Nitre cultura jene jene te aune kukwe jene jenebätä ye bäsi jökrä tä orare. Iglesiate, sinagoga, mesquita, pagodas o santuario aune jondron kia kia ñodre, rosario, devocionarios, iconos, alfombras, tablilla aune cilindro orakäre, kä ño erere känti, kaibe o mukobe akwa nitre jökrä tä orare.

Nita orare ye köböire ni ñan ja erebe jondron mada nire kä tibienbätä yebe. Jondron nire ye erere arato nita mrö ribere jai, ñö aune murie ribere jai. Arato ni ta därere, nirien aune krüte (Eclesiastés 3:19). Akwa, ni nire aibe tä orare. ¿Ñobätä?

Nita ribere jai yebätä. Orasion ye köböire ni raba nemen kä üaire yete, orasion ye abokän puente ye kwrere; yebiti ni raba jondron deme aune kärekäre yebe blite. Bibliata niere, kukwe ja üaire ye ni sribebare niera ribekäre jai (Eclesiastés 3:11). Jesukwe niebare: “Nire nire ie gare tä kukwe ja üaire ribere jai yebätä käta juto” (Mateo 5:3, TNM).

Templo keta kabre aune jondron bätäkä ngöbö mikakäre täte, arato orasion nuainta ora kabre te, ye tä mike gare kukwe ja üaire ye ribeta jai. Bäkänä, nitre ruäre tö kukwe ye erere ie aisete tätre kukwe ye känene jabätä o tätre ja di kärere ni madai. Akwa, nitre tä ja di ngwen kaibe kukwe ye känänkäre ngwane, ngwarbe tä ja di ngwen, ¿ñan ererea? Ni nire ne bobre jakän aune ñan nuin kä raire te, aune kukwe ñaka gare jökrä nie. Ni iti käre, töbätä, aune dite krubäte ye aibe raba kukwe ribeta nikwe jai ye bien nie. Akwa, ¿kukwe meden ja üairebiti ribeta jai abokän tä ni töi mike orare?

Ñodre, kukwe ruäre känti, mäkwe ja jie ngwandre ño, mäträdre ño mäbätä o mä nämäne kukwe ribere jai ye mikakäre gare mäi ni ñan namani jire iti, ¿ye kwrere tärä nemen bare mäbätä? Kukwe tare näire ñodre, ni mräkä tare nikwe tä krüte, nita kukwe ütiäte den nuaindre jai o nita ja mike ngite ngwane, ¿mä töi mikani jäme, ngite juani ta mäbiti o mä jie ngwani ye ñan aibe mä nämäne ribere jai namani ruin mäi?

Biblia tä mike gare, orasion yebiti kukwe ribeta nikwe jai ye raba nemen nikwe. Ñodre, nitre brare aune merire Ngöbö mikaka metre täte käkwe orasion nuainbare yekänti töi mikadre jäme, jie ngwandre aune ngite kitadre ta biti ye ribebare kwetre, arato kukwe nguseta ngwantaribare kwetre jai ye mikani gare ietre nieta Bibliakwe (Salmo 23:3; 71:21; Daniel 9:4, 5, 19; Habacuc 1:3).

Kukwe käräbare ne jökrä ja erebe kukwe keteiti känti. Dre nuaindre ne kwe orasion kukwe nuadre ye nämäne gare nitre oraka yei, akwa ne ngwane kukwe ye mika ñan ütiäte jai: Ye abokän nirei oradre kwetre ye nämäne gare ietre.