Ni abokän muko käkwe tuanimetre ye ruäre tärä gare mäi. Nitre tä ja tuenmetre ye nemen bare kä jökräbiti tibien. Ñodre, kukwe ngwantaribare nitre juta Polonia yei aune mikani gare kwetre nitre kä 30 biti bäri abokän tä gure kä komä o kä kwä ti te ye tä ja tuenmetre. Akwa, nitre kä ye närebiti ye ñan aibe tä ja tuenmetre.

Instituto de Política Familiar, tä España tä mike gare “nitre nibokä kätä ja mäkete köbö arabe te kä Europa yekänti ye iti tä ja tuenmetre”. Juta te nitre jondron bökäne yete kukwe ye erere tä nemen bare arato.

¿Nitre tä ja tuenmetre ye bitikäre dreta nemen bare? ¿Jata nemen ruin ño ietre? Meri iti ie mäträ gare ni mada gure yebätä nünanka kä Europa kädrikri, ye käkwe niebare: “Ja tuanmetreta ye tä mike gare metre: nitre gure ñaka niena ja mäke kwin jabe aune tä kä mikekä jabätä aune töi ñaka tä nemen kwin”. Niebare kwe arato, “kätä niken ta angwane jata nemen ruin jene jene ietre aune ye ñaka dianka raba töite, ñodre, tä nemen rubun krubäte, jata nemen ruin ngite ie, ja ñaka ruin kwin ie, töita nemen ngwarbe kwäräkwärä aune tä nemen ja gaire”. Nitre tuanmetreta ye ruäre ngwane töta nemen ja murie ketai. “Gobran tä kukwe meden ribere ietre ja tuanmetrekäre ye ükateta kwetre ye bitikäre kukwe mada tä nemen bare niaratre yebätä. Jata nemen ruin kaibe ie ye ngwane raba nemen kukwe ne niere: ‘Ti muko ti tuanimetre aisete, ¿ti abokän ni ño? ¿Drekäre tikwe nünandre?’”.

Kukwe ye namani bare Ewa yebätä ye ngwane ja namani ruin ño ie ye niara tä mike gare: “Ti tuanmetreba ye ngwane nitre nünanka ti bäre aune nitre sribikä tibe nämä ti kädeke meri ‘tuanimetre’ ye nämä ti mike ja gaire krubäte. Ti nämä rubun krubäte. Ti muko ti tuanimetre monso kia nibu ben, aisete ti nämä ja mike niaratre rüne aune meyere”. * Adam, nämene sribire ni umbrere konkrekasionte ye käi nikani 12 ta, niarakwe niebare: “Ja ñaka ruin ütiäte tie, aune ruäre ngwane tita nemen rubun aune ti töta nemen kä mikaikä nitre jökräbätä”.

Dre rabai bare ja känenkäre yebätä nitre tä töbike krubäte, niaratre ja tuanimetre ye käi nikanina kwati krubäte ta, akwa yebiti ta tätre ja di ngwen krubäte ne kwe töi rabadreta jäme. Nitre ye raba nemen töbike ni mada ñaka töita niaratre yebätä. Meri kukwe mikaka gare kwin käkwe niebare erere, “kukwe meden niara nämene nuainne ye erere ñaka rabaira nuainne aune ja tuai kaibe kwe kukwe ruäre ben”.

Stanisław ie tä törö: “Ti muko ti tuanmetreba ye ngwane monso merire kia nibu tikwe ye niara ñaka törbaba ti tuai nemen känti. Kukwe ye käkwe ti mikaba töbike aune ti rababa nütüre ni mada ñaka töi  nämä tibätä, aune Jehovakwe ti tuanimetre arato rababa ruin tie. Ti ñaka törbaba ja tuai nire. Akwa, kä rikaba ta angwane rababa gare tie ti ñaka nämä töbike metre”. Dre rabai bare ja käne yebätä Wanda nämene töbike krubäte, niara tä niere: “Ni mada aune ja mräkätre konkrekasionte ye ñaka käkwe ti aune monsotre tikwe töibikai jire chi nämene nemen ruin tie. Akwa, nengwane nüke gare tie ja mräkätre nun ngübabare aune ti dimikani krubäte kwetre monsotre tikwe tötikakäre ne kwe rabadre sribire Jehová kräke”.

Nitre ruäre tä ja tuenmetre ye bitikäre kukwe keta kabre ñaka kwin tä nemen töite ye ñaka dianka raba jötrö ngwarbe. Nitre tuanimetre ye ie ja ñaka raba nemen ruin ütiäte aune raba nemen nütüre ni mada ñaka töita bätätre. Ne madakäre, nitre nünanka niaratre bäre tä dre nuainne ye rüere raba kite ñäke, aune ye köböite raba nemen nütüre ja mräkätre konkrekasionte ñaka töita bätätre o ñaka niaratre töi mike nüke gare jai. Akwa, namani bare Stanisław aune Wanda yebätä erere, kä rikai ta angwane rabai gare ietre ja mräkätre kukwebätä töi nämene niaratre yebätä arato. Erametre, konkrekasion tä niaratre dimike krubäte, akwa kenanbe niaratre ñaka kukwe ye gain.

Nikwe ja di ngwain krubäte niaratre dimikabätä, akwa ngwandre törö jai ja mräkätre kukwebätä abokän muko käkwe tuanimetre yei ruäre ngwane ja rabai ruin kaibe. Metrere, ja ngwaitre abokän muko kwe käkwe tuanimetre raba nemen nütüre ni mada ñaka töitabätä. Alicja ie nükani gare: “Ti muko ti tuanimetre ye käi nikanina kwä kwä ta, akwa ruäre ngwane jata nemen ruin ngwarbe tie ni madabätä. Jata nemen ruin kore tie angwane tita niken kaibe mentokwäre aune tita ja muaire bätä jata nementa ruin bobre akwle tie”.

Nitre tä ja tuenmetre ye bäsi jökrä ie jata nemen ruin ye erere, akwa Biblia tä niere ni ñaka rikadre mento ni madabätä, ñobätä ñan aune ye raba ni töi mike ‘kukwe kite Ngöbökri’ ye ñaka kain ngäbiti (Prov. 18:1). Ja mräkä o ja ngwai muko kwe käkwe tuanimetre aune ja ruin kaibe ie bätä rikadre ja di kärere meri o brare mada ie ye ñaka kwin. Nuaindre kwetre angwane kukwe ñaka kwin raba nüke niara aune ni niara dimikaka ye töite.

Ja mräkätre aune ja ngwaitre abokän muko kwe käkwe tuanimetre ye töite kukwe keta kabre raba nüke. Ne madakäre, dre rabai bare ja käne ye jürätä nemen bätätre angwane ja raba nemen ruin kaibe ietre aune raba nemen nütüre ni mada ñaka töita bätätre. Kukwe ye tä nüke niaratre töite aune ñaka nuäre diankakäre, aisete nikwe niaratre dimikadre Jehová tä nuainne erere (Sal. 55:22; 1 Ped. 5:6, 7). Erametre, niaratre debe biain krubäte nie kukwe yebätä. ¡Rabai gare ietre ja ketamuko erametre tä kwetre konkrekasionte! (Prov. 17:17; 18:24.)