Jesús erere nikwe ja töi mikadre bobre aune ni mada mikadre ruin tare jai
“Kristo arato käkwe tare nikabare mun ütiäre, ne kwrere kukwe bämikani kwe mun kräke, ne kwe munkwe nändre deme jiebiti erametre.” (1 PEDRO 2:21, TNM)
1. ¿Nikwe ja ngwandre Jesús erere ye raba ni mike nökrö ño bäri Jehová ken?
NI MADA ütiäte ni kräke angwane, ni töta nemen ja ngwain ni ye erere. Jesús ye ni bäri ütiäte abokän erere ni raba ja ngwen. ¿Ñobätä? Ñobätä ñan aune niarakwe niebare: “Nire nire käta ti tuen, ye abko tä ti Rün tuen arato” (Juan 14:9). Jesukwe kukwe ye niebare ñobätä ñan aune niara tä ja ngwen täte Jehová erere. Jesús töi ño tä nemen gare nie angwane, Jehová töi ño ye tä nemen gare nie arato. Ye medenbätä, nita ja ngwen Jesús ye erere angwane, nita nökrö Jehová ni bäri ütiäte jondron jökrä sribekä ye ken. ¡Ye kwin krubäte!
2, 3. a) ¿Ñobätä Biblia tä kukwe mike gare krubäte Jesús yebätä? b) ¿Jehová tö ni tuai dre nuainne? c) ¿Kukwe ja tötikara ne aune kukwe mada ja tötikara yebätä nikwe dre mikai gare jai?
2 Biblia tä kukwe mike gare krubäte nie Jesús yebätä. ¿Ñobätä? Ñobätä ñan aune Jesús rabadre gare kwin nie aune nikwe ja ngwandre niara erere ie Jehová tö (ñäkädre 1 Pedro 2:21 yebätä). * Biblia tä niere nikwe nändre Jesús ye tä jiebiti. ¿Ye abokän dre gärätä? Jesukwe dre dre nuainbare ye ererebätä nikwe ja ngwandre. Erametre, Jesús yebätä ngite ñaka nämene jire. Ye medenbätä, Jehová ñaka ribere nibätä nikwe ja ngwandre täte Jesús erere. Akwa nikwe ja di ngwandre ja ngwen Jesús erere rabadre nemen bare nie ye erere känti yei Jehová tö.
3 Jesús töi nämene ño ye ani mike gare ruäre jai ne kwe ni rabadre ja ngwen niara erere. Jesús ja töi mikani ño bobre aune ni mada mikani ruin tare jai ye nibike mike gare jai kukwe ja tötikara nekänti. Niara ñaka kä jürä ngwani ño jabätä aune kukwe kwin diani nuaindre kwe jai ye nikwe mikai gare jai kukwe mada ja tötikara yekänti. Kukwe ketamä ngwantarita ne nikwe mikai gare jai niara töi nämene ño jene jenebätä: ¿Ye gärätä? ¿Jesukwe bämikani ño? Aune, ¿ni raba ja ngwen ño niara erere?
JESÚS TÖI BOBRE
4. ¿Ja töi mikadre bobre ye dre gärätä?
4 ¿Ja töi mikadre bobre ye dre gärätä? Nitre bike kri tätre nütüre nitre töi bobre ye abokän tätre ja tuenmetre gobraindre nitre madai o ñaka tö ngwen jai. ¿Akwa ye metre? Ñakare. Ja töi mikakäre bobre ni rabadre ja ngwen dite aune ñaka kä jürä ngwen jabätä. Ja töi mikadre bobre ye abokän ñaka ja erebe bikadre kri o ja rabadre ruin bäri ütiäte nie yebe. Ja töi mikakäre bobre, kena nikwe töbikadre kwin akwle jabätä. Ñodre, diccionario kukwe Bibliabätä mikakäre gare tä niere nikwe ja töi mikadre bobre ye abokän ni bäri chi Ngöbö okwäkänti ye nikwe ngwandre törö jai gärätä. Ne madakäre, ni töita bobre angwane ja ñaka rabai ruin bäri ütiäte nie nitre mada yebiti ta (Romanos 12:3; Filipenses 2:3). Erametre, ni ngite yebätä ruäre ngwane ñaka tä nemen nuäre ni kräke ja töi mikakäre bobre. Akwa raba nemen bare nie. Yekäre ni rabadre töbike Jehová bäri kri aune Jesús ja ngwani kwin yebätä.
Ni töita bobre angwane ja ñaka rabai ruin bäri ütiäte nie nitre mada yebiti ta
5, 6. a) ¿Nire abokän arcángel Miguel? b) ¿Miguel töi nämene bobre ye bämikani ño kwe?
5 Ngöbö Monsoi ye käre tä ja ngwen töi bobre. Niara nämene ángel dite krubäte kä kwinbiti ye ngwane, ja töi mikani bobre kwe. Niara nükani Kä tibienbätä ni kä nebätä erere akwa ngite ñaka nämenebätä, ye ngwane ja töi mikani bobre kwe arato. ¿Niara töi nämene bobre ye bämikani ño kwe? Ani mike gare ruäre jai.
6 Jesús töi nämene bobre ye bämikani kwe nämene ja ngwen ño yebiti. Jesús jämi kite Kä tibienbätä ye känenkri, niara nämene arcángel, ye abokän niara nämene angeletre jie ngwen gärätä. Biblia tä kädeke Miguel. Tärä Bibliabätä kädekata Judas tä niere Miguel aune Satana nämene ñäke jai (ñäkädre Judas 9 yebätä). ¿Dre dokwäre nämenentre ñäke jai? Jehovakwe Moisés doboi mikani kä keteiti känti abokän ni kä nebätä ie ñaka raba kwentari (Deuteronomio 34:5, 6). Akwa, Satana tö namani Moisés ngwaka ye ngwain jai, ne kwe nitre Israel käkwe mikadre ngöböre jai raba ruin nie. Tärä keteiti tä mike gare Jesús niebare Satana ie ñaka rabadre niken Moisés ngwaka ye ngwena jai. Jesukwe ñaka kä jürä ngwani jabätä Satana ketabätäkäre, akwa ja töi mikani bobre kwe aune Jehová tuanimetre kwe kukwe ükete Satana ben. ¿Ñobätä nuainbare kwe? Ñobätä ñan aune Jehová aibe nämene kukwe ye ükatekäre Satanabe.
Jesús ja töi mikani bobre aune Jehová kukwei mikani täte kwe kukwe jökrä känti. ¡Aune ja tuanimetre kwe kämikadre arato!
7. a) ¿Jesús töi nämene bobre ye bämikani ño kwe kukwe nie nämene kwe yebiti? b) ¿Jesús töi nämene bobre ye bämike ño kwe kukwe nuainbare kwe yebiti?
7 Jesús nämene Kä tibienbätä ye ngwane, niara töi nämene bobre ye bämikani kwe kukwe niebare kwe yebiti. Jesús ñaka tö namani ja käi kitakamana jire. Jehová aibe käi kitadrekä yei niara tö namani (Marcos 10:17, 18; Juan 7:16). Ne madakäre, ñaka kukwe niebare jire kwe, ne kwe nitre ja tötikaka ben yei ja rabadre ruin ñaka ütiäte o ja rabadre ruin ngwarbe ietre. Ñakare aune nämene niaratre mike ütiäte jai aune nitre ye nämene ja töi mike kwin yebätä nämene kwin niere ietre. Yebiti nämene bämike niara nämene tö ngwen nitre ie (Lucas 22:31, 32; Juan 1:47). Jesús töi nämene bobre ye bämikani kwe kukwe nuainbare kwe yebiti. Ja töi mikani kwe nüne jondron braibebiti aune ñaka jondron ribebare krubäte kwe jai (Mateo 8:20). Nitre ñaka tö nämene sribi ruäre nuain ye niarakwe nuainbare kä jutobiti (Juan 13:3-15). Ne madakäre, niarakwe Ngöbö mikani täte metre (ñäkädre Filipenses 2:5-8 yebätä). * Nitre bike kri ye ñaka töta nemen nitre mada kukwei mikai täte. Akwa Jesús ñaka ja ngwani ye erere. Niarakwe ja töi mikani bobre aune Jehová kukwei mikani täte kwe kukwe jökrä känti ¡Aune ja tuanimetre kwe kämikadre arato! Erametre, Jesús ye nämene “bike tidrä ni mda mdabtä” (Mateo 11:29).
JESÚS ERERE NIKWE JA TÖI MIKADRE BOBRE
8, 9. ¿Ni töi bobre ye nita bämike ño?
8 ¿Ni raba ja töi mike ño bobre Jesús erere? Ni töi bobre angwane, ni ñaka raba jondron jökrä nuainne ye rabai gare nie. Yebätä, nikwe ñaka ja mikadre ni kukwe ükatekä ye kwrere nitre madabe. Aisete, nikwe ñaka ñäkädre blo niaratre rüere aune ñaka töbikadre blo niaratre yebätä (Lucas 6:37; Santiago 4:12). Jondron nuain gare kwin nie o sribi ütiäte tä ni kisete ye ñan aibätä bikadre bäri kwin ni madabätä (Eclesiastés 7:16). Nitre umbre töita bobre angwane, ja ñaka ruin bäri kwin ietre ja mräkätre mada yebiti ta. Ñakare aune, ruin ietre nitre mada ye bäri ütiäte niaratre kräke (Lucas 9:48; Filipenses 2:3).
9 Ani töbike ja mräkä Walter Thorn yebätä. Kä 1894 yete, niara jatani sribire ni ni tuabitikä ye kwrere. Akwa sribibare kä kwati krubäte te kwe ye bitikäre, nitre Testiko nämene kwi ngübare kä Nueva York yekänti mikani sribire. Niara tädre sribi bäri ütiäte nuainne näre nämene kwi ngübare, yebätä nämene töbike angwane nämene kukwe ne erere niere jai: “Jo, kä bure ngwarbe, ¿ñobätä mä kite bike kri?” (ñäkädre Isaías 40:15 yebätä). * ¡Niara töi nämene bobre ye bämikani kwe!
10. a) ¿Ni töi bobre ye nita bämike ño nita blite yebiti? b) ¿Ni töi bobre ye nita bämike ño jondron nuainta nikwe yebiti?
10 Ni töi bobre angwane, nikwe bämikai nita blite ño yebiti arato (Lucas 6:45). Nita blite ja mräkä o ja ngwai kukwebätä nibe yebe angwane, dre dre kwin niena nikwe aune dre dre nuainta kwin nikwe ye ñan aibätä nita blite bentre (Proverbios 27:2). Ñakare aune dre dre nuainta kwin kwetre aune töi meden meden kwin yebätä nita kwin niere ietre (Proverbios 15:23). Ni töi bobre ye nita bämike jondron nuainta nikwe yebiti arato. Ni ñaka tö ja käi kitakamana o ja mikamana ütiäte nitre kä nebätä ye ngätäite. Ni töita nünanbätä jondron braibebiti ne kwe ni rabadre sribire bäri Jehová kräke. Aune nita juto biare sribi ñaka ütiäte ye nuainkäre (1 Timoteo 6:6, 8). Akwa yebiti ta, kukwe nieta nie ye nita mike täte ni töi bobre ye bämikakäre. Ye medenbätä, juta ükaninte Ngöbökwe aune nitre umbre ye nita mike täte (Hebreos 13:17).
JESÚS TÄ NI MIKE RUIN TARE JAI
11. ¿Ni mada mikadre ruin tare jai ye dre gärätä?
11 ¿Ni mada mikadre ruin tare jai ye dre gärätä? Nikwe ni mada mikai ruin tare jai angwane, nikwe ni mada taredi aune nikwe ja töi mikai niaratrebätä. Nita ni mada tarere yebätä nita mike ruin tare jai aune ye ja erebe nita ni mada kräke ja töi mike kwin aune mike tuin bobre jai yebe. Biblia tä niere Jehová aune Jesús ie nitre “ruentari tare kri”, “ruentari tare kärekäre ie” aune nitre “mda mda ta[re]” kwe (Lucas 1:78; 2 Corintios 1:3; Filipenses 1:8). Tärä keteiti tä mike gare, nikwe ni mada mikadre ruin tare jai nieta Bibliakwe ye ngwane, ñaka tä ni mada mikadre tuin bobre jai ye aibebätä blite. Tärä ye tä mike gare ni mada mikata ruin tare jai ye abokän nita ja töi mike ni itire itire yebätä aune jondron nuainne kräke. Ye medenbätä, nikwe ni mada mikai ruin tare jai angwane, nikwe ja di ngwain jondron nuainne nitre kräke.
12. a) ¿Ni mada nämene ruin tare Jesús ie ye dre tä mike gare? b) ¿Aune dre käkwe niara töi mikani jondron nuainne ni mada kräke?
12 ¿Jesús nämene nitre mike ruin tare jai ye bämikani ño kwe? Ani mike gare ketamä jai. Kena, niara töi nämene ño ni mada kräke yebiti bämikani kwe. Ja ketamuko kwe María aune nitre mada tuani kwe Lázaro krütani ye muaire angwane, niarakwe muabare siba bentre (ñäkädre Juan 11:32-35 yebätä). Nitre kwati janamane Jesús känti ye namani tuin bobre ie nieta Bibliakwe arato (Marcos 6:34). Ketebukäre, jondron nuainbare kwe yebiti bämikani kwe niara ie nitre nämene ruin tare. Ñodre, niara nämene ni mada mike ruin tare jai ye nämene töi mike kukwe nuainne. Ye medenbätä meri kän muko krütani ye monsoi mikaninta nire kwe aune Lázaro ganinkröta kwe arato (Lucas 7:11-15; Juan 11:38-44). Ye köböire ja känenkäre Lázaro namani nünankäre kä kwinbiti arato. Nitre braibe nämene ja ükaninkrö ye nikani Jesús känti angwane, nitre ye namani ruin tare ie yebätä niarakwe “kukwe diri[ba]re kabre bätäkä ngwarbe ietre”. Kukwe ye köböire nitre nämene niara kukwe nuin ye ja töi kwitani. Ye tä mike gare nie, Jesús ie ni mada nämene ruin tare ye bämikani metre kwe. Nitre nämene ja di ribere ye niarakwe dimikani (Mateo 15:32-38; 20:29-34; Marcos 1:40-42).
13. ¿Jesús nämene nitre mike ruin tare jai ye bämikani ño kwe nämene blite yebiti? (Üai bämikani kena mikadre ñärärä.)
13 Ketamäkäre, Jesús nämene nitre mike ruin tare jai ye bämikani kwe nämene blite yebiti. Niara nämene nitre mike ruin tare jai ye käkwe töi mikani blite töi jämebiti nitre ben, metrere nitre nämene ja tare nike nitre mada kisete ye kräke ja töi mikani kore kwe. Mateo nämene blite Jesús yebätä angwane, Isaías ni Ngöbö kukwei niekä kukwe niebare ye kädekaninte kwe: “Nitre bobre bobre tä mikä kroko trekani kwrere, ye abko niarakwe ñan juandi ngwarbe. Erere arato, ñotra jutra mikata krire amne ngübü aibe tä nebe neen krä chi käne, ye kwrere nitre tödekaka krire niarabti tä, ye abko niarakwe ñan di gadrekäta jire chi” (Isaías 42:3; Mateo 12:20). ¿Ye abokän dre gärätä? Jesús ñaka ñäkäbare tare jire nitre madai. Niara nämene blite ye ngwane nitre ie ja nämene nemen ruin kwin. Ne madakäre, kukwe kwin ie tö ngwan raba ye niarakwe mikani gare “nitre brukwä nötaninte” yei (Isaías 61:1). Nitre nämene ja tare nike ye niarakwe töi mikaninta jäme (Mateo 11:28-30). Jehová töi nämene nitre ja tötikaka yebätä ye niebare kwe ietre, aune nitre mada ñaka nämene tuin ütiäte nitre madai yebätä niara töi nämene arato niebare kwe ietre (Mateo 18:12-14; Lucas 12:6, 7).
JESÚS ERERE NIKWE NI MADA MIKADRE RUIN TARE JAI
14. ¿Ni mada ruin tare nie ye ni raba bämike ño ni töi yebiti?
14 Jesús erere ni tö ni mada mikai ruin tare jai angwane, nikwe bämikai ni töita ño yebiti. Ni mada tare nikwe ye niekäre ie ñaka tä nemen nuäre ni kräke, akwa Biblia tä niere nie nikwe ja di ngwandre nuainne. Ni kristiano jökrä rabadre ni mada tarere bämikakäre ni töita ni bitin ye kwrere abokän ie Jehová tö (ñäkädre Colosenses 3:9, 10, 12 yebätä). ¿Ni mada tare nikwe ye ni raba bämike ño? Biblia tä niere ni rabadre blite aune nitre mada tare nikwe ye nikwe niedre ietre (2 Corintios 6:11-13). Ni mada ie ja ruin ño aune dre tä mike töbike ye niedre kwe nie ye ngwane nikwe kukwe nuadre kwin (Santiago 1:19). Ye bitikäre nikwe ngwandretari jai: “Kukwe ye erere rabadre bare tibätä angwane, ¿ja rabadre ruin ño tie? ¿Tikwe dre ribedre jai?” (1 Pedro 3:8).
15. ¿Nitre tä ja tare nike o nitre kän mräkä tä krüte ye dimikakäre ni raba dre nuainne?
15 Ni mada ruin tare nie ye ni raba bämike arato jondron nuainta nikwe yebiti. Ni mada ruin tare nie ye tä ni töi mike nitre mada dimike, metrere nitre tä ja tare nike o mräkä tä krüte kän ye dimikata nikwe. ¿Ni raba dimike ño? Romanos 12:15 tä niere: “Nire nire [...] tä ja müaire abko ben munkwe ja müaidre gwaire siba”. Nitre tä ja tare nike ye nikwe dimikadre tä nementre ribere krubäte jai, aune dre nuaindre kwe kukwe ye ükatekäre ye ñan ai ribeta kwetre jai. Ja töi mikadre niaratre yebätä aune kukwe nuadre ye tätre ribere jai. Meri iti Testiko tä niere ngängän krütani kän ye ngwane ja mräkätre nikani niara gwirete aune muabare kwetre ben. Niara töi mikaninta jäme yebätä tä debe bien krubäte. Nita jondron nuainne ni mada kräke dimikakäre yebiti nita bämike nita ni mada mike ruin tare jai. Ñodre, meri kän muko krütani ye tä ja di ribere jondron ruäre gwi ye ükatekäre. O ja mräkä niena umbre tä ja di ribere ne kwe jänrikadre gätäbätä, kukwe driere o doctor känti. Ni raba nitre mada dimike krubäte jondron chi nuainta nikwe kräketre yebiti (1 Juan 3:17, 18). Akwa bäri ütiäte, nikwe kukwe driedre bäri ni madai, nita mike ruin tare jai ye bämikakäre. Ye kukwe bäri kwin ni raba nuainne nitre brukwä kwin ye dimikakäre.
¿Ja mräkätre kukwebätä nibe yebätä nikwe ja töi mikai bökän? (Párrafo 15 mikadre ñärärä)
16. ¿Nitre tä ulire aune töbike krubäte yei nikwe dre niedre?
16 Arato nita blite yebiti nita bämike ni mada ye ruin tare nie. Biblia tä niere nitre tä ulire o tä töbike krubäte ye nikwe dimikadre (1 Tesalonicenses 5:14). ¿Nikwe dre niedre ietre? Niaratre ütiäte krubäte ni kräke ye nikwe niedre ietre. Niaratre töi meden meden kwin ye nikwe mikadre gare ietre aune tätre jondron kwin nuainne yebätä nikwe kwin niedre ietre dimikakäre arato. Niaratre tä konkrekasionte ye tä mike gare ütiäte krubäte Jehová kräke ye ni rabadre ngwen törö ietre (Juan 6:44). Nitre Jehová mikaka täte tä ja tare nike aune tätre töbike krubäte yebätä niara töita krubäte ye ni raba mike gare metre ietre (Salmo 34:18). Nita blite yebiti nita bämike ni mada ye ruin tare nie ye tä nitre tä ja di ribere ye dimike krubäte (Proverbios 16:24).
17, 18. a) ¿Nitre umbre konkrekasionte ye ja mräkätre mikadre tuin ño jai ie Jehová tö? b) ¿Dre mikai gare jai kukwe ja tötikara mada yekänti?
17 Nitre umbre konkrekasionte ye ja mräkätre mikadre ruin tare jai ie Jehová tö (Hechos 20:28, 29). Nitre umbre konkrekasionte kisete sribi krörö tä: rabadre dirire ja mräkätre ie, kukwe kwin niere ietre aune dimike (Isaías 32:1, 2; 1 Pedro 5:2-4). Nitre umbre konkrekasionte tä ja mräkätre tarere aune mike ruin tare jai ye käkwe ñaka kukwe ribi ükaite nuaindre ietre. O ñaka ñäke ietre ne kwe ja rabadre ruin ngite ietre ñakare aune kukwe meden medenbätä ja mräkätre ñaka raba sribi ruäre nuainne ye niaratre tä mike nüke gare jai. Kä rabadre juto ja mräkätre yebätä yei niaratre tö. Ja mräkätre aune ja ngwaitre tä Jehová tarere aune tätre ja di ngwen sribire bäri kwin kräke, yei nitre umbre tä tö ngwen.
18 Jesús ja töi mikani bobre aune ni mada mikani ruin tare jai yebätä nikwe töbikai angwane ye käkwe ni töi mikai ja ngwen niara erere. Kukwe mada ja tötikara yekänti nikwe mikai gare jai ni raba ñaka kä jürä ngwen ño jabätä aune kukwe kwin den nuaindre jai Jesús erere.
^ párr. 2 1 Pedro 2:21, (TNM): “Ne erere, mun käräbare [kukwe] ne kräke, ñobätä ñan aune Kristo arato käkwe tare nikabare mun ütiäre, ne kwrere kukwe bämikani kwe mun kräke, ne kwe munkwe nändre deme jiebiti erametre”.
^ párr. 7 Filipenses 2:5-8, (TNM): “Kristo Jesús töi nämene ño ye erere munkwe ja töi mika arato, niara, nämene Ngöbö kwrere, akwa ñaka ja töi mikani kwe ja mike Ngöbö täte. Ñakare aune, jondron nämene kwe ye tuanimetre kwe ja töi jeñebiti aune ja mikani kwe ni klabore kwrere nünankäre nitre kä nebätä ye erere. Arato, namani ni kä nebätä erere ye ngwane, ja töi mikani bobre kwe aune Ngöbö mikani täte kwe nememe murie ketani kribätä ye ngwane”.
^ párr. 9 Isaías 40:15: “¡Mike ñärärä! Nitre juta keta kabre te ye abokän ñö ngwäri chi cubote ye kwrere; aune jondron jondron ñäkärä te kä burei tä ye kwrere. ¡Mike ñärärä! Niara tä ngutuä mrente kainkä kä burei chi ye kwrere”.
