Bibliakwe niaratre töi kwitani

¿DRE käkwe meri bati töi mikani kukwe driebare rünkwe ie ye kain ngäbitita? Meri ye ara tä mike gare.

“Kä nengwane tita nüne kwin” (LISA ANDRÉ)

DÄREBARE: 1986

JUTA: LUXEMBURGO

KUKWE MADA: NIARAKWE JA TÖI KWITANI

TIKWE JA NGWANI KRÖRÖ: Ti ririabare Bertrange, kä yekänti kä mrebe, nitre nämene nüne jäme aune jondron nämene krubäte; kä ye nemenkä Luxemburgo ken. Nun nirike jai, ti abokän köre. Ti rün aune ti meye abokän testiko Jehovakwe, nun nämene kia ye ngwane niatre käkwe kukwe Ngöbökwe driebare nunye.

Ti namani ünä ye ngwane nitre Testiko tä kukwe driere ye ñan jataba tuin metre tie. Ti nämene töbike kore, yebätä tödeka tikwe jataba dinekä. Ti rün aune ti meye nämene ti dimike ne kwe ti ñaka ja diandrekä ji metre yebiti, akwa tikwe ñan niaratre kukwei mikaba täte. Monsotre ñaka nitre mada mike ütiäte jai yebe ti jataba ja kete, ye abokän ñaka nämene gare ietre. Monsotre ben ti nämene ja kete ye tö nämene dre nuain ye erere nämene nuainne, yebätä ti nämene ja kete bentre arato. Nun nämene niken bieta jökräbätä, nun nämene dö ñain krubäte aune droka duen, bätä nun nämene nemen ni ño ño erere ben. Nitre nämene nüne kwin krubäte nämene tuin tie, nitre yebe ti tö nämene näin.

Ti ñaka nämene nüne kä jutobiti. Kukwe nuain nämene tikwe ye ñaka nämene ti mike nüne kwin, nitre ben ti nämene ja kete ye ñaka nämene töbike jire kukwe nämene nemen bare käbiti tibien yebätä. Kukwe käme nuainta käbiti tibien ye abokän nämene ti ngwen töbike. Köbö kwatire kwatire ti nämene nemen bäri ulire.

BIBLIAKWE TI TÖI KWITANI ÑO: Kä nämene 17 tibiti ye ngwane ti nämä ulire ti meye gaba tibätä, aisete ti nübaiba kwe ja tötiketa Bibliabätä. Kukwe meden drieta Bibliabätä aune ye ererebätä tikwe ja ngwandre, yebätä tikwe töbikadre nieba kwe tie. Kukwe nieba kwe ye käkwe ti mikaba töbike. Ti eteba Caroline bäri umbre ti kräke aune muko kwe Akif käkwe ti tötikadre Bibliabätä ye tikwe ka ngäbitiba. Ti aune ti eteba ririabare kukwebätä, akwa Akif ye abokän namanina umbre ye ngwane namani testiko Jehovakwe. Ye medenbätä, rababa ruin tie, kukwe meden nämene ti töi nike ye ti rabadre niere jökrä ie, ye abokän nämene ütiäte ti kräke.

 Ti nämene ja ngwen ye erere ni testiko käkwe ñaka ja ngwandre ye nämene gare kwin tie. Ti nämene kukwe nuainne ye abokän nämene ti aibe mike töbike ti nämene nütüre. Akwa, ti rikaba ja tötike Bibliabätä ye ngwane rükaba gare tie ti nämene kukwe nuainne nämene Jehová töi mike ulire (Salmo 78:40, 41; Proverbios 27:11). Ti nämene nitre mada mike ulire arato.

Ti nämene ja tötike bäri ye käkwe ti mikani tö ngwen Biblia ye abokän Kukwe Ngöbökwe. Kukwe niebare Bibliabätä abokän namani bare metre ye käkwe mikani gare tie kukwe Ngöbökwe ye ütiäte aune tä kukwe metre niere. Biblia käkwe ti dimikani kukwe metre mike gare jai.

Tikwe ja tötika Bibliabätä kömikabata, ye bitikäre kä kwati näre ti rikaba ti meye aune ti rün ben basare ti ngwai känti, niara nämene sribire sukursal Alemania. Kä nämä juto niarabätä ye käkwe kä mikaba juto tibätä. ¡Ye erere ti tö nämene nünain! Nitre mada mada nämä sribire ja töi jeñebiti yete ye käkwe kä mikaba juto tibätä arato. Nitre ben ti nämene ja kete käne ye abokän nämene ja ngwen käme aune ñaka nämene ja nire mike tuin ütiäte jai, akwa nitre sribikä sukursalte ñaka nämene ja ngwen nitre ye erere. Ti janama kä yekänti, ye bitikäre tikwe oraba Ngöböi mikakäre gare ie tikwe niara mikai täte käre. Kä 19 tibiti angwane tikwe ja ngökaba ñöte mikakäre gare tikwe sribidi Jehová kräke.

KUKWE KWIN NAMANI TIKWE: Kä nengwane tita nüne kwin. Tita blite Bibliabätä nitre madabe, tita Jehová aune dre käbämikata kwe kä ja känenkäre ye tita mike gare ietre ye tä kä mike juto tibätä. Ti mräkätre tä nüne kwin, ñobätä ñan aune niaratre ñan niena ti töibikaire krubäte.

Tikwe kukwe käme nuainbare krubäte, akwa tita ja di ngwen ñan ja töi mike krubäte kukwe yebätä. Jehovata ngite juen ta nibiti aune ti tare krubäte kwe yebätä tita ja töi mike. Proverbios 10:22 yete mikata gare, “Jehovata kukwe kwin mike nemen bare ye köböire kukwe keta kabre tä nemen nikwe, aune ye ñaka tä ni ngwen ja tarenike”, kukwe yei tita tö ngwen ja brukwä tätebiti.

[Kukwe nieta página 14]

“Nun nämene niken bieta jökräbätä, nun nämene dö ñain krubäte aune droka duen, bätä nun nämene nemen ni ño ño erere ben”

[Kukwe nieta página 15]

“Tikwe kukwe käme nuainbare krubäte, akwa tita ja di ngwen ñan ja töi mike krubäte kukwe yebätä”