NITRE Braibe Konkrekasion Jökrä Ngübabitikä tätre ükaninte keta ti jatäri. * Kä 1992 yete ja känenkäre, niaratre tä nitre umbre ji ngwanka ie kukwe gare krubäte ye denkä nitre braibe dianinkä ye dimikakäre. Kä nengwane, nitre braibe dianinkä dimikaka ye jökrä “obeja mda mda” (Juan 10:16). Nitre Braibe Konkrekasion Jökrä Ngübabitikä tätre gätäre jabe bämän kratire kratire te yekänti nitre niaratre dimikaka ye tä nemen siba, kukwe kädrieta jabe yebätä tätre kukwe ütiäte mike gare aune dre nuaindre ye tätre niere. Nitre Braibe Konkrekasion Jökrä Ngübabitikä tätre kukwe ükete metrere, aune nitre niaratre dimikaka tätre kukwe ükaninte ye erere nuaindre ye mike nemen bare. Niaratre ye tä juto biare sribi meden meden mikata kisete nuainkäre. Ne madakäre, niaratre tätre niken Nitre Braibe Konkrekasion Jökrä Ngübabitikä yebe gätä krikri känti nitre juta madate nübaita aune gätä krikri ütiäte nuainta yebätä siba. Ruäre ngwane central mundial tä niaratre juen sukursal keta kabre tuinbiti arato.

Ni brare Testiko iti jatani nitre braibe dianinkä dimike kä 1992 yete ja känenkäre tä niere, sribi mikata niara kisete ye tä nuainne kwin angwane, Nitre Braibe Konkrekasion Jökrä Ngübabitikä tätre ja töi mike metrere Ngöbökwe sribi mikani kisete ye aibebätä. Kä 20 nikanina ta yete ni brare Testiko mada tä nitre braibe dianinkä dimike tä niere, sribi ütiäte krubäte rabai kisete yebätä ñaka nämene töbike jire.

Nitre Braibe Konkrekasion Jökrä Ngübabitikä tä nitre niaratre dimikaka ja ngwen metre Ngöböi yei sribi keta kabre bien nuaindre aune niaratre tä sribire krubäte ye ütiäte niaratre kräke. Erametre, ni jökrä rabadre “ni [...] ne kwrerekwrere, ye [...] mik[e] ütiäte” jai (Filipenses 2:29).