KRI rüka kä Líbano yekänti ye krikri krubäte aune bä nuäre. Akwa kri olivo ñaka ye erere ñobätä ñan aune bäri tibien aune nirien tolene. Akwa olivo ye bäri ribi krubäte aune raba nüne kä 1,000 te. Ngätrie kri krubäte aune ribi krubäte. Olivo ye tikadrekä dokwäte ta akwa ngätrie ye tädre nire angwane bükün raba nirienta.

Job ni Ngöbö kukwei niekä kira käkwe kukwe niebare ye abokän kukwe bämikani ne tä ngwen törö nie. Niarakwe kukwe bämikani kri yebätä, ye abokän nämene blite olivo yebätä raba ruin nie. Kri ye tikadrekä akwa bükün raba nirienta niebare kwe. Aune kä rabadre moren krubäte, ñü tädre näkäin tibien, ye ngwane “kri bükün mrä” ye kwrere küde rabai (Job 14:7-9). Job kukwe bämikani yebiti mikani gare kwe, niara krütadi angwane Ngöbökwe gaikröta yei nämene tö ngwen (Job 14:13-15).

Kri tikaninkä ye ni sribikä tirete tä tuin angwane töta nemen bükün tuai nirienta. Ye erere arato, nitre Jehová mikaka täte aune nitre mada kwati tä krüte yei niara tö ja nirien biainta (Mateo 22:31, 32; Juan 5:28, 29; Hechos 24:15). Ni tö niaratre ye tuai nüketa nire arato. Köbö ye rükai angwane, ¡kä rabai juto krubäte nibätä!