TI DÄREBARE Queensland (Australia) kä 1955 yete. Ti rün aune ti meye kädekata Estelle aune Ron. Ti därebare ye bätäräbe bäsi, ti meye jatani ja tötike Bibliabätä nitre testiko Jehovakwe ben. Kä ja känenkäre yete niarakwe ja ngökani ñöte, aune ye bitikäre kä nikani 13 ta angwane ti rün ja ngökani ñöte. Kä 1968 yete tikwe ja ngökaba ñöte kä mente Queensland ye käibiti.

Tärä bätä täräkwata aune kukwe jene jenebiti blitata ye käre tuin kwin tie. Ti nämä chi aune ti rün bätä ti meye nämä niken ti ngwena basare karote ye ngwane, käre ti nämä niken ñäke täräbätä. Ti ñaka nämä niken kä mrusaire ye ñaka nämä nemen kwin ti rün aune ti meye kräke rababa ruin tie. Akwa ñäkä täräbätä ye nämä tuin kwin krubäte tie, ye köböire ti nämä ja tötike kwin krubäte kwelate. Ti nämä ja tötike colegiote juta Glenorchy (Tasmania) yekänti angwane, tikwe jondron keta kabre ganainba jai.

Ye ngwane ngwian käbämikaba tie ti dimikakäre ja tötike kwela krite. Ñäkä täräbätä aune ja tötika ye nämä tuin kwin krubäte tie, aisete tikwe ngwian ye kain ngäbiti o ñakare yebätä ti rababa töbike. Akwa tikwe Jehová taredre bäri jondron mada ye jökräbiti ta driebare ti meyekwe tie (1 Corintios 3:18, 19). Ti meye kukwe drieba tie ye köböire, ti nämä ja tötike colegiote krütaba tie ye bitikäre tikwe ñaka ja tötikaba  jankunu aune tikwe ja mikai prekursor tikwe nieba. Aune ti rün bätä ti meye kräke rababa kwin. Aisete enero kä 1971 yete kä rababa 15 tibiti ye ngwane tikwe ja mikaba prekursor.

Tikwe sribi prekursor nuainba kä rikaba krä kwä ta yete ngutuä mrente Tasmania yekänti. Yete meri bati bä nuäre krubäte kädeka nämä Jenny Alcock yebe tikwe ja mäkäteba. Nunkwe sribi prekursor especial nuainba kä kobokä te Smithton aune Queenstown yekänti.

Kä 1978 yete, Jenny aune ti, nun rikaba gätä kri känti nitre juta madate nübaita nuainba yebätä, juta Port Moresby (Papúa Nueva Guinea) yekänti. Misionero iti käkwe kukwe kädrieba kukwe hiri motu yebiti ye aibe törö bäri tie. Kukwe ye ñaka rükaba gare jire tie, akwa ti törbaba ja tuai siba nitre misionero erere yebätä ti jataba töbike. Ye köböire ti rabadre ja kite blite kukwe madabiti aune kukwe kädriere ja mräkätre bätä ja ngwaitre nünanka juta madate ye dimikakäre. Kukwe jene jenebiti blitata ye tikwe taredre köböire ti raba sribire Jehová kräke rükaba gare tie.

Nun rikabata Tasmania angwane, nun nübaiba sribi misionero nuainkäre ngutuä mrente Funafuti (Tuvalu) yekänti. Sribi ye nun töi mikaba ñan krütare. Enero kä 1979 ye ngwane nun rababa kä yekänti. Nitre Testiko nämä nimäkäbe kä Tuvalu ye jökrä känti.

Ñaka rababa nuäre nun kräke ja kitakäre blite kukwe tuvaluano yebiti, ñobätä ñan aune nitre tötika ñaka nämä blite kukwe yebiti aune diccionario ñaka nämä kukwe yebiti. Tärä kwatibe nämä kwitani kukwe tuvaluano yebiti ye abokän Biblia Nuevo Testamento. Aisete ja töi jeñebiti nunkwe ja töi mikaba ja kite blite kukwe yebiti. Ye medenbätä, nunkwe ja töi mikaba tärä okwä kwäjätä o 20 näre mike gare jai köbö kwatire kwatire te. Akwa kä ñaka rikaba raire ta angwane, tärä okwä keta kabre ñaka nämä nüke gare kwin nunye ye nunkwe gaba jabätä. Ñodre, blitadre chokalitre ben ye ñaka kwin niedre nunkwe näre, akwa jondron jondron ñäkärä aune mökän diandre kisete ye blo nun nämä niere. Nun nämä ja di ngwen jankunu ja kitakäre blite kukwe tuvaluano yebiti, ñobätä ñan aune nitre kwati nämä blite kukwe yebiti ye nun nämä tötike Bibliabätä. Kä rikaba ruäre ta ye bitikäre, nitre ye käkwe nieba nunye käne nun nämä blite ñaka kwin yebätä nun nämä dre niere ye ñaka nämä nüke gare ietre.

Ngutuä mrente yekänti cuarto ñaka nämä ütiä biandre ja kräke, aisete nunkwe nünanba ja mräkätre Testiko ben. Ye köböire nunkwe ja töi mikaba blite bäri kukwe tuvaluano yebiti kä jökrä ngwane, aune ye köböire nun rababa blite bäri jötrö kukwe tuvaluano yebiti. Aune nane nane nun nämä blite kukwe inglere yebiti, yebätä nun rababa blite metrere kukwe tuvaluano yebiti.

Nitre kwati blite kukwe tuvaluano yebiti tö nämä kukwe Bibliabätä mikai gare jai, akwa tärä aune täräkwata  ñaka nämä kwitani jire niaratre kukweibiti. ¿Se ño kukwe rabadre gare nitre yei Jehovabätä, kantadre kwetre ie, blitadre kwetre gätäte o ja ngökadre ñöte kwetre? Erametre, nitre töi kwin ye kukweibiti tärä aune täräkwata tä kukwe mike gare Jehovabätä ye sribedre niaratre nämene ribere jai (1 Corintios 14:9). Nitre 15,000 bäsi aibe nämene blite kukwe tuvaluano yebiti. Yebätä, ¿ja känenkäre tärä aune täräkwata ye sribei kukwe yebiti? Jehová kukwe niebare ye kukwe ketebu bämikani. Kena, nitre nünanka “ngutuä mrente keta kabre mente krubäte” yekänti ie niara rabadre gare arato ie tö (Jeremías 31:10). Aune ketebukäre, nitre ñaka tuin ütiäte nitre kä nebätä ie ye niara tö dimikai (Sofonías 3:12).

Kä 1980 yete, sukursal nieba nunye nun rabadre tärä aune täräkwata kwite kukwe tuvaluano yebiti. Nun ñaka nämä tötikani sribi ye nuainkäre rababa ruin nunye, akwa yebiti ta nun jataba sribi ye nuainne (1 Corintios 1:28, 29). Kä ye ngwane ñotra ñaka nämä nunkwe, yebätä nunkwe impresora ngututu kökaba gobrain. Kena nunkwe tärä aune täräkwata gätä kräke ye imprimibabiti. Ye bitikäre nunkwe tärä La verdad que lleva a vida eterna kwitaba kukwe tuvaluano yebiti ye imprimibabiti. Tinta rä nämä mate krubäte nunbiti aune kä ngire krubäte te nun nämä tärä imprimire kisebiti ye täbe törö tie.

Ñaka rababa nuäre nun kräke kukwe kwitakäre kukwe tuvaluano yebiti, ñobätä ñan aune diccionario aune tärä bätä täräkwata ñaka nämä kukwe tuvaluano yebiti kukwe känänkäre. Akwa ruäre ngwane nun ñaka kukwe ngübare jai ja dimikakäre ye batibe rababa nüke nun kisete. Ñodre, ni ñaka tö nämä nitre Testiko kukwe nuai ye gwirete ti rababa bati. Ni ye nämene dirire kwelate akwa jubilabare. Niara ñaka tö nämä nun tuai nüke jakänti niebata kwe tie. Akwa kukwe keteiti nieba kwe tie yekwe ti töi mikaba ñan krütare. Tärä aune täräkwata kwita nämä nunkwe ye ñaka nämä kwitani kwin kukwe tuvaluano yebiti nieba kwe tie aune nun nämä kukwe meden ñaka kwite kwin ye mikaba gare kwe tie. Ye erere o ñakare ye tikwe ngwantariba nitre madai, aune ni ye kukwe metre nieba rababa gare tie. Aisete nun nämä kukwe kwite ye ruäre nunkwe ükateba. Ni ñaka tö nämä nun kukwe nuain akwa nämene ñäke tärä aune täräkwata  sribe nämä nunkwe yebätä yekwe ti tö mikaba ñan krütare.

Täräkwata kwitaba kena nunkwe kukwe tuvaluano yebiti nitre nübaikäre Jesús Ja Nire Biani Ngwankäre Törö Jai ye nunkwe döräiba ju ju te. Ketebukäre abokän nunkwe täräkwata chi Noticias del Reino número 30 ye kwitaba, täräkwata ye imprimiba inglere yebe gwaire. Tärä aune täräkwata sribebare nitre blite kukwe tuvaluano yebiti kräke drie nämä nunkwe ye käi nämä juto krubäte nunbätä. Ja känenkäre tärä aune täräkwata keta kabre sribeba kukwe tuvaluano yebiti. Kä 1983 yete, täräkwata Ni Mikaka Mokre sribe jataba kukwe tuvaluano yebiti sukursal juta Australia yekänti. Täräkwata Ni Mikaka Mokre sribe nämä batire batire yebätä página nämä 24 aune sribe nämä sö krämä krämä. Nitre jökrä tö nämä ñäkäi krubäte täräbätä, aisete käre niaratre nämä ñäke tärä aune täräkwata sribe nämä nunkwe yebätä. Batire batire tärä aune täräkwata sribe nämä mrä kukwe tuvaluano yebiti angwane, radio gobrankwe yete mika nämä gare, aune ruäre ngwane kukwe ye aibe mika nämä gare köböiti. *

Akwa ¿nun nämä tärä aune täräkwata ye kwite ño? Kena nun nämä kukwe kwite ye ngwane nun nämä tike kisebiti. Biti nun nämä tike máquina yebiti aune nun nämä tuinteta. Kukwe ye tikani blo nunkwe rababa kwen nunye angwane, nun rababa tiketa maquinabiti. Ye kwrere nun nämä nuainne ne kwe rabadre kwin aune juto juankäre sukursal juta Australia yekänti. Sukursal yekänti, meri Testiko nibu nämä computadora yebiti kukwe ye tike. Akwa meritre ye ñaka nämä blite kukwe tuvaluano yebiti. ¿Niaratre nämene dre nuainne ne kwe ñaka kukwe ye tikadre blo kwetre? Niaratre nämene kukwe ye jökrä tike jene jene aune ye bitikäre kukwe ye nämene ja kwrere o ñakare ye nämene mike ñärärä. Biti ja mräkätre nämene kukwe ye mike keteitibe jondron o ni üai mikani yebe ne kwe tärä o täräkwata ye rabadre tuin bä nuäre. Ye bitikäre niaratre nämä tärä o täräkwata ye juenta nunye ru kuinta yete ne kwe nunkwe tuadreteta. Biti nun nämä juenta sukursal ie ne kwe rabadre imprimire.

¡Kukwe ye erere nuain ñaka niena! Kä nengwane, täräkwatabätä kukwe kwitata ye nitre kukwe kwitaka ñaka niken ngwena jötrö ngwarbe oficina kukwe juankäre yekänti. Kä nengwane, niaratre tä kukwe kwite aune ükete computadora yete. Ja mräkä iti tä sribire niaratre ken ye tä metrere kukwe kwitani ye mike keteitibe jondron o ni üai mikani yebe. Aune tärä o täräkwata tä nemen juto angwane, nitre kukwe kwitaka tä juen sukursal ie Internet yebiti imprimikäre.

Ja känenkäre Jenny aune ti, nun juanba ngutuä mrente keta kabre nemenkä kä Pacífico yekri yekänti. Kä 1985 yete nun juanba sukursal juta Samoa yekänti. Yete nun nämä kukwe kwite jankunu kukwe tuvaluano yebiti, akwa nitre nämä kukwe kwite kukwe samoano, tongano aune toquelao yebiti ye nun nämä dimike. * Kä 1996 yete nun juanba sukursal juta Fiyi yekänti nitre dimikakäre kukwe kwite kukwe fiyiano, kiribatiano, nauruano, rotumano aune tuvaluano yebiti.

Sribi tä nitre kukwe kwitaka kisete ye ñaka nuäre aune tä niaratre mike nainte akwa sribita niaratre kisete ye tätre tarere käre ye tä ti töi mike ñan krütare. Nitre jökrä ie kukwe kwin Gobran Ngöbökwe yebätä rabadre gare kukwei kwetre yebiti ie niaratre tö Jehová erere (Apocalipsis 14:6). Ñodre, kukwe ükate  nämä täräkwata Ni Mikaka Mokre kwitakäre kukwe tongano yebiti angwane, nitre umbre ji ngwanka konkrekasionte nünanka Tonga ye jökrä ben tikwe gätäba aune nire raba ja kite kukwe kwitakäre tikwe ngwantariba ietre. Nitre umbre konkrekasionte ye iti nämene sribire karo ükatebätä, aune sribi ye ütiä bian nämene kwin ie. Akwa niarakwe sribi ye tuainmetre aune jetebe se kwrere rabai kukwe kwitaka nieba kwe. Niarakwe ngwian ganaindi ño mräkätre kwe ngübakäre ye ñaka nämä gare ie, akwa nämä tö ngwen täte Jehovai. Kä kwati krubäte te niarakwe kukwe kwitani, aune käre Jehovakwe niara aune mräkätre ngübabare.

Tärä aune täräkwata ye kwitadre nitre blite kukwe jene jenebiti ye jökrä kräke, nitre braibe blite kukwe ruärebiti ye kräke arato ie Nitre Braibe Konkrekasion Jökrä Ngübabitikä tö. Kukwe tuvaluano yebiti kukwe kwitadre jankunu o ñakare ye bati ngwantariba Nitre Braibe Konkrekasion Jökrä Ngübabitikä yei. Niaratre kukwe mikabata gare ye ti dimikaba krubäte. Nun nämä kukwe kwite kukwe yebiti ye nunkwe ñaka tuanemetre jire nieba kwetre. Nitre braibe nämä blite kukwe tuvaluano yebiti akwa nitre yei kukwe Gobran Ngöbökwe yebätä rabadre gare kukwe kwetre yebiti nieba kwetre.

Oficina Känti Kukwe Kwita Nämä juta Fiyi yekänti Jenny aune ti, nunkwe sribiba nükebe kä 2003 yete. Kä ye ngwane nun kädekaba sribikäre Oficina Nitre Kukwe Kwitaka Dimikakäre yete, oficina ye nämä Patterson, Betel Estados Unidos yekänti. Nun tö nämä sribi nuain ye erere rababa nun kisete. ¿Ñobätä? Ñobätä ñan aune oficina yekänti nitre dimikata ne kwe tärä aune täräkwata ye kwitadre bäri kukwe mada jene jene yebiti. Kä kubu biti bäri nunkwe sribiba oficina yekänti angwane, nun janama juta keta kabre känti nitre kukwe kwitaka kukwe jene jenebiti dimikakäre.

Gätä ütiäte krubäte nuainba kä 2000 yete, abokän kädrite kena tikwe yebätä ani bliteta. Kä ye ngwane, Nitre Braibe Konkrekasion Jökrä Ngübabitikä yei nükani gare nitre kukwe kwitaka kä jökräbiti tibien ye namani tötikadre ne kwe rabadre sribi ye nuainne bäri kwin. Nitre ye jökrä bäsi ñaka janamene jire ja tötike kukwe kwitadre ño kwetre ye kräke. Ye medenbätä, gätä nuainba Nitre Dianinkä Mrö Ja Üaire Sribeta Jie Ngwankäre yebe ye bitikäre, Nitre Braibe Konkrekasion Jökrä Ngübabitikä käkwe kukwe ükateba ne kwe nitre kukwe kwitaka ye jökrä tötikadre kukwe kwitakäre. Nitre kukwe kwitaka tötikata ye tä dimike kukwe tikani inglere ye mike nüke gare bäri kwin jai, kukwe meden kwitadre abokän ñaka nuäre ye ükatekäre aune sribikäre keteitibe jabe.

Nitre kukwe kwitaka tötikata, ye köböire tärä aune täräkwata nikwe ye kwitata bäri kwin aune kwitata bäri kukwe keta kabre jene jenebiti. Nun jataba sribi misionero nuainne ye ngwane, täräkwata Ni Mikaka Mokre ye kwita nämä kukwe 82 ye aibebiti. Kukwe ye jökrä bäsibiti täräkwata ye sribe nämä bäri köre kukwe inglere ye kräke. Akwa, kä nengwane täräkwata Ni Mikaka Mokre ye kwita niena kukwe jene jene 240 biti bäri. Aune kukwe ye jökräbiti bäsi, täräkwata ye sribeta gwairebe kukwe inglere yebe. Kä nengwane, tärä aune täräkwata nikwe ye sribeta kukwe 700 biti bäri. Kä ruäre nikanina ta yete kukwe ye ñaka namani tuin nuäre nuaindre.

Kä 2004 yete, Nitre Braibe Konkrekasion Jökrä Ngübabitikä käkwe kukwe ütiäte krubäte ükateba nuaindre. Biblia Traducción del Nuevo Mundo ye kwitadre bäri jötrö ngwarbe kukwe keta kabre yebiti  ükateba kwetre. Ye köböire, kä nengwane nitre kwati krubäte tä ñäke Biblia yebätä kukwe kwetre yebiti. Kä 2014 yete, Biblia Traducción del Nuevo Mundo kwitani täte o ötare ye nämä kukwe jene jene 128 yebiti, Biblia ye ruäre sribebare nitre nünanka kä Pacífico sur yekänti kräke.

Gätä kri nuainba juta Tuvalu yekänti kä 2011 yete ye törö kwin tie. Sö kabre nikani ta yete ñü ñaka nämene näkäin jire tibien juta yekänti, yebätä gätä kri ye ñaka nuaindi ja mräkätre namani nütüre. Akwa nun rababa dere yete angwane ñü jataba näkäin jobe tibien, aisete gätä kri ye nuainba. Biblia Traducción del Nuevo Mundo de las Escrituras Griegas Cristianas kwitani kukwe tuvaluano yebiti ye tikwe mikaba tuare. Ja mräkätre braibe tä blite kukwe yebiti, akwa jondron kwin krubäte ye Jehovakwe biani niaratre yei arato. Gätä kri krütaba ye bätäräbe ñü jatabata näkäin tibien. Aisete ni raba niere köbö yete jondron ketebu kwin krubäte bianba ja mräkätre ie.

Akwa kukwe tare köböite ti muko nämene tare krubäte tikwe ye ñaka nämä gätä kri yete. Kä kwäjätä te niara ja tare nikaba bren cáncer kisete, aune krütaba kä 2009 yete. Kä rikaba 35 ta yete nun nämä ja mäkäninte. Biblia kwitani kukwe tuvaluano yebiti rabai gare ie gaikröta ye ngwane, ye käi rabai juto krubätebätä.

Kä nengwane tita ja mäkäninte meri mada bä nuäre ben. Meri ye kädekata Loraini Sikivou aune ye kukwe mada kwin krubäte Jehovakwe mikani nemen bare ti kräke. Niara ye nämene kukwe kwite siba, aune sribibare kwe Jenny ben Betel juta Fiyi yekänti. Aisete meri tä Jehová mike täte metre aune tä nitre blite kukwe jene jenebiti tarere ti erere, yebe tita ja mäkäninte bobukäre.

Kä nikanina kabre ta yete namanina gare tie Jehová tä nitre jökrä ngübare, aune nitre blite kukwe ruärebiti abokän ñaka gare jire nitre ie ye ngübata kwe arato (Salmo 49:1-3). Tärä aune täräkwata sribeta mrä ye ka ngäbitita kena kwetre ye ngwane kätä nemen juto bätätre aune tätre kantare Jehovai ja kukwei jeñebiti ye tikwe tuanina. Ye ngwane tita nemen töbike Jehovakwe ni tare krubäte yebätä (Hechos 2:8, 11). Ja mräkä umbre nünanka juta Tuvalu yekänti kädeka nämä Saulo Teasi ye törö kwin tie. Kantiko nikwe sribebare niara kukweibiti ye keteitibätä kantaba kena kwe, ye bitikäre kukwe nieba kwe tie ye rababa tuin nuäre tie. Kantiko nunkwe kukwe tuvaluano yebiti ye kantaita bäri nuäre kantiko inglere ye kräke nie manama kwe tie Nitre Braibe Konkrekasion Jökrä Ngübabitikä yei.

Septiembre kä 2005 yete batibe kukwe ütiäte mikaba gare tie yebätä ti töi rababa ñan krütare. Ti kädekaba sribikäre Nitre Braibe Konkrekasion Jökrä Testiko Jehovakwe Ngübabitikä ye erere. Ti ñaka raba nementa ni kukwe kwitaka ye erere, akwa ti täbe nitre kukwe kwitaka kä jökräbiti tibien ye dimike. Aune yebätä tita debe bien Jehovai. Nitre jökrä niara mikaka täte aune nitre nünanka ngutuä mrente mente krubäte nemenkä kä Pacífico yekri, ye tä ngübare ño tuata tikwe ye tä kä mike juto tibätä. Salmo 97:1 tä niere: “¡Jehová ye ara nibira reire! Kä tibien yebätä kä rabadre juto. Ngutuä mrente keta kabre yebätä kä rabadre juto”.