Blitata nitre testiko Jehovakwe ben: ¿Jesús ye arabe Ngöbö?

NITRE TESTIKO JEHOVAKWE yebätä kätä nemen juto blitakäre Bibliabätä nitre nünanka niaratre bäre yebe. ¿Kukwe ruäre Bibliabätä ñaka tuin metre mäi? ¿Nitre Testiko tä kukwe ruäre nuainne aune mike täte ye mä törba mikai gare jai? Ye erere angwane, mäkwe niaratre tuadre ye ngwane mä raba kukwe ye ngwentari ietre. Niaratre käkwe mikai gare kä jutobiti mäi.

Blitata ño ni testiko Jehovakwe ben yebätä ani töbike, meri Testiko kädekata Carmen abokän tä meri Susana ye gwirete ye ani bämike.

¿Erametre nitre Testiko ye ñaka Jesús mike era jai?

Susana: Iglesia tikwe yete pastor tä niere nitre testiko Jehovakwe ñaka Jesús mike era jai. ¿Ye metre?

Carmen: Nunta Jesús mike era jai. Tödekadre Jesús ie ye ütiäte krubäte ni mikakäre kwäre yei nunta tö ngwen.

Susana: Tita kukwe ye mike metre jai arato.

Carmen: Ye erere akräke ni töita ja erebe. Ti kä Carmen, ¿mä abokän kä ño?

Susana: Ti kä Susana.

Carmen: Mä käi nibi juto tibätä Susana. Nitre testiko Jehovakwe tä Jesús mike metre täte nieta, akwa ñobätä niaratre ñaka ye erere nuainne ni mada tä niere, yebätä mä tärä töbike raba ruin tie.

Susana: Jän, ti tö kukwe ye mikai gare jai.

Carmen: Tätre ye niere ñobätä ñan aune nunta tödeke krubäte Jesús ie, akwa kukwe ruäre nieta niarabätä ye nun ñaka mike era jai.

Susana: ¿Mä raba mike gare keteiti tie?

Carmen: Nitre ruäre tä niere Jesús töi nämene kwin jerekäbe, akwa kukwe ye ñaka metre nun kräke.

Susana: Kukwe ye ñaka metre ti kräke arato.

Carmen: Ni töita ja erebe arato. Ketebukäre, Jesús tä Rün kwe mike tuin ño jai ye driebare kwe, akwa ye erere ñaka drieta ye abokän nun testiko Jehovakwe ñaka kain ngäbiti.

Susana: ¿Dre gärätä mäkwe?

Carmen: Iglesia kwati tä driere Jesús ye arabe Ngöbö. Ye erere drieta mäi raba ruin tie.

Susana: Jän, pastor tikwe tä niere Ngöbö ye arabe Jesús.

Carmen: Jesukwe kukwe meden niebare jabätä ye nikwe mikadre gare metre jai ye bäri kwin, ¿ñan ererea?

Susana: Jän, ye erere.

¿Jesukwe dre driebare?

Carmen: Bersikulo keteiti Bibliabätä tä kukwe ye mike gare ye ani känene. Ani ñäke Juan 6:38 [NGT] yebätä, mä raba mike ñärärä. Jesukwe niebare: “Ti abrä kä kwinbätä jatani, ñan jondron ie ti tö erere nuaindre tikwe, akwa tikwe nuaindi ni ti juanka töi erere”. Jesús Ngöbö ara akräke ñaka kukwe ye erere niedre kwe.

Susana: ¿Dre gärätä mäkwe?

Carmen: Mike ñärärä, Jesús ñaka jatani kä tibienbätä ja töi jeñe nuainkäre niebare kwe.

 Susana: Mätä kukwe metre niere, niara jatani kä tibienbätä Rün töi nuainkäre niebare kwe.

Carmen: Jesús arabe Ngöbö akräke, ¿nirekwe niara juani kä tibienbätä? ¿Ñobätä rabadre ni niara juanka mike täte aune töi erere nuainne?

Susana: Dre gärätä mäkwe ye nüra gare tie. Akwa, bersikulo ye ñaka tä mike gare metre ta Jesús ye ñaka Ngöbö.

Carmen: Jesukwe kukwe mada niebare ye nikwe mikadre gare jai ye kwin krubäte. Kukwe kädrieni käne ye erere bäsi niebare kwe Juan kapitulo 7 yekänti. ¿Mä törba ñäkäi bersikulo 16 yebätä?

Susana: Jän. “Jesukwe nieba ietre: Tita kukwe dirire, ye abko ñakare tikwe, akwa ni ti juanka abko kukwei dirita tikwe.”

Carmen: Tä debe. Bersikulo ne tä niere, ¿Jesukwe ja kukwei diribare?

Susana: Ñakare, ni niara juanka kukwei driebare kwe niebare kwe.

Carmen: Metre. ¿Nirekwe Jesús juani? ¿Aune kukwe metre driebare kwe ye nirekwe mikani gare ie? Ni bäri ütiäte Jesús kräke käkwe juani. Erametre, ni ni mada juanka ye bäri ütiäte ni juanta kwe ye kräke.

Susana: ¡Ye ütiäte krubäte! Ti ñaka ñäke texto yebätä.

Carmen: Jesukwe kukwe niebare Juan 14:28 yebätä töbike arato: “Ti abko bike nikenta, akwa ti rükadita munbe nete, tikwe nini, ye munkwe kukwei nurira. Ye abko, munta ti tarere era metre bkänä ne ngwane, ti bike nikenta kä käinbti ti Rün känti, tikwe nini munye, ye käi rabadre nuäre munbtä, ñobtä ñan angwane ti Rün abko bäri kri tikrä”. Bersikulo ne tä mike gare, ¿ja namani ruin ño Jesús ie Rün kwe yebätä?

Susana: Rün kwe ye bäri kri niara kräke niebare kwe. Nämene Ngöbö ye mike tuin bäri kri jai raba ruin tie.

Carmen: Ye metre. Ani ñäke arato Mateo 28:18 yebätä. Bersikulo nekänti Jesukwe niebare nitre ja tötikaka kwe yei: “Kä käinta se amne kä temen ne [...] mikani gare jökrä tie”. ¿Niara ye jondron jökrä bökänkä niebare kwe?

Susana: Ñakare, jondron mikani gare ie niebare kwe.

Carmen: Akwa, Jesús ye arabe Ngöbö akräke, ¿ñokänti jondron jökrä ye mikani gare ie? ¿Aune nirekwe biani ie?

Susana: Tikwe töibikadi kukwe yebätä.

¿Nire ie nämene kukwe niere?

Carmen: Kukwe mada ütiäte tä mike gare Jesús ye ñaka Ngöbö.

Susana: ¿Kukwe meden?

Carmen: Jesús ngökani ñöte kädrieta Bibliakwe yebätä. Ani Lucas 3:21, 22 ye känene. ¿Mä törba ñäkäibätä?

Susana: “Juan kita ngämi ngite kä teri, känenkri nämane ni ngökö ñöte angwane, Jesu ngökani ñöte kwe arato. Jesu jämi nikenta jate angwane, nämane blite Ngöböbe, btäräbe jukwe tika kwrere kä ngitiani kä käinbti, amne Ngöbö Üai Deme, jatani tuen ütü bä kwrere timonkwäre, nikani mate Jesubti. Ne btäräbe ni kukwe jarabare krörö kä käinbti: Ma abko ti Ngobo tikwe. Ma tare kri tikwe. Ma käi nuäre kri tibtä”.

Carmen: ¿Jesús ngökani ñöte ye ngwane nämene dre nuainne ye nü gare mäi?

Susana: Nämene orare.

Carmen: Ye erere. Jesús Ngöbö ara akräke, ¿nirei nämene orare?

Susana: Kukwe ye ütiäte krubäte. Tikwe kukwe ye ngwaintari pastor tikwe ie.

Carmen: Kukwe mada mikata gare nete. Jesús ngökani ñöte ye ngwane, jataninta ñöte kwin angwane, ni kukwe juruabare kä kwinbiti. ¿Dre niebare kwe ie?

Susana: Jesús ye abokän Monso kwe, tare krubäte kwe aune käi namani nuäre krubätebätä niebare kwe.

Carmen: Kwin krubäte. Akwa Jesús ye arabe Ngöbö akräke, ¿nirekwe kukwe ye niebare kä kwinbiti?

Susana: Ti ñaka töbike jire chi kukwe yebätä.

 ¿Ñobätä kädekata “Rün” aune “Monso”?

Carmen: Ni raba kukwe mada mike gare jai. Ngöbö abokän Jesús Rün kä kwinbiti niebare kwe yebätä nikwe ñäri. Aune Jesús ngökani ñöte ye ngwane, ni kukwe juruabare kä kwinbiti ye käkwe niebare niara abokän Monso kwe. Ne madakäre, Jesukwe mikani gare metre niara abokän Ngöbö Monsoi. Ni nibu ye bä ja erebe mä törba mikai gare tie angwane, ¿mä raba bämike ño tie?

Susana: Nitre nibu ja etebare yebätä tikwe bämikadre.

Carmen: Ni munkine bä ja erebe yebätä blita raba. Akwa Jesukwe blitabare Ngöböbätä ye ngwane Ngöbö abokän Rün niebare kwe aune blitabare kwe jabätä ye ngwane niara abokän Monso Ngöbökwe niebare kwe. Ye medenbätä, ¿Jesukwe kukwe meden mikani gare kukwe niebare kwe yebiti raba ruin mäi?

Susana: Nüra gare tie. Jesús nämene blite ni iti bäri umbre aune bäri ütiäte niara kräke yebätä.

Carmen: Ye erere. Nitre bä ja erebe ye mäkwe bä miri ni ja etebare o ni munkine yebätä. Ye erere arato, Jesús Dirikä bäri Kri törbadre mikai gare niara arabe Ngöbö angwane, ¿ñan bämikadre ye erere kwe arato?

Susana: Ye erere raba ruin tie.

Carmen: Akwa, ñaka kukwe ye erere niebare kwe, ñakare aune kukwe ketebu ne niebare kwe Rün aune Monso.

Susana: Kukwe nieta mäkwe ye ütiäte krubäte.

¿Nitre ja tötikaka Jesukwe käkwe dre driebare?

Carmen: Kä tärä mäi ngwane ti törba kukwe mada kädriei mäbe.

Susana: Jän, ti raba mä kukwe nuin.

Carmen: Jesús ye arabe Ngöbö akräke, nitre ja tötikaka kwe käkwe mikadre gare metre, ¿ñan ererea?

Susana: Ye erere raba tuin tie.

Carmen: Akwa, niaratre käkwe kukwe ye erere driebare ye mika ñaka gare jire chi Bibliabätä. Ne madakäre, apóstol Pablo ni nänkä Jesús jiebiti käkwe kukwe tikabare ye ani mike ñärärä. Jesús murie ketani aune ganinkröta ye bitikäre Ngöbökwe dre nuainbare ye mikata gare Filipenses 2:9 [NM] yebätä: “Ngöbökwe niara mikani bäri ütiäte aune ja töi kwinbiti kädekani bäri kri kwe ni mada ye jökräbiti ta”. Bersikulo ne tä niere, ¿Ngöbökwe dre nuainbare Jesús kräke?

Susana: Ngöbökwe niara mikani bäri ütiäte nieta.

Carmen: Ye erere. Jesús murie keta jämi ye känenkri nämene Ngöbö erere akräke, ¿ñobätä nieta niara ganinkröta ye ngwane mikani bäri kri? ¿Nire raba nemen bäri kri Ngöböbiti ta?

Susana: Ni ñaka tärä iti jire chi.

Carmen: Nikwe kukwe keta kabre miri gare jai ye medenbätä, ¿Jesús ye Ngöbö ara drieta Bibliakwe raba ruin mäi?

Susana: Ñakare. Niara abokän Ngöbö Monsoi nietabätä.

Carmen: Ye erere. Akwa, ye ñaka tä mike gare nun ñaka Jesús mike ütiäte jai. Niara Mesías käbämikani abokän murie ketani ye köböire ni jökrä Ngöbö mikaka metre täte mikai kwäre yei nunta tö ngwen.

Susana: Kukwe ye metre ti kräke arato.

Carmen: Ye medenbätä, Jesús ja nire biani ni kräke yebätä ni raba debe bien ño ie ye nikwe ngwandretari jai ye ütiäte krubäte. *

Susana: Ruäre ngwane ti tärä kukwe ye ngwentari jai.

Carmen: Mä törba angwane, ti raba kiteta köbö mada ngwane kukwe ye mike gare Bibliabiti mäi. ¿Bämän madabätä mä täi gwi ora ne näre?

Susana: Jän, ti täi gwi.

Carmen: ¡Kwin krubäte! Ye erere ngwane ja tuaita.

[Nota]