KÄ NENGWANE, kukwe driedre Gobran Ngöbökwe yebätä ye sribi bäri ütiäte ni raba nuainne. Nita kukwe driere ye ngwane, nita blite Jehová kräke ye abokän ütiäte krubäte. Akwa ruäre ngwane ñaka raba nemen nuäre ni kräke nuainkäre kä jutobiti. ¿Ñobätä?

Ja mräkätre ruäre yei nitre ñaka tä kwen gwi aune ñaka tä blite jire ni iti ben ye tä niaratre mike di nekä. Akwa nitre tä kwen gwi ietre angwane, nitre kwati ye ñaka töta nemen kukwe drieta kwetre ye kain ngäbiti o tätre ñäke tare ietre. Ja mräkätre mada abokän ie käta krubäte kukwe driekäre aune nitre kwati tö kukwe mikai gare jai tä kwen ietre, akwa niaratre ñaka kukwe driei nitre ye jökrä ie tä nemen ruin ietre ye ngwane tätre nemen di nekä. Ja mräkätre mada konkrekasionte tätre mekerabe kukwe driere akwa nitre blo gate jämi ye tä nemen mike di nekä arato.

Kukwe ne jökrä köböite ni ñaka raba kukwe driere jankunu kä jutobiti. Erametre, kukwe driedre ye ñaka rabai nuäre nuaindre ye gare nie, ñobätä ñan aune Satana tä kä ne gobraine (1 Juan 5:19).

Ruäre ngwane kukwe ñaka nuäre ben mäkwe ja tuai kukwe driekänti arato. Akwa Jehovakwe mä dimikai yei mäkwe tö ngwan. ¿Mä raba kukwe driere ño bäri kä jutobiti? Mä raba kukwe keta kabre nuainne ye ani mike gare jai.

Kä kwatire kwatire te, nitre kwati krubäte tä ja ngökö ñöte aune tä ja mike testiko Jehovakwe. Bitinkä mäkwe ja ngökani ñöte angwane, mä raba ja kite nitre ja ngökani ñöte mekerabe yebätä. Mäkwe ja ngökani ñöte mekerabe angwane, mä raba dirire nitre ja ngökabare bitinkä ñöte yei. Ye köböire kä rabai juto krubäte mäbätä.

Nitre ja tötikaka ye rabai ja di ribere ne kwe rabadre dirire kwin ye nämene gare Jesús ie. Yebätä kukwe driedre ño ye driebare kwe ietre (Lucas 8:1). Kä nengwane, nitre ja ngökabare ñöte bitinkä ye tä ja di ribere ne kwe rabadre dirikä kwin arato.

¿Nitre ja ngökabare bitinkä ñöte ye ni raba dimike ño? Ni kukwe driekä ye rikadre kukwe driere ye ñan aibe köböire rabai dirikä kwin ye nikwe ngwandre törö jai. Ja mräkä kukwe driekä ye rabadre dirikä kwin yekäre ja mräkä ie kukwe drie gare kwin ye  rabadre tötike ja tare yebiti aune ngübare bätärekä. Aisete kukwe drie niena gare mäi angwane, käne mäkwe ja mräkä tä kukwe driere krire ye tötika aune dre niedi kwe yebätä mä raba ja kite ben. Ketebukäre, blitadre ño kwe nitre ben ye mäkwe drie ie. Ketamäkäre, tärä aune täräkwata driedre ño kwe ye mäkwe drie ie. Ketabokäkäre, nitre tö kukwe mikai gare jai ye tuadrebiti ño kwe ye mäkwe drie ie. Ketarikekäre, ja tötika Bibliabätä kömikadre ño kwe ni madabe ye mäkwe drie ie. Arato kukwe driedre kwe yebätä mäkwe kwin nie ie aune mäkwe kukwe nie ie dimikakäre (Eclesiastés 4:9, 10). Ni ie kukwe drie niena gare ye ni kukwe driekä mrä mikaitari ñärärä aune dre nuaindi kwe ye erere niarakwe nuaindi angwane rabai dirikä kwin arato (Lucas 6:40). Ne madakäre, kä jürä ñaka rabaibätä, ñobätä ñan aune täi ja di ribere ye ngwane ni mada raba dimike ye rabai gare ie.

Nita ja di ngwen krubäte kukwe driekänti, akwa ruäre angwane nitre ñaka tä kwen jire nie blitakäre ben. Aisete ja mräkä tä näin nibe ye aibe ben ni raba blite. ¿Kukwe ye namanina bare mäbätä? Mäkwe ngwan törö jai Jesús nitre ja tötikaka ben ye juani “nibu nibu” jabe (Lucas 10:1). Ye köböire niaratre “ja die mikadre kwärikwäri”, o kukwe kwin niedre jai kwärikwäri (Romanos 1:12).

¿Drebätä mä raba blite ja mräkä tä näin mäbe yebe? Kukwe kwin namani bare mäbätä kukwe driekänti ye mäkwe kä driere ben, mäkwe ja tötikani kaibe o mä mräkäbe ye ngwane kukwe nükani gare mäi ye mäkwe nie ie, kukwe kwin kädriebare gätäte mäkwe kukwe nuabare ye mäkwe nie ie. Ni kukwe driekä jämi gare kwin mäi yebe mä tädre kukwe driere ye ngwane, ¿mäkwe dre nuaindre? Ñokänti niara namani Testiko ye mä raba ngwentari ie, ñobätä kukwe mikata täte ne metre niara kräke o medente sribibare kwe Ngöbö kräke ye mä raba ngwentari ie. Arato kukwe driekänti kukwe meden namani bare mäbätä aune niarabätä ye mun raba kädriere jabe. Ye erere mäkwe nuaindi angwane, nitre mun kain ngäbiti ño yebiti ta, mun nibu ja dimikai kwärikwäri (1 Tesalonicenses 5:11).

Kä tädre juto käre mäbätä kukwe driebätä, yekäre bämän kratire kratire mäkwe kä dianka jai ja tötikakäre kaibe. “Ni klabore ie tö ngwan raba bätä töbätä” ye kätä tärä aune täräkwata keta kabre sribere yebätä ja tötika raba kaibe (Mateo 24:45, TNM). Ñodre, kukwe meden medenbätä kukwe driedre ye ütiäte krubäte yebätä mäkwe kukwe känä. Recuadro känti “ ¿Ñobätä ütiäte krubäte kukwe driedre?” nieta yekänti kukwe keta kabre kwain mäi.

Kukwe keta kabre tä recuadro yete yebätä mäkwe ñäkä aune töbikabätä. Ye käkwe mä töi mikai kukwe  driere bäri. Ne madakäre, kukwe meden medenbätä ni rabadre kukwe driere nieta Bibliakwe yebätä mäkwe kukwe känä. Mäkwe kä diainkä jai töbikakäre kukwe yebätä angwane mäkwe kukwe driei bäri kä jutobiti.

Nita kukwe driere ju ju te, akwa juta ükaninte Jehovakwe ye tä ni nübaire käre kukwe bätäkä ngwarbe nuainne kukwe driekäre. Ñodre, tä niere nie nikwe kukwe driedre carta yebiti, teléfono yete, ji ngrabare, kä mada mada känti nitre nüke kwati yekänti aune nitre tä sribire yekänti. Arato nikwe kukwe ükadrete jai ne kwe kä känti nitre Testiko ñaka bökän o nitre testiko ñaka jire yekänti ni raba niken kukwe driere.

¿Mätä juto biare kukwe ye erere nuainkäre? Ja mräkätre aune ja ngwaitre kwati käkwe nuainbarera aune kukwe kwin namanina bare bätätre. Kukwe ketamä namani bare ye ani mike gare jai.

Täräkwata Sribi Nikwe Ngöbökrä yekänti ja tötika Bibliabätä driedre ño ye kräke kukwe nie nämene ye kwani meri Testiko ie aune tö namani kukwe ye erere nuaindi. Aisete ja tötika Bibliabätä ye driebare kwe meritre nimä sribikä ben yei. Niara töi namani ñan krütare ñobätä ñan aune meritre nimä käkwe ja tötika Bibliabätä ye kani ngäbiti aune jatanintre näin gätäbätä.

Kukwe tä täräkwata Ni Mikaka Mokre aune ¡Despertad! yebätä ye nire nire ie raba nemen tuin kwin ye juta ükaninte Jehovakwe tä ni nübaire ngwentari jai arato. Kukwe keteiti nämene täräkwata ¡Despertad! yebätä abokänbätä ni circuito tuabitikä käkwe ñäkäbare kä Estados Unidos yekänti, aune kukwe ye nämene blite llanta yebätä. Aisete, kä llanta rürübäinkäi jene jene ye jökrä känti nitre ji ngwanka sribibätä yei niarakwe ja töi mikani täräkwata ¡Despertad! ye bien. Niara aune muko kwe  janamene arato kä ni kräkäi mikara 100 jene jene biti bäri yekänti, täräkwatabätä kukwe kädriebare jatäri kädekata “Los retos del médico de hoy” ye biankäre. Niara tä niere ye köböire kukwe drieta nikwe aune tärä bätä täräkwata sribeta nikwe ye tä nemen gare nitre kwati ie. Tä niere arato kä nengwane niara aune muko kwe yei nitre kä yekänti gare bäri kwin aune käta nemente bäri ietre nitre tö kukwe mikai gare jai ye tuabitikäre.

Kukwe driedre teléfono yete niebare yebätä debe biankäre meri Testiko mada käkwe carta juani central mundial yei. Meye yebiti kä 86 aune nämene ja tare nike bren keta kabre kisete, yebätä nämene kukwe driedre teléfono yebiti niebare kwe. Ye köböire meribiti kä 92 ye tötikani kwe Bibliabätä.

Tärä aune täräkwata tä kukwe mike gare nie kukwe driekäre ye köböire kukwe kwin tä nemen bare. ¡Mä raba nuainne! Mäkwe nuaindi angwane, kä täi juto käre mäbätä aune mäkwe kukwe driei bäri kä jutobiti.

¿Kukwe drieta ye ngwane kukwe kwin rabadre bare yekäre dre nuaindre? Nitre ruäre tä nütüre tärä aune täräkwata ye mikadrete krubäte, nitre kwati tötikadre Bibliabätä o nitre kwati dimikadre ja mike testiko Jehovakwe. Akwa ye ñaka metre. Töbike Noé yebätä. ¿Kukwe driebare kwe ye köböire kukwe kwin namani bare? Jän. Akwa ¿nitre nibe dimikani kwe Jehová mike täte? ¡Niara mräkätre aibe dimikani kwe! ¿Ne tä dre mike gare nie? Tä mike gare nie Jehová mikadre täte metre ye bäri ütiäte (1 Corintios 4:2).

Ja mräkätre aune ja ngwaitre ie nüke gare niaratre rabadre kukwe driere kä jutobiti yekäre rabadre kukwe ükete metre nuaindre jai. ¿Kukwe meden meden ükate raba? Kukwe meden ükate raba jai ye raba kwen mäi recuadro “ Mäkwe kukwe ükate metre nuaindre jai” nieta yekänti.

Mäkwe ja di kärä Jehovai ne kwe mäkwe kukwe driedre bäri kä jutobiti. Mäkwe dre mikani nuaindre jai ye erere rabai bare mäi angwane, ja rabai ruin kwin mäi, ñobätä ñan aune mätä ja di ngwen krubäte kukwe driekäre ye gare mäi.

Erametre kukwe driedre ye ñaka rabai nuäre nuaindre. Akwa kukwe keta kabre raba mä dimike kukwe driere käre kä jutobiti. Ja mräkä tä kukwe driere mäbe yebe mäkwe blita. Käre mäkwe ja tötika kwin kaibe bämän kratire kratire. Ni klabore ie tö ngwan raba tä kukwe niere ye mäkwe nuain. Mäkwe kukwe ükate metre nuaindre jai. Kukwe drie ye sribi bäri ütiäte mikani mä kisete Jehovakwe aune mätä Testikore niara kräke ye ütiäte krubäte ye mäkwe ngwan törö jai (Isaías 43:10). Mäkwe ñaka kukwe ne käikwitaka jabiti: mäkwe kukwe driei käre kä jutobiti angwane, kä rabai juto krubäte mäbätä.