Kä bä nuäre aune mä

BIBLIA ñan tä kä bä nuäre Edén ye mike era jai ye kukwe keteiti nieta nitre ja tötikaka kri krikwe. Ni dirikä iti Religionbätä kädekata Paul Morris tikabare: “Tärä Génesis ye aibebätä blitata metre ta kukwe nakaninkä Edén yebätä”. Ne erere nitre ja tötikaka krikri kwati tätre niere, akwa kukwe tä nemen bare ye tä kukwe bä jene mike gare.

Metrere Bibliabätä kenanbe nükebe mrä blitata Adán, Eva, tibi aune kä bä nuäre Edén yebätä. a Kukwe ne tä nemen chi ketata kukwe bäri tare nieta nitre ja tötikaka krikri aune nitre ji ngwanka iglesiate yebe, ye abokän: niaratre tädre niere kä bä nuäre Edén ye ngwarbe. ¿Ñobätä nita ne niere? Ñobätä ñan aune tätre ja mike Biblia ara rüere.

Kukwe tä tikani Ngöbö kukweibätä ni kräke ye rükadre gare kwin nie yekäre kukwe nakaninkä kä bä nuäre Edén yete ye rükadre gare mrebe nie. Bike nemen gare nie erere, kukwe bäri ütiäte aune nguseta nita ngwentari jai ye Biblia tä mike gare nie aune kukwe nakaninkä kä bä nuäre Edén yete ye tä ni dimike kukwe ye mike nüke gare bäri kwin jai.

● ¿Ñobätä nita kite umbre aune krüte? Adán aune Eva Ngöbö mikadre täte akräke nünandre kärekäre kwetre. Akwa köbö te niaratre ja mikani ngite ja käne, ja nire metre nianinte kän aune jatanintre krüte (Génesis 2:16, 17; 3:19).Niaratre köböite ni töi namani ngite aune ni jökrä namani ja mike ngite. Yebätä Biblia tä niere: “Kena ni itibe kädian nämane Adán abko käkwe ja mikani ngite Ngöbö rüere angwane, kukwe käme Ngöbö rüere nükani kä nebtä amne kukwe käme köböite ni jökrä nikani krüte, ñobtä ñan angwane ni jökrä käkwe ja mikani ngite Ngöbö rüere arato” (Romanos 5:12).

● ¿Ñobätä Ngöbö tä kukwe käme ye tuenmetre nakainkä? Kä bä nuäre Edén yete Jehová ni ni ngökaka aune tä kukwe kwin ye rükente monsotre kwe yebätä ye Satanakwe niebare (Génesis 3:3-5). Jehová ñan gobranka kwin niebare kwe. Adán aune Eva ñan kukwe Ngöbökwe kani ngäbiti mada aune ja mikani kwetre Satana yekri yebiti bämikani kwetre ni kä tibienbätä raba kukwe meden kwin aune kukwe meden käme ye den akwle jai. ¿Jehovakwe dre nuainbare? Niara töbätä kri aune kukwe ükatekä bäri kwin yebätä, kukwe bäri kwin nuaindre kwe ye abokän ni kä tibienbätä tuadremetre kwe ja gobraine kä ruäre te namani ruin ie aune erere nuainbare kwe. Kukwe käme keta kabre tä käbiti tibien ye metrere satana köböite ye tä mike gare ni kä nebätä ñan raba ja gobraine akwle (Jeremías 10:23).

● ¿Ñokäre Ngöbökwe kä tibien ne dätebare? Ngöbö tö namani kä tibien ne tuai bä nuäre ye jardín Edén tä bämike. Adán aune Eva ngäbäkre ngübadre kwati krubäte aune kä tibien ne kwitadre bä nuäre kwetre ye sribie mikani Ngöbökwe kisete (Génesis 1:28). Kä tibien ne rabadre bä nuäre aune Adán bätä Eva monsoitre töi rabadre metre aune rabadre nüne kä jutobiti te ie Ngöbö tö namani. Ngöbökwe kukwe ye mikai nemen bare ño yebätä metrere blitata Bibliabätä.

● ¿Ñobätä Jesukristo nükani kä tibienbätä? Kukwe namani bare Edén yete ye bitikäre Adán bätä Eva aune ngäbriänkätre jökrä kwe ye tuanimetre gata kisete. Akwa ni tare krubäte Ngöbökwe yebätä monso kwe juani kwe kä tibienbätä ni “kökatarikäre” (Mateo 20:28). ¿Ni kökatarita ye dre gärätä? Jesús kädekata arato Bibliabätä “Adán mrä”, aune niara ye käre Jehová mikani täte aune ñan ja ngwani kwe Adán erere. Yebätä ja nire metre ñan nianinte kän. Niara ja nire metre kwe biani ni jökrä diantarikäre. Ye köböire ngite kita raba ta nitre ja ngwanka metre yebiti, aune raba nüne Adán bätä Eva nünanbare käne ye erere (1 Corintios 15:22, 45; Juan 3:16). Ye medenbätä, Jesús nükani kä tibienbätä ne kwe Ngöbö töi ye rabadre bare. b

Nibira gare nie erere, Ngöbö tö dre nuaindi ye ñan ribi mikakäre gare jai. Ye ñan kukwe ngwarbe aune nuäre ja kitakärebätä. Kukwe jökrä nämäne Edén yete ñodre, kä bä nuäre, nitre aune jondron nire mada ye era, ye kwrere kukwe käbämikata Ngöbökwe ja känenkäre ye rabai bare metre. ¿Dre köböire nikwe kukwe ne tuadi? Ni ara köböire. Kukwe ye rabadre ni jökräkwe ie Ngöbö tö, nitre nikani ji blobiti ye arato (1 Timoteo 2:3, 4). ¿Ñokänti gare nie?

Jesús krütadre ye känenkri blitabare kwe ni ja mikaka ngite, nämäne ken yebe. Ni ja ngwanka käme ye mikadre ja ngie nuin nämene gare ie, akwa kä jäme aune tö ngwanta ye känänbare kwe Jesús känti. Aune Kristokwe niebare ie: “Ti niere metre mäi matare: mä täi tibe Kä Bä Nuäre yete” (Lucas 23:43, TNM). Jesús tö namani ni kukwe käme nuainkä ye tuai kä bä nuäre yete, ¿se ñan tö ni tuai nüne kä bä nuäre yete? Jän, niara tö ni tuai nüne kä bä nuäre yete aune Rün kwe arato. Kukwe kwin käbämikata ye mä tö tuai nemen jakwe ngwane, mäkwe ja kita jankunu Jehová, kä bä nuäre Edén ye sribekä yebätä.

[Nota]

[Üai aune recuadro]

PROFECÍA KENA KUKWE NAMANI BARE JATÄRI BIBLIABÄTÄ

“Aune tikwe mä bätä meri mikai ja rüere kwärikwäri aune tikwe mä monsoi bätä meri monsoi mikai ja rüere. Niarakwe mä dokwä trekaite aune mäkwe niara mikai bren ngoto üebätä” (Génesis 3:15).

Nete profecía kena Bibliabätä niebare Ngöbökwe. Akwa, ¿nire abokän meri, icha aune ngäbriänkätre? ¿Ño tätre ja rüere?

ICHA

Satana (Revelación 12:9).

MERI

Juta kä kwinbätä Jehovakwe abokän te angeletre tä (Gálatas 4:26, 27). Isaías profecía niebare känti meri yekwe juta keteiti üaire däredi (Isaías 54:1; 66:8).

ICHA MONSOI

Nitre ye abokän tä diablu töi nuainne (Juan 8:44).

MERI MONSOI

Metrere Jesukristo, niara ye jatani juta üaire Jehovakwe yekri. Ye ngätäite Kristo mräkätre üaire tä. Nitre kristiano ye dianinkä gobrankäre Jesube kä kwinbiti ne kwe rabadre juta üaire, Israel Ngöbökwe (Gálatas 3:16, 29; 6:16; Génesis 22:18).

TRÄIN NGÖTÖ ÜEBÄTÄ

Ngöbö monsoi nämäne kä tibienbätä ngwane, satana käkwe nitre töi mikani murie kete. Nuainbare tare akwa ye nuabare kä braibe te, ñobätä ñan aune ganinkröta.

DOKWÄ TREKAITE

Jesukwe metai dokwäte käkwe kämikai niara gaite kärekäre ngwane. Akwa ye känenkri Diablukwe kukwe nuainbare kä bä nuäre Edén yete jä käne ye ükaiteta kwe (1 Juan 3:8; Revelación 20:10).

Folleto Biblia ¿tä dre mike gare?, sribebare nitre testiko Jehovakwe yete kukwe meden metrere Bibliabätä ye mikata gare bäri yete.

[Üai]

Adán aune Eva ja mikani ngite yebätä ja ngie nuani kwetre