¿Nire abokän Jesús?

“Nitre jökrä tä töbike jene jene [Jesús] yebätä. Nitre kukwebätä aune nitre ñaka tö ngwen Jesús ie, tätre ngwentari jai niara ye abokän nire.” (STAN GUTHRIE, ESCRITOR)

JESÚS yebätä ni töta nemen kukwe mikai gare jai. Ye medenbätä, tärä keta kabre rürübäinta bätä película sribeta niara yebätä ye nitre kwati tä niken mike ñärärä. Akwa, nitre täbe kukwe ngwentari jai niara yebätä, aune kukwe jene jene nieta niara yebätä.

Kä nikani ta yete nitre nibu kukwe mikaka gare käkwe kukwe mikani Internet yete, ne kwe nitre kukwe känänkä internete käkwe mikadre gare “¿Nire abokän Jesús?”. Nitre ye käkwe dre niebare ye ani mike gare jai.

● “Niara kädekani kri (Ngöbö kukwei dirikä) aune nitre mikani tuin bobre kwe jai.”

● “Niara bä nämene ni erere, akwa ñaka ja ngwani kwe ni erere.”

● “Niarakwe nünanbare ye ñaka mikata gare metre.”

● “Niara Ngöbö Monsoi abokän därebare kä tibien nebätä, murie ketani aune ganinkröta ni mikakäre kwäre ja mika ngite yebätä. Kä nengwane Jesús tä nüne aune jataita Kä tibienbätä.”

● “Raba ruin tie niara aibe Ngöbö monsoi ni bä erere aune niara ara Ngöbö.”

● “Kukwe ngwarbe nieta niarabätä nitre näkwitakäre.”

¿Kukwe nini nete ye abokän meden metre? Kukwe ruäre ye ñaka mikata gare metre. Ye medenbätä, ¿medente kukwe metre mika raba gare nie Jesús yebätä? Nitre täräkwata ne sribekä ie nüke gare kwin Biblia ye abokän Ngöbö Kukwei, ye medenbätä tärä ye aibe raba kukwe metre mike gare nie Jesús yebätä (2 Timoteo 3:16). *

Nitre tä kukwe ngwentari jai Jesús yebätä aune Biblia tä dre niere, ye nikwe mikai gare jai kukwe kädriei ja käne yekänti. Jesús arabe käkwe driebare “ni jökrä käkwe tödekadre ie” ye rabai dianintari (Juan 3:16, NM). Aisete, dre nieta Bibliakwe ye nunta mä nübaire mike gare jai. Ye bitikäre, mäkwe ja töi mikadre akwle kukwe mike gare jai Jesús yebätä aune tödeke ie.

[Nota]