ERAMETRE, ni nämä braibe ye rababa bäri kwin ti kräke. Käre kä jürä nemen krubäte tibätä blitakäre ni madabe. Ti nämä chi ye ngwane nitre nübai nämä gwi, ye ruäre nämä gare tie akwa ti nämä ja üke ngänikaire.

Yebätä mun raba nemen töi ñan krütare ñobätä ñan aune sribi keta kabre biani tie juta Jehovakwe yete, tikwe sribibarera nitre kwati ben, nitre ja ketamuko o ruäre ñaka nämä gare tie yebe. Akwa, kä jürä aune ti ñaka tö ngwen jai yebe tita ja tuin käre, yebätä kukwe kwin namani bare tibätä ye ñaka ja töbiti, ñakare aune Jehová köböire. Kukwe kämikata kwe ne niara tä mike nemen bare ye rababa gare metre tie: “Tikwe mä mikai dite, [...] tikwe mä dimikai, erametre ti kise ruinkri kukwe metre nuainkäre yebiti tikwe mä ketaite dime” (Is. 41:10). Metrere Jehovakwe ti dimikaba ja mräkätre yebiti. Ti nämä chi ye ngwane ti dimikani ño kwe ye tibike mike gare ruäre munye.

Kä 1940 yete, dominkote dekä ñänä nämä ngire krubäte, Elsie Huntingford rükaba nun känti nun nämä jondron nire ngübare aune jondron kwetadre nökö, kä noroeste Ontario yekänti. Ti meye rikaba jukwe tike,  akwa ti rün abokänbätä kä jürä nämä nemen ti erere, niara rababa käteri tibe meri testiko ye kukwe nuin. Ja ngwai Huntingford nämä jondron rürübäine aune nun ñaka jondron ribere abokän mama kökai ie tata rababa nütüre, yebätä nun ñaka törbaba jondron yei tata janama niere ie. “¿Mun ñaka tö ja tötikai Bibliabätä?”, ngwantariba kwe. Yebätä tatakwe nieba: “Yebrä nun tö mikai gare jai”.

Ja ngwai Huntingford yekwe köbö dianinkä jai nänkäre nun känti. Iglesia Unida Canadá yete tata aune mama nämä niken käre, akwa niaratre ja diankaba mento iglesia yete ye käi rikaba braibe ta. ¿Ñobätä nuainbare kwetre? Ñobätä ñan aune, nitre nämene ngwian bien ye ni ji ngwanka iglesiate ye nämene kä tike täräkwatabätä aune nämene mike jukwete tuakäre. Nitre nämene ngwian bien bäri ye ererebätä kä tika nämene jatäri. Ti rün aune ti meye bobre, yebätä käre niaratre kä nämä tikani mrä täräkwatabätä, aune nitre umbre iglesiate nämä ngwian biamana bäri ere ietre. Akwa ye ñan ngörä. Ni iti ji ngwanka iglesiate nämene kukwe mada mike täte, akwa ñan nämene driere ne kwe sribi ye ñaka diandrekä kän nieba kwe. Yebätä nunkwe iglesia ye tuametreba; akwa nun nämä Ngöbö känene jankunu.

Ye ngwane nitre testiko Jehovakwe nämä kukwe driere ye ñäkäi nämä Canadá, yebätä ja ngwai Huntingford nämä nun tötike Bibliabätä aune tärä chi drüne yebiti. Ye bitikäre, nunkwe ñaka niara driedi rababa gare ie ye ngwane, nämä kite tärä aune täräkwata ngwena nunye, nun nämä ja tötike ye bitikäre nun nämä üke bärebäre. *

Ja ngwai Huntingford nämä kukwe kwin driere kukwe keta kabre tare yebiti ta. Niara nämä sribire kä jutobiti yekwe ti töi mikaka sribire Jehová kräke. Ti rün aune ti meye ja ngökaba ñöte ye bitikäre, kä rikaba kwati ta kä nämä 17 tibiti ye ngwane tikwe ja ngökaba ñöte, 27 febrero kä 1949 yete. Baninkwata te nitre nämä ñö keke ñadre nibi ie yete ti ngökaba ñöte. Tikwe ja ngökaba ñöte ye bitikäre, tikwe ja töi mikaba sribi prekursor nuainne.

Tikwe ñaka sribi prekursor ye nuainba bengwairebe. Tikwe käne ngwian ükadrekrö jai ye nämä gare kwin tie. Tikwe sribiba banco aune oficina  yete, akwa ti nämä bati krubäte yebätä ti nämä ngwian ganainne ye ti nämä kitekä jötrö ngwarbe. Tikwe ñaka kä jürä ngwandre jabätä aune tikwe tö ngwandre Jehovai ja mräkä kädeka nämä Ted Sargent nieba tie (1 Crón. 28:10). Ti dimikaba kwe ye köböire, sö noviembre kä 1951 yete tikwe sribi prekursor kömikaba. Ngwian nämä 40 tikwe, bicicleta ñaka mrä aune maletín mrä aibe nämä tikwe. Akwa, dre dre ribe nämä tikwe jai ye Jehová nämä käre bien tie. ¡Ted ti nübaiba sribi prekursor nuainne yebätä tita debe bien krubäte ie! Tikwe ja töi mikaba sribi prekursor nuainne köböire kukwe kwin keta kabre rababa tikwe.

Kä 1952, sö agosto jatabara krüte ye ngwane deu ñäkäba teléfono yete tie kä Toronto yekänti. Sukursal nitre testiko Jehovakwe kä Canadá yete ti nübaiba sribire Betel sö septiembre yete ja känenkäre. Kä jürä nämä krubäte tibätä aune ti ñaka nemen jire sukursal yete, akwa ti nübaiba ye käi rababa juto tibätä, ñobätä ñan aune nitre prekursor mada nämä kukwe kwin niere tie Betel yebätä. Bengwairebe ja rababa ruin ja gwirete tie.

Ti rükaba Betel aune kä rikaba kubu ta angwane ti mikaba sribire Bill Yacos ye täte siervo de konkrekasion erere (nengwane kädekata ni gätä nitre umbrekwe köböikitaka) kä Unidad Shaw Toronto yete. * Kä rababa 23 tibiti ye ngwane, monso ie kukwe ñaka gare krubäte ye erere ja rababa ruin tie. Ja mräkä Yacos, ye nämä ti tarere aune töi bobrebiti, tikwe dre nuaindre ye drieba kwe tie. Jehovakwe ti dimikaba krubäte.

Ja mräkä Bill Yacos ni ye tibienkä aune dite, käre kä nämä juto ngwärebätä töi nämä bökän nitre mada dimikabätä. Nämä ja mräkätre tarere, aune niaratre nämä niara tarere. Käre nämä niken tuinbiti, aune kukwe kri nämä nemen barebätä ye ñan aibe ngwane nämene nuainne. Niarakwe ti nübaiba ye erere nuainne arato, aune kukwe driere ja mräkätre konkrekasionte yebe. Nieba kwe tie: “Ken, mä töita ja mräkätre yebätä ye mäkwe bämika tuare ietre. Ye köböire kukweta nainte mäi ye niaratre juaindi ta mäbiti.”

Sö enero kä 1957 yete ja känenkäre Jehovakwe ti dimikaba bäri. Sö yebätä tikwe ja mäkäteba Evelyn ben, niara janamane clase 14 Kwela Galaad yete. Nun jämi ja mäkete ye känenkri, niara nämä sribire konkrekasion te blita nämä kukwe Francés yebiti kä Quebec yekänti. Kä yekänti nitre Iglesia Católica nämä nüne krubäte, yebätä kukwe driedre ye ñaka nämä nuäre niara kräke. Akwa Evelyn ja ngwani metre Jehovai aune kukwe driebare jankunu kwe.

Arato, ti muko ti dimikaba metre kukwe jökräbätä (Efes. 5:31). Ñodre, nunkwe ja mäkäteba ye bätäräbe kukwe mada rababa bare. Nunkwe ja mäkäite ye ngwane nun näin basare Florida (Estados Unidos) nunkwe nieba jai, akwa nunkwe ja mäkäteba ye bitikäre jetebe se kwrere, sukursal ye ti nübaiba ja tötike bämän krati Betel Canadá yete. Jehová nämä dre dre ribere nunye ye Evelyn aune ti nun töi nämä kwatibe nuainbätä, yebätä nunkwe kukwe ükateba basakäre yete nun ñaka rikaba. Bämän yete, niara nämene kukwe driere sukursal ye  kenta. Niara nämä kukwe driere Quebec ye erere ñaka kä yekänti, akwa niara ñaka ja di ngwanba nekä.

Bämän jataba krüte ye ngwane, nun ñaka kukwe ngübare abokän mikaba gare nunye. Ti juanba sribire ni tuabitikä konkrekasionte kä norte Ontario yete. ¡Töbike kukwe nebätä! Krire tikwe ja mäkäteba, kä nämä 25 tibiti aune sribi ye nuaindre ño ye ñaka nämä gare tie. Akwa, Jehovakwe nun dimikai yei nunkwe tö ngwanba, yebätä nun rikaba. Ñü nämä näkäin krubäte tibien Canadá ye ngwane, nun rikaba tren yete deu nitre mada ni tuabitikä konkrekasionte ie sribi ye nuain gare nämä siba yete, niaratre nämä näinta konkrekasion tuadrebiti kwetre ye kokwäre. ¡Nun dimikaba krubäte kwetre! Nun ñan tädre dibire ta täkäni täkärä ñaka kwin yete, yekäre iti käkwe kä dianinkä kübiakäre jai yete nun juanba kübien kwe. Kä jataba ngwen dekä angwane, nun rababara nitre nämene ja ükökrö braibe Hornepayne ye tuinbiti tikwe miri gare kena ye erere. Nun ja mäkäteba ye bitikäre krire köbö rikaba 15 ta.

Kukwe mada nämä nun kräke. Kä 1960 jatabara krüte yete nun nämä distrito tuinbiti, ye ngwane ti nübaiba clase 36 Kwela Galaad yete ja tötikakäre sö krä jätä te, kwela ye kömikai sö febrero kena yebätä kä 1961 Brooklyn (Nueva York) yete. Kä rababa juto krubäte tibätä, akwa Evelyn ñaka nübaiba yebätä ti rababata ulire. Ribebare ja ngwaitre mada ie ye erere, niarakwe tärä tikadre arato raba ja mikete kaibe sö krä jätä te ye mikakäre gare. Nun ñaka täi ja ken sö kabre te yebätä rababa ja muaire krubäte. Akwa ti rikadre ja tötike ye rababa debe nun nibu kräke, ti nübaiba ye käi rababa juto niarabätä, ñobätä ñan aune ti tötikai kwin krubäte yebätä.

Ti nämä Brooklyn ye ngwane, Evelyn nämä sribire Betel Canadá yete. Niara nämä cuarto arabe te ja ngwai Margaret Lovell dianinkä nänkäre kä kwinbiti yebe. Nun ñan nämä ja ken yebätä nun nämä ulire, akwa Jehová nun dimikaba sribi nämä nun kisete ye nuainne kä jutobiti. Niara töi nämä kwatibe sribire bäri Jehová aune juta kwe kräke tibe gwaire ye kä mikaba juto ti brukwäbätä.

Sö krämära ti nämä Galaad ye ngwane ja mräkä Knorr, nämä sribi Ngöbökwe jie ngwen kä ye ngwane, ti nübaiba sribi ütiäte nuainne. Ja rüka törö tie Kwela Galaad ye tuametrekäre aune nänkäreta Canadá sukursal yete nitre tötikakäre ken Kwela Sribi Ngöbökwe jie ngwankäre yete ngwantariba kwe tie. Akwa ti nübaiba ye tikwe ñaka kadre ngäbiti ja dibiti nieba kwe tie. Ti törbadre angwane tikwe Kwela Galaad ye mikadre krüte aune biti ti juan raba misionero juta madate nieba kwe tie. Arato, ti näinta Canadá angwane, ti ñaka nübaidreta jire Galaad, aune ja känenkäre ti juandreta kukwe driekäre Canadá mikaba gare kwe tie. Tikwe kädriedre käne ti muko ben biti tikwe mikadreta gare ie nieba kwe tie.

Evelyn ie sribi Ngöbökwe ye nämä tuin ütiäte, ye nämä gare tie yebätä tikwe ñan kukwe ye ngwantariba ie. Nun töita dre dre nuainbätä ja kräke yebiti ta juta ükaninte Jehovakwe nun juandre medente ye erere känti nun rikadre nun nibu tä töbike ja erebe. Yebätä tikwe nieba bengwairebe ja mräkä Knorr ie: “Juta Jehovakwe tö dre dre nuainmana nunye ye nun töita kwatibe nuainbätä”.

 Yebätä abril kä 1961 ti nämä Brooklyn aune ti rikabata Canadá nitre tötikakäre Kwela Sribi Ngöbökwe jie ngwankäre yete. Ja känenkäre nun rababa sribire ja mräkätre Betel yebe kä yekänti. Ti nübaiba clase 40 Galaad yete ja tötikakäre ye abokän kömikaba kä 1965 yete. Mada bati, Evelyn tärä tikabata raba ja mikete kaibe ye mikakäre gare. Akwa, kä rikaba bämän krati ta ye bitikäre, kukwe mada mikabata gare nunye. ¡Evelyn nübaiba arato!

Nun rababa Kwela Galaad yete angwane, nitre kä tikani tötikakäre kukwe francés yebiti nun erere ye juain África ja mräkä Knorr nieba nunye. Akwa ¿nun graduaba ye ngwane nun juanba kä medenkänti? ¡Juta Canadá! Ti kädekaba superintendente de sukursal ye kwrere (nengwane kädekata ni Sukursal Jie Ngwanka). Krire kä nämä 34 tibiti, yebätä tikwe nieba ja mräkä Knorr ie: “Ti tä bati krubäte”. Niarakwe ti dimikaba tö ngwen bäri. Ne madakäre, kenanbe ti jämi ja töi mike kukwe ütiäte nuainne ye känenkri, tikwe ja di ngwanba kukwe ye ngwentari nitre umbre kukwe gare bäri ietre yei.

Nunta Betel ye köböire nunta ja kite krubäte ja mräkätre mada Ngöbö mikaka metre täte yebätä. Nitre mada Sukursal Jie Ngwanka tä sribire tibe ye tita mike ütiäte jai aune tä ti dimike krubäte. Mekerabe nükebe kä nengwane ja mräkätre brare aune merire, monsore bätä umbre, namani gare nunye Betelte aune konkrekasion jene jene känti nunkwe sribibare yebätä tikwe ja tötikabare krubäte arato.

Ne madakäre, Betel yete tikwe nitre mada tötikanina jondron nuainkäre aune tödeka kwetre mikakäre dite. Apóstol Pablo niebare Timoteo ie: “Kukwei brendebare makwe, ye abko makwe mika täte [...] janknu”. Arato niebare kwe: “Tikwe diribare ni kwati okwäbti angwane, makwe ti kukwei nuani, ye abko nire nire bti tödekadre amne rabadre Ngöbö kukwei dirire kuin, raba tuen mae, ye ie makwe kukwe ye dirita, niaratre käkwe diridreta ni mda mdaye ja täritäri abkokäre” (2 Tim. 2:2; 3:14). Kä niena 57 tita sribire Betel, aune dre namanina gare tie ruäre ngwane ja mräkätre tä ngwentari tie. Tita niere ietre: “Juta Jehovakwe tä dre ribere tie ye tikwe ja töi mikani nuainne kä jutobiti aune jötrö ngwarbe niarakwe ti dimikai ie tita tö ngwen yebätä”.

Ti rababa Betel ye ngwane ti nämä bati kä jürä nämä tibätä aune kukwe ñaka nämä gare tie, ye namani bare jändrin kwrere ruin tie. Akwa, kä jökrä nikanina ta yete Jehová tä ti dimike. Ja mräkätre tä ti tarere aune tä ti dimike yebiti metrere Jehová tä gare tie: “Mäkwe ñaka kä jürä ngwan jabätä. Tikwe mä dimikai” (Is. 41:13).