NITA kwelate ye ngwane ni tädre ngwäte ye ütiäte krubäte ¿ñan ererea? Monsotre kwati tä niken jerekäbe kübien kwelate, akwa mä törbadre kukwe mikai gare jai angwane mä ñaka kübiadre kwelate. Mätä niken gätäbätä ja tötike Bibliabätä ye ngwane mä ñaka rikadre kübien arato.

¿Dre raba mä dimike ne kwe mä tädre ngwäte?  *... Mä raba kübien derebe o gätä känenkri mä raba ja düke chi. Biblia tä mike gare Pablo nämene blite ye ngwane monso nämene niara kukwe nuin ye nikani kübien jabiti. Kukwe nakaninkä ye tä dre driere nie ye ani mike gare jai. Tärä Hechos kapitulo 20 bersikulo 7 nemen 12 ye mäkwe känä aune ñäkäbätä.

Juta Troas ye nämene mren ken. Pablo nämene konkrekasion ye tuinbiti. Biblia tä niere niara “rababarata yäketa jetbe se kwrere” rute, “aisete rikaba blite janknu abko kä jataba nüke ruäre deo”. Ye bitikäre “ni bati kädian nämane Eutico [...] näma täkänintbe bentanante ni kukwe nuen. Pablokwe blitaba raire, aisete köbö namani krübäte Eutico okwäte”. ¿Dre namani bare ye mä törba gai?...

Eutico “betakaba timon ju komä jabti kukwäne känti”. Pablo aune nitre jökrä nämene yete jatani drekebe timonkwäre. Nükani tibien aune Eutico kwani ngwakare ietre. ¿Niaratre namani ño raba ruin mäi?... Biblia tä mike gare Pablokwe kise kitani ngärä, ketani jabätä kwe aune niebare kwe: “¡Munkwe ñan töbika, Eutico tä kwin!”. Ngöbökwe ja nire bianinta monso ye ie.

¿Kukwe nakaninkä Eutico yebätä ye tä dre driere Ngöböbätä nie?... Tä mike gare Jehová ni  Rün kä kwinbiti raba ni krütanina ye miketa nire aune raba monsotre krütanina miketa nire arato. Mä meye aune mä rün töita mäbätä, akwa Jehová tä mä tarere bäri aune ja ruin ño mäi ye nüke gare kwin ie. Jesús nämene Kä tibienbätä ye ngwane bämikani kwe niara nämene monsotre tarere Jehová ye erere. Niarakwe kise kitani monso kia ngärä aune kukwe kwin niebare kwe ietre, akwa ye ñan aibe, niarakwe monso ruäre ganinkröta, ñodre meri bati abokänbiti kä nämene kwäjätä biti kubu mikaninta nire kwe.

¿Ngöböta mä tarere yebätä ja ruin ño mäi?... Ngöbö tare nikwe, ye medenbätä ni tö niara kukwei mikai täte. ¿Niara tare nikwe ye bämikakäre nikwe dre nuaindre ye mä törba mikai gare jai?... Niara tare nikwe ye ni raba niere ie Jesús erere. Niarakwe niebare: “Tita ti Rün tarere”. Kukwe nuain nämene kwe yebiti bämikani kwe nämene Rün kwe tarere.

Jesukwe Ngöbö mikani täte. “Dre tuen kuin ie abko erere tita nuene”, niebare kwe. Ni törba Ngöbö mikai täte aune kä mikai jutobätä aune Monso kwe yebätä, angwane nikwe ja di ngwandre ñaka kübien kwelate aune gätä nuainta ja tötikakäre Bibliabätä yete.