ORA NUÄI ngwane oradre aune medente oradre ye religión krikri kä jökräbiti tibien ye bäsi jökrä tä ükete. Akwa, ¿Biblia tä nuainne erere?

Ño ngwane oradre yebrä nieta kwe. Jesús jämi mröre ye känenkri debe biani kwe Ngöböi (Lucas 22:17). Aune nitre ja tötikaka kwe nämäne ja ükekrö Ngöbö mikakäre täte ngwane nämäne orare Ngöböi. Akwa ye ñan nuain nämäne krire. Ye nuain nämänena sinagogas judías aune templo Jerusalén yete. Ju yete nitre kä jökräbiti rabadre niken orare ie Ngöbö tö namani (Marcos 11:17).

Nitre Ngöbö mikaka täte käkwe oradre gwairebe töi ja erebebiti aune kukwe Bibliakwe ye ererebätä ie Ngöbö tö. Orasion ye kwrere ye raba töi mike kukwe nuainne (Hebreos 13:18, 19). Ye medenbätä ni testiko Jehovakwe tä orare gätä nuaita kwe ye jökrä te. Mä tö orasion kwetre ye kukwe nuai ngwane, mä raba niken töi jämebiti Ju Ja Ükarakrö ni testiko Jehovakwe no mä känti yete.

Akwa oradre ora keteiti aibe te aune kä keteiti aibe känti ye Biblia ñaka niere. Nitre Ngöbö mikaka täte käkwe orabare ora jene jene te aune kä jene jene känti ye mikata gare Bibliakwe. Jesukwe niebare: “Ma rika blite Ngöböbe angwane, makwe ja ketaka kaibe kä teri gwi, käkwe jukwe dika jabti, bti ma Rün Ngöbö tuen ñakare mae, ben makwe blita kaibe angwane, ma Rün ie jändrän nuenta kaibe makwe abko tuen, käkwe ütiä biandi mae” (Mateo 6:6).

Ora nuäi o kä meden känti nita orare Ngöbö kri kä kwinbätä ie aune niara tä ni kukwe nuin, ¿ye ñan bä nuäre ya? Ye tä mike gare ñobätä Jesús nämäne kä kaibe känene orakäre ie. Bati jämi kukwe ütiäte den jai ye känenkri orabare kwe dibire ta (Lucas 6:12, 13).

Arato nitre brare aune merire ja ngwanka metre Ngöböi käkwe orabare jämi kukwe ütiäte den jai känenkri o ja tuani kukwe tare ben kwetre ye ngwane. Orabare kwetre käbube, ja kukwei kribiti, keteitibe o kaibe, akwa nuainbare kwetre ye namani ütiäte. Jehová ara tä niere nie: “Käre munkwe” ora (1 Tesalonicenses 5:17). Ni nübaita ye kwin krubäte, ¿ñan ererea? Bäbe ni Ngöbö mikaka täte tä orare, akwa niara tä juto biare kukwe nuakäre.

Nitre ñan kukwe mike era jai tätre nemen ngwentari, ¿oradre ye bäkänä raba ni dimike? Nane mä tärä kukwe ye ngwentari jai.