¿Mä nämene ja ükökrö juta Ngöbökwe yebe? Mä töita ja ükaikrö bobukäre bentre, akwa mätä nemen nütüre Jehová ñaka mä kai ngäbiti. Mätä töbike ye erere angwane, mäkwe ñäkä kukwe nebätä aune kukwe mada sribei ja käne yebätä.

MERI käkwe niebare: “Ngöbö rabadre ti tuenmetre näinta ja kokwäre aune tikwe niara mikaba ulire ye juandre ta tibiti kwe ti nämene niere käre ie orasionte”. Meri ye ririabare kukwe Ngöbökwe yebätä, akwa biti ja dianinkä mento kwe. Meri ye nämene ulire krubäte, ¿ñan ererea? Ngöbö töita nitre yebätä, o tä nitre ye käikwitekä jabiti o niara törba nitre ye tuai näinta ja kokwäre ye mä tärä ngwentari jai. Jeremías ni Ngöbö kukwei niekä käkwe kukwe tikani ye raba mä dimike (ñäkä Jeremías 31:18-20 [NM] yebätä).

Kena, ñongwane kukwe ye niebare kwe yebätä ani töbike. Jeremías jämi därere ye känenkri, kä 740 ye ngwane Jehovakwe nitre Asirio tuanimetre juta 10 nitre Israelkwe ye ganainne aune jänikani ngite. * Juta Israel nämene ja mike ngite krubäte aune ni Ngöbö kukwei niekä nämene kukwe niere ye niaratre ñaka mikani täte, ye medenbätä Ngöbökwe kukwe ñäkäbare kräketre (2 Reyes 17:5-18). Juta ye jänikani mente ngite ye ngwane, ¿ja namani ruin ño ietre? ¿Ja töi kwitani kwetre? ¿Jehovakwe niaratre käi kwitaninkä jabiti?, o ¿Jehovakwe niaratre kani ngäbitita bobukäre?

“Ja rababa ruin ngite tie”

Kukwe namani gare nitre israel ie: niaratre jänikani ngite ye käkwe mikani töbike aune ja töi kwitani kwetre. Niaratre ja töi kwitani bökän ye namani gare Jehovai. Efraín käkwe blitabare ño juta mada mada ye ütiäre aune ja namani ruin ño ie yebätä nikwe ñäkädre angwane rabai gare nie.

“Efraín tä akwle ja muaire ja mikani ngite kwe yebätä ye kukwe nuata tikwe.” (Bersikulo 18.) Nitre Israel käkwe ja ngwani käme yebätä nämene ja muaire ye Ngöbö nämene kukwe nuin. Diccionario hebreore tä niere kukwe “akwle ja muaire” ye abokän “dokwä minien” ye gärätä arato, ñodre, monso tä dokwä minien kukwe blo nuainbare kwe tä nemen gare ie yebätä, aune ja töi kwitaita kwe bätä törbadre näinta ja gwirete (Lucas 15:11-17). Akwa, ¿nitre Israel käkwe ja töi kwitani ye bämikani ño kwetre?

“Mätä mäträre tibätä [...] tita ja ngwen nibi ngäbä mika jämi jäme ye kwrere.” (Bersikulo 18.) Nitre israel ie nämene gare niaratre mikadre ja ngie nuin. Niaratre ja ketani nibi ngäbä yebätä, ñobätä ñan aune jondron nire ye nämene ja ngwen ye erere niaratre nämene nuainne. Tärä keteiti tä mike gare kri biti nibi däkäte nämene ye erere “niaratre nämene ribere jai”.

“Ti dimike ja töi kwiteta aune tikwe ja töi kwitaita jötrö ngwarbe, ñobätä ñan aune mä Jehová Ngöbö tikwe.” (Bersikulo 18.) Kukwe käme nuainbare kwetre yebätä ja namani ruin ngite ietre aune jataninta ja muaire Ngöböbätä. Erametre, niaratre ja dianinkä niarabätä aune ja mikani ngite krubäte niara rüere. Akwa Ngöbökwe ngite juandre ta biti yei niaratre tö namani, ye medenbätä niaratre namani ja di ribere ie. Biblia mada tä kukwe ye kwite krörö: “Ti kain ngäbitita bobukäre, ti tuenmetre näinta ja kokwäre; ñobätä ñan aune mä YHWH [Ngöbö] tikwe” (Versión Israelita Nazarena).

 “Ja rababa ruin ngite tie [...] tita jakaire aune ja ruin ngwarbe tie.” (Bersikulo 19.) Niaratre namani jakaire aune ja mikani ngite kwetre ye namani gare ietre. Ja namani ruin di ñaka ietre aune ulire krubäte (Lucas 15:18, 19, 21).

Kukwe käme nuainbare kwetre, yebätä ja namani ruin ngite ietre ye bämikani kwetre. Niaratre namani jakaire krubäte yebätä ja driebare kwetre Ngöböi aune ji blo namani ietre. Akwa, ¿Jehovakwe ngite juani ta biti aune tuanimetre näinta ja käite kukwe nuainbare kwetre yebätä?

“Erametre tikwe niara mikaita tuin bobre jai”

Jehová nämene nitre Israel tarere. Jeremías 31:9 tä mike gare: ‘Ti abokän Israel Rün ye erere; Efraín ye abokän mubai tikwe’. Ye medenbätä, ni rüne kwe monso tare aune monso ye ja töi kwitadre kukwe blo nuain nämene kwe yebätä, rün kwe ñaka raba kain ngäbitita, ¿raba ruin mäi? Jehovakwe kukwe niebare ye tä mike gare juta kwe ye nämene tare kwe.

“¿Efraín ye ti ngobo ütiäte, o monso tare tikwe? Tikwe kukwe ñäkäba kräke, akwa ti ñaka niara käikwitekä jire chi jabiti.” (Bersikulo 20.) !Kukwe ye ngö nemen nuäre ni olote!, ¿ñan ererea? Kukwe ye tä mike gare Ngöbö ye ni rün ni tarekä. Niarakwe ja töi mikani kwatibe blitakäre monsotre kwe ye rüere; nitre Israel nämene ja ngwen käme yebätä kukwe rabai bare niaratre yebätä ye mikani gare kwe ietre meden gärätä. Kukwe mikani gare ietre bati bobu, akwa niaratre ñaka niara kukwei nuabare, ye medenbätä Ngöbökwe tuanimetre jäniken ngite ja ngie nuakäre. Ni rüne ñaka tä monso tare kwe käi kwitekä jabiti, ye erere Ngöbökwe ñaka niaratre käi kwitaninkä jabiti. Juta kwe käkwe kukwe käme nuainbare yebätä ja namani ruin ngite ietre, ¿ye ngwane ja namani ruin ño Ngöböi?

“Ti ngänkrä ñaka namani kwekebe. Erametre tikwe niara mikaita tuin bobre jai.” * (Bersikulo 20.) Jehová tö namani monsotre kwe ye tuaita. Juta kwe kukwe käme nuainbare yebätä ja namani ruin ngite ietre ye ngwane ja namani ruin ulire Ngöböi aune tö namani tuai näinta ja kokwäre. Monso käkwe kämikaninkä rünbätä bämikani Jesukwe, ye erere juta ye namani “ruen bäri bobre” Jehovai (Lucas 15:20). Jehová tö namani monsotre kwe tuaita bobukäre.

“Jehovakwe ti tuanimetre näinta ja kokwäre”

Kukwe nieta Jeremías 31:18-20 ye tä mike gare nie Ngöböta ni mike tuin bobre krubäte jai. Nire nire käkwe mikani täte ye niara ñaka käi kwitekä jire chi jabiti. Nitre ye törba näinta niara kokwäre ye ngwane, niarata “biarebe ja mika ngite ye juankäre [biti]ta” (Salmo 86:5, NM). Nitre tä ja töi kwiteta aune tä näinta kokwäre yei niara ñaka trö kwite (Salmo 51:17). Niarata kain ngäbitita kä jutobiti (Lucas 15:22-24).

¿Meri kädrite kena ye tä törö mäi? Niarakwe ja töi mikani näinta Ngöbö kokwäre, niara nämene nüne yekänti ja di käräbare kwe konkrekasionte nitre testiko Jehovakwe yei. Kena niara nämene nütüre ñaka nämene ütiäte Ngöbö kräke. Niebare kwe: “Ngöbökwe ñaka ngite juain ta tibiti nämä ruin tie”. Akwa, nitre umbre konkrekasionte käkwe niara dimikani kukwe Ngöbökwe yebiti. ¿Kukwe meden kwin namani bare? Niarakwe niebare “Jehovakwe ti tuanimetre näinta ja kokwäre aune tita debe bien krubäte ie”.

Mäkwe kä mikaninkä Ngöböbätä aune mä tö näinta kokwäre angwane, nunta mä nübaire ja di kärere konkrekasionte nitre testiko Jehovakwe mä käite yei. Nire nire tä ja töi kwite aune tä niere Ngöböi: “Ti kain ngäbiti bobukäre, ti tuenmetre näinta ja kokwäre” ni ye tuin bobre Ngöböi aune tä ngite juen biti ta ye mäkwe ngwan törö jai.

[Nota]