¿Jesús mikadre gare jai ye ütiäte ni kräke?

“Kukwe era metre [...] rükadi gare munye amne [...] mun rabai tikaninte.” (JUAN 8:32)

Kukwe metre Jesubätä tä Bibliabätä ye raba ni mike kwäre kukwe ngwarbe drieta yebätä. ¿Kukwe meden mikadre täte ye ütiäte ni kräke? Jän, kukwe ye ütiäte Jehová, Jesús aune ni kräke arato.

● ¿Ñobätä ütiäte Jehová kräke? Ngöbö abokän “ja tarekä” (1 Juan 4:8, NM). Ngöbö tö ni tuai nüne kä jutobiti kärekäre. Juan 3:16 tä niere: “Ngöbökwe ni jökrä tarebare krubäte, medenbätä Monso ngöräbe kwe biani kwe, ne kwe ni jökrä käkwe tödekadre ie [...] ja nire käre rabadre kwe”. Niarakwe Monso kwe juani Kä tibienbätä ni kökatarikäre, ye köböire ni rabai nüne kärekäre kä bä nuäre te niara töi namani kena ye erere (Génesis 1:28). Nire nire käkwe Monso kwe yebätä kukwe metre mikadre gare jai aune ye ererebätä ja ngwandre, angwane ja nire käre ye rabai kwetre (Romanos 6:23).

● ¿Ñobätä ütiäte Jesús kräke? Niara tä nitre kä nebätä tarere, aune bämikani kwe ja nire biani ni jökrä ütiäre ye ngwane (Juan 15:13). Niarai nämene gare ye aibe köböire ni raba nemen dianintari (Juan 14:6). Niara tö nitre kwati tuai nemente nire yebätä ja nire biani kwe. Aisete nitre ja tötika ben ie niebare kwe niaratre käkwe Ngöbö tö dre nuainmana aune töita ño ye mikadre gare kä jökräbiti tibien (Mateo 24:14; 28:19, 20).

● ¿Ñobätä ütiäte ni kräke? Ni aune ni mräkätre tädre kwin yebätä töbike. Mä tö ja tuai kwin aune nüne kä jutobiti mä mräkätre tare mäkwe yebe ¿ñan ererea? Jesús ye köböire Jehovata käbämike nie ni rabai nüne kwin kärekäre kä mrä te, aune yekänti ja tare nika ñaka rabaira jire chi (Salmo 37:11, 29; Apocalipsis 21:3, 4). ¿Mä tö nünain yete? Ye erere angwane mä rabadre ja di ngwen ne kwe mä rabadre yete.

¿Texto Bibliabätä tikani kena nete ye tä törö mäi? “Kukwe era metre [...] rükadi gare munye amne [...] mun rabai tikaninte.” Kukwe metre Jesubätä aune Ngöbö töi ye niarakwe mikai nemen bare ño ne kwe ni rabadre kwäre ja mika ngite aune gata yebätä ye rabadre gare nie. Ni törba ja tuai nemen kwäre angwane nikwe kukwe metre ye mikadre gare jai. ¿Mä törba kukwe mikai gare bäri jai Jesús yebätä? ¿Dre kwin raba nemen mäkwe aune mä mräkätre yekwe ye mä törba mikai gare jai? Nitre testiko Jehovakwe raba mä dimike ja brukwä kwinbiti kukwe ye mike gare jai.