1, 2. a) ¿Ni tö nünain kärekäre angwane nikwe dre nuaindre? b) ¿Dre käkwe ni dimikai ja ngwen metre nememe mrä?

JA MIKATA kristiano ye abokän nita niken kena jibiti ye kwrere. Ja nire kärekäre tä ji niken krüte yekänti. Jesús niebare: “Nire nire käkwe nünandrekä dite jabtä [...] nebebe kä mrä, ni ye abko rabadi dianintari Ngöbökwe” (Mateo 24:13). ¿Ni tö nünain kärekäre angwane nikwe dre nuaindre? Nikwe ja ngwandre metre nememe ni krütadre ye ngwane o nitre kä nebätä gaite ye näire. Akwa jondron ruäre raba ni näkwite aune ni ñaka raba ja ngwen metre jankunu (1 Juan 2:15-17). ¿Dre käkwe ni dimikai ja ngwen metre nememe mrä?

² Ni rabadre ja ngwen Jesús erere. Jesús töi nämene ño ye Biblia tä driere nie. Biblia tä kukwe meden meden mike gare niarabätä ye nikwe mikai gare jai angwane, niara rabai tare nikwe aune nikwe tödekai ie (ñäkädre 1 Pedro 1:8, 9 yebätä). Apóstol Pedro niebare  nikwe ja ngwandre Jesús erere (1 Pedro 2:21). Nikwe nuaindi angwane, nikwe kä ngwain nüke jai nememe mrä. * (Ñäkädre nota yebätä.) Kukwe ja tötikara käne yekänti rababa gare nie nikwe ja töi mikadre bobre aune ni mada mikadre ruin tare jai Jesús erere. Kukwe ja tötikara nekänti rabai gare nie ño ni raba ñaka kä jürä ngwen jabätä aune kukwe kwin den nuaindre jai Jesús erere.

3. a) ¿Ni ñaka kä jürä ngwen jabätä ye abokän ño? b) ¿Dre käkwe ni dimikai ñaka kä jürä ngwen jabätä?

³ Ni ñaka kä jürä ngwen jabätä ye abokän ni dite aune tä ja tuin kukwe tare ben ye ngwane tä kä ngwen nüke jai. Arato ja mikadre kukwe meden kwin yekri, aune ja töi mikadre jäme bätä kukwe tare ben ja tuadre ye ngwane ja ngwandre metre Ngöböi. Kä jürä ñaka nibätä aune ni tö ja ka ngäbitimana Ngöböi, yebätä ni ñaka nikenkä ni mada käne (1 Samuel 11:7; Proverbios 29:25). Kä jürä ñaka nibätä aune Jehovata kukwe käbämike yei nikwe tö ngwain angwane, nikwe ja töi mikai kwatibe jondron tä ja känenkäre yebätä aune ñaka kukweta ni kisete yebätä (Salmo 27:14). Kä jürä ñaka nibätä aune nita nitre mada tarere angwane, ja nire nikwe tä nemen kukwe tare te akwa yebiti ta nita niaratre dimike (Juan 15:13). ¿Dre käkwe ni dimikai ñaka kä jürä ngwen jabätä? Nikwe tö ngwandre Jehovai aune ja ngwandre Jesús erere (Salmo 28:7).

4. ¿Jesús ñaka nämene kä jürä ngwen jabätä ye bämikani ño kwe nämene templote ye ngwane? (Üai bämikani kena mikadre ñärärä.)

⁴ “Dirikätre nämane ju blitakrä Ngöböbe bäre abko ngätäite Jesu nämane täkänintbe” ye ngwane ñaka kä jürä ngwani kwe jabätä (ñäkädre Lucas 2:41-47 yebätä). Kä nämene krire 12 niarabiti, aune Kukwe Biani Ngöbökwe Moisés ie yebätä kukwe nämene gare krubäte nitre dirikä yei. Arato nitre judío nämene kukwe meden meden nuainne ye nämene gare krubäte ietre, ye köböite ñaka nämene nemen nuäre Kukwe Biani Ngöbökwe Moisés ie ye mikadre täte. Akwa Jesús ñaka nämene nitre dirikä ye jürä ngwen jabätä. Ye medenbätä niarakwe kukwe ngwanintari ietre. Akwa, monsotre kia tä kukwe ngwentari ye ñan ai ngwanintari kwe, ñakare aune kukwe ütiäte krubäte ngwanintari kwe. Kukwe ngwanintari kwe ye nitre dirikä töi mikani niara kukwe nuin aune töbike kukwe yebätä. Nitre dirikä ye kukwe ngwanintari ie arato ja kwetakäre ben kukwe yebätä raba ruin nie, akwa ñaka namani bare ietre. Nitre mada mada aune nitre dirikä käkwe Jesús kukwe nuabare ye töi namani ñan krütare kukwe nämene gare krubäte ie aune namani blite ño yebätä. Jesús ñaka kä jürä ngwani jabätä blitakäre kukwe metre Ngöbökwe yebätä.

5. ¿Jesús ñaka nämene kä jürä ngwen jabätä ye bämikani ño kwe kukwe driekänti?

⁵ Jesús ñaka kä jürä ngwani jabätä nämene kukwe driere ye ngwane aune bämikani kwe kukwe keta kabrebiti. Ñodre, ñaka kä jürä ngwani kwe jabätä niekäre nitre ie, nitre dirikä ye nämene niaratre ngökö (Mateo 23:13-36). Jesukwe ñaka nitre kä nebätä tuanimetre ja töi kwite Ngöbö mikabätä täte (Juan 16:33). Nitre ñaka tö namani niara tuai kukwe driere akwa niarakwe kukwe driebare jankunu (Juan 5:15-18; 7:14). Ne madakäre, nitre nämene jondron rürübäine ngwian ganainkäre ye juanintari bobu kwe templo yete (Mateo 21:12, 13; Juan 2:14-17).

6. ¿Jesús ñaka kä jürä ngwani jabätä ye bämikani ño kwe nünanbare mrä kwe Kä tibienbätä ye ngwane?

⁶ Jesús ñaka kä jürä ngwani jabätä ye bämikani ño kwe nünanbare mrä kwe Kä tibienbätä  ye ngwane ye ani mike gare jai. Judas niara kitai ngise ye ngwane dre rabai bare niarabätä ye nämene gare ie. Akwa yebiti ta niebare kwe ie: “Makwe dre nuendi, ye nuene jötrö” (Juan 13:21-27). Nitre rükä nikani Jesús kain ngite ye ngwane, niara ñaka ja ükani. Ja nire kwe namani kukwe tare te, akwa niara ja tuanimetre ngwandre aune niebare kwe nitre rükä yei rabadre nitre ja tötikaka ben ye tuenmetre niken (Juan 18:1-8). Gobrantre bäri ütiäte kukwe ükatekä nitre judío yekwe känti kukwe ngwanintari ie ye ngwane, ñaka kä jürä ngwani kwe jabätä aune niebare kwe niara ye Kristo aune Ngöbö Monsoi. Sacerdote bäri ütiäte namani kukwe ngwarbe känene Jesús murie ketakäre, akwa niara ñaka kä jürä ngwani jabätä (Marcos 14:60-65). Niara ja ngwani metre nememe murie ketani ye näire. Ye medenbätä, niara jämi krüte ye känenkri niebare kwe: “Sribita ti kisete, erere nibira bare täte jökrä tie” (Juan 19:28-30).

7. a) Monso bati, ¿mä testiko Jehovakwe yebätä ja ruin ño mäi? b) ¿Kä jürä ñaka mäbätä ye mä raba bämike ño?

⁷ Jesús erere, ¿monsotre kristiano yebätä kä jürä ñaka ye raba bämike ño kwelate? Monsotre bati kwati krubäte tä niere monsotre mada ja tötikaka ben kwelate aune nitre dirikä yei niaratre abokän Testiko. Mä tä bati angwane, mä Testiko ye mäkwe nie kwelate mä kötaidre ye kärera, aune yebiti mäkwe bämikai kä jürä ñaka mäbätä. Aune yebiti mäkwe bämikai arato mä testiko Jehovakwe ye ütiäte mä kräke (ñäkädre Salmo 86:12 yebätä). * Ne madakäre, jondron jökrä nükani ja töbiti drieta ye nitre dirikä ruäre törbai mä tuai mike era jai. Akwa Biblia tä käre kukwe metre niere yei mäkwe tö ngwan. Jondron jökrä sribekä tärä ye ñobätä mätä mike era jai ye ngwandretari mäi angwane, mä raba kukwe ye mike gare täräkwata Ni Mikaka Mokre 15 octubre 2013, página 7-11 yebiti (1 Pedro 3:15). Mäkwe ye nuaindi angwane ja rabai ruin kwin mäi, ñobätä ñan aune mäkwe ñaka kä jürä ngwani jabätä kukwe nieta Bibliabätä ye mikakäre gare.

8. ¿Ñobätä ni rabadre ñaka kä jürä ngwen jabätä kukwe driekänti?

⁸ Ni ñaka kä jürä ngwen jabätä kukwe driekänti arato (Hechos 14:3). ¿Ñobätä ni rabadre ñaka kä jürä ngwen jabätä kukwe driekänti? Kena, nita kukwe drieta nikwe ye abokän tä Bibliabätä. Aune Biblia tä kukwe metre driere (Juan 17:17). Ketebukäre, ni “abko sribikä jen Ngöbökwe”, aune niara tä ni dimike üai deme kwe yebiti (1 Corintios 3:9; Hechos 4:31). Ketamäkäre, nita Jehová aune nitre mada tarere. Ye tä ni töi mike kukwe driere bäri, raba nemen bare nie ye ererebätä (Mateo 22:37-39). Ni ñaka kä jürä ngwen jabätä, yebätä nita käre kukwe driere. Nitre dirikä kätä nitre ngökö yei ni töita kwatibe kukwe metre driebätä (2 Corintios 4:4). Nitre ñaka törbai ni kukwe nuai o rabai ja mike ni rüere, akwa yebiti ta nikwe kukwe driedi jankunu (1 Tesalonicenses 2:1, 2).

9. ¿Ni ñaka kä jürä ngwen jabätä ye ni raba bämike ño kukwe tare ben nikwe ja tuadre ye ngwane?

⁹ Ni ñaka kä jürä ngwen jabätä ye nita bämike arato kukwe tare ben nita ja tuin ye ngwane. Nita tö ngwen Jehovai angwane, niarata ni dimike ñaka kä jürä ngwen jabätä aune nita tödeka ribere kä ngwankäre nüke jai ye tä bien nie. Ñodre, ni mräkä o ja ketamuko nikwe krütadre nikän, ye ngwane rabadre tare krubäte ni kräke, akwa nikwe tö ngwandre jankunu kukwe käbämikata yei. Jehovakwe ja di biain nie ye gare nie, ñobätä ñan aune niara ye “Ngöbö [...] kä mik[aka] nuäre nibtä” (2 Corintios 1:3, 4; 1 Tesalonicenses 4:13). Nita bren krubäte, nita ja tare nike krubäte, akwa yebiti ta kräkä  meden raba ni mike ñaka kukwe ükaninte Ngöbökwe mike täte ye ni ñaka kain ngäbiti jire (Hechos 15:28, 29). O nita ulire krubäte, yebätä ja ñaka nemen ruin kwin akwle nie, akwa ni ñaka ja di ngwen nekä. Nitre tä ja tare nike ye Jehovata käre dimike ye gare nie (2 Corintios 7:6; 1 Juan 3:19, 20).

10. a) ¿Nikwe dre nuaindre ne kwe kukwe meden kwin ye nikwe diandre nuaindre jai? b) Nikwe kukwe kwin diain nuaindre jai angwane, ¿nikwe bämikai ño ni täi blite aune ja ngwen yebiti?

¹⁰ Kukwe meden kwin aune meden käme ye mikadre gare käne jai, ne kwe kukwe meden kwin ye erere diandre nuaindre jai (Proverbios 15:21; Hebreos 5:14). Nikwe kukwe kwin diain nuaindre jai angwane, ye nikwe bämikai kukwe niedi nikwe aune ja ngwain ño yebiti. ¿Ni raba nuainne ño? Dre niedi nikwe yebätä nikwe töbikadre kwin, ne kwe nikwe dre niei ye ñaka matadre tare nitre madabätä, ñakare aune rabadre nitre ye dimike. Nikwe kukwe ye nuaindre ie Ngöbö tö (Proverbios 11:12, 13). Ni ñaka rabai rubun jötrö ngwarbe ye ngwane nikwe kukwe ye bämikai arato (Proverbios 14:29). Nikwe kukwe kwin diain nuaindre jai angwane, ni rabai ja kete bäri kwin Ngöböbe. Kukwe kwin diandre nuaindre jai, ¿ye ñokänti raba nemen gare nie? Ni rabadre ja tötike Bibliabätä aune dre drieta kwe ye nikwe mikadre täte (Proverbios 2:1-5, 10, 11). Jesukwe kukwe kwin diani nuaindre jai yebätä nikwe ja tötikai aune nikwe ja ngwandi niara erere ye ni dimikai arato.

11. ¿Jesukwe kukwe kwin diani nuaindre jai ye bämikani ño kwe nämene blite ye ngwane?

¹¹ ¿Jesukwe kukwe kwin diani nuaindre jai ye bämikani ño kwe? Ani mike gare ketamä jai. Kena, niarakwe kukwe kwin diani nuaindre jai ye bämikani kwe nämene blite yebiti. Niara nämene kukwe driere ye ngwane, nämene kukwe dirire kwin krubäte. Yebätä nitre niara kukwe nuaka ye töi nämene nemen ñan krütare (Mateo 7:28; Lucas 4:22). Ne madakäre, Kukwe Ngöbökwe yebätä niara nämene ñäke aune nämene kädekete bä kabre. Kukwe jene jene nämene nemen bare ye ererebätä nämene Kukwe Ngöbökwe yebiti blite (Mateo 4:4, 7, 10; 12:1-5; Lucas 4:16-21). Aune nämene Kukwe Ngöbökwe yebätä kukwe mike gare ye ngwane, kukwe ye nämene mate nitre brukwäte. Ñodre, Jesús ganinkröta ye bitikäre blitabare kwe nitre ja tötikaka kwe yebe nikanintre ji ngrabare kä mada kokwäre ye ngwane. Köbö yete kukwe niebare niarabätä ye mikani gare kwe ietre. Kukwe ye nitre ja tötikaka dimikani krubäte, yebätä niebare kwetre: “Niara ki blite ji ngrabare nibe Ngöbö Kukweibtä angwane, kä nibi nuäre krübäte nibtä” (Lucas 24:27, 32).

12, 13. ¿Jesús ñaka nämene nemen rubun jötrö ngwarbe aune nämene ja töi mike kwin ye kukwe meden tä mike gare?

¹² Ketebukäre, Jesús kukwe kwin diani nuaindre jai ye bämikani kwe ja töi mikani ño kwe yebiti. Niara ñaka nämene nemen rubun jötrö ngwarbe (Proverbios 16:32). Ñakare aune nämene ja töi ngübarebiti aune kä nämene nuäre ngwärebätä (Mateo 11:29). Arato niara nämene nitre ja tötikaka kwe ye ngübare bätärekä  kukwe nämene nainte ietre ye ngwane (Marcos 14:34-38; Lucas 22:24-27). Ne madakäre, niara nuainbare tare ye ngwane ñaka ja ngie mikani jire kwe (1 Pedro 2:23).

¹³ Jesús nämene ja töi mike kwin arato. Ñodre, ani töbike meri iti nämene därie nimiente yebätä (ñäkädre Marcos 5:25-34 yebätä). Meri ye nänbare nitre kwati ngätäite ta rabakäre Jesús känti aune kise mikani kwe dän Jesukwe yebätä. Kukwe Biani Ngöbökwe Moisés ie ye nämene niere meri bren ye kwrere ñaka rabadre kise mike ni madabätä (Levítico 15:25-27). Akwa Jesukwe ñaka ñäkäbare ie. Ngöbökwe Kukwe Biani Moisés ie ye nämene gare ie. Aune ni mada taredre bätä mikadre ruin tare jai ye bäri ütiäte Kukwe Biani Ngöbökwe Moisés ie nämene kukwe kiakia niere mikadre täte ye kräke nämene gare ie (Mateo 23:23). Ye medenbätä, Jesús niebare meri yei: “Makwe tödiri kwatibe tibti, köböire ma nibirate kuinta, aisete nänta jäme”. ¡Kukwe kwin krubäte bämikani kwe!

14. a) ¿Dre nämene bäri ütiäte Jesús kräke? b) ¿Jesukwe kukwe meden diani nuaindre jai kukwe driekäre bäri?

¹⁴ Ketamäkäre, Jesús kukwe kwin diani nuaindre jai ye bämikani kwe nünanbare ño kwe yebiti. Kukwe driedre ye nämene bäri ütiäte niara kräke (Lucas 4:43). Ye medenbätä, kukwe diani nuaindre kwe jai ja töi mikakäre bäri kukwe drie yebätä. ¿Kukwe meden diani nuaindre kwe jai? Niara ja töi mikani nüne jondron braibebiti ne kwe kä rabadrete bäri ie aune tädre dite kukwe driekäre (Lucas 9:58). Arato nitre ja tötikaka ye kräke kukwe ükaninte kwe, ne kwe niara murie ketadre ye bitikäre nitre ja tötikaka ye kukwe driedre jankunu (Lucas 10:1-12; Juan 14:12). Ne madakäre, niarakwe nitre ja tötikaka ye dimikai jankunu nememe mrä ye käbämikani kwe ietre (Mateo 28:19, 20).

15. ¿Ni raba ja töi mike ño kukwe kwin känene niekäre?

¹⁵ Nikwe miri gare käne jai ye erere, nikwe ja töi mikadre kukwe kwin känene niekäre, ye abokän kukwe mada ni raba nuainne ja ngwankäre Jesús erere. Nita blite ja mräkätre ben ye ngwane nikwe kukwe niedre ietre dimikakäre, aune ñaka mikakäre di nekä (Efesios 4:29). Nita kukwe driere ye ngwane nikwe “ja kukwe mrita[d]re mrenbe”, ye abokän nikwe  kukwe niedre nitre ie ye ngwane mikadre ütiäte jai (Colosenses 4:6, Ngöbö Täräe, tärä okwä ükaninte). Nitre tä dre ribere jai aune dre bäri ütiäte kräke ye nikwe mikadre gare käne jai ne kwe nikwe dre niedi ietre ye rabadre gare nie. Nikwe blitai töi jämebiti angwane, nitre raba ni kukwe nuin aune kukwe drieta ietre ye raba mate niaratre brukwäte. Ne madakäre, nita kukwe meden mike täte ye nikwe mikadre gare käre Biblia yebiti. Nita nuainne ñobätä ñan aune gare nie kukwe nieta Bibliabätä ye bäri ütiäte kukwe mada mada niedre nikwe ye kräke (Hebreos 4:12).

16, 17. a) ¿Dre käkwe ni dimikai ñaka nemen rubun jötrö ngwarbe? b) ¿Nita ja töi mike kwin ye ni raba bämike ño? c) ¿Dre käkwe ni dimikai ja töi mike kwatibe kukwe drie yebätä?

¹⁶ Nita kukwe kwin den nuaindre jai ye bämikai nita ja töi mike ño yebiti. ¿Nuain raba ño? Ja ruin ño nie yebätä ja ngübadrebiti. ¿Dre raba ni dimike ñaka nemen rubun jötrö ngwarbe? (Santiago 1:19.) Ni mada ñäkädre tare nie o kukwe nuaindre nibätä abokän ñaka matadre kwin nibätä ye ngwane, ñobätä niarakwe kukwe ye nuainbare ye mikadre nüke gare jai. Ye köböire rabai bäri nuäre ni kräke ngite juen ta biti (Efesios 4:32). Nita ja töi mike kwin ye nikwe bämikadre arato. ¿Nuain raba ño? Ja mräkätre mada ye ja ngwandre metre ye ñaka ribedrebätä. Ni raba ngwen törö jai kukwe meden tä niaratre kisete ye ñaka raba nüke gare jökrä nie. Nitre mada tä töbike ño ye niedre kwetre ye nikwe kukwe nuadre, yebiti ni raba bämike nita ja töi mike kwin. Ni tö jondron nuainmana ño ye ni ñaka tädre niere käre nitre madai (Filipenses 4:5).

¹⁷ Ne madakäre, nita kukwe kwin den nuaindre jai ye ni raba bämike nita nüne ño yebiti. Kukwe driedre ye ütiäte krubäte ni kräke. ¿Dre käkwe ni dimikai ja töi mike kwatibe kukwe drie yebätä? Nikwe ja töi mikadre sribi Jehovakwe ye mike nuaindre käne jai aune nüne jondron braibebiti. Ye köböire kä rabaite bäri nie aune ni täi dite kukwe driekäre kä krüte ye känenkri (Mateo 6:33; 24:14).

18. ¿Ni tö nünain kärekäre angwane nikwe dre nuaindre?

¹⁸ Jesús töi nämene bobre, nämene nitre mike ruin tare jai, kä jürä ñaka nämenebätä aune nämene kukwe kwin den nuaindre jai nibi gare nie ye käi nibi juto nibätä. Niara töi mada mada kwin ye mikadre gare jankunu jai ye käkwe ni dimikai arato. Ye medenbätä, nikwe ja ngwandre jankunu Jesús erere. Ye köböire ni rökrai bäri Jehová ken aune nikwe nünain kärekäre.