Mekerabe, tärä aune täräkwata nikwe ye tä niere Gog kä Magog yekänti ye Satana gärätä. ¿Ñobätä tärä aune täräkwata nikwe ye tä kukwe ye mike gare kore? Ñobätä ñan aune tärä Apocalipsis tä niere nitre ja mikai juta Jehovakwe kä jökräbiti tibien rüere ye Satanakwe jie ngwain (Apocalipsis 12:1-17). Aisete Gog nie nämene ye ngwane Satana kädeka nämene kore arato nämene nüke gare nie.

Akwa kukwe ye mika bike gare bä jene mada. Ñobätä ye ani mike gare jai. Kena, Gog gaite yebätä Biblia tä blite angwane, tä mike gare Jehovakwe mikai kwetadre mü ngri kwetaka aune jondron nire rubun rubun yei (Ezequiel 39:4). Aune tä niere arato Jehovakwe niara “doboi mikai kä Israel yekänti” (Ezequiel 39:11). Akwa Satana ye üaire, aisete jondron nire ñaka raba kwete aune ñaka raba nemen doboi mikani Kä tibienbätä. Ne madakäre, Biblia tä mike gare metre kä 1,000 te Satana kitai kä mente nguse yete. Aisete jondron nire käkwe ñaka niara kwetai aune ñaka doboi mikai (Apocalipsis 20:1, 2).

Ketebukäre, Biblia tä niere kä 1,000 jataira krüte yete Satana jataita kä mente nguse yete kä merebiti ni kä jökräbiti tibien ngökakäre aune “kä jökräbti temen nebebe kä ñäre jökrä amne käkä Gog amne Magog [yekänti] [...], ni ükadikrö kwati kwe rükäre” (Apocalipsis 20:8). Satana ye Gog, akräke niara tädre ja ngököta akwle. Aune ye erere ñaka raba nemen bare. Aisete tärä Ezequiel aune Apocalipsis tä blite Gog yebätä angwane, ñaka tä blite Satana yebätä.

Ye erere ngwane, ¿Gog kä Magog yekänti ye nire? Rabadre gare nie yekäre, nikwe ja tötikadre Bibliabätä aune nirekwe ja mikai juta Ngöbökwe rüere ye nikwe mikadre gare jai. Biblia tä niere Gog kä Magog yekänti, ye “rei ngwitärikri” aune “jrei kä jökräbti” ye rüdi juta Ngöbökwe rüere (Ezequiel 38:2, 10-13; Daniel 11:40, 44, 45; Apocalipsis 17:14; 19:19). ¿Rüdi juta Ngöbökwe rüere nieta ye rüdi jene jene gärätä? Ye ñaka rüdi jene jene raba ruin nie, ñakare aune ye rü arabe akwa kädekata jene jene Bibliabätä. ¿Ñobätä nita ye niere? Ñobätä ñan aune Biblia tä niere juta jökrä Kä tibienbätä käkwe rüdi mrä, abokän käkwe rü Armagedón ye kömikai (Apocalipsis 16:14, 16).

Ja mikadi mrä juta Ngöbökwe rüere nieta bersikulo ketare ketare yekänti ye jökräbätä nikwe  ñäkädre angwane, rükai gare nie “Gog kä Magog yekänti” nieta ye ñaka Satana. Gog kä Magog yekänti nieta ye abokän juta ruäre meden gärätä. ¿“Rei ngwitärikri” ye käkwe ni rükä ye jie ngwain? Ñaka gare metre nie. Akwa ye erere rabai bare raba ruin nie ñobätä ñan aune Jehová tä niere Gog ie: “Kä mäkwe yekri, kä ngwitäri mente yekri, mä aune juta keta kabre jatai mäbe, niaratre ye jökrä jatai mädäbiti, nitre kwati krubäte, nitre rükä kwati krubäte jatai arato” (Ezequiel 38:6, 15).

Daniel ni Ngöbö kukwei niekä käkwe kukwe ye erere niebare rei ngwitärikri yebätä: “Akwa kukwe kädrikri aune ngwitärikri mikai gare ye käkwe niara ngwain nikenkä, aune niara rabai rubun krubäte yebätä rikai nitre kwati gatekäre. Aune mren kri bätä ngutuä deme Bä Nuäre yete ju kri ütiäte sribedi kwe; nememe niara krütai ye ngwane, aune niara dimikaka ñaka rabai” (Daniel 11:44, 45). Daniel kukwe niebare ye erere Ezequiel kukwe niebare Gog yebätä (Ezequiel 38:8-12, 16).

¿Rüdi mrä juta Ngöbökwe rüere ye bitikäre dre rabai bare? Daniel 12:1 tä niere: “Kä ye näire Miguel rükai krö, niara ye ji ngwanka kri tä nünaninkä krö juta mäkwe yekri”. Aune tä niere arato: “Ja tare nikadi kri ñaka rababare bare jire juta köbö ye näire te nükebe kä ye näire erere”. Ye abokän kukwe tare krubäte rabai bare ye meden gärätä. Aune mrä, tä niere juta Ngöbökwe “kä tä tikani täräbätä ye jökrä gitiai”. ¿Kukwe nieta Daniel 12:1 ye tä dre mike gare? Tä mike gare, Jesukristo “tä nünaninkä krö” rei kwrere kä 1914 yete ja känenkäre, ye käkwe rüdi ni dokwäre Armagedón yete. Jesukristo dre nuaindi rüdi mrä ye bitikäre nieta ye erere bäsi mikata gare Apocalipsis 19:11-21 yekänti.

Akwa ¿Gog aune Magog nieta Apocalipsis 20:8 yekänti ye abokän nirebätä blitata? Ye abokän kä 1,000 rabaira krüte yete nitre jökrä käkwe ja mikai Jehová aune nitre Jehová mikaka täte rüere ye meden gärätä. Gog kä Magog yekänti erere nitre ye brukwä rabai juta Ngöbökwe ye kräke. Akwa Armagedón yete Ngöbökwe Gog kä Magog yekänti gaite, ye erere nitre ye gaite kwe arato (Apocalipsis 19:20, 21; 20:9). Aisete nitre jökrä käkwe ja mikai Ngöbö rüere kä 1,000 rabaira krüte yete ye Biblia tä kädeke Gog aune Magog.

Ni testiko Jehovakwe töita krubäte ja tötikabätä Bibliabätä. Ye medenbätä, kä ja känenkäre niena känime yete nire abokän “rei ngwitärikri” mikai gare ye nita mokre mikakäre nüke gare jai. Juta jene jene ja mikai ni rüere ye nire käkwe jie ngwain ñaka gare nie, akwa kukwe ketebu rabai bare yebrä gare metre nie. Kena, Gog kä Magog yekänti aune nitre rükä kwe ye riaite aune gaite. Aune ketebukäre, Jesukristo rei nikwe ye käkwe ni mikai kwäre aune ni mikai nüne kwe kä mrä jäme aune kukwe tare ñaka rabaira yete (Apocalipsis 7:14-17).