1, 2. ¿Jesukwe dre nuainbare deu köbö 14 nisán kä 33 yete? (Üai bämikani kena mikadre ñärärä.)

KÖBÖ 14 nisán kä 33 yete sö nämene ngwen täte o bolore Jerusalén. Jesús aune nitre apóstol kwe nämene Pascua käi ngwen juto jabätä. Ngöbökwe nitre Israel mikani kwäre Egipto kä 1,500 nikani ta känenkri ye ngwankäreta törö jai niaratre nämene kä kwatire kwatire fiesta ye käi ngwen juto jabätä. Fiesta ye nuainbare kwetre ye bitikäre, Jesukwe fiesta mrä kömikani nitre apóstol 11 ja ngwanka metre yebe. Nitre nänkä jiebiti ye rabadre jankunu fiesta ye nuainne kä kwatire kwatire te Jesús ja nire biani ngwankäreta törö jai (Mateo 26:1, 2).

² Fiesta mrä ye kömikakäre Jesukwe orasion nuainbare. Biti ban ñaka mritani levadurabe ye biani kwe nitre apóstol kwe yei aune niebare kwe ietre: “Kaen ngäbti munkwe, bti munkwe kweta”. Ye bitikäre vino nämene copa yete diani kisete kwe, orabareta kwe aune niebare kwe ietre: “Uba döi tä basote ne ñaen [...] munkwe” (Mateo 26:26, 27). Ban aune vino ye nämene kukwe bämike jerekäbe. Köbö ye näire deu, ban aune vino yebiti dre bämika nämene ye Jesukwe  driebare nitre apóstol kwe yei aune kukwe mada keta kabre ütiäte driebare kwe ietre.

3. ¿Kukwe meden meden ngwantarita abokän mikai gare jai kukwe ja tötikara nekänti?

³ Jesús murie ketadre ye nitre nänkä jiebiti rabadre ngwenta törö jai kä kwatire kwatire te ie niara tö namani. Ja känenkäre fiesta ye kädekani, “Däkien Jesús Mrö Biani Deu” (1 Corintios 11:20, TNM). Kä nengwane kädekata Jesús Ja Nire Biani Ngwanta Törö Jai. Kukwe ja tötikara nekänti kukwe ngwantarita ne mikai gare: ¿Jesús ja nire biani ye ñobätä ni rabadre ngwenta törö jai? ¿Ban aune vino ye tä dre bämike? ¿Ni rabadre ja mike ño juto fiesta ye nuainkäre? ¿Jesús Ja Nire Biani Ngwanta Törö Jai yete nire nire rabadre ban kwete aune vino ñain? ¿Nüna kärekäre käbämikata Ngöbökwe yebätä nitre kristiano tä debe bien ye tätre bämike ño?

4. Jesús ja nire biani nitre kä tibienbätä kräke, ¿ye köböire dre raba nemen nikwe?

⁴ Adán ye köböite ni jökrä tä ja mike ngite aune krüte (Romanos 5:12). Ni mikakäre kwäre ngite aune gata yebätä ni iti namani biandre Ngöböi ni kökatarikäre. Akwa ni jökrä tä därere ngite, yebätä ni ñaka jire iti ni kökatarikäre (Salmo 49:6-9). Jesús abokän töi metre. Niarakwe ja nire biani ni kräke aune ye köböire ni kökataridre ribe nämene nikwe jai ye ütiä biani kwe Ngöböi. Ye köböire, ni raba nemen kwäre ngite aune gata yebätä, aune ni raba nüne kärekäre (Romanos 6:23; 1 Corintios 15:21, 22).

5. a) ¿Jehová aune Jesús tä ni tarere ye bämikani ño kwetre? b) ¿Ñobätä ni rabadre niken Jesús Ja Nire Biani Ngwanta Törö Jai yebätä?

⁵ Jehová aune Jesús tä ni kä nebätä tarere krubäte ye bämikani kwetre. Ni kökataridre ni nämene ribere jai ye Jehovakwe ütiä biani ni kräke (Juan 3:16). Aune Jesús namani juto ja nire biankäre. Erametre, niara jämi kite Kä tibienbätä ye känenkri nämenena ni kä nebätä tarere krubäte (Proverbios 8:30, 31). ¡Jehová aune Jesús kukwe nuainbare ni kräke yebätä nita debe bien krubäte! Aisete kä kwatire kwatire te nita niken Jesús Ja Nire Biani Ngwanta Törö Jai yebätä. Ye erere nita Jesús kukwe biani nuaindre ne mike täte arato: “Käre munkwe [nuain] kore ti ngwiankrä töre jae” (1 Corintios 11:23-25).

6. Jesús kukwe niebare ban aune vino yebätä, ¿yebiti dre mikani gare kwe?

⁶ Jesús mröbare mrä nitre apóstol ben ye ngwane ban aune vino yebiti dre bämika nämene ye driebare kwe ietre. Ban yebätä niarakwe niebare: “Ne tä ti ngrabare bämike”. Aune vino yebätä niebare kwe: “Ne tä ti ‘däriebiti kukwe ükaite’ ye bämike, abokän iainte ni kwati ütiäre” (Marcos 14:22-24, TNM). Jesús ñaka ja ngrabare ye kwitani ban erere aune ñaka ja därie ye kwitani kwe vino ye erere. Niara kukwe niebare yebiti mikani gare metre kwe ban aune vino yebiti nämene kukwe bämike jerekäbe.

7. ¿Ban ñaka mritani levadurabe bianta Jesús Ja Nire Biani Ngwanta Törö Jai ngwane ye tä dre bämike?

⁷ Ban ñaka mritani levadurabe bian nämene Pascua yete ye arabe Jesukwe biani köbö yete deu (Éxodo 12:8). Bibliabätä, ruäre ngwane ngite ye bämikata levadura yebätä (Mateo 16:6, 11, 12; Lucas 12:1). Aisete ban ñaka mritani levadurabe biani Jesukwe ye tä niara ngrabare ñaka ngite ye bämike (Hebreos 7:26). Yebätä, kä nengwane  ban ñaka mritani levadurabe ye bianta Jesús Ja Nire Biani Ngwanta Törö Jai yete.

8. ¿Jesús Ja Nire Biani Ngwanta Törö Jai yete vino bianta ye tä dre bämike?

⁸ Vino biani Jesukwe ye tä niara därie bämike. Ye erere arato Jesús Ja Nire Biani Ngwanta Törö Jai yete vino bianta ye tä kukwe arabe bämike. Jesús murie ketani ni ütiäre juta Jerusalén ye bäre mento. Kä yekänti niarakwe ja nire biani ni ütiäre ne kwe “ngite [...] dian[dre]kä mento” nibätä (Mateo 26:28; 27:33). ¿Kukwe nuainbare kwe yebätä nita debe bien ye ni raba bämike ño? Jesús Ja Nire Biani Ngwanta Törö Jai ye nuaindre känenkri nikwe ja mikadre juto fiesta ütiäte ye nuainkäre. Ni raba ja mike juto ño ye ani mike gare jai.

9. a) Jesús Ja Nire Biani Ngwanta Törö Jai kräke texto dianinkä ñäkäkäre, ¿ye ñobätä ni rabadre ñäkebätä? b) ¿Ni kökataribare yebätä ja ruin ño mäi?

⁹ Jesús Ja Nire Biani Ngwanta Törö Jai ye kräke nikwe ja mikadre juto, yekäre nikwe ñäkädre niara murie keta jämi ye känenkri dre nuainbare kwe yebätä. Jesús Ja Nire Biani Ngwanta Törö Jai ye kräke texto Bibliabätä dianinkä ñäkäkäre abokän tä mikani tärä chi kädekata Texto Ja Tötikakäre Köbö Kwatire Kwatire yekänti yebätä ni raba ñäke. * (Nota mikadre ñärärä.) Biblia tä kukwe niere yebätä nikwe ñäkädre ye ütiäte krubäte. ¿Ñobätä? Ñobätä ñan aune, Jesús murie ketani ye köböire dre dre tä ni itire itire kräke yebätä tä ni dimike töbike. Kukwe ye ütiäte krubäte ja mikakäre juto Jesús Ja Nire Biani Ngwanta Törö Jai ye kräke. Meri iti Testiko käkwe tikabare: “Kä jutobiti nunta Jesús Ja Nire Biani Ngwanta Törö Jai ye ngübare ngäbiti. Kä kwatire kwatire yete tä nemen tuin bäri ütiäte nunye”. Texto meden meden tä blite ni kökanintari yebätä ye nämene gare jökrä ie aune driedre ño ye nämene gare ie arato. Akwa rün krütani ye ngwane nükani gare bäri ie Jesús murie ketani ye ütiäte krubäte ni kräke. Yekwe töi mikaninta jäme krubäte.

10. ¿Dre dre mada ni raba nuainne ja mikakäre juto Jesús Ja Nire Biani Ngwanta Törö Jai ye kräke?

¹⁰ Ja ükatekäre köbö ye kräke nikwe kukwe  driedre bäri arato. Ni raba kä ye näire sribi prekursor ausiliar nuainne. Ye köböire ni raba nitre kwati nübaire Jesús Ja Nire Biani Ngwanta Törö Jai ye kräke. Nikwe blitai ni madabe, Ngöbö, niara Monsoi aune ni raba nüne kärekäre yebätä angwane, Ngöbö tö kukwe nuainmana nie ye nikwe nuaindi ye kä mikai juto nibätä (Salmo 148:12, 13).

11. ¿Ñobätä Pablo niebare nitre kristiano Corinto ye ruäre nämene ban kwete aune vino ñain akwa nämene “mike ngwarbe jae”?

¹¹ Jesús Ja Nire Biani Ngwanta Törö Jai kräke nikwe ja mikadre juto yekäre, nikwe töbikadre apóstol Pablo kukwe niebare nitre kristiano Corinto ie yebätä (ñäkädre 1 Corintios 11:27-34 yebätä). Niarakwe niebare ni iti raba ban kwete aune vino ñain akwa raba “mike ngwarbe jae”. Mikani gare kwe nire nämene kukwe ye nuainne, ye nämene bämike “ni Dänkien ngrabare [...] amne ni Dänkien därie” ye ñaka nämene mike ütiäte jai. Ni kristiano dianinkä nänkäre kä kwinbiti yekwe kukwe käme nuaindre, yebiti ta ban kwetadre kwe aune vino ñadre kwe ye ani bämike ja töite. Pablo kräke, ni dianinkä nänkäre kä kwinbiti yekwe “ban kwetadre amne uba döi ñadre [...], ye ngwane, ja rüere [...] [tä] ja mike ngite”. Pablo näire, nitre kristiano Corinto ye kwati nämene kukwe käme nuainne. Däkien Jesús Mrö Biani Deu nuain nämene ye känenkri o näire nitre ruäre mröbare aune dö ñani krubäte yebätä nämene bäsi kübien köbö ye näire raba ruin nie. Nitre dianinkä nänkäre kä kwinbiti ye ñaka nämene kukwe ükaninte abokän nuain nämene ye mike ütiäte jire jai. Yebätä, niaratre nämene ban kwete aune vino ñain ye Ngöbö ñaka nämene kain ngäbiti.

12. a) ¿Däkien Jesús Mrö Biani Deu ye Pablo bämikani drebätä? b) ¿Dre niebare kwe nitre nübaibare ye mikakäre mokre? c) Ni kristiano tä ban kwete aune vino ñain yekwe ja mikadre ngite angwane, ¿rabadre dre nuainne?

¹² Däkien Jesús Mrö Biani Deu ye Pablo bämikani nitre nübaita mröre ja gwirete yebätä. Aune kukwe ne niebare kwe nitre nübaibare ye mikakäre mokre: “Mun ñaka tädre jondron ñain copa Jehovakwe yete aune copa chokalikwe yete; mun ñaka tädre mröre ‘mesa Jehovakwe’ yebätä aune mesa chokalikwe yebätä arato” (1 Corintios 10:16-21, TNM). Jesús Ja Nire Biani Ngwanta Törö Jai ye kräke ban aune vino sribeta ye ni kristiano tä kwete aune ñain yekwe ja mikadre ngite krubäte angwane, rabadre mike gare nitre umbre konkrekasionte yei (ñäkädre Santiago 5:14-16 yebätä). Tä ja töi kwite ye bämikadre kwe angwane, raba ban kwete aune vino ñain Jesús Ja Nire Biani Ngwanta Törö Jai yete. Ye ngwane täi bämike Jesús ja nire biani murie ketadre ye ütiäte kräke (Lucas 3:8).

13. ¿Ñobätä ni rabadre orare aune töbike medente ni nünain yebätä?

¹³ Jesús Ja Nire Biani Ngwanta Törö Jai ye känenkri, ni jökrä rabadre orare aune töbike kwin Ngöbö tö ni tuai nüne ño ja känenkäre yebätä. Jesús ja nire biani ni ütiäre ye ni tö mikai ütiäte jai. Yebätä, nita dianinkä nänkäre kä kwinbiti o ñakare ye ñaka gare metre jabätä nie angwane, ni ñaka raba ban kwete aune vino ñain Jesús Ja Nire Biani Ngwanta Törö Jai ye näire. Ye erere ngwane, ¿nire nire raba kwete?

14. ¿Nitre tä kukwe ükaninte mrä yete ye tätre dre nuainne Jesús Ja Nire Biani Ngwanta Törö Jai ye näire?

¹⁴ Nitre Israel yebe Jehovakwe kukwe ükaninte. Ye abokän Kukwe ükaninte biani Moisés ie. Akwa ja känenkäre Ngöbökwe niebare niarakwe kukwe ükaite mrä (ñäkädre Jeremías 31: 31-34 yebätä). * Jesukwe mröbare mrä nitre apóstol yebe angwane, kukwe ne niebare kwe vino yebätä: “Uba döi ne abko kukwe ükaninte btin Ngöbökwe abko rabadre bare täte jökrä ti däriebti ye bä mikakrä” (1 Corintios 11:25). Ngöbökwe kukwe ükaninte mrä nitre dianinkä nänkäre kä kwinbiti yebe (Gálatas 6:15, 16). Jesús ja nire biani ye köböire kukwe ükaninte mrä ye namani bare (Lucas 22:20). Niara ye aibe köböire Ngöbökwe kukwe ükaninte nitre nänkä kä kwinbiti yebe. Aune nitre dianinkä nänkäre kä kwinbiti tä ja ngwen metre abokän tä kukwe ükaninte mrä yete ye täi kä kwinbiti niarabe (Hebreos 8:6; 9:15). Nitre dianinkä nänkäre kä kwinbiti ye tä kukwe ükaninte mrä yete ye gare kwin jabätä ietre. Yebätä, Jesús Ja Nire Biani Ngwanta Törö Jai ye näire tätre ban kwete aune vino ñain.

15. a) ¿Nire nire tä kukwe ükaninte Gobrankäre yete? b) ¿Niaratre ye ja ngwain metre angwane dre ütiäte rabai kwetre?

¹⁵ Nitre dianinkä nänkäre kä kwinbiti yei gare niaratre ye tä kukwe ükaninte Gobrankäre yete (ñäkädre Lucas 12:32 yebätä). Nitre nänkä Jesube dianinkä nänkäre kä kwinbiti ja ngwen metre yebe niarakwe kukwe ükaninte, nitre ye nämene juto biare ja tare nikakäre niara erere (Filipenses 3:10). Nitre dianinkä nänkäre kä kwinbiti tä ja ngwen metre kä nengwane ye tä kukwe ükaninte yete arato. Niaratre ye jökrä rabai reire kä kwinbiti aune gobrandi kärekäre kwetre Jesube (Apocalipsis 22:5). Yebätä Jesús Ja Nire Biani Ngwanta Törö Jai ye näire niaratre raba ban kwete aune vino ñain.

16. Romanos 8:15-17 tä dre mike gare ye mä raba niere jötrö ngwarbe.

¹⁶ Nitre dianinkä nänkäre kä kwinbiti ye Ngöbö monsoi aune raba ban kwete aune vino ñain Jesús Ja Nire Biani Ngwanta Törö Jai näire ye gare metre ietre (ñäkädre Romanos 8:15-17 yebätä). Pablo niebare nitre dianinkä ye tä niere krörö Ngöböi: “¡Abba! ¡Tata tikwe!” Abba ye kite kukwe arameo yekri. Kukwe nieta ye abokän kukwe mikata nuäre “tata” nikwebätä ye kwrere, aune ni “rün” mikata ütiäte jai ye kwrere. Nitre dianinkä nänkäre kä kwinbiti tä kukwe ye niere Ngöböi ye tä mike gare niaratre ye tä ja kete kwin Ngöböbe aune “Ngöbö Üai käta [...] mike [...] [ja] ngäbriänkäre”. Niaratre ye dianinkä nänkäre kä kwinbiti ye üai deme Ngöbökwe tä mike gare ietre. Yebätä, nitre dianinkä nänkäre kä kwinbiti yei gare kwin jabätä Ngöböta niaratre kain ngäbiti monso kwe ye kwrere. Ye ñan tä mike gare niaratre ñaka tö nünain Kä tibienbätä. Akwa niaratre ja ngwain metre nememe krütai ye ngwane, rabai reire kä kwinbiti Jesube ye gare ietre. Jehová deme ye käkwe niaratre dianinkä nänkäre kä kwinbiti ye gare ietre arato. Kä nengwane nitre 144,000 dianinkä nänkäre kä kwinbiti ye nemena braibe Kä tibienbätä (1 Juan 2:20; Apocalipsis 14:1). Ja ruin Jehová ken krubäte ietre yebätä tätre niere krörö ie: “¡Abba! ¡Tata tikwe!”.

17. a) ¿Ngöböta dre käbämike nitre dianinkä nänkäre kä kwinbiti yei? b) ¿Ñokänti tä nemen gare nitre ie Ngöböta denkä nänkäre kä kwinbiti?

¹⁷ Nitre dianinkä nänkäre kä kwinbiti yei Ngöböta ja nire käre käbämike kä kwinbiti. Mä dianinkä nänkäre kä kwinbiti angwane, kukwe käbämikata ye mäkwe kädekaite käre orasion mäkwe yete. Texto ruäre Bibliabätä ye mä kräke rabai ruin mäi arato. Ñodre, Jesús aune “meri  tä [...] ja mikakäre gure” ben kä kwinbiti kädrieta Bibliabätä ye ngwane, blitata mäbätä ye gare mäi aune mä tö tuai nemen bare (Juan 3:27-29; 2 Corintios 11:2; Apocalipsis 21:2, 9-14). O Ngöböta nitre dianinkä nänkäre kä kwinbiti tarere nieta kwe ye ngwane, Ngöböta blite mäbe ye gare mäi. Aune tä kukwe niere metre ta nuaindre nitre dianinkä nänkäre kä kwinbiti ie ye ngwane, üai deme tä mä töi mike kukwe ye mike täte. Üai deme tä mike gare mäi Ngöbökwe mä dianinkä nünankäre kä kwinbiti.

18. a) ¿Ngöböta dre käbämike “obeja mda” yei? b) ¿Kukwe käbämikata “obeja mda” yei yebätä ja ruin ño ietre?

¹⁸ Kä bä nuäre Kä tibienbätä te nünain kärekäre ye Ngöböta käbämike “obeja mda” “kwati” krubäte yei (Apocalipsis 7:9; Juan 10:16). Mä “obeja mda” angwane, Biblia tä blite Kä Bä Nuäre yebätä abokänbätä mätä ñäke ye ngwane kätä nemen juto mäbätä. Mä tö nünain jäme Kä tibienbätä mä mräkätre aune nitre ja ketamuko mäkwe yebe. Mrö nika, nüna bobre, ja tare nika, bren aune gata diainkä ño ye mä tö tuai (Salmo 37:10, 11, 29; 67:6; 72:7, 16; Isaías 33:24). Mä mräkätre tare mäkwe krütani abokän gaikröta ye mä tö kain ngäbiti kä jutobiti (Juan 5:28, 29). Jehovata kukwe kwin krubäte käbämike mäi yebätä mätä debe bien krubäte ie. Jesukwe ja nire biani murie ketadre ni ütiäre yebätä mätä debe bien krubäte arato. Ye medenbätä, mä ñaka ban kwete aune vino ñain, akwa mätä niken Jesús Ja Nire Biani Ngwanta Törö Jai yebätä.

19, 20. a) Ni tö nünain kärekäre angwane, ¿nikwe dre nuaindre? b) ¿Jesús Ja Nire Biani Ngwanta Törö Jai ye ñobätä mä ñaka tö juain ja bäre?

¹⁹ Ni kä nebätä ye jökrä ie nüna kärekäre käbämikata. Nitre ruäre nünain kä kwinbiti, aune nitre mada abokän käkwe nünain Kä tibienbätä. ¿Ni tö nünain kärekäre angwane nikwe dre nuaindre? Nikwe tödekadre Jehová aune Jesukristo ie bätä ni kökanintari yei. Yebätä, Jesús Ja Nire Biani Ngwanta Törö Jai ye näire, ja känenkäre Ngöböta kukwe käbämike ni itire itire ie aune Jesús murie ketani ye ütiäte krubäte ni kräke yebätä nikwe töbikadre. Kä 2015 nete, nitre kwati kä jökräbiti tibien käkwe Jesús Ja Nire Biani Ngwainta Törö Jai köbö viernes 3 abril yete, Ñänä näin nekä ye bitikäre. Ye nuaindi Ju ja Ükarakrö yete o kä madakänti.

²⁰ Jesús Ja Nire Biani Ngwanta Törö Jai yebätä ni jämi niken ye känenkri, ni kökataribare ütiäte krubäte yebätä nikwe töbikadre. Ye köböire nikwe debe biain Jesús ie. Jesús Ja Nire Biani Ngwanta Törö Jai yete kukwe kädrieta ye nikwe kukwe nuai kwin angwane ni törbai nitre mada tarebätä. ¿Nuaindre ño? Ni tare Ngöbökwe aune niara tä kukwe käbämike ni kä nebätä ie ye kädriedre nitre madabe (Mateo 22:34-40). Erametre, Jesús Ja Nire Biani Ngwanta Törö Jai ye ni jökrä ñaka tö juain ja bäre.