¿Kukwe nieta Bibliabätä ye ütiäte?

“Kä kwäjätä tibiti angwane ti jatanina ja känene monsotre brare ben. Kena nun nämene ja kain kisebiti aune ja demaine, akwa biti nun jataba kise mike jabätä kwärikwäri. Kä 15 tibiti angwane ti namanina sribire aune nitre brare tö nämene ti tuai nemen jabe. Nitre sribi muko tikwe nämene dre dre nuainne ye erere ti nämene nuainne jankunu, ne kwe niaratre käkwe ja ketadre tibe.” (SARA, AUSTRALIA) *

¿RABA ruin mäi Sara ye ngübabare kukwebätä? Rün aune meye käkwe ja di ngwani kukwe metre Bibliabätä driere ie, akwa niarakwe ja töi mikani ji mada den ja käne.

Nitre kwati töita Sara ye erere, ñobätä ñan aune tätre nütüre kukwe nieta Bibliabätä ni nemen jabe yebätä ye abokän kukwe kirabe. Nitre mada tätre nütüre raba ja mike kukwebätä aune raba nemen bati bati ni madabe arato.

¿Ni nemen jabe yebätä Biblia tä dre niere ye ütiäte ni kräke raba ruin mäi? Biblia yebätä “Ngöbökwe ja töimikani aune kwin krubäte ni tötikakrä” (2 Timoteo 3:16, NM). Ngöbökwe ni Sribebare aune Biblia ye niara Kukwei nita mike era jai angwane, kukwe nieta Bibliakwe ye mikai tuin ütiäte jai.

Ni nemen jabe yebätä Biblia tä dre niere ye ñaka gare kwin metre nitre kwati ie. Nitre ji ngwanka kukwe madabätä tätre niere Biblia ye ütiäte kräke, akwa kukwe nieta Bibliabätä ye tätre kwite jene jene. Erametre, tätre ñaka töbike ja erebe ye köböite iglesia kwati tätre ja denkä jene jene.

Erametre ni mada tä kukwe keta kabre niere akwa bäri kwin nikwe kukwe ye mikadre gare akwle jai. Ni nemen jabe yebätä kukwe keta jätä ngwantarita, aune Biblia tä kukwe ye mike gare ño ye kädriebike ja käne. Ñobätä ütiäte ni itire itire käkwe kukwe kwin diandre ja käne ye mikata gare kukwe kädrieta mrä yebätä.

[Nota]