöte ye ngwane ja töi mikani kwe ye erere nuainne. Muko ja tötikabarera nitre Testiko ben, akwa jämi ja töi mike Jehová mikabätä täte. Janamanena gätä ruäre konkrekasionte yebätä aune tä blite kwin ja mräkätre ben, akwa töita ño ye ja mräkätre tä mike tuin ütiäte jai. ¿Christa tä dre nuainne Ngöbö kukwei ye mikakäre nemen muko kwe brukwäte?

Niara tä niere: “Ji medenbiti tikwe nändre nieta Jehovakwe tie yebiti ti töita kwatibe nänbätä. Aune tita ja ngwen kwin ti muko ie ne kwe niarakwe ja töi kwitadre aune tikwe ‘ñakare ganandre [...] ja kukwebiti’. Kukwe nuainta kwe ye ñäkäi ñaka kukwe nieta Bibliabätä ja jie ngwankäre yebätä angwane, tita nuainne siba ben töi mikakäre jäme. Tö dre diain nuaindre jai ye tita mike tuin ütiäte jai aune tita kukwe ye mikete Jehová kisete”.

Christa tä ja töi mike ño ye tä mike gare kukwe ükadrete jai jondron jene jene nuainkäre ye ütiäte krubäte. Niara töita kwatibe kukwe ja üaire ye nuainbätä, ñodre, tä näin gätäbätä aune kukwe driere. Akwa muko kwe töita ño ye tä mike nüke gare jai arato. Rabadre muko kwe tarere aune kä denkä jai kräke bätä jondron nuainne ye nüke gare ie. Ni mräkätre ñaka Testiko ye kräke ni jökrä rabadre kukwe ükete jai jondron jene jene nuainkäre aune töita ño ye mikadre nüke gare jai. “Jondron jökrä kräke kä tärä”, nieta Bibliakwe. Ye abokän ni mräkätre ñaka kukwebätä nibe ye kräke nikwe kä diandrekä jai, metrere ni muko ye kräke. Kä diandrekä rabakäre keteitibe jabe ye köböire blitata bäri jabe, aune blitadre bäri ni mräkätre ben ye köböire ja ñaka raba nemen ruin kaibe ietre, ni ñaka tö tuai ja ken ye ñaka rabadre nütüre aune ñaka rabai mokre (Ecl. 3:1).

Holger ja ngökabare ñöte ye bitikäre kä nikani ta angwane mräkätre kwe ja ngökani ñöte, aune kä nikani gre ta angwane rün kwe nuainbare arato, niara tä niere: “Nita ni mräkätre tarere aune nita orare kräke ye rabadre gare ietre ye ütiäte krubäte”. Christa tä niere arato: “Ti muko kukwe metre kai ngäbiti aune ja mikai kwe Jehovakri yei tikwe tö ngwain käre”. Ni mräkätre ñaka Testiko yekwe Ngöbö kukwei kai ngäbiti ye tädre käre ni töite. Nikwe ñaka ja di ngwandre nekä jire.

Ni töita kwatibe ja ketabätä kwin ni mräkätre yebe, dimikadre kukwe metre ye mike gare jai aune kukwe Bibliabätä mikadre nemen brukwäte. Ye nuainkäre ni rabadre “ja moto jämenbti [...] blit[e] [...] amne [...] ni mda mda mik[e] ütiäte jae” (1 Ped. 3:15).