GUY HOLLIS PIERCE nämene Nitre Braibe Konkrekasion Jökrä Ngübabitikä Testiko Jehovakwe erere. Köbö martes 18 marzo kä 2014 yete kä nämene 79 niarabiti ye ngwane sribibare mrä kwe Kä tibienbätä. Niara abokän Kristo mräkä arato, yebätä ganinkrö nünankäre kä kwinbiti (Heb. 2:10-12; 1 Ped. 3:18).

Köbö 6 noviembre kä 1934 yete Guy Pierce därebare kä Auburn (California, Estados Unidos) yekänti, aune kä 1955 yete niara ja ngökabare ñöte. Kä 1977 yete niara ja mäkäninte Penny ben, aune niaratre monso ngübabare kabre. Yebätä, niara nämene ni mada tarere krubäte. Kä 1982 yete, Penny aune niara ja mikani sribi prekursor nuainkäre. Ye bitikäre, kä 1986 yete niaratre namani sribire ni circuito tuabitikä Estados Unidos, aune niaratre sribi ye nuainbare kä 11 te.

Kä 1997 yete niaratre nübaibare sribire Betel Estados Unidos. Aune Oficina Känti Kukwe Drie Jie Ngwanta yekänti ja mräkä Pierce sribibare. Kä 1998 yete niara namani Nitre Dianinkä Kätä Nitre Kädeke Sribire Betel ye dimikaka. Watch Tower Bible and Tract Society of Pennsylvania gätä nuainbare köbö 2 octubre kä 1999 yete, mikani gare ja mräkä Pierce kädekani Nitre Braibe Konkrekasion Jökrä Ngübabitikä. Krütadre ye känenkri sribi keta kabre nuainbare kwe: Nitre Dianinkä Kätä Nitre Kädeke Sribire Betel, Nitre Dianinkä Mrö Ja Üaire Sribeta Jie Ngwankäre, Nitre Dianinkä Tärä Sribeta Jie Ngwankäre aune Nitre Dianinkä Kukwe Ükatekäre.

Kä nämene kötare ngwärebätä aune nämene kukwe niere kötaidre yebätä ja mräkätre nünanka kä jene jene känti aune kukwe jene jene gare ietre yei ja nämene nemen ruin kwin niarabe. Akwa, niara nämene nitre tarere, ja töi mike bobre, kukwe ükaninte aune kukwe biani Jehovakwe ni jie ngwankäre ye nämene mike ütiäte jai aune nämene tö ngwen kwatibe Jehovai, yebätä ja mräkätre nämene tarere metrere. Kukwe käbämikata Jehovakwe ye rabadre bare metre ie Guy Pierce tö namani aune tö namani kukwe metre ye tuai nemen gare nitre jökrä ie.

Ja mräkä Pierce ye ñaka nämene nainte sribi Jehovakwe nuainbätä. Nämene nüke dekä krö aune bä kabre nämene sribire nükebe kä raire te deu. Niarakwe dikakabare kä jökräbiti tibien ja mräkätre aune ja ngwaitre dimikakäre. Käre nämene kä denkä jai ja mräkätre nämene sribire Betel ye kräke aune ja mräkätre mada nämene kite mäträmana jabätä ie o ja di kärere ie o basare jerekäbe ie. Niara nämene ja mräkätre kain ngäbiti jakänti, ja kete bentre aune kukwe kwin Bibliabätä niere ietre dimikakäre, yebätä ja mräkätre ie niara nämene gare yebiti käi ñaka nikwitekä.

Erametre, niara muko, niara ngäbriäntre ni ti, bräntre aune bräntre ye ngäbriäntre, aune nitre jökrä nämene niara mike ja rüne, ye rabai ja mräkä aune ja ketamuko nikwe ye uliere. Köbö sábado 22 marzo kä 2014 yete, ja mräkä Mark Sanderson Nitre Braibe Konkrekasion Jökrä Ngübabitikä kukwe kädriebare ja mräkä Pierce krütani ye kräke Betel Brooklyn yekänti. Ne madakäre, ja mräkä Pierce nämene tö ngwen nüna kä kwinbiti ie yebätä blitabare kwe aune Jesús kukwe niebare nebätä ñäkäbare kwe: “Ti Rün tikwe, känti kä tärä kabre nünankrä. [...] Ye erere ti näinta kä ükete munkrä, yebti ti jatadita mun tuenta, kä näin mun ngwena jabe angwane, ti tädi ti Rün känti, ye känti mun tädi ketetibe tibe, abkokäre ti näin mun ngwena. Mdakäre abko, ti näin mdente, ye känti ji garera kuin munye” (Juan 14:2-4).

Nun täi ja mräkä Pierce uliere krubäte. Akwa ji medenbiti nämene näin kä nünankäre kärekäre kokwäre abokän nämene gare ie ye käi juto nunbätä.