1. ¿Nita Ngöbö mike täte ye ngwane dreta nemen bäri ütiäte ni kräke?

JU MENTE kwin jabiti o kä jondron kira mikara tuare, ¿yebätä mäkwe Ngöbö kä Jehová ye tuanina tikani? Erametre, namani tuin kwin krubäte mäi. Ngöbö kä ye ütiäte ni kräke: ¡ñobätä ñan aune ni abokän testiko Jehovakwe! Nitre mada kädeka ñaka Ngöbö kä yebiti ni erere. Akwa, Ngöbö kä ngwandre jabätä ye sribi kri tä mikani ni kisete ye gare nie.

2. Nita Ngöbö kä ngwen jabätä ye ütiäte krubäte, ¿aisete nikwe ja ngwandre ño?

² Jehovakwe ni kadre ngäbiti yekäre ñan niara kädekadrete jerekäbe, ñakare aune kukwe ükaninte kwe ja ngwankäre kwin nie ye ererebätä nikwe nünandre. Ye medenbätä, Biblia tä ngwen törö ni itire itire niara mikaka täte yei: “Jändrän käme Ngöbö rüere, yebtä kä mikaka [mun]kwe” (1 Ped. 3:11). Sribi kri tä ni kisete ye apóstol Pablo mikani gare metre kukwe ne tikabare kwe ye ngwane: “Nita Gobran kri kä kädekete jabätä, käkwe kä mikadrekä jondron käme dionte” (2 Tim. 2:19, Ngöbö Täräe [NGT], tärä okwä ükaninte). Ni Testiko tä Jehová kädekete jabätä yebätä nüke gare kwin. Akwa, ¿ni raba ño kä mikekä kukwe käme yebätä? ¿Ni raba ño ñaka kukwe käme ye kain ngäbiti?

3, 4. ¿Texto meden kätä nitre kukwe Bibliabätä mikaka gare mike töbike kä kwati krubäte te, aune ñobätä?

³ (Ñäkädre 2 Timoteo 2:19 yebätä.) * Texto nekänti Pablo blitabare “jukrä Ngöbökwe abrä tä dime tibien” yebätä, aune yete kukwe ketebu mikata gare. Kena, “Ji dokwäte kri [Jehová, TNM] ie, ni kwe gare”, kukwe ye arabe tä tikani Números 16:5 yete (kukwe ja tötikara käne mikadre ñärärä). Ketebukäre, “nita Gobran kri kä kädekete jabätä, käkwe kä mikadrekä jondron käme dionte”, ¿ñobätä kukwe ye nitre kukwe Bibliabätä mikaka gare mikanina töbike kä kwati krubäte te?

⁴ Pablo kukwe niebare ye ngwane, kukwe niebarera abokän niara nämene kädekete. Akwa, Pablo kukwe niebare ye erere ñaka tikani texto madabätä Kukwe Tikani Hebreore yekänti. Ye erere ngwane, Pablokwe niebare “nita Gobran kri kä kädekete jabätä, käkwe kä mikadrekä jondron käme dionte”, ¿yebiti nämene dre mike gare? Pablokwe kukwe ye niedre känenkri, blitabare kwe Coré ja mikani nitre kädekani rüere abokän kädrieta Números kapitulo 16 yebätä. ¿Pablo kukwe niebare ketebukäre ye tä blite arato kukwe nakaninkä yebätä?

5-7. ¿Kukwe meden nakaninkä Moisés näire abokänbätä Pablo blitabare 2 Timoteo 2:19? (Üai bämikani kena mikadre ñärärä.)

⁵ Biblia tä niere Datán aune Abiram, niaratre ye Eliab monsoitre, käkwe ja mikani Coré yekri ja mikakäre Moisés aune Aarón rüere (Núm. 16:1-5). Niaratre ñaka Moisés mikani ütiäte jai aune Ngöbökwe Moisés kädekani ye niaratre ñaka tö namani kain ngäbiti. Nitre ye namani kukwe tare mike ja üairebiti nitre Ngöbö mikaka täte metre kräke, ñobätä ñan aune niaratre nämene nüne juta Jehovakwe ngätäite siba. Akwa, nire nämene Ngöbö mike täte metre aune nire abokän nämene bike bäri ye mikakäre gare Jehovakwe kukwe mikani gare metre nuaindre.

⁶ Kukwe ne namani bare: “Jehovakwe niebare Moisés ie: ‘Nitre tä ja ükaninkrö yebe mäkwe blita, aune mäkwe nie ietre: “¡Coré, Datán aune Abiram käkwe jondron kwata sribebare jure jai yebätä kä mikekä!”’. Ye bitikäre, Moisés nükani krö aune nikani Datán aune Abiram yekänti, aune nitre umbre Israel nikani ben. Nitre nämene ja ükaninkrö yei niarakwe niebare: ‘Nitre töi käme käkwe jondron kwata sribebare jure jai yebätä kä mikekä, aune jondron meden kwetre yebätä ñaka kise mika, ne kwe mun ñaka murie ketadre ngite kwetre ye köböite’. Jötrö ngwarbe niaratre kä mikaninkä kwäräkwärä Coré, Datán aune Abiram jondron kwata sribebare jure jai yebätä” (Núm. 16:23-27). Jehovakwe nitre bikaka bäri ye jökrä murie ketani. Akwa, nitre niara mikaka täte metre ye namaninte nire, ñobätä ñan aune niaratre nikani mento nitre töi käme yebätä, aune yebiti bämikani kwetre nämenentre kä mikekä kukwe käme yebätä.

⁷ Dreta nitre brukwäte ye gare Jehovai aune nire tä niara mike täte metre ye gare ie. Akwa, ye ñan aibätä nitre niara mikaka täte metre ye namani kwekebe, ñakare aune ja töi mikani kwatibe kwetre kä mikekä kukwe blo yebätä. Ye tä mike gare, kukwe namani bare kädrieta Números 16:5, 23-27 yebätä Pablo nämene töbike ngwane kukwe ne tikani kwe: “Nita Gobran kri kä kädekete jabätä, käkwe kä mikadrekä jondron käme dionte”. Kukwe ne metre ñobätä ñan aune kukwe ye känenkri niarare tikabare: “Ji dokwäte kri [Jehová] ie, ni kwe gare” (2 Tim. 2:19, NGT).

8. ¿Ngöbö kä Jehová ye kädekadrete o ni tädre konkrekasion kristiano yete ye ngöräbe?

⁸ Pablo nämene blite kukwe nakaninkä Moisés näire yebätä angwane, ngwani törö kwe Timoteo ie niara ja töi mikadre kwati kukwe nuainne ja mäkä Jehovabe ye kriemikakäre. Coré aune nitre ja ketaka ben nämene Ngöbö kä kädekete ye ñan ai köböire Ngöbökwe kani ngäbiti, ye erere Timoteo tädre konkrekasion kristiano yete ye ñan ai köböire Ngöbökwe kadre ngäbiti. Ütiäte krubäte nitre Ngöbö mikaka täte metre ja töi mikadre kwatibe “kä mik[e]kä jondron käme dionte”. ¿Kukwe ye  niebare Timoteo ie angwane töbikabare ño kwe? Ngöbö die köböire Pablo kukwe niebare mäträkäre, ¿ye tä dre driere ja töi kräke nitre Jehová mikaka täte kä nengwane ie?

9. ¿“Kukwe ngwarbe, aune kukwe ñan nüketari gare” yebätä ja kweta nämene ye köböite dre namani bare konkrekasion kristiano siklo kena yete?

⁹ Kukwe meden käme abokänbätä nikwe kä mikadrekä ye Kukwe Ngöbökwe tä niere metre nie. Ñodre, Pablo kukwe niebare 2 Timoteo 2:19 ye bitikäre Timoteo arabe ie niebare kwe: “Ñan [...] ja kwet[a]” kukwe ruärebätä aune “blita dätika näin käme käme ngwarbe” ye ñaka kan ngäbiti (ñäkädre 2 Timoteo 2:14, 16, 23 yebätä). * Nitre ruäre konkrekasionte nämene kukwe ngwarbe driere ne kwe nitre mada kukwe metre tuanemetre aune ja mikadre rüere. Arato, ruäre nämene kukwe niere ne kwe ja mräkätre rabadre ja kwete. Kukwe nie nämene kwetre ye Biblia ñaka nämene ñäkäire, akwa kukwe ye köböite ja mräkätre konkrekasionte ñaka nämene ja mäke kwin. Ye medenbätä, Pablokwe niebare Timoteo ie “kukwe ngwarbe, aune kukwe ñan nüketari gare, ne mä ñansi töibika [ka ngäbiti, TNM]”.

10. ¿Nitre kukwe metre tuanmetrekä aune ja mikaka rüere jatadre kukwe driere ye ngwane nikwe dre nuaindre?

¹⁰ Kä nengwane nitre kukwe metre tuanmetrekä aune ja mikaka rüere ye ñaka raba kwen nie konkrekasionte. Akwa, kukwe drie ñaka Bibliabätä ye nire jatadre driere ye nikwe ñaka kadre ngäbiti jire. Nitre kukwe metre tuanmetrekä aune ja mikaka rüere yebe ni ñaka rabadre ja kwete kukwe ruärebätä ngwärere, Internet yebiti o jondron mada yebiti. Ni törbadre ni ye dimikai angwane, ni ñaka tä kukwe nieta Bibliakwe abokänbätä nita ja tötike ye mike täte. Nitre Jehová mikaka täte kätä kä mikekä täte nitre kukwe metre tuanmetrekä aune ja mikaka rüere yebätä.

11. a) ¿Kukwe meden raba ni töi mike ja kwete “kukwe ngwarbe” yebätä”? b) ¿Nitre umbre rabadre dre nuainne kukwe kwin bämikakäre?

¹¹ Nitre kukwe metre tuanmetrekä aune ja mikaka rüere ye köböite konkrekasion ñaka raba ja mäke kwin, akwa kukwe raba nakainkä abokän köböite kukwe tare raba nemen bare. Ñodre, töbika ñaka ja erebe kä ngwan juto jabätä yebätä, ye raba ni töi mike ja kwete “kukwe ngwarbe, aune kukwe ñan nüketari gare” yebätä. Nire rabadre kukwe ñäkäita Bibliakwe ye nuainne kä ngwankäre juto jabätä angwane, nitre umbre ñaka rabadre kukwe ye tuenmetre nemen bare, aune ñaka rabadre kä jürä ngwen jabätä nuainkäre (Sal. 11:5; Efes. 5:3-5). Akwa, niaratre rabadre ja ngübarebiti ne kwe ñaka ja töi jeñe driedre kwetre. Niaratre rabadre kukwe nieta Bibliabätä nitre umbre kräke ye mike täte: “Nitre tödekaka Jesubti tä obeja kwrere Ngöbö ngwärekri amne tä mikani ngibiadre munye, ye abko munkwe ngibia kuin [...], munkwe ñan ja mika dänkiene, akwa niaratre käkwe nünandre kuin, abkokäre mun ara jire käkwe nüna kuin niaratre okwäbti” (1 Ped. 5:2, 3; ñäkädre 2 Corintios 1:24 yebätä).

12, 13. a) ¿Nitre testiko Jehovakwe tä jondron ja näkwitara mike tuin ño jai? b) ¿Jondron dianta jai ja näkwitara ye ngwane kukwe meden nieta Bibliabätä ja jie ngwankäre abokän ngwandre törö jai? c) ¿Kukwe kädrite párrafo 12 ye raba ni dimike ño kukwe tä gare ni itire itire ie yebätä?

¹² Película, videojuego keta kabre, tärä o kansion meden kukwe nuadre o meden ñaka kukwe nuadre ye juta ükaninte Ngöbökwe ñaka tä känene ni kräke. ¿Ñobätä? Ñobätä ñan aune Biblia tä ni kristiano itire itire nübaire “dre dre kuin amne dre dre käme Ngöbö ngwärekri” ye mike gare kwin jai (Heb. 5:14). Kukwe nieta ja jie ngwankäre ye raba kwen nie Bibliabätä abokän tä ni dimike kukwe kwin den ja käne jondron dianta jai ja näkwitara yebätä. “Jändrän mden mden tuen dbe ni Dänkienye” yebätä ja töi mikadre kukwe jökrä känti (Efes. 5:10). Biblia tä niere nitre ji ngwanka mräkätre käne rabadre niere mräkätre kwe yei jondron meden ñaka diandre kwetre jai ja näkwitara, ñobätä ñan aune niaratre tä ji ngwen käne (1 Cor. 11:3; Efes. 6:1-4). *

 ¹³ Kukwe Bibliabätä ja jie ngwankäre abokänbätä blitani ye ñaka nieta jondron dianta jai ja näkwitara ye aibe kräke. Kukwe mada känti kukwe ye ngwandre törö jai. Ñodre, ja ngwäkitadre aune ja ükadrete ño, dre kwetadre aune dre ñaka kwetadre aune kukwe mada abokän tä gare ni itire itire ie yebätä nitre ja mräkäre raba kite ñäke jai. Kukwe nuainta abokän Biblia ñaka ñäkäire ye ngwane ni Jehová mikaka täte ñaka rabadre ja kwetebätä, ñobätä ñan aune “ni sribikä ni Dänkienkwe abko ñan tädre ja kwete ni mda mdabe, akwa ni dirikä ye abko tädre ja gete jäme ni jökräbe” (2 Tim. 2:24).

14. ¿Pablokwe kukwe meden bämikani mikakäre gare nie ni ñaka ja ketamuko käme känändre?

¹⁴ “Nita Gobran kri kä kädekete jabätä, käkwe kä mikadrekä jondron käme dionte”, ¿ye nuaindre kukwe meden känti? Nire tä kukwe käme nuainne yebe ñaka ja ketadre. Pablo blitabare “jukrä Ngöbökwe abrä tä dime tibien” yebätä. Ye bitikäre, kukwe bämikakäre blitabare kwe arato “ni jändrän bkänkä kri gwir[e]” yebätä, ju yete “ñan oro btä plata dätebare blatore amne basore aibe tä kwe amne, kri kukwän btä dobro dätebare blatore amne basore tä kwe arato. Akwa jändrän kuin orore btä platare abko tä ni ütiäte ütiäte kakrä ngäbti amne, kri kukwän btä dobro sribebare blatore amne basore, ye abko tä sribi ngwarbe ngwarbekrä gwita” (2 Tim. 2:20, 21). Ye medenbätä, mäträbare kwe nitre kristiano yebätä ne kwe vaso abokän “tä sribi ngwarbe ngwarbekrä” yebätä tädre mente.

15, 16. ¿“Ni jändrän bkänkä kri gwir[e]” yebätä kukwe bämikata ye tä dre driere nie?

¹⁵ ¿Kukwe bämikani kwe ye tä dre mike gare? Konkrekasion kristiano ye Pablo tä kete “ni jändrän bkänkä kri gwir[e]” yebätä aune ja mräkätre tä konkrekasionte ye ketata “baso” ye kwrere. Jondron ruäre raba nemen käme jondron ñaka kwin tä yete gwita yebätä. Ye medenbätä, ñaka mikata keteitibe jondron mada tä kwin yebe. Ñodre, jondron biti mrö riata ye mika ñaka raba jondron käme yebe.

¹⁶ Ye erere arato, nitre Jehová mikaka täte tä ja di ngwen ja ngwen kwin ye ñaka rabadre ja kete jire nitre konkrekasionte abokän tä nierare kukwe Bibliabätä ja jie ngwankäre ñaka mike täte yebe (ñäkädre 1 Corintios 15:33 yebätä). Nikwe ñaka ja ketadre nitre tä ja ngwen käme  konkrekasionte yebe nieta, ye erere ñaka ja ketadre nitre abokän ñaka tä konkrekasionte yebe, ñobätä ñan aune nitre ye tä “ngwian tarere bäri [...], rün btä meye ñan kukwei mik[e] täte [...], Ngöbö rabadi ütiäte ñakare kräke arato [...], rabadi blite ngwarbe ni mda mda rüere [...]. Erere arato, rabadi kukwe nuene blo ni mda mdabtä abko käi rabadi juto btätre, akwa jändrän kuin rabadi tuen käme ietre. Erere arato, rabadi kukwe muko kwekwe kite ngite ngwarbe, kä jürä rabadi ñakare btä kukwe kämekäme nuene. Rabaditre bike bäri krikri ni mda mdabtä, tö rabadi kä ngwen nuäre jabtä, akwa Ngöbö taredi ñakare kwetre” (2 Tim. 3:1-5).

17. ¿Nitre Israel ja mikaka metre täte käkwe dre nuainbare kä mikakakäre kukwe blo yebätä?

¹⁷ Coré, Datán aune Abiram jondron kwata sribebare jure yebätä nitre Israel kä mikadrekä niebare ietre angwane ja töi mikani kwatibe kwetre nuainne drekebe ngwarbe, ye mikata gare Bibliabätä. Kukwe Ngöbökwe tä niere “jötrö ngwarbe niaratre kä mikaninkä” aune ñan töbikabare bati bobu kwetre nuainkäre (Núm. 16:24, 27). Tä niere arato nitre ye: “Kä mikaninkä kwäräkwärä”. Nitre Israel ja ngwanka metre ñan tö namani kukwe tare tuai nemen bare jire chi jabätä, ye medenbätä dre ribebare ietre ye erere nuainbare kwetre. Niaratre ja mikani Jehová yekri aune kukwe blo rüere ye mikani gare metre kwetre. ¿Kukwe nuainbare kwetre ye tä dre driere nie?

18. Pablo niebare Timoteo ie: “Jändrän kämekäme mdei tä krübäte ni bati batiye abko ngäniene ma gitia” ye ngwane, ¿nämene dre mike gare ie?

¹⁸ Nita ja mäke Jehovabe ye ni tö kriemikai angwane ja töi mikadre kwatibe kukwe nuainne aune nuaindre bengwairebe. Pablo tö namani Timoteo tuai kukwe ye erere nuainne, yebätä niebare kwe ie: “Jändrän kämekäme mdei tä krübäte ni bati batiye abko ngäniene ma gitia” (2 Tim. 2:22). Timoteo namanina umbre, kä nämene 30 biti bäri niara yebiti raba ruin nie, ¿se ñobätä Pablo kukwe ye niebare? Ñobätä ñan aune ni bati ñan aibe ie jondron käme käme medei tä krubäte. Ye medenbätä, Timoteo gitiadre kukwe käme yebätä arato. Kukwe yebiti nämene mike gare rabadre “kä mik[e]kä jondron käme dionte”. Jesukwe kukwe ye erere bäsi niebare: “Ma okwä köböite ma raba ja mike ngite Ngöbö rüere, ne ngwane makwe ja okwä ye diante kwati mento, bti makwe kitaka mobe” (Mat. 18:9). Kä nengwane nitre kristiano tä kukwe ye mike täte angwane kukwe meden raba kukwe tare mike kisete kukwe ja üairebiti ye tätre ja töi mike kwatibe ñaka nuainne aune tätre ja kriemike bengwairebe.

19. ¿Ni kristiano ruäre ja töi mikanina dre nuainne ja kriemikakäre kukwe ja üairebiti?

¹⁹ Ja mräkätre ruäre jämi nemen Testiko ye ngwane nämene dö ñain krubäte, akwa nengwane tä ja töi mike ñaka dö ñain jire chi. Jondron ja näkwitara ye ruäre ñaka blo, akwa ja mräkätre mada tä ja töi mike ñaka ja näkwite jondron yebiti, ne kwe töi ñan rabadreta kukwe käme jiebiti (Sal. 101:3). Ja mräkä iti jämi nemen Testiko ye känenkri nämene niken bietabätä abokän känti ja mika gure käme käme ye nuain nämene. Akwa, kukwe metre namani gare ie angwane ja töi mikani kwe ñaka bailare. Nitre kristiano ruärebe tä bieta nuainne kä ngwankäre juto jabätä yete niara ñaka niken bailare jire, ñobätä ñan aune baile ye raba niara töi miketa kukwe nuain nämene käne kwe yebätä ye jürä nämene nemen niarabätä. Erametre, dö, baile bätä jondron mada mada ye ñaka blo aune ñäkäi ñaka täte nitre kristiano ie. Akwa, ni itire itire rabadre ja töi mike kwatibe kukwe nuainne bengwairebe ja kriemikakäre kukwe ja üairebiti.

20. “Kä mikadrekä jondron käme dionte” ye ñaka nuäre akwa, ¿dre tä ni mike tö ngwen aune ni töi mike jäme?

²⁰ Ni kädekata Ngöbö kä yebiti ye kukwe ütiäte tä nikwe. Ni rabadre “kä mik[e]kä jondron käme dionte” aune kukwe käme yebätä (Sal. 34:14). Kukwe ye nuaindre ye ñaka nuäre ye gare nie. Akwa, Jehová ie “ni kwe gare” aune nire ñaka niken mento ji kwe yebätä ye niarakwe taredi jankunu ye tä ni töi mike jäme (2 Tim. 2:19; ñäkädre 2 Crónicas 16:9a yebätä). *