Ja mikadre ño orakäre, kukwe nieta orakäre aune ceremonia nuaita orakäre ye religión mada tä mike ütiäte jai, akwa Biblia ña kukwe ye mike ütiäte krubäte jai. Ñakare aune tä kukwe mada bäri ütiäte ye mike gare.

Nitre Ngöbö mikaka metre täte käkwe orabare kä jene jene känti aune ja mikani jene jene kwe orakäre nieta Bibliakwe. Kukwe ño nämäne nemen bare ye ererebätä orabare kwetre, ñodre ruäre käkwe orabare tiebe aune mada abokän käkwe blitabare kri. Ruäre käkwe nikrabare kä kwinbiti aune mada abokän käkwe dokwä mikani kuintubu. Niaratre ñaka jire orabare rosario o devocionario yebiti. Ñakare aune dre nämäne brukwäte ye erere niebare kwetre. ¿Dre käkwe orasion ye mikani mate kwin Ngöböbätä?

Käne ye abokän orasion nuain nämäne Jehovai, aune oradre ie ye ütiäte krubäte nibi gare nie erere. Akwa 1 Juan 5:14 yete kukwe mada mikata gare arato: “Angwane tödekakrä niarabiti nikwe abrä ne: Nita jondron kärere niara ie, niara tö ie erere angwane, niarata ni kukwei nuin”. Ye erere, nita orasion nuainne Ngwane Ngöbö tö dre ie ye ererebätä nikwe oradre. ¿Ye abokän dre gärätä?

Ngöbö tö dre ie ye nikwe mikadre gare käne jai. Ye medenbätä ütiäte krubäte ja tötikadre Bibliabätä. Bäkänä, kukwe rabadre gare krubäte nie Bibliabätä ye Jehová ñan ngübare nibätä. Akwa, niara tö dre ie ye nikwe ja di ngwandre mike nüke gare jai aune ye ererebätä nikwe ja ngwandre yebrä ie tö (Mateo 7:21-23). Kukwe nemen gare Bibliabätä nie ye ererebätä nikwe oradre.

Ne madakäre, kukwe rabai gare bäri nie Jehovabätä ngwane, bäri ni jatai tödeke ie. Kukwe ne ütiäte krubäte arato ne kwe Ngöbkwe orasion nikwe ye kukwe nuadre, Jesukwe niebare: “Munkwe tödekadre kwatibe Ngöböbti, käkwe blitadre ben angwane, dre dre munkwe kärädre ie, ye rükadre mun kisete” (Mateo 21:22). Bäkänä tödekadre ye abokän kukwe ñan tuin nie ye mikadre era jai, akwa ye ñan tä mike gare ni abokän tödekata jerekäbe (crédulos): Tödekabätä Jesukwe blitabare ye abokän tödekata kukwe era ie (Hebreos 11:1). Jehová ñan raba tuin nie, akwa niara ye metre, tö ngwan raba ie, aune nire tä tödeke ie yei tä kukwe mike gare, ye mikata gare ere krubäte Bibliabätä. Nikwe tödeka kärädre ie ye ñan nemen blo kräke, ñakare aune niara tä käre juto biare biankäre nire tä ribere jai ye ie (Lucas 17:5; Santiago 1:17).

Kukwe keteiti ütiäte krubäte ne kwe Ngöbökwe ni kukwe nuadre nebe ye ani mike gare jai mada. “Ti [...] köböire ni jökrä raba nüke ti Rün känti” niebare Jesukwe (Juan 14:6). Ngöbö Monsoi ye aibe köböire ni raba nemen ni Rün känti. ¡Ye medenbätä nitre ja tötikaka kwe rabadre orare niara käbiti niebare kwe! (Juan 14:13; 15:16.). Oradre Jesús käbiti ye ñan tä mike gare orata Jesús ie. Ñakare aune yebiti nita mike gare, niara ye aibe köböire ni raba nökrö ni Rün kä kwinbiti töi metre aune deme ye ken meden gärätä.

Bati, oradre ño ye nitre ja tötikaka Jesukwe käkwe ngwanintari Jesús ie: “Ti Dänkien, blitadre ño Ngöböbe [...] makwe diridre nunye” (Lucas 11:1). ¿Dre gärä nämäne kwe? Oradre ño ye nämänena gare ietre, akwa metrere dre dre niedre kwetre orasionte ye ngwantari nämäne kwetre, ye abokän drebätä oradre kwetre.