1, 2. a) ¿Adán aune Eva nämene nüne ño kena? b) ¿Kukwe meden meden ngwantarita abokän mikai gare jai kukwe ja tötikara nekänti?

ADÁN aune Eva sribebare ye ngwane rüe ñaka nämene jire. Ñaka nämene ja mike ngite aune nämene nüne kä bä nuäre te. Niaratre namani Ni ni Sribekä monsoire, aisete nämene ja kete kwin ben (Gén. 2:7-9; Luc. 3:38). Ngöbökwe sribi biani ietre ye käkwe mikani gare niaratre nünandi nuäi (ñäkädre Génesis 1:28 yebätä). * Niaratre ñaka nämene nüna kärekäre ye ribere jai “ngäbäkre ngüba[käre] kwati [...] aune [...] sribi[käre] kä tibien[bätä]”, akwa “jondron nire jateta” ye ngübakäre niaratre rabadre nüne kärekäre. Adán aune Eva käkwe jondron nire ye ngübadre käre.

² Akwa, ¿ñobätä nita nüne kore kä nengwane? ¿Ñobätä ni rüe krubäte abokän köböite ni ñaka nüne kä jutobiti? ¿Ñokänti gata ni jökrä rüe bäri käme ye nükani? ¿Ngöbökwe dre nuaindi diankakäre? Kukwe ngwantarita ye aune kukwe mada ye Biblia tä mike gare. Tä dre niere ye ani mike gare jai.

3, 4. a) ¿Jehovakwe dre niebare Adán aune Eva ie mikakäre mokre? b) ¿Ñobätä ütiäte niaratre rabadre kukwe ye mike täte?

³ Adán aune Eva nünandre kärekäre, akwa ja nire ñaka krüte ye ñan nämene kwetre. Niaratre murie jäkädre, mrödre aune kübiadre nünankäre. Akwa, nünankäre jankunu rabadre ja kete Jehovabe, niara köböire niaratre namani nire (Deut. 8:3). Nünankäre kwin niaratre rabadre Ngöbö tuenmetre ja jie ngwen. Eva sribedre kwe ye känenkri niebare kwe Adán ie: “Kri jökrä tä kä bä nuäre nete ye mä raba ngokwä kwete mä törba kwetai nuäi ye näre. Akwa kri dre kwin aune dre käme mikakäre gare jai, ye mä ñaka raba ngokwä kwete, ñobätä ñan aune köbö medente mäkwe kwetai ye ngwane, mä krütai” (Gén. 2:16, 17).

⁴ “Kri dre kwin aune dre käme mikakäre gare jai”, ye nämene bämike Ngöbö aibe raba niere dre kwin aune dre käme. Jondron meden kwin aune dre käme ye nämenena gare ruäre Adán ie: Ngöbökwe niara sribebare ja bä kwrere aune töi mikani kwe arato. Akwa, kri ye nämene ngwen törö Adán aune Eva ie käre niaratre ja tuanemetre jie ngwandre Jehovai. Niaratre kri ngokwä kwetadre angwane, kukwe yebiti mikadre gare kwe Ni niaratre Sribekä yei: “Mätä kukwe ükete ye nun ñaka ribere jai”. Kukwe ye köböite kukwe tare rabadre bare niaratre aune monsotre kwetre yebätä. Jehovakwe niebare ietre ye erere niaratre krütadre.

5. ¿Ñobätä Adán aune Eva ñaka Jehová mikani täte?

⁵ Ngöbökwe kukwe biani nuaindre Adán ie ye niarakwe mikani gare Eva ie. Kukwe ye namani gare kwin Eva ie, ñobätä ñan aune kukwe kwatire kwatire ye niebareta jökrä kwe (Gén. 3:1-3). Mikani gare kwe kulebra ie. Satana monso üaire Ngöbökwe tö namani ja tuai kri aune ja jie ngwain kaibe ye nämene ja bämike kulebra erere (Santiago 1:14, 15 mikadre ñärärä arato). Tö namani kukwe käme nuain, yebätä Ngöbö biani kwe ni ngökö. Eva ñaka Ngöbö mikai täte angwane ñaka krütai niebare kwe ie. Eva rabai Ngöbö kwrere niebare kwe ie arato (Gén. 3:4, 5). Eva niara kukwei mikani era jai aune kri ngokwä kwetani kwe, yebiti bämikani kwe ñaka tö nämene ja tuainmetre jie ngwandre Ngöböi. Ye bitikäre, Adán töi mikani kwe kukwe ye arabe nuainne (Gén. 3:6, 17). Satana niara ngökani (ñäkädre 1 Timoteo 2:14 yebätä). Adán kri ngokwä kwetadre ye ngwane nämene kukwe ñaka kwin nuainne ye nämene gare ie, akwa muko kwe kukwei mikani täte kwe. Kenanbe kulebra ye ñaka namani tuin käme, akwa kulebra yebätä ni töi käme nämene ja ükani, aune nämene gare ie kukwe ngwarbe niedi kwe ye köböite kukwe tare rabadi bare.

6, 7. ¿Jehová kukwe ükaninte ño Adán aune Eva yebe?

⁶ Jehová nämene jondron keta kabre aune ja nire bien Adán aune Eva ie, akwa niaratre töi nämene ja aibebätä ye käkwe töi mikani ja mike niara rüere. Dre nämene nakainkä yebätä Ngöbö ye töi nämene arato (1 Crón. 28:9; ñäkädre Proverbios 15:3 yebätä). * Adán, Eva bätä Satana nämene niara mike tuin ño jai ye niarakwe tuanimetre mike tuare. Niara ye nämene nitre ye Rüne, aisete niaratre kukwe nuainbare ye namani tare krubäte kräke (Génesis 6:6 mikadre ñärärä arato). Akwa, niara ye Ni Kukwe Ükatekä, ye medenbätä kukwe ükaninte metre kwe ye ererebätä niara rabadre kukwe nuainne nitre ye mikakäre ja ngie nuin.

⁷ Ngöbökwe niebare Adán ie: “Köbö medente mäkwe [kri dre kwin aune dre käme mikakäre gare jai] kwetai ye ngwane, mä krütai”. Adán namani nütüre Ngöbökwe  “köbö” niebare ye ngwane nämene blite köbö köböiti metre yebätä aune Ñänä rikai nekä ye känenkri niara krütai. Akwa, “kä jatani tibore dere angwane” Jehovakwe blitabareta nitre nibu yebe (Gén. 3:8, Jändrän Kena). Niara ye Ni Kukwe Ükatekä, yebätä nitre ja mikani ngite ye dre niedi kukwe mikakäre jabiti ye niarakwe kukwe nuabare käne (Gén. 3:9-13). Ye bitikäre, niarakwe gata ñäkäbare kräke (Gén. 3:14-19). Niara nitre ye murie ketadre bengwairebe akräke, niara töi nämene dre nuainbätä ni kräke ye ñaka rabadre bare (Is. 55:11). Adán aune Eva ja mikani ngite ye köböite kukwe keta kabre tare jatani nemen bare, akwa Jehovakwe niaratre tuanimetre nüne kä debe näre te ne kwe niaratre monsoi rabadre aune kukwe kwin rabadre bare ja käne monsotre ye kräke. Niaratre ja mikani ngite ye ngwane namanina ngwakare Jehová okwäkänti. Niara kräke köbö köböiti ye kä mil krati erere, aisete niara okwäkänti nitre ye krütani jötrö ngwarbe köbö “köböiti” te (2 Ped. 3:8).

8, 9. ¿Adán ja mikani ngite ye köböite dre namani bare monsoitre yebätä? (Üai bämikani kena mikadre ñärärä.)

⁸ ¿Adán aune Eva ja mikani ngite ye ngie nikani monsotre kwe yebiti? Jän. Apóstol Pablo käkwe mikani gare Romanos 5:12 (TNM) yekänti: “Ni itibe köböite ngite ye jatani ni jökräbiti, aune ja mika ngite ye köböite gata ye jatani, aune ne köböite gata ye jatani ni jökräbiti, ñobätä ñan aune ni jökrä käkwe ja mikani ngite”. Abel ni ja ngwanka metre ye krütani käne (Gén. 4:8). Ye bitikäre, Adán monsoitre aune bränkätre mada namani umbre aune krütani. ¿Ngite ye nikani niaratre yebiti arato? Pablo mikani gare: “Ni itibe [...] käkwe Ngöbö kukwei kitani temen, ye köböite ni kwati nikani kukwe nuene kämekäme” (Rom. 5:19). Nitre jökräbiti ngite aune gata ye nikani Adán aune Eva köböite. Ngite aune gata ye ni rüe abokän ngänikaire ni ñaka raba ngitie jire. Ngite ye namani ño ni ngrabarebätä ye ñaka gare metre ta nie, akwa kukwe keta kabre tä nemen bare ni ngrabarebätä ye tä mike gare ni ngite.

⁹ Ye medenbätä, Biblia tä gata aune ja mika ngite ye bämike “dänkwäbiti nitre jökrä tä minianinte” aune “jondron tä mikani juta jökräbiti tä dikani ja teta” ye kwrere (Is. 25:7). Dänkwä doboko ye tä ni jökräbiti aune tä ni murie ötökä. Biblia tä niere: “Adán köböite ni jökrä [...] tä krüte” (1 Cor. 15:22). Yebätä Pablokwe ngwantaribare: “Käre tita ja mike ngite ti ngrabare nebti abtä tita mente Ngöböye. ¿Ne kisete nirekwe ti tikadrete se?” (Rom. 7:24). ¿Ni mada raba Pablo dentari kukwe yebätä? *

10. a) ¿Texto meden tä mike gare Jehovakwe gata ye diainkä? b) ¿Bersikulo ye tä dre mike gare nie Jehová aune Monso kwe yebätä?

¹⁰ Jehová aibe raba Pablo dentari. Isaías blitabare “dänkwä” yebätä, ye bitikäre tikabare kwe: “Niarakwe erametre gata ye ñaikä kärekäre, aune Däkien Gobranka kri Jehová, käkwe nitre jökrä okwä ñöi sökaite ngwärebätä” (Is. 25:8). Jondron meden tä monso mike ja tare nike ye nitre rüne tä denkäbätä töi kwinbiti aune tä okwä ñöi sököte, ye erere Adán köböite gata nikani nibätä ye Jehovakwe diainkä kärekäre. Jesús niara dimikai ye nuainne. Tärä 1 Corintios 15:22 yete nieta: “Adán köböite ni jökrä [...] tä krüte, ye kwrere arato Kristo köböire Ngöbökwe ni jökrä [...] mikadita nire”. Pablo ngwanintari nire niara diaintari, ye bitikäre niara arabe käkwe niebare: “Ngöbö  aibe abko ie tita kuin niere ni Dänkien Jesukristo köböire” (Rom. 7:25). Adán aune Eva ja mikani Jehová rüere, akwa niara ni kä nebätä tarebare jankunu. Jesukwe Rün dimikani ni kä nebätä sribere ye käkwe ni kä nebätä tarebare jankunu arato (Prov. 8:30, 31). Akwa, ¿nitre diaintari ño ngite aune gata yebätä?

11. ¿Jehovakwe dre nuainbare nitre kä nebätä dimikakäre?

¹¹ Adán ja mikani ngite ye ngwane, Jehovakwe gata ñäkäbare kräke. Aune ye köböite ngite aune gata nikani nitre jökräbiti (Rom. 5:12, 16). Biblia tä mike gare: “Ño ni iti käkwe ja mikani ngite köböite ni jökrä ngwani ja ngie nuin” (Rom. 5:18, TNM). ¿Jehovakwe dre nuaindre nitre kä nebätä dimikakäre aune kukwe ükaninte kwe ye ñaka kite tibien? Jesukwe kukwe niebare ne tä mike gare nie: “Ni brare monsoi [...] jatani [...] ja nire biankäre ni kwati kökatarikäre” (Mat. 20:28, TNM). Jesús ñaka ja mikani ngite jire, ye medenbätä “ni jökrä köka[nintari]” kwe. ¿Jehovakwe kukwe ükaninte kwin metre ye namani ño ütiäte ni kökanintari kwe yebiti? (1 Tim. 2:5, 6, TNM.)

12. ¿Jehovakwe kukwe ükaninte kwin metre ye namani ño ütiäte ni kökanintari kwe yebiti?

¹² Jesús ñaka därebare ngite, aisete kukwe kwin nämene Adán kräke ye erere nämene niara kräke. Adán monsoitre ye rabadre kwati kä jökräbiti tibien ie Jehová tö namani. Akwa, Adán köböite ja nire metre nianinte, ye medenbätä Jesukwe ja nire ñaka ngite ye bianinta täte aune ye nuainbare kwe nämene Rün aune nitre kä nebätä tarere yebätä. Ye bitikäre, Jehovakwe niara ganinkröta ni üaire erere (1 Ped. 3:18). ¿Jehovakwe kukwe ükaninte kwin metre ye namani ño ütiäte ni kökanintari kwe yebiti? Ja nire metre nianinte Adán kän ye täte Jesús ja nire ñaka ngite bianinta. Ja nire ñaka ngite biani kwe ye köböire ni kä nebätä kökataribare o ngite nikwe ütiä biani, aune jondron kwin nianinte Adán kän ye rabadreta nikwe. Pablo mikani gare: “Ni käne kädian nämane Adán abko Ngöbökwe mikani nire, akwa Adán mrä kädianta Kristo ne abko Üai kwe köböire tä ni miketa nire” (1 Cor. 15:45).

13. ¿“Adán mrä” ye käkwe dre nuaindi nitre krütanina ye kräke?

¹³ Gwäune, Jesús “Adán mrä” käkwe nüna kärekäre ye biain Adán monsoitre yei. Niaratre jökrä bäsi krütanina, aisete gaikröta kwe nünankäre Kä tibienbätä (Juan 5:28, 29).

14. ¿Nitre kä nebätä mikai ño kwäre ngite yebätä?

¹⁴ ¿Nitre kä nebätä ye mikai ño kwäre ngite yebätä? Jehovakwe kukwe ükaninte ne kwe “Adán mrä” aune nitre 144,000 dianinkä nitre kä tibienbätä ngätäite ye käkwe gobrain (ñäkädre Apocalipsis 5:9, 10 yebätä). Nitre 144,000 ye nämene ngite käne, aisete niaratre rabai reire angwane rabai gare metre ietre ni ngite ie ja ruin ño. Kä mil krati te niaratre aune Jesús käkwe nitre nünanka Kä tibienbätä dimikai ne kwe rabadre ñaka ngite jire (Apoc. 20:6).

15, 16. a) ¿Biblia tä blite ni “rüe mrä” yebätä angwane dre gärätä, aune ñongwane diainkä? b) Tärä 1 Corintios 15:28 tä niere ye erere, ¿Jesús käkwe dre nuaindi?

¹⁵ Kä mil krati rabaira krüte ye ngwane, nitre kä tibienbätä Ngöbö mikaka täte metre ye rabaira kwäre ngite aune gata yebätä. Pablo mikani gare: “Adán köböite ni jökrä kä nebtä tä krüte, ye kwrere arato Kristo köböire Ngöbökwe ni jökrä tödekaka Kristobti mikadita nire. Akwa Ngöbökwe kukwe ükaninte, erere rabadi bare ja täritäri abko krörö: Ngöbökwe Kristo mikaninta nire käne, yebti Kristo jatadita angwane, ni kwekwe tödekaka niarabti [käkwe gobrandi ben] abko rükadita nire [...]. Kristo jatadita angwane, üai käme tä dänkiene nibtä kä nebtä amne jändrän mda mda üai käme kwrerekwrere abko gadikä jire jökrä kwe. Abti kä mrä angwane,  gobran [...] ye mikadita Rün Ngöbö kisete kwe. Ngöbökwe jändrän jökrä mikani gare Kristoye, aisete Kristo rabadi gobrane abti rüe jökrä ye mikadi ja ngoto täni kwe. Yebti Kristokwe gata mikadi mrä ja ngoto täni ne abko Kristo rüe mrä ganaindi kwe” (1 Cor. 15:22-26). Erametre, gata ni “rüe mrä” nikani nibiti Adán köböite ye diainkä kärekäre. “Dänkwä” doboko tä nitre jökrä kä nebätä yebiti ye ñaka rabaira (Is. 25:7, 8).

¹⁶ Apóstol Pablo käkwe niebare jankunu: “Jondron jökrä mikai niara kisete ye ngwane, Monso ye käkwe ja mikaita gare arato Ngöbö jondron jökrä mikaka niara kisete yei, ne kwe Ngöbö ye aibe rabadre ji dokwäre jondron jökrä kräke” (1 Cor. 15:28). Jesús mikani gobrane kukwe nuainkäre ye rabaira bare täte. Kä jutobiti niarakwe gobran aune nitre kä tibienbätä ye biainta Jehovai, ñobätä ñan aune nitre ye rabaira ñaka ngite jire.

17. ¿Dre rabai bare Satana yebätä?

¹⁷ Satana köböite nitre kä nebätä tä ja tare nike, ¿niara yebätä dre rabai bare? Kukwe ye mikata gare Apocalipsis 20:7-15 yekänti. Kä mil krati ye bitikäre, nitre kä tibienbätä rabaira ñaka ngite ye Satanakwe ja di ngwain mike nemen kö okwäte. Biti, niara aune nitre jökrä käkwe ja ketai ben ye jökrä gaite kärekäre. Niaratre gaite ye Biblia tä kädeke “gata bobukäre” (Rev. [Jondron tä rakadrekä täräe] 21:8, Ngöbö Täräe, tärä okwä ükaninte). Gata ye ñaka “mikadi mrä ja ngoto täni”, ñobätä ñan aune nitre krütai “gata bobukäre” yete ye krütai kärekäre. Akwa, “gata bobukäre” ñaka rabaira nitre tä Jehová mike täte metre aune tarere ye rüere.

18. ¿Ngöbökwe sribi biani nuaindre Adán ie ye mikai nemen bare ño?

¹⁸ Ni jökräbätä ngite ñaka rabaira aune Jehovakwe kai ngäbiti ne kwe nüna kärekäre ye rabadre kwetre. ¡Ni rüe ñaka rabaira jire! Sribi biani nuaindre Adán ie ye rabai bare aune ñaka niara köböire. Nitre kwati niara mräkäre rabai kä tibienbätä, niaratre käkwe Kä tibien aune jondron nire ngübadi. Jehovakwe gata ni rüe mrä diainkä, ¡ye kai rabai juto nibätä!