Ni nemen jabe: kukwe keta jätä ngwantarita Biblia tä mike gare

1 ¿Adán bätä Eva namani jabe ye aibätä ja mikani ngite kena kwetre?

▪ Mikata gare: Nitre kwati tätre nütüre Adán bätä Eva namani jabe ye abokän kri ngokwä ñäkäbaire kä Edén yekänti meden gärätä, akwa Biblia ñaka tä kukwe ye niere.

Ani töbike. Ngöbö jämi Eva sribere ye känenkri niebare kwe Adán ie “kri dre kuin btä dre käme mikakrä gare” ye ñaka kwetadre kwe (Génesis 2:15-18, JK). Adán nämene kaibe ye ngwane Ngöbökwe kukwe ye niebare ie, ye medenbätä ñaka nämene blite ni nemen jabe yebätä. Ye bitikäre, kukwe ne biani nuaindre kwe nitre nibu yei: “Ngäbäkre ngibia kwati munkwe ie ti tö” (Génesis 1:28, JK). ¿Nitre nibu ye ñaka rabadre jabe angwane ñokänti kukwe biani nuaindre ye rabadre bare ietre? Ngöbö ja tarekä käkwe nitre nibu ye kräke gata ñäkädre kukwei mikabätä täte, ¿raba ruin mäi? (1 Juan 4:8).

Ne madakäre, Eva “kri ngwäkä ye ötani [...] bti kwetani kwe” ye ngwane niara ñaka nämene muko kwe yebe. Biblia tä mike gare “bti biani kwe brareye angwane brarekwe kwetani arato” (Génesis 3:6, JK).

Arato, Adán bätä Eva namani jabe aune monsoi namani ye ngwane Ngöbökwe ñaka ñäkäbare ietre (Génesis 4:1, 2). Kukwe nini nete ye tä mike gare Ngöbökwe kri ngokwä ñäkäibare, ye ngwane ñaka nämene blite ni nemen jabe yebätä, ñakare aune kri ngokwä metre ye gäräbare kwe.

2 ¿Ni nemen jabe ye ñäkäita Bibliabätä?

▪ Mikata gare: Tärä kena Bibliabätä tä mike gare, Ngöbökwe “ni brare btä merire” sribebare. Ne madakäre, jondron jökrä nuainbare kwe “namani tuen bäri nuäre ie” (Génesis 1:27, 31, JK). Siklo nikani kwati ta angwane, niarakwe ni kukwe Bibliabätä tikaka mikani kukwe ne tike nitre brare gure ye kräke: “Kä ngwen juto jabätä meri kena mäkwe yebe [...]. Chuchu kwe ye rabadre tuin kwin mäi kä jökrä ngwane” (Proverbios 5:18, 19). Kukwe nini nete ye tä mike gare ni nemen jabe ye Biblia tä ñäkäire, ¿raba ruin mäi?

 Kukwe keta kabre tä mike gare Ngöbökwe ni ngrabare keteiti bäin ye ñaka sribebare jerekäbe ne kwe monso rabadre nikwe, ñakare aune, sribebare ne kwe nitre gure tä ja tarere aune ja kete kwin ye bämikadre kwetre jai aune ja rabadre ruin kwin ietre kwärikwäri. Nitre gure tätre ja tarere aune nemen jabe ye ngwane jata nemen ruin kwin ietre aune töita nemen kwin.

3 ¿Ni brare aune merire ñaka gure metre akwa tätre jabe yebätä Biblia tä dre niere?

▪ Mikata gare: Biblia tä mike gare metre nire kätä “ja mike gure bati bati abko Ngöbökwe mikadi ja ngie nuen” (Hebreos 13:4). “Fornicación” (nitre ñaka gure metre nemen jabe) ye tikata griekore (pornéia), ye ngätäite kukwe keta kabre nuainta ja mika gure yebiti, ñodre, ni brare bätä ni merire abokän ñaka gure metre tä ja ngrabare keteiti bäin yebiti ja sribere käme. * Ye medenbätä, ni brare bätä ni meri tätre töbike ja mikakäre gure metre, akwa ye känenkri tätre jabe ye abokän ñaka tuin kwin Ngöböi.

Nitre ie ja nemen tuin nuäre krubäte kwärikwäri, akwa ja mikadre gure metre kwetre ne kwe rabadre nemen jabe ye ribeta Ngöbökwe ietre. Ja tare ye Ngöbökwe aune niarakwe ni töi mikani ja tarere, aisete, ñobätä niara tä niere ni brare bätä meri gure metre, ye aibe raba nemen jabe ye tä gare ie. Kukwe ye mikai gare bäri kukwe kädriei ja käne yebätä.

4 ¿Ni nemen nibu o nimä jabe ye tuin ño Ngöböi?

▪ Mikata gare: Ni brare ben meri rabadre kwati ye Ngöbökwe tuanimetre nemen bare kirabe (Génesis 4:19; 16:1-4; 29:18–30:24). Akwa, niarakwe ñaka kukwe ye ükaninte, ñobätä ñan aune Adán ie meri biani itibe kwe.

Meri itibe rabadre ni brarekwe ye abokän ükaninte kena kwe aune kä nikani raire ta angwane niarakwe Jesús mikani blite bäri kukwe yebätä (Juan 8:28). Nitre gure yebätä Jesukwe kukwe mikani gare: “Ngöbökwe kä dätebare angwane “ni brare btä ni merire dätebare kwe,” [...] ne aisete ni brare käkwe ja mikadre gure angwane, rikadre nüne jenena rünbtä amne meyebtä mento merire kwebe. Angwane ni nibu ye abko rabadi ni itibe kwrere” (Mateo 19:4, 5).

 Ye bitikäre, Ngöbökwe ni iti ja tötikaka Jesube töi mikani kukwe ne tike: “Ni brare gure gure käkwe kibia meri jen kwebe. Erere arato, ni merire gure gure käkwe kibia brare jen kwebe” (1 Corintios 7:2). Arato, Biblia tä mike gare, ni brare gure ie sribi biandre konkrekasionte yekäre “meri itibe [tädre] kwe” (1 Timoteo 3:2, 12).

5 ¿Nitre gure metre tä ja ngübare ne kwe monso ñaka rabadre kwe ye abokän käme?

▪ Mikata gare: Jesús bätä nitre ja tötikaka ben ye ñaka niebare ni kristiano käkwe monso ngübadre. Monso ngübadre o ñakare ye Biblia ñaka ñäkäire.

Ye medenbätä, ñongwane monso rabadre nitre gure yekwe bätä monso nibe ngübadre kwetre ye tä gare ietre. Dre diandre kwetre jai ja ngübakäre ye tä gare ietre, akwa ñaka nuaindre monso jämi nikwite ye murie ketakäre. * Aisete ni mada ñaka raba kukwe niere niaratre rüere (Romanos 14:4, 10-13).

6 ¿Monso jämi därere murie ketata ye Biblia tä ñäkäire?

▪ Mikata gare: Ja nire ye ütiäte Ngöbö kräke. Niara kräke monso jämi nikwite ye ni nire arato aune ütiäte kräke (Salmo 139:16). Aisete, niarakwe kukwe ükaninte, ne kwe nire käkwe monso meyebätä murie ketadre ni ye mika nämene ja ngie nuen. Ye medenbätä, monso jämi därere murie ketadre ye abokän tuin ie ni mada murie ketata ye kwrere (Éxodo 20:13; 21: 22, 23).

Monso däredi ye ngwane meye o monso aibe rabadrete nire niedre ¿ye ngwane dre nuaindre? Kukwe ye ñaka nuäre, akwa ye tä gare nitre nibu gure yei. *

7 ¿Ja tuanmetreta yebätä Biblia tä dre niere?

▪ Mikata gare: Jesukwe niebare kukwe keteiti aibebätä kukwe ye nuain raba: “Meri ja mike ngite ñakare brare mda mdabe [ñaka nemen ni madabe], akwa brare kwe käkwe tuandremetre, bti ja mikadre gure meri mdabe kwe, ye ngwane ni brare ye tä ja mike ngite” (Mateo 19:9).

Nire käkwe ni ngökadre bätä kukwe nuaindre nierare ja tuanmetrekäre muko kwe ben ye tuin käme krubäte Ngöböi. Kukwe ngwarbebätä muko tuanemetre kwe ja mikakäre gure ni madabe, Ngöbökwe kukwe ükaite ben (Malaquías 2:13-16; Marcos 10:9).

8 ¿Ni brare o merire ja erebe nemen jabe ye tuin ño Ngöböi?

  ▪ Mikata gare: Nitre ñaka gure metre nemen jabe bätä ni brare o merire ja erebe nemen jabe kukwe ye jökrä ñäkäita Bibliabätä (Romanos 1:26, 27; Gálatas 5:19-21). Ni brare o merire ja erebe nemen jabe ye tuin käme Ngöböi. Arato, niarakwe “ni jökrä tarebare krubäte, medenbätä Monso ngöräbe kwe biani kwe, ne kwe ni jökrä käkwe tödekadre ie ye ñaka gadrete, ñakare aune ja nire käre ye rabadre kwe” (Juan 3:16, NM).

Ye medenbätä, ni brare o merire ja erebe nemen jabe ye ñaka tuin kwin ni kristiano ie, akwa tätre ja töi mike kwin ni jökrä kräke (Mateo 7:12). Nitre Ngöbö mikaka täte käkwe “ni jökrä mika[dre] ütiäte jae” ye ie niara tö, ye medenbätä, ni ñaka ja brukwä mike ni brare o merire ja erebe nemen jabe ye kräke (1 Pedro 2:17).

9 ¿Ni nemen jabe ye kädriedre teléfono, sexting aune Internet yebiti ye kwin?

▪ Mikata gare: Teléfono yebiti nitre nemen ño jabe kädrieta aune kukwe nuata. Sexting ye abokän nitre nemen ño jabe ye üai juanta celular yebiti meden gärätä. Cibersexo ye abokän nitre nemen ño jabe o kukwe mada käme nuainta ye känänta Internet yebiti meden gärätä.

Kukwe ketamä nuainta kä nengwane ye Biblia ñaka kädekete. Biblia tä niere “ja mika gure bati bati bätäkä ngwarbe amne kukwe mda kämekäme [...] amne, jändrän jenena jenena ie ni töta nebe jakrä, ye ñan kwandre jire chi mun ngätäite. Erere arato, kukwe kämekäme diän diän, ye munkwe ñan dian kadate amne, ni töi ñakare tä blite kukwe ngwarbebtä, ye kwrere munkwe ñan blita jire chi. Amne kukwe ngwarbe kämekäme ni mikakrä kötö, yebtä munkwe ñan blita jire chi” (Efesios 5:3, 4). Ni nemen jabe kädrieta telefonobiti, arato sexting aune cibersexo ye tä nitre töi mike töbike jene ni nemen jabe yebätä aune ye tä niaratre töi mike nemen ni madabe. Ni töta nemen rabai ni madabe ye ngwane kukwe ketamä ye ñaka ni dimike ja gobraine, ñakare aune kukwe ye tä ni töi mike töbike jabebätä.

10 ¿Küdreta akwle jabätä yebätä Biblia tä dre niere?

▪ Mikata gare: Küdreta akwle jabätä ye abokän ni ngrabare keteiti bäin yebätä kise mikata nierare bati bobu nükebe ja rabadre ruin debe. Biblia ñaka tä blite metre ta kukwe yebätä, akwa tä niere ni kristiano käkwe kukwe ne nuaindre: “Kukwe kämekäme [...] ye kite jökrä temen munkwe abko krörö: munkwe ñan ja mika gure bati bati ni mda mdabe amne, mun merire brare käkwe ñan kukwe nuen kämekäme jabtä kwärikwäri. Mun tö rabai bäri ni mda mike jabe, ye munkwe kita temen” (Colosenses 3:5).

Nire nire tä küdrere akwle jabätä tä töbike jabebätä aune tä töbike jene ni nemen jabe yebätä. Biblia tä niere “Ngöbö di kri [...] ye abko tä nunbtä” ye medenbätä nire tö kukwe käme ye tuainmetre ye dimikata kukwe ye tuenmetre (2 Corintios 4:7; Filipenses 4:13).

[Nota]