Profecía 6. Kukwe driei kä jökräbiti tibien
Profecía 6. Kukwe driei kä jökräbiti tibien
“Kukwe kwin Gobran Ngöbökwe yebätä ye driedi kä jökräbiti tibien” (MATEO 24:14, TNM).
● Vaiatea tä nüne ngutuä chi mrente archipiélago Tuamotú (Pacífico) yete. Kä 803,000 kilómetro cuadrado yete, ngutuä mrente tä 80 bäsi aune nitre 16,000 aibe tä nüne. Akwa yebiti ta, nitre testiko Jehovakwe tärä Vaiatea aune nitre nünanka bäre ye tuinbiti. ¿Ñobätä nitre testiko ye nemen kä mente yekänti? Ñobätä ñan aune niaratre tö kukwe kwin Gobran Ngöbökwe yebätä ye mikai gare nitre jökrä ie, tätre nüne medente ye jökrä känti.
¿KUKWE NAKÄNINANKA TÄ DRE MIKE GARE? Kukwe kwin Gobran Ngöbökwe yebätä ye drieta kä kiakia te kä ngrabare. Ñodre, kä 2010 yete nitre testiko käkwe kukwe kwin driebare ora 1,600 millón näre juta aune kä 236 jene jene känti, ye abokän nitre testiko itire itire käkwe kukwe driebare 30 minuto köböiti nie raba. Kä nikanina kwäjätä ta yete, nitre testiko käkwe tärä aune täräkwata sribebare 20,000 millón biti bäri kukwe kwin Bibliabätä mikakäre gare nitre ie.
KUKWE NIETA BIBLIA RÜERE. Kä nikanina kwati krubäte ta yete kukwe kwin Ngöbökwe ye drie jatani.
¿KUKWE NIETA YE METRE? Nitre kwati käkwe ja di ngwanina kukwe Bibliabätä driekäre ye ni raba niere. Akwa köbö braibe te nuainbare kwetre aune kä braibe känti. Akwa nitre testiko Jehovakwe abokän tä kukwe Ngöbökwe driere kä jökräbiti tibien nitre millón kwati krubäte ie. Gobrantre aune nitre dite dite mada käkwe ja di ngwanina kukwe drie ye ketabätäkäre, akwa yebiti ta nitre testiko täbe kukwe driere jankunu (Marcos 13:12, 13). * Ne madakäre, nitre testiko tä kukwe driere ye niaratre ñaka ütiä käre, ñakare aune tätre kukwe driere ora kabre te aune täräkwata döräire. Sribi nuainta kwetre ye ngwian bianta ja töi jeñebiti yebiti ütiä bianta.
¿KUKWE NE TUIN ÑO MÄI? ¿“Kukwe kwin Gobran Ngöbökwe yebätä” ye drieta kä jökräbiti tibien ruin mäi? ¿Profecía tä nemen bare ye tä mike gare kukwe kwin tärä ni kräke ja känenkäre?
[Nota]
^ párr. 6 Mä tö kukwe mikai gare bäri jai ngwane, película Fieles ante las pruebas, Los triángulos púrpuras aune Los testigos de Jehová se mantienen firmes ante el ataque nazi ye mäkwe tua.
[Kukwe mikata gare braibe]
“Kukwe kwin Gobran Ngöbökwe yebätä ye nunkwe driei jankunu aune kä jutobiti ni jökrä ie, dre dre raba nun dimike yebiti nunkwe nuaindi nememe Jehovakwe ‘nibira debe’ niedi batibe”. (ANUARIO DE LOS TESTIGOS DE JEHOVÁ 2010)