¿Kukwe nieta Bibliabätä ja jie ngwankäre ye ñobätä mikadre täte?

NI NEMEN jabe ye ñäkäita täte Bibliabätä o kukwe nieta tärä yebätä ja jie ngwankäre ye kukwe kira ¿raba ruin mäi? Ñakare, ñobätä ñan aune, nitre kätä kukwe Bibliabätä ñaka nuainne, yebätä kukwe ne tä nemen bare...

▪ ... ni mada tä bren käme ketekäbätä

▪ ... meri ñaka tö monso ngübabätä akwa nemen muräre

▪ ... tätre ja tuenmetre muko kwe ben

▪ ... töi ñaka tä nemen kwin

▪ ... ja ñaka ruin ütiäte ietre

Ngöbö Jehová * ni Sribekä, niara tö ni tuai jondron sribebare kwe ye käi ngwen juto jabätä. Isaías 48:17 yebätä mikata gare Jehovata ni tötike ye abokän kwin ni kräke. Ye medenbätä, nitre kätä kukwe Bibliabätä nuainne yekwe kukwe ne tä nemen...

▪ ... Ngöböta kain ngäbiti

▪ ... töita jäme

▪ ... tätre ja mäke bäri kwin muko kwe ben

▪ ... blitata kwinbätä

▪ ... jata nemen ruin kwin ie

Kukwe Ngöbökwe tä dre niere ye erere ni ñaka nüne angwane, ¿dre nuaindre? ¿Kukwe nuainta nikwe ye ni raba tuenmetre? ¿Kukwe käme nuainbare nikwe ye Ngöbö ñaka käi kwitekä jabiti?

Ani töbike nitre konkrekasion siklo kena yebätä. Nitre ruäre ye jämi kukwebätä ye känenkri nämene nemen ni madabe, ruäre nämene gure akwa nämene nemen ni madabe bätä nitre brare nämene nemen jabe, akwa ja töi kwitani kwetre aune Ngöbökwe ngite juani biti ta (1 Corintios 6:9-11). Kä nengwane kukwe ye erere tä nemen bare kä  jökräbiti tibien. Nitre ye tätre ja töi kwite aune ni nemen jabe yebätä kukwe nieta Bibliabätä ni jie ngwankäre ye tätre mike täte. Nitre ye jökrä bätä meri bati Sara kädirite kena täräkwata nebätä yekwe kukwe kwin namanina.

“Jötrö ngwarbe ja rababa ruin kwin tie”

Sara nämene kukwe käme nuainne aune ñaka ñäkäidre ie ye niara tö namani, akwa ja ñaka nämene ruin kwin ie aune kä ñaka nämene juto niarabätä nükani gare ie. Niarakwe niebare: “Kukwe nuain nämene tikwe ye ñaka nämene ti töi nike, akwa ti nämene nemen ja gaire aune nane ti rabadre muräre o bren reketadrekä tibätä ye jürä nämene tibätä. Ngöbö tärä ye ti ñaka käi kwitakaba jabiti, aune ti nämä ja ngwen ño ye nämene niara mike ulire ye nämene gare tie. Ja nämene ruin kämekäme tie ye nämene ti mike töbike krubäte.”

Ye bitikäre, Sara ja töi mikani kukwe ye tuenmetre drekebe ngwarbe. Rün bätä meye testiko Jehovakwe aune nitre umbre konkrekasionte yekänti nikani. Sara niebare: “Ti rün aune ti meye bätä nitre umbre käkwe ti ka ngäbitiba ja tarebiti bätä ja ketaba kwin tibe ye mataba kwin tibätä. Yebätä jötrö ngwarbe ja rababa ruin kwin tie.”

Kä nengwane monso tä nibu kwe. Niarata niere: “Tikwe dre nuainbare ye tita kädriere bentre. Ni nemen jabe yebätä Biblia tä kukwe niere ye erere tikwe ñaka nuainbare aune ye köböite kukwe tare namani bare tibätä ye rabadre gare ietre, akwa kukwe Bibliabätä mikadre täte ye köböire jata nemen ruin kwin nie ngrabare, töite aune kätä nemen juto nibätä ye rabadre gare ietre ye ti tö arato. Ngöböta kukwe bien nuaindre nie ne kwe nikwe ñaka ja tare nikadre ye gare kwin tie.”

Ngöböta ni tarere yebätä tä kukwe bien nuaindre nie ne kwe kukwe kwin rabadre nikwe. Erametre, Biblia tä niere ‘Jehovata kukwe nuainmana nie ye abokän metre, kukwe ye tä kä mike juto ni brukwäbätä’ aune ‘Jehovata kukwe niere nie ye abokän tä ni okwä mike trä ngitiekä’. Arato nire tä kukwe ye mike täte yekwe ‘jondron kwin krubäte rabai’ (Salmo 19:8, 11). *

[Nota]

[Kukwe nieta página 8]

Nitre kätä kukwe Bibliabätä ñaka nuainne ye tätre ja tarenike krubäte

[Kukwe nieta página 9]

Nitre kätä kukwe Bibliabätä nuainne ye töita nemen jäme aune tätre ja kete bäri kwin muko kwe ben