Jesukristo: kukwe ngwantarita aune mikata gare

“¿Ti ne abko nire nieta ni mda mdakwe tibtä?” (LUCAS 9:18)

NITRE kwati nämene kukwe jene jene niere Jesús yebätä akwa nitre ja tötika kwe nämene töbike ño ye niara tö namani gai. Kukwe rabadre gare Jesubätä ietre, ñobätä ñan aune niara ñaka nämene nüne kä kaibe te, aune ñaka nämene ja üke nitre madabätä. Nitre kwati ye ngätäite niara nämene arato. Niara rabadre gare nitre mada ie ye niara tö namani, ye medenbätä kä jökrä känti niarakwe kukwe driebare nitre tö nämene niara kukwe nuai yei (Lucas 8:1).

Jesukwe blitabare bätä ja ngwani kwe yebiti niara raba nüke gare kwin nie. Tärä ketabokä Bibliabätä: Mateo, Marcos, Lucas, bätä Juan känti Ngöbö töita tikani ye raba kukwe ye mike gare bäri nie. Jesukwe nünanbare ño nieta Bibliabätä ye abokän raba ni dimike kukwe metre mike gare jai niarabätä (Juan 17:17). *

 KUKWE NGWANTARITA: ¿Dreta mike gare niarakwe nünanbare?

MIKATA GARE: Nitre kukwe kira tikaka tä kukwe ye mike gare metre. Ñodre, Josefo bätä Tácito nünanbare siklo I käkwe mikani gare Jesukwe nünanbare metre. Tärä ketabokä Bibliabätä yete kukwe keta kabre mikata gare metre Jesubätä, aune ye tä mike gare niarakwe nünanbare metre aune ñaka kukwe ngwarbe nietabätä. Ñodre, tärä Lucas yebätä mikata gare ñongwane Jesukwe kukwe drie ye kömikani, aune nitre ni kükü nämene gobrane ye mikani gare kwe arato. Nitre kukwe kira tikaka ye käkwe mikani gare nitre ye käkwe nünanbare metre (Lucas 3:1, 2, 23).

Kukwe keta kabre krubäte tä mike gare Jesús nünanbare metre. Tärä Evidence for the Historical Jesus (Pruebas históricas de la existencia de Jesús) tä mike gare, “nitre ja totikaka krikri ye jökrä bäsi tä niere Jesús Nazarebo käkwe nünanbare siklo I yete”.

KUKWE NGWANTARITA: ¿Jesús ye arabe Ngöbö?

MIKATA GARE: Ñakare. Jesús ñaka nämene niere niara abokän Ngöbö. Bati bobu bämikani kwe Jehová aibe mikadre täte. * Ye medenbätä, nämene kädeke “Ngöbö tikwe” aune nämene niere ie “mä aibe itebe Ngöbö erametre” (Juan 20:17; 17:3). Ni sribikä tä sribi bökänkä o ni mada kädekani bäri kri niara kräke yei “jefe tikwe” niere, ye kwrere Jesukwe niebare.

Jesukwe bämikani niara bätä Ngöbö ye ñaka ja erebe. Bati, nitre ja mikaka niara rüere ye ñaka tö namani niara kukwei mikai täte ye ngwane niarakwe niebare ietre: “Kukwe Biani Ngöbökwe Moiséye mun kräke, btä nieta krörö: Ni nibu käkwe blitadre ja kwrere [...] ye ngwane niaratre nibu kukwei rabadre ütiäte [...]. Ti ara jire tä blite au jakrä amne ti Rün käkwe ti juani abko tä blite tikrä arato” (Juan 8:17, 18). Nikwe töbikadre kukwe yebätä angwane niaratre nibu ye ñaka ja erebe. *

KUKWE NGWANTARITA: ¿Jesús töi nämene kwin jerekäbe?

MIKATA GARE: Sribi mada ütiäte nuainbare kwe, ye köböire Ngöbö töi nämene ño ye mikani nemen bare kwe. Sribi meden nuainbare kwe ye ani mike gare jai.

● “Ngöbö Monsoi itibe.” (Juan 3:18, NGT). Jesús nämene medente jatani ye nämene gare kwin ie. Niara jämi nüke Kä tibienbätä ye ngwane niara nämenena nüne ye nämene gare kwin ie. Niarakwe niebare: “Ti abrä kä kwinbätä jatani” (Juan 6:38, NGT). Niara ye Ngöbökwe sribebare käne, aune ye bitikäre niarakwe Rün dimikani jondron mada ye jökrä sribere. Niara aibe Ngöbökwe sribebare kaibe yebätä kädekata “Odei itibe” (Juan 1:3, 14; Colosenses 1:15, 16).

● “Ni brare monsoi.” (Mateo 8:20, NGT). Blitakäre jabätä Jesukwe kukwe ye niebare bä kabre aune tärä ketabokä Bibliabätä tä blite niarabätä yekänti kukwe ye nieta gre ketabokä näre. Kukwe yebiti mikani gare kwe niara därebare kä nebätä aune ñaka Ngöbö arabe. ¿Ñokänti Ngöbö Monsoi itibe ye därebare ni kä  nebätä kwrere? Üai deme ye köböire Jehovakwe Monso kwe ye mikani nüke nire, meri deme kädeka nämene María yebätä. Ye medenbätä, Jesús därebare töi metre aune ñaka därebare ngite (Mateo 1:18; Lucas 1:35; Juan 8:46).

● “Dirikä.” (Juan 13:13.) Jesukwe kukwe kwin Gobran Ngöbökwe yebätä driedre, sribi ye mikani niara kisete bämikani kwe (Mateo 4:23; Lucas 4:43). Gobran ye abokän dre gärätä aune Ngöbö töi ye mikai nemen bare ño kwe, ye niarakwe mikani gare kukwe nuärebiti (Mateo 6:9, 10).

● “Kukwe.” (Juan 1:1, NGT). Jesús namani Ngöbö kukwei niekä. Niara mikani kukwe mike gare, aune Ngöbö kukwei ye mike gare ni Kä tibienbätä yei arato (Juan 7:16, 17).

KUKWE NGWANTARITA: ¿Jesús ye ara Mesías käbämikani?

MIKATA GARE: Jän. Bibliabätä niebare känenkri ni rükai abokän käkwe Ngöbö töita ño ye mikai nemen bare. Ye abokän blita nämene Mesías o Kristo yebätä, kukwe ketebu ye abokän ni “dianinkä” meden gärätä. Bati meri nünanka Samaria käkwe niebare Jesús ie: “Ni Dianinkä Ngöbökwe (kädekata Kristo [...]) abko rükadre, ye garera tie”. ¿Jesukwe dre niebare ie? “Ni btä mata blite ye abko ti ara” niebare kwe metre ie (Juan 4:25, 26).

Akwa, ¿kukwe meden tä mike gare niara namani Mesías? Kukwe ketamä ütiäte raba ni dimike; ñodre, ni kise tä känänta ye kwrere. Ani mike gare jai.

● Niara mräkätre. Biblia yebätä niebare Mesías ye jatadi David, Abrahán mräkätre yekri (Génesis 22:18; Salmo 132:11, 12). Jesús jatani niaratre nibu yekri (Mateo 1:1-16; Lucas 3:23-38).

● Kukwe rabai bare niebare. Kukwe tikani Hebreore yekänti niebare känenkri Mesías nünain ño Kä tibienbätä. Jesukwe kukwe ye jökrä mikani nemen bare. Niara däredi aune murie ketadi yebätä kukwe niebare arato. Ñodre, däredi Belén (Miqueas 5:2; Lucas 2:4-11), nämene Egipto Ngöbökwe käräbareta (Oseas 11:1; Mateo 2:15) aune murie ketai ye ngwane niara krä ye ñaka ötaibätä krati jire (Salmo 34:20; Juan 19:33, 36). Dre dre rakaikä niarabätä ye niarakwe ñaka ükaninte, ne kwe kukwe niebare ye rabadre bare jökrä niarabätä. *

● Ngöbö arabe käkwe kukwe niebare. Jesús därebare ye ngwane, Ngöbökwe angeletre juani niere nitre obeja ngübare yei Mesías därebare (Lucas 2:10-14). Jesús nämene kukwe driere ye ngwane, Ngöbökwe bati bobu niebare niara nämene Monso kwe ye kain ngäbiti (Mateo 3:16, 17; 17:1-5). Ngöbökwe ja di biani Jesús ie kukwe keta kabre ñan tuabare nuainkäre, ne kwe rabadre gare niara abokän Mesías käbämikani (Hechos 10:38).

 KUKWE NGWANTARITA: ¿Ñobätä ja tare nikani kwe aune murie ketani?

MIKATA GARE: Jesús ñaka därebare ngite yebätä ñaka ja tare nikadre kwe näre. Arato, niara ñaka metadre kribätä ni kukwe käme nuainkä ye kwrere. Dre rakaikä niarabätä ye nämene gare kwin ie, aune niara murie ketai tare ye nämene ngübare (Mateo 20:17-19; 1 Pedro 2:21-23).

Mesías ja tare nikadi krubäte aune murie ketadi ngite nikwe ye ütiäre ye mikani gare känenkri (Isaías 53:5; Daniel 9:24, 26). Jesús arabe käkwe mikani gare niara jatani Kä tibienbätä “ja nire biankäre ni kwati kökatarikäre” (Mateo 20:28, NM). Ye medenbätä, Jesús ja nire biani ni ütiäre ie nikwe tödekadre angwane, ni raba nemen kwäre ngite aune gata yebätä, bätä ni raba nemen nüne kärekäre Kä tibien kwitai bä nuäre yete (Juan 3:16; 1 Juan 4:9, 10). *

KUKWE NGWANTARITA: ¿Kukwe meden tä mike gare nie Jesús ganinkröta?

MIKATA GARE: Jesús gaikröta ye nämene gare kwin ie (Mateo 16:21). Akwa, niarakwe nuaindi die kwe yebiti ye nitre kukwe tikaka Bibliabätä ñaka niebare. Ñaka rabadre nemen bare ie. “Ngöbö ara jire käkwe mikaninta nire, ñobtä ñan angwane gata ñan rabadre niara ganaine janknu jire chi” (Hechos 2:24). Ngöbö tärä aune jondron jökrä sribebare kwe ye nita mike era jai angwane, niarakwe Monso kwe ganinkröta yei ni raba tö ngwen (Hebreos 3:4).

Akwa ¿kukwe meden tä mike gare kukwe ye nuainbare kwe? Ani mike gare ruäre jai.

● Nitre käkwe tuani. Jesús murie ketani ye bitikäre kä nikani grebiti kubu ta angwane apóstol Pablo käkwe tikani, Jesús ganinkröta ye nitre 500 biti bäri ja tötika ben käkwe tuani, kä ye ngwane nitre ye jökrä bäsi nämene nire (1 Corintios 15:6). Ni nibu aibe käkwe tuadre akräke ni mada ñan raba kukwei mike era jai, akwa nete nieta nitre 500 käkwe tuani.

● Nitre abokän ie tö ngwandre. Dre namani bare metre ye nitre ja tötika Jesukwe yei nämene gare bäri kwin nitre mada ye ngwä. ¿Dre nuainbare kwetre? Ñaka kä jürä ngwani jabätä kwetre mikakäre gare Dirikä kwe ye ganinkröta (Hechos 2:29-32; 3:13-15). Jesús ganinkröta yei ni kristiano rabadre tödeke ye nämene gare ietre (1 Corintios 15:12-19). Niaratre murie keta rabadre, akwa yebiti ta nämene tödeke Jesubiti (Hechos 7:51-60; 12:1, 2). ¿Mä raba ja tuenmetre murie ketakäre kukwe ngwarbebätä? Niaratre ye käkwe ñaka nuainbare arato.

Kukwe metre miri gare Bibliakwe ye köböire Jesús ye nibira gare nie. Aisete, ¿kukwe meden metre rabadre gare nie ye ütiäte ni kräke?, o ¿Kukwe meden mikadre täte ye ütiäte ni kräke?

[Notas]