Nita sribire Jehovabe ye mikadre ütiäte jai
“[Ni] abko sribikä jen Ngöbökwe.” (1 COR. 3:9)
1. a) ¿Jehová tä sribi mike tuin ño jai? b) ¿Nitre sribebare kwe ye tä mike dre nuainne?
KÄRE Jehová tä sribire kä jutobiti (Sal. 135:6; Juan 5:17). Niara tö angeletre aune nitre kä nebätä tuai sribire ye erere, ye medenbätä tä sribi bien ietre ne kwe kä rabadre juto bätätre. Ñodre, niarakwe Monso itibe kwe ye mikani jondron jökrä ye sribere jabe (ñäkädre Colosenses 1:15, 16 yebätä). Biblia tä mike gare nie Jesús jämi kite Kä tibienbätä ye känenkri sribibare kwe Ngöböbe kä kwinbiti “ni sribikä kwin krubäte kwrere” (Prov. 8:30).
2. ¿Jehová tä käre sribi ütiäte bien angeletre ie abokän tä kä mike juto bätätre ye ñokänti gare nie?
2 Jehová tä sribi bien käre angeletre ie ye Biblia tä mike gare Génesis nemen Apocalipsis yekänti. Adán bätä Eva ja mikani ngite aune juanintari kä Edén ye bäre mento, ye ngwane Ngöbökwe “kerubine mikani Edenbtä kädriri. Arato Dänkin Ngöbökwe ngitra jutra ngitiekä mikani känti abko, nämane nübrete ja bäre ta nekwäre sekwäre Edente, kri ni mikakrä nüne kärekäre ye ni ñan rabare neme jire chi känti” (Gén. 3:24, Jändrän Kena). Apocalipsis 22:6 tä mike gare Jehovakwe “angele kwe juani abko kukwe mden mden rakadikä bä jötrö mikakäre tuare sribikä kwekwe ie”.
NGÖBÖTA SRIBI BIEN NITRE KÄ NEBÄTÄ IE
3. ¿Jesús nämene Kä tibienbätä ye ngwane ja ngwani ño kwe Rün erere?
3 Jesukwe nünanbare Kä tibienbätä ye ngwane Rünkwe sribi mikani kisete ye nuainbare kwe töi kwinbiti. Aune Jehovakwe kukwe nuainbare ye erere Jesukwe sribi ütiäte biani nuaindre nitre ja tötikaka ben yei arato. Kukwe ne niebare kwe ietre töi mikakäre sribire kä jutobiti: “Nire nire käta tödeke tibti, ye abko sribi kri nuenta tikwe, ye kwrere nuendi kwe arato. Akwa mtare ti bike nikenta ti Rün känti, aisete ni ye käkwe sribi bäri kri nuendi Ngöbö diebti” (Juan 14:12). Ne madakäre, mikani gare kwe ietre rabadre sribi ye nuainne jötrö ngwarbe: “Nikwe sribidre kä trä ngwenbti, ñobtä ñan angwane [...] kä jatadi kä iko kwrere, ye näire ni ñan rabadre sribire jire chi mda” (Juan 9:4).
4-6. a) Jehová kukwe niebare ye erere Noé mikani täte, ¿ñobätä nita debe bien kukwe yebätä? b) ¿Jehovakwe kukwe ribebare Moisés ie ye erere nuainbare kwe ye köböire dre kwin tä nemen nikwe? c) ¿Ngöböta sribi bien nitre kä nebätä ie ye jökrä köböire dreta nemen bare?
4 Jesús jämi kite Kä tibienbätä ye känenkri, Jehovakwe sribi bianina nitre kä nebätä ie ne kwe sribi ye kä mikadre juto bätätre. Ngöbökwe sribi biani Adán aune Eva ie ye niaratre ñaka nuainbare, akwa niarakwe dre ribebare ye nitre mada abrä käkwe nuainbare (Gén. 1:28). Ñodre, arka sribedre ño ye niebare kwe metre ta Noé ie, ne kwe Noé aune mräkätre ye rabadrete nire Ñü Kri näire. Kukwe niebare ye Noé mikani täte jökrä ye köböire nita nire kä nengwane (Gén. 6:14-16, 22; 2 Ped. 2:5).
5 Ye erere arato, tabernáculo sribedre ño aune nitre ükadrete ño sribikäre sacerdotere niebare Jehovakwe ye erere Moisés nuainbare (Éx. 39:32; 40:12-16). Niarakwe sribi ye nuainbare ribebare ie ye erere, ¿ye köböire dre tä nemen nikwe? Kukwe kwin rabai bare ja känenkäre ye bämika nämene tabernáculo aune nitre sacerdote ükaninte yekwe ye apóstol Pablo niebare (Heb. 9:1-5, 9; 10:1).
6 Ngöbö tö dre nuain ye tä kite nemen bare ye ererebätä tä sribi mada bien nitre niara mikaka täte yei; akwa sribi ye tä Jehová käikitekä aune kukwe kwin mike nemen bare nitre ja ngwanka metre kräke. Jesús jämi kite Kä tibienbätä aune nünanbare kwe ni kä nebätä erere ye ngwane kukwe ye nuainbare kwe (Juan 4:34; 17:4). Ye erere arato, sribita ni kisete kä nengwane ye tä Jehová käikitekä (Mat. 5:16; ñäkädre 1 Corintios 15:58 yebätä). ¿Sribi ye tä Jehová käikitekä ño?
NGÖBÖTA SRIBI BIEN NIE YE MIKADRE ÜTIÄTE JAI
7, 8. a) Nitre kristiano tä sribi meden meden ütiäte nuainne kä nengwane ye kädekete. b) ¿Jehovata ni jie ngwen ye mikadre tuin ño jai?
7 Ni ngite akwa Jehovata ni mike sribire jabe ye tä kä mike juto nibätä, ¿ñan ererea? (1 Cor. 3:9.) Nitre tä Ju Gätä Kri Nuainkäre, Ju ja Ükarakrö aune sukursal sribere ye tä sribire Noé aune Moisés ye erere. Nane nita sribi ye erere nuainne, ñodre Ju ja Ükarakrö ükete o nita central mundial sribeta mrä kä Warwick (Nueva York) yekänti sribire siba (üai bämikani kena mikadre ñärärä). Nita ye nuainne angwane, nikwe mikadre tuin ütiäte jai: ye sribi deme nuainta nikwe. Sribi mada ja üaire nuainta abokän ni kristiano jökrä nübaita nuainne. Ni nübaita kukwe driere aune ye tä Jehová käikitekä aune nire tä kukwe ye mike täte yekwe kukwe kwin tä nemen (Hech. 13:47-49). Juta ükaninte Ngöbökwe tä ni töi mike sribi ye nuainne bäri kwin. Ye medenbätä, ruäre ngwane tä sribi mada mrä bien nie.
8 Nitre kristiano ja ngwanka metre ye tä käre ja tuenmetre jie ngwandre juta ükaninte Jehovakwe yei töi kwinbiti (ñäkädre Hebreos 13:7, 17 yebätä). Ñobätä kukwe ribeta nuaindre bä jene nie ye ñan tä nemen nüke gare täte nie kenanbe. Akwa, kukwe meden tä nemen tuin kwin Jehovai ye ererebätä tä ükete, yebätä nita niara dimike angwane, kukwe kwin tä nemen nikwe.
9. ¿Nitre umbre tä kukwe meden kwin nuainne konkrekasion okwäkänti?
9 Nitre umbre tä kukwe nuainne konkrekasion okwäkänti ye tä bämike niaratre töita krubäte Ngöbö töi nuainbätä (2 Cor. 1:24; 1 Tes. 5:12, 13). Tätre juto biare sribikäre ja dibiti aune kukwe keta kabre nuainta kwetre kukwe driekäre ribeta ietre ye ererebätä. Kukwe ükateta kukwe driekäre teléfono yebiti, ru kri mrente tä nüke yekänti o nitre tä nüke kwati yekänti ye köböire dre kwin rabai bare ye ñaka tä nemen gare ietre kenanbe, akwa tätre ja töi mike nuainne ye ngwane kukwe kwin tä nemen bare ye niaratre tä tuin. Ñodre, nitre nibokä sribikä prekursor juta Alemania yekänti, käkwe ja töi mikani kukwe driere kä jondron rürübäinkäre yekänti, aune kä yekänti kukwe drie ñaka nämene krubäte. Iti kädekata Michael abokän tä sribire ni umbrere ie kukwe ne törö: “Kä rikaba kwati krubäte ta nunkwe ñaka sribi ye nuainba, yebätä nun nämä nikenkä krubäte. Jehová ie kukwe jökrä tuin, aisete niarakwe kukwe kwin mikaba nemen bare nun kräke dekä kukwe driebätä köbö yete. Nunkwe tö ngwanba niarai aune täräkwata Sribi Nikwe Ngöbökrä yebätä kukwe niebare kukwe driekäre ye erere nunkwe nuainba ye kä mikaba juto nunbätä”. ¿Ni raba kukwe ye erere niere arato? ¿Ni tö kukwe mrä bä jene nuain kukwe driekäre?
10. ¿Juta ükaninte Ngöbökwe käkwe dre nuainbare kä nikani bitinkä ta yete?
10 Ruäre ngwane kukwe mada ükateta sukursal nikwe yekänti. Kä nikani ruäre ta yete, sukursal keta kabre bäri chi ye mikani keteitibe sukursal bäri kri yebe. Kukwe ükaninte ye käkwe ja mräkätre mikani kukwe mada ükete jai, akwa ye köböire kukwe kwin tä nemen bare ye tuin niaratre jökrä ie (Ecl. 7:8). Nitre sribikä kä jutobiti ye tä sribire gwairebe juta Jehovakwe kä nengwane yebe ye kukwe ütiäte tä kwetre.
11-13. ¿Juta ükaninte Ngöbökwe käkwe kukwe mada ükaninte yebätä ja mräkätre ruäre käkwe ja töi mikani dre nuainne?
11 Sukursal keta kabre mikani keteitibe yete ja mräkätre kwati nikani sribire ye tä kukwe ütiäte driere ja töi kräke nie ye ani mike gare jai. Ja mräkätre aune ja ngwaitre ye käkwe sribibare kä kwati krubäte te sukursal nämene niaratre käite yekänti. Nitre gure nämene sribire sukursal keteiti Centroamérica yete ye nübaibare niken nüne México sribikäre Betelte ja mräkätre bäri kwati ye ngätäite. Ñodre, Rogelio tä mike gare: “Ñaka rababa nuäre nun kräke nun mräkätre aune ja ketamuko nunkwe ye tuanmetrekäre”. Ja mräkä mada kädekata Juan nikani México, tä niere: “Nita nüke kena ye erere ja rababa ruin tie, ti rababa nitre känene ja ketamukore aune kukwe nuainta juta yete aune nitre töita ño ye ti jataba kain ngäbiti”.
12 Ja mräkätre nämene sribire Betel juta ruäre Europa yete nikani nüne sukursal Alemania, niaratre ye kräke ñan namani nuäre arato. Nitre kätä kä ngutuäre bä nuäre tarere yei raba nüke gare ja mräkätre nämene sribire Suiza ye kräke ñan namani nuäre kä bä nuäre ngutuä Alpes ye tuanmetrekäre. Ja mräkätre nämene nüne jäme Austria yei kä ye namani nüketa törö.
13 Nitre tä niken nüne juta madate ye tätre ja kite nünankäre kä biani nünankäre ie yete, tätre sribire ja mräkätre ñan nämene gare ietre yebe aune ruäre ngwane tätre ja kite sribi mada nuainkäre. Arato niaratre tä nemen konkrekasion madate aune kukwe driere kä madakänti aune ruäre tätre ja kite blitakäre kukwe madabiti. Kukwe ye nuaindre ye ñaka nuäre, akwa nitre sribikä Betel tä kain ngäbiti töi kwinbiti. ¿Ñobätä tätre ye nuainne?
14, 15. a) ¿Ja mräkätre tä sribire Jehovabe kä ño erere känti ye tä sribi mike tuin ütiäte jai ye bämikata ño kwetre? b) ¿Ni raba ja töi mike ño niaratre ye erere?
14 Grethel tä niere: “Ti nübaiba ye tikwe ka ngäbitiba, ñobätä ñan aune yebiti tikwe mikaba gare Jehovai niara tare tikwe aune ñan tita nuainne juta tikwe, ju, o sribi ruäre tä ti kisete yebätä”. Dayska tä niere: “Jehovakwe ti nübaiba, yebätä ti ñan töbikaba bati bobu ka ngäbitikäre”. André aune Gabriela tätre töbike ye erere arato, niaratre tä niere: “Rababa gare nunye nun raba sribire Jehová kräke ye erere aune nun tö dre ie ja kräke ye nun ñan mikadre bäri ütiäte”. Niaratre tä nütüre juta ükaninte Jehovakwe tä kukwe mada ükete ye ngwane bäri kwin kadre ngäbiti töi kwinbiti aune ye ererebätä ja jie ngwandre.
Kukwe bäri ütiäte tä nikwe: ¡ye abokän nita sribire Jehovabe!
15 Sukursal keta kabre mikata keteitibe ye ngwane nitre sribikä Betelte ye nübaita sribi prekursor nuainne. Sukursal Dinamarca, Noruega aune Suecia mikani keteitibe abokän kädekani sukursal Escandinavia, ye ngwane kukwe ye erere namani bare ja mräkätre ruärebätä. Ñodre, Florian aune Anja käkwe niebare: “Sribi ñaka nuäre bianta nuaindre nunye, akwa ye tä kä mike juto nunbätä. Jehová tä nun mike sribire kä ño erere känti ye kwin krubäte. Ja brukwä tätebiti nun raba niere kukwe kwin namani krubäte nunkwe”. Ni jökrä bäsi käkwe ñan ja tuai kukwe ye erere ben, akwa ni rabadre ja töi mike ja mräkätre ye erere aune Gobran Ngöbökwe mike käne, ¿ñan ererea? (Is. 6:8.) Kä ño erere känti nita sribire Jehovabe ye nita mike tuin ütiäte jai angwane käre niarata kukwe kwin nuainne ni kräke.
NITA SRIBIRE JEHOVABE YE NIKWE NUAINDRE JANKUNU KÄ JUTOBITI
16. a) ¿Gálatas 6:4 tä kukwe meden niere nie mäträkäre nibätä? b) ¿Sribi meden abokän bäri ütiäte tä nikwe?
16 Ni kä nebätä därebare ngite, aisete dre nuainta nikwe ye nita kete jondron nuainta ni madakwe yebätä. Akwa, dre nuain raba ye aibebätä nikwe ja töi mikadre ye Ngöbö Kukwei tä niere (ñäkädre Gálatas 6:4 yebätä). Ni jökrä ñaka tä kädekani konkrekasion jie ngwankäre. Ni jökrä ñaka raba sribire prekursor, misionero o sribire Betel. Akwa, ni jökrä kisete sribi bäri ütiäte mikani ye nikwe ñaka käi kwitadrekä jabiti: kukwe drieta yebiti nita sribire Jehovabe. Ye kukwe ütiäte tä nikwe, ¿ñan ererea?
17. a) Kä gobrainta Satanakwe täi kore angwane, ¿kukwe meden ñaka rabai bare täte nie? b) ¿Ñobätä kukwe ye ñaka rabadre ni ngwen di nekä?
17 Kä gobrainta Satanakwe täi kore angwane ni tö dre dre nuain Jehová kräke ye ñaka rabai nuäre nuaindre nie. Akwa ye ñan aibätä ja di ngwandre nekä. Ni mräkätre tä ngübadre nie, nita bren o kukwe mada mada tä ni kisete ye köböite ni ñan raba sribire krubäte Ngöbö kräke, akwa ni raba niara kä aune Gobran kwe ye mike gare kä jökrä ngwane. ¡Nikwe ñaka sribi ye mikadre tuin jai jondron ñan ütiäte kwrere! Dre dre raba nemen bare nie ye erere nuaindre ye bäri ütiäte. Ja mräkätre abokän tä sribire bäri ye kräke Jehovakwe kukwe kwin mikadre nemen ye nikwe kärädre ie. Nitre jökrä tä Jehová käikitekä ye ütiäte niara kräke ye ngwandre törö jai.
18. ¿Nikwe ja töi mikadre dre nuainne aune ñobätä?
18 Ni ngite aune kukweta nainte nie, akwa yebiti ta nita sribire Jehovabe ye tä kä mike jutobätä. ¿Nita sribire ben kä krüte näire ye nita mike tuin ütiäte jai? Nita ye nuainne angwane, ni töi rabai kwatibe kä mrä ye ngübabätä aune kä yekänti ni törbai dre nuain ye erere nikwe nuain. Kä ye rükai angwane nikwe nünain kärekäre, töi jämebiti aune kä jutobiti (1 Tim. 6:18, 19).
¿Nita sribire Jehovabe ye nita mike ütiäte jai? (Párrafo 16 nemen 18 mikadre ñärärä)
19. ¿Dre tä Jehovakwe ni kräke kä ja känenkäre yete?
19 Nitre Israel namanina nänkäre Kä Käbämikani yekänti angwane Moisés kukwe niebare ietre yebätä nikwe töbikadre, ñobätä ñan aune ni nibira kä mrä ken arato. Niebare kwe: “Mätä sribi nuainne ye Jehová Ngöbö mäkwe käkwe mikai nemen bare krubäte mä kräke” (Deut. 30:9). Armagedón ye bitikäre, Jehovakwe Kä tibien käbämikani ye biain kwe ni sribikä ben yei. Ye ngwane sribi mada mrä mikai ni kisete: kä tibien ne ükete bä nuäre.