Oradre ye ñan raba kukwe kwin mike bare ni kräke nütüta nitre kwatikwe. Akwa, Biblia tä kukwe jene driere (Lucas 22:40; Santiago 5:13). Kukwe ja üaire ye ñan aibe känti oración tä ni dimike, ñakare aune ja ruin ño nie aune ni ngrabare yebätä tä ni dimike arato. ¿Ye nemen bare ño?

Ani bämike: Regalo bianta monso chi ie ngwane, ¿dre nuaindre kwe nieta rünkwe ie? Niara töi rabadre debe bianbätä ye ña aibe ñakare aune rabadre tä debe niere ye drieta rünkwe ie. Tä debe nita niere ye köböire ni töita ño ye tä nemen bäri dite. Ye erere tä nemen bäre nita blite Ngöböbe ye ngwane. Orasion keta kabre nuainta ye köböire dreta nemen bare, ye ani mike gare jai.

Orasion debe biankäre. Kukwe kwin keta kabre tä nemen bare ni kräke yebätä nita debe bien Ngöböi ngwane, kukwe kwin nemen bare nibätä yebätä nita ja töi mike. Ye medenbätä, tita nemen debe bien bäri, käta nemen juto nibätä aune nita nemen töbike kwin (Filipenses 4:6).

Ñodre: Jesukwe debe biani Rün kwe ie nämäne kukwe nuin yebätä (Juan 11:41).

Orasion ngite kita manankäre ta jabiti. Ngöbökwe ngite kitadre ta nibiti nita ribere ye köböire ja ñan tä nemena ruin ngite nie aune jata nemen ruinta kwin nie. Ne madakäre tä ni töi tötike aune nikwe ja mikani ngite ye tä nüke gare nie aune tä ni töi mike ja töi kwite.

Ñodre: Davidkwe orabare ngite kita manankäre ta jabiti (Salmo 51).

Ja ngwandre töbätä aune ja jie ngwankäre orata. Tä ni mike ja töi mike bobre, ñobätä ñan aune ni abokän di ñaka ye tä ngwen törö nie aune tä ni mike tö ngwen ni Rün kä kwinbiti ie aune ñan tö ngwen akwle jai (Proverbios 3:5, 6).

Ñodre: oración känti Salomón käkwe ribebare Ngöböi niara mikadre töbätä kwe aune jie ngwandre kwe gobrankäre juta Israel yebiti (1 Reyes 3:5-12).

Ja tare nikata ngwane orata. Kukwe tä nemen ni ngwen töbike krubäte ngwane, oradre Ngöböi ye aibe tä ni töi mike jäme. Aune Jehovakwe ni dimikai yei nita nemen tö ngwen (Salmo 62:8).

Ñodre: Rei Asá rüe krubäre nämene rüere ngwane orabare kwe (2 Crónicas 14:11).

Nitre tä ja di ribere kräke orata. Yebiti nita ja töi mike mantiame aune nita ni mada mike tuin bobre jai aune töi mike nüke gare jai.

Ñodre: Jesukwe orabare nitre ja tötikaka kwe kräke (Juan 17:9-17).

Orasion Jehová käi kitakakäre. Jehovakwe jondron sribebare aune töi kwin keta kabre yebätä nita käi kitekä ngwane, tä nemen bäri ütiäte ni kräke aune tä nemen bäri tare nikwe. Orasion ye tä ni krötö bäri Ngöbö ni Rün kä kwinbätä ye ken.

Ñodre: Ngöbökwe jondron sribebare yebätä Davidkwe töi kwinbiti käi kitaninkä (Salmo 8).

Akwa ye ñan ngöräbe: Orasion ye köböire “kä jäme Ngöbökwe abokän ñaka raba nüke gare” ye tä nemen nikwe (Filipenses 4:7, TNM). Kä näire nita nüne te nünandre jäme ye bäri ütiäte kukwe mada kräke. ¡Ye kwin ni ngrabare kräke! (Proverbios 14:30). Akwa, ¿ño kä jäme raba nemen nikwe? ¿Ja di nikwe ye aibe köböire o kukwe mada bäri ütiäte ribeta jai?