Kukwe ngwantarita ne bäri nitre töta nemen mikai gare jai. Ngöböta orasion ruäre kukwe nuin aune ruäre ñaka kukwe nuin ye nibira gare nie. ¿Tä orasion nikwe kukwe nuin? Kukwe nuai kwe ye tä ni kisete.

Nitre ji ngwanka kukwebätä Jesús näire nämäne kukwe jene nuainne biti nämäne orare ye rüere Jesukwe ñäkäbare: Niaratre nämäne Ngöbö mike era täte ye kwrere jutuadre ni madai ye aibe ie tö nämänentre. Jondron ganain barera kwetre jakrä niebare Jesukwe. Ngöbökwe kukwe nuadre ye ñan ai ie nitre ji ngwanka ye tö namani, ñakare aune tö namani nitre töi mikai jabätä, aisete ye aibe namani kwetre (Mateo 6:5). Ye erere bäsi nemen bare ni näire. Nitre kwati tä orare ngwane ñan tä töbike Ngöböbätä ñakare aune tätre töbike ja aibebätä. Niaratre ñaka tä kukwe miri gare käne nikwe jai ye ererebätä orare, aisete Ngöbö ñaka tä kukwe nuin.

¿Aune dre nie raba nikwe jabätä? Ni kwata bä jene, ni nünanka juta keteiti te, ni ngwian bäkäne ye ribe ñaka ne kwe Ngöbökwe ni kukwe nuadre. Ngöbö “tä ni kitete ñakare” nieta Bibliakwe. “Akwa ni nünanka juta mdente mdente käta Ngöbö mike ütiäte jae amne tä nüne metre abko Ngöböta juto biare kaen ngäbti” (Hechos 10:34, 35). Nire tä Ngöbö tarere krubäte ye ñaka tö kukwe käme nuaindi niara mikakäre ulire. Aune nire tä kukwe metre nuainne ye tä ja di ngwen Ngöbö mike täte aune ñaka ja o ni mada töi ye nuainne. Ye medenbätä Ngöbökwe ni kukwe nuadre ie ni tö ngwane, nikwe ja di ngwandre kukwe kwe ye erere mike täte. a

Nitre kwati tä orare ngwane Ngöbökwe orasion kwetre ye kadre ngäbiti kukwe ñan tuabare yebiti ie töta nemen. Akwa kirabe, nane nane niara nämäne orasion ye kain ngäbiti kore. Ruäre Ngöbökwe kukwe ñan tuabare mikani bare ye bitikäre kä nikani raire ta ngwane kukwe mada ñan tuabare nuainbare kwe nieta Bibliakwe. Ne madakäre, kukwe ñan tuabare nuain nämäne ye mikani krüte nitre apóstol krütani ye ngwane nieta Bibliakwe (1 Corintios 13:8-10). Kukwe jökrä ne ñan tä mike gare Ngöbö ñaka orasion nikwe kukwe nuin. Jehovata ño orasion kain ngäbiti ne ngwane ye ani mike gare ruäre jai.

Tä ni mike töbätä. Ngöbö ye töbätä kri aisete nire tä ja jie ngwan mana ie aune tö mikai täte ye niarata mike töbätä töi bökänbiti (Santiago 1:5).

Tä üai deme bien. Kukwe mada ñaka üai deme Ngöbökwe ye kwrere, ye Ngöbö di kri. Kukwe mada ye ngätäite tä ni dimike ja tuin kukwe tare ben, tä ni töi mike jäme kukweta ni ngwen töbike ngwane aune tä ni dimike ja töi mike kwin (Gálatas 5:22, 23). Nita üai deme ribere nuäi jai ye erere Ngöbökwe biain nie käbä mikani Jesukwe (Lucas 11:13).

Nire tä kukwe metre känene yei tä kukwe ye mike gare. Hechos 17:​26, 27 tä niere erere, nitre kwati kä jökräbiti tibien tö Ngöbö mikai gare jai. Tö kä mikai gare jai, töita ño kä tibien kräke, nitre kräke aune ño raba nökrö ken ye tö mikai gare jai (Santiago 4:⁠8). Käre nitre ye kwrere tä kwen ni testiko Jehovakwe ie aune tä kä jutobiti kukwe ngwantarita kwetre ye mike gare ietre Biblia yebiti.

¿Yebätä mäkwe tärä ne kani ngäbiti? ¿Mätä Ngöbö känene? Ye erere ngwane, kukwe nebiti Ngöbökwe mä kukwe nuani tä bämike mäi.