ORASION keta kabre ni kristiano tä niere akwa ye jökrä ngätäite orasion padrenuestro driebare Jesukwe ye bäri nitre tä kädekete nieta nitre kwatikwe. Akwa orasion ye dre gärätä ye ñan nüke gare nitre ie. Orasion ye dre gärätä yebätä nitre ñan töbike, akwa millón kwati tä kädekete bati bobu köböitire köböitire, nuaindre kore ye ie Jesús ñan tö namani. ¿Ñobätä kukwe ye gare metre nie?

Ñobätä ñan aune jämi orasion ye driere känenkri niebare kwe: Munkwe ora ngwane, munkwe ñaka kukwe arabe kädekate bä kabre (Mateo 6:7). Se ño Jesukwe mada driedre orasion ye mikadre gare ja töibiti jai aune ye erere kwatire kwatire kädekadrete, ye ñan ai driebare Jesukwe, ñakare aune kukwe meden metrere abokänbätä oradre yebrä drie tö namani Jesukwe. Aisete Jesukwe ora mananbare ño tä tikani Mateo 6:9-13 yebätä ani ja kite.

Kömikakäre, nitre ja tötikaka Jesukwe oradre ngwane, rabadre nuainne Rün kwe Jehová aibe ie ye tä ngwen törö ietre. Akwa, ¿ñobätä Jehová kä mikadre deme nieta kwe?

Ñobätä ñan aune kena sete nüke ne ngwane Jehová kä yebätä kukwe ngwarbe nieta. Satana bäri ja mikaka Jehová rüere. Niara tä niere Jehová ye ni ngökö aune käbäre aisete ñan ni gobraindre kwe nieta Satanakwe (Génesis 3:1-6). Aune nitre ja mikaka Satanakri ye tätre niere, Jehová ye kwata ñaka tare, brukwä käme, ja ngie mike, aune bäri käme, niara ñan aikwe jondron jökrä sribebare nieta kwetre. Ruäre abokän käkwe Ngöbö kä ye dianinkä Bibliabätä aune ñäkäibare.

Akwa, Ngöbö kukwe jökrä ye diainkä nieta Bibliakwe (Ezequiel 39:7). Aune nuaindi kwe ngwane, kukwe ükaite kwe ni kä tibienbätä kräke arato. ¿Nuaindi ño kwe? Jesukwe mikani gare, ye mike ñärärä.

Nitre dirikä iglesiate töi ñaka ja erebe, Gobran Ngöbökwe ye abokän dre gärätä yebätä. Ye erere, ñan nämäne nemen bare Jesús näire. Mesías rükai abokän rabai gobrane käkwe kukwe jökrä ükaite mikani gare profeciakwe ye nämäne gare nitre judío ie (Isaías 9:6, 7; Daniel 2:44). Gobran kite Ngöbökri ye käkwe Jehová kä mikaita deme, satana tä ni ngökö ye mikai kä mrebiti kwe aune satana bätä kukwe nuainta kwe ye mikai krüte kwe. Kukwe mikai krüte kwe ye ngätäite, bren nika, rü, mrö nika aune gata ye diainkä kwe (Salmo 46:9; 72:12-16; Isaías 25:8; 33:24). Aisete, Gobran mäkwe jatadre nita niere ye ngwane, kukwe käbä mikani ye rabadre bare meden ribeta nikwe.

Jesukwe Satana aune angeletre ja ketaka ben ganainbare aune kitani kä tibienbätä kwe ngwane Ngöbö töi ño ye erere namani bare kä kwinbiti aune ye tä mike gare kukwe käbämikata Ngöbökwe ye rabai bare metre kä tibienbätä (Apocalipsis 12:9-12). Kukwe ribeta ne, ketebu käne erere, metrere nikwe ja töi mikadre kukwe ribere Ngöbö töi ño ye ererebätä aune ñan ni töi ño yebätä, ye ütiäte krubäte ye ngwanta törö nie. Ngöbö töi ño rabadre bare kä tibienbätä ye tä kukwe kwin mike bare jondron jökräbätä. Jesús ye töi nämäne metre akwa yebiti ta niebare kwe: “Ma tö dreye tikrä, ye erere raba bare tibtä amne ñan ti töi abko erere rabadre bare” (Lucas 22:42).

Ni raba kukwe ruäre ribere ja kräke driebare Jesukwe arato. Nita dre ribere jai ye kärädre Jehovai ye ñan blo niebare Jesukwe. Ñakare aune nita nuainne yebiti nita bämike Jehová ye “käta kä bien nünankrä nie amne tä müre bien nie amne jändrän jökrä mda mda bianta kwe nie” (Hechos 17:25). Monso tä dre ribere jai ye tä niere rün ie aune rün tä bien ie ye erere Biblia tä Jehová bämike. Ribedi kisere kwe ie akwa, kukwe raba nuainne tare ye ñan biain jire kwe ie.

¿Rürübän ütiä meden tä nibiti Jehovakwe? ¿Ñobätä ngite kitadre kwe ta nibiti nita ribere jai? Nitre kwati ñaka kukwe ye mike era jai o ñaka mike ütiäte jai akwa, Bibliata mike gare erere, ja mika ngite ye köböite kukwe bäri tare tä nemen bare nibätä ye ngätäite gätä ye tä. Nita därere ngite aisete nita kukwe käme nuainne aune ja mike ngite Ngöbö rüere. Ye medenbätä ni tö nünain kärekäre ngwane, Jehovakwe ngite kitadre ta nibiti ye nita ribere jai (Romanos 3:23; 5:12; 6:23). Biblia tä mike gare, Jehová ye töi kwin aune tä juto biare ngite kitakäre ta nibiti (Salmo 86:5).

Ngöbökwe ni krie mikadre ye nita ribere jai. Ni käme o satana ye ñaka nieta nitre ruärekwe. Akwa satana ye tärä niebare Jesukwe aune ni ye kä ne gobrainkä niebare kwe (Juan 12:31; 16:11). Niara tä kukwe keta kabre käme nuainne kä nebätä ye ñaka debe kräke aisete tä ja di ngwen ni töi mikakäre käme ne kwe nikwe ñaka ja ketadre kwin ni Rün Jehovabe (1 Pedro 5:8). Akwa nikwe ñaka jürä ngwandre jabätä ñobätä ñan aune Jehová bäri dite satanabätä aune Jehová tä juto biare ni niara tarekä ye krie mikakäre.

Kukwe keta kabre tärä abokän bätä ni raba orare Ngöböi. 1 Juan 5:14 yete kukwe ye mikata gare bäri kukwe nebiti: Kukwe ñokwä ni raba kärere ie akwa niara töi erere ngwane, tä ni kukwe nuin. Ye abokän dreta ni ngwen töbike ye jökrä ni raba niere ie aune ye jökrä ütiäte kräke (1 Pedro 5:7).

¿Aune dre nie raba medente aune ño ngwane oradre yebätä? ¿Ngöbö kukwei tä dre niere kukwe yebätä? Kukwe ye mikai gare kukwe ja tötikara ja käne yebätä.