NITRE Israel nikani mento juta Babilonia yebätä kä 537 kä 1 känenkri, ye ngwane ji ñobiti nändi kwetre rabakäreta Jerusalén yebätä Jehová namani töbike. Niebare kwe ietre: “Ji nänkäre nitre ie ye mike merebe. Kä aune ji ye ükete kwin” (Is. 62:10). ¿Kukwe niebare kwe ye nitre Judea mikani ño täte? Raba ruin nie nitre nikani ruäre käne kämäkä ji ngrabare ükete aune drobo ükete tibien ne kwe nitre jatadre köre ye kräke rabadre nuäre nändre ji yebiti.

Ji abokänbiti nitre Israel nänbare ye bämika raba ji dianta jai kukwe ja üaire nuainkäre yebätä. Jehová tö nitre jökrä niara mikaka täte ye tuai näin ji yebiti aune kukwe mada ñan rabadre jiete. Aisete, tä mäträre krörö nibätä Kukwe kwe yebiti: “Ji nänkäre mäi ye mäkwe ükate metre, aune ji ye jökräbiti rabai nuäre nänkäre mäi” (Prov. 4:26). Ni tä bati o ni niena umbre, akwa kukwe nieta ne raba ni jökrä dimike.

Monsotre bati ye jökrä bäsi, ñaka bren, kukwe gare ie aune töta nemen jondron kwin tuai jakwe. Kukwe meden nuain gare monsotre bati yei ye nitre niena umbre tä tuin angwane, ruäre ngwane töta nemen tuai kukwe ye nuainne täte jökrä. Yebätä Biblia tä niere: “Monsotre die ye abokän bä nuäre krubäte” (Prov. 20:29). Monso bati ye käkwe sribidi Ngöbö kräke die kwe aune dre nuain gare ie yebiti, angwane dre mikai nuaindre kwe jai kukwe ja üairebiti ye rabai bare kwin ie aune kä rabai jutobätä.

Monsotre bati ie kukwe nuain gare ye tä nemen tuin kwin nitre jökrä ie. Monso bati testiko Jehovakwe tä nota kwin ganainne ye ngwane nitre niara tötikaka, nitre profesor o nitre ja tötikaka kwelate ben tä nemen töi mike ja tötike kwela krite ne kwe jondron kwin rabadre kwe kä nebätä. O ruäre ie ja daka gare, ye töi mika raba ja denkä bäri kwin. ¿Kukwe ye erere namanina bare mäbätä? ¿Ni mada tä ja tuen kukwe ye erere ben tärä gare mäi? ¿Dre raba ni kristiano dimike kukwe kwin den nuaindre jai?

Kukwe nieta Bibliabätä ye raba mä dimike näin ji kwin yebiti. Eclesiastés 12:1 tä niere: “Mätä bati ye ngwane mäkwe Ni Ütiäte Kri mä Sribekä ye  ngwan törö jai”. ¿Mä raba Ni Ütiäte Kri mä Sribekä “ngwen törö” ño jai? ¿Ni jökrä raba kukwe ye nuainne ño?

Ja mräkä iti nünanka África occidental kädekata Eric *, abokänbätä kukwe namani bare yebätä mä raba töbike. Niara tö nämene bola täkäite krubäte, ye medenbätä kä namani 15 niarabiti angwane namanina ja denkä juta kwe yete. Akwa, niara rabadre ja denkä bäri kwin yekäre rabadre niken ja tötike kä Europa yekänti. Akwa, Ni Ütiäte Kri ni Sribekä ngwandre törö jai nieta, ¿kukwe ye nuainkäre niara rikadre kukwe mada den nuaindre jai? Eric ja töi mikani dre nuainne aune ye tä dre driere nie ye ani mike gare jai.

Eric nämene ja tötike kwelate ye ngwane jatani ja tötike Bibliabätä nitre testiko Jehovakwe ben aune Ni ni Sribekä käkwe kukwe ükaite kärekäre nitre kä tibienbätä kräke ye namani gare ie. Ütiäte krubäte niara rabadre kä denkä jai aune die kwe yebiti Ngöbö töi nuainne ye nükani gare ie. Ye medenbätä, niara ñaka ja töi mikani ja tötike ja dakakäre bäri kwin, ñakare aune ja ngökani ñöte kwe aune ja töi mikani kwatibe kwe nirien kukwe ja üairebiti. Ja känenkäre, niara namani kädekani ni sribikä konkrekasionte, kä nikani ta angwane niara nübaibare Kwela nitre Brare Kaibe tötikakäre Bibliabätä yete.

Niara ja töi mikadre niken ja denkä akräke käikitadrekä aune ngwian ganaindre krubäte kwe. Akwa, kukwe nieta Bibliabätä ja jie ngwankäre ne tä kukwe metre mike gare ye nükani gare ie: “Jondron ütiäte tä ni jondron bökänkä yekwe ye abokän juta dite kwrere kräke, tä jondron ye bämike ja töite ki ja kriemikakäre ye kwrere” (Prov. 18:11). Ye erere, ngwian ye tä nitre mike nüne kwin tä nemen tuin, akwa ye tö ngwanta ngwarbe. Erametre, nire nire tö jondron tuai krubäte jakwe ja di ngöibiti ye abokän tä “ja tare nike kri” (1 Tim. 6:9, 10).

Monsotre bati kwati käkwe sribi köbö täte Ngöbö kräke ye diani nuaindre jai ye köböire tä nüne jäme aune kä jutobiti. Eric tä niere: “Nitre kwati tä sribire köbö täte Ngöbö kräke abokän bäsi ‘nitre ja dakaka’ kwrere ye ngätäite tita. Nitre ye ngätäite ni tädre ye bäri kwin, tita debe bien Jehovai niarakwe ti dimikani näin ji niken ni ngwena kä juto kokwäre aune kukwe kwin erametre jiebiti yebätä”.

¿Aune mä abokän raba dre nuainne? Mätä ja töi mike jondron kä nebätä ye jiebiti angwane, ¿ñobätä mä ñan ja töi mike sribi prekursor ye nuainne ji nänkäre mäi ye ükatekäre bäri kwin? (Recuadro “ Kukwe kwin abokän ja tötika kwela krite ñan raba bien mäi” ye mäkwe mika ñärärä.)

Nitre gure nämene sukursal Estados Unidos mike gare jai angwane, nitre sribikä betelte yebätä kä nämene juto tuani kwetre. Ye bitikäre, meri Testiko ye käkwe kukwe ne tikabare: “Nun nämä nüne kwin krubäte, yebätä nun ñan nämä kä töibikaire”. Niara aune muko kwe ja töi mikani kukwe nuainne sribikäre bäri Jehová kräke.

Kukwe diani nuaindre kwetre jai ye ñaka namani nuäre nuaindre kenanbe kräketre. Akwa, bati textobätä blita nämene köbö ye kräke yebätä niaratre töbikataribare. Texto dianinkä ye abokän Juan 8:31, yekänti Jesukwe niebare: “Munkwe nünandikä kärekäre ti kukweibtä ne ngwane, mun rabadi ja töitikaka era metre tibe”. Kukwe yebätä niaratre töbikabare krörö: “Nikwe dre tuainmetre nünankäre jondron braibebiti, akwa ye köböire kukwe kwin rabai nikwe”. Ju kri nämene kwetre ye niaratre rürübäinbare bätä kukwe mada nämene kisete ye ükaninte kwetre aune nikanintre nüne konkrekasion mada nämene ja di ribere yekänti. Kä nengwane tätre sribi prekursor nuainne, aune tätre Ju ja Ükarakrö sribere bätä ja töi jeñebiti tätre sribire gätä kri köbömä nuainta ye näire. ¿Ja ruin ño ietre? Niaratre tä niere: “Nunta nüne jondron braibebiti aune juta ükaninte Jehovakwe tä dre ribere ye nunta nuainne ye tä kä mike juto nunbätä”.

Salomón kukwe tikani: “Mä okwä rabadre nikren metre ja käne, jän, mä okwä ye rabadre nikren ja känenkäre” (Prov. 4:25). Ni karo ngwanka tä nikren metre ja käne, ye erere ni rabadre ñaka ja näkwite jondron madabätä, ñobätä ñan aune ni ñan raba kukwe ja üaire mike nuaindre jai aune mike nemen bare.

 ¿Kukwe meden meden mika raba nuaindre jai? Ñodre, ni raba sribire köbö täte Ngöbö kräke. Arato, niken konkrekasion te nitre ribeta kukwe driekäre yekänti, o konkrekasion känti nitre umbre aune nitre sribikä konkrekasionte ribeta yekänti. ¿Mä raba ja töi mike niken konkrekasion ye dimike? ¿Mä tö dre nuain ye mä raba mike gare ni ni tuabitikä konkrekasionte ie? Mä töita nänbätä kä mente känti, aune konkrekasion meden tä ja di ribere ye mäkwe ngwantari ie. *

Kukwe bämikani Isaías 62:10 yebätä ani töbiketa. Nitre Judea ruäre sribibare ja dibiti ji ükatekäre ne kwe nitre Israel mada rikadreta kä kwetre yekänti. ¿Niaratre sribibare ja dibiti ye köböire kukwe kwin namani bare? Jän, ñobätä ñan aune juta Ngöbökwe ye namaninta kwin ja käite. Mätä ja di ngwen sribi ja üaire nuainkäre angwane mäkwe ñaka ja di ngwan nekä. Jehová diebiti rabai nemen bare mäi. Kukwe meden tä mä jiete ye mäkwe dianka mento aune Ngöbökwe mä mikadre töbätä ye mäkwe ribe ie. Niarakwe mä dimikai “ji nänkäre mäi ye [...] ük[e]te metre” (Prov. 4:26).