¿Ñongwane rü Armagedón kömikai?

“Tikwe nikraba angwane, ni kä jökräbti temen näma kwati, btä ti okwä rababa. Ni bätäkä ngwarbe amne ni kukwe bätäkä ngwarbe näma, erere arato ni nünanka juta bätäkä ngwarbe, ye näma kwati kwati krübäte [...] aisete ñan rababa tanre jire chi. Nitre [...] se käkwe ja tare nikani arato.” (APOCALIPSIS 7:9, 14)

¿ÑOKÄNTI gare nie kukwe jökrä nibira ükaninte rü Armagedón ye nuainkäre?

Kä nengwane nitre kwati tä Jehová mike täte aune tätre nüne kukwe nieta Bibliabätä ye erere. Nitre ye nüne juta jene jene te, blite kukwe jene jenebiti, akwa Ngöbö köböire tätre keteitibe ja tarere kwärikwäri. Nitre testiko Jehovakwe tä ye erere nuainne (Juan 13:35).

Juta Ngöbökwe tä nüne jäme aune ñaka raba ja kriemike raba tuinbätä, aisete Satana köböra nitre rükä kwe ükökrö rükäre juta ye rüere (Ezequiel 38:8-12; Apocalipsis 16:13, 14, 16). ¿Ñokänti gare nie kukwe ye rabai bare? Kukwe meden meden käkwe mikai gare rü Armagedón kömikai ye Biblia tä mike gare. Kukwe ruäre ye ni nibira tuin kä nengwane.

Kukwe niebare abokän tä nemen bare kä nengwane

Ñokänti rabadre gare “kukweta ükaninte ye rabaira krüte”, ye nitre ja tötikaka Jesube käkwe ngwantaribare ie (Mateo 24:3, NM). Jesukwe niebare kukwe ne rabai bare ja känenkäre: “Juta kwatirekwatire rabadi rüre jabe kwärikwäri amne nitre nünanka kä ketareketare te rabadi rüre jabe kwärikwäri. Erere arato, ni kwati rabadi mrö nike krübäte amne dobo rabadi nakaenkä kä ketareketare temen”. Arato niebare kwe: “Ye ngwane abko ja tare nika jatadi krire kena” (Mateo 24:7, 8). Apóstol Pablo käkwe niebare kukwe ye rakaikä “kä mrä” yete aune kä ye näire “kukwe rabadi nakenkä taretare krübäte” (2 Timoteo 3:1). Kukwe niebare ye erere tä nemen bare kä nengwane, ¿raba ruin mäi?

 ¿Ñobätä kä krüte yete kukwe tare tare rabadi nakainkä krubäte? “Kä [...] braibe” te Satana bätä chokalitre käkwe kukwe nuaindi Kä tibien nebätä ye apóstol Juan käkwe mikani gare känenkri. Arato mikani gare kwe Satana “mätä [rabai] kri” (Apocalipsis 12:7-12). Nitre tä nemen rubun krubäte aune ja metata ye nemen bare kä jökräbiti tibien, ¿ñan ererea?

Jesukwe niebare kukwe tare rakaikä ye ngätäite sribi ütiäte nuaindi arato: “Kukwe kuin [...] rabadi diribare kä jökräbti temen Ngöböta sribire ño ni ngätäite mikakäre gare angwane, batibe kä mrä jatadi nüke” (Mateo 24:14). Juta 235 biti bäri nitre testiko Jehovakwe tä kukwe kwin driere Gobran Ngöbökwe yebätä, aune tätre tärä sribere kukwe 500 jene jenebiti bäri. Täräkwata Ni Mikaka Mokre bätä ¡Despertad! tä blite Bibliabätä ye niaratre tä sribere. Täräkwata ye döräita bäri täräkwata mada yebiti ta kä jökräbiti tibien. Arato niaratre Biblia ye kwitanina kukwe 100 jene jenebiti. Sribi Ngöbökwe nuainkäre tätre sribire ja töi jeñebiti aune tätre ngwian bien ja töi jeñebiti. ¿Jesukwe niebare kukwe driedi käbiti tibien ye erere tä nemen bare raba ruin mäi?

Kukwe meden meden rakaikä abokänbätä Jehovakwe rüdi nitre ja mikaka rüere yebe ye Biblia tä niere arato. Kukwe ketamä jämi nemen bare yebätä ani blite.

Kukwe niebare abokän köböra nemen bare

Keteiti. Biblia tä niere nitre ji ngwanka käne juta krikri te rabai nütüre kukwe jökrä bäsi rabaira ükaninte ietre, ye medenbätä niedi kwetre “matare kukwe ñakare. Nita nüne kuin jäme”, akwa kukwe tare rakaikä ye ñan gare ietre (1 Tesalonicenses 5:1-3).

Ketebukäre. Gobrantre ruäre käkwe ja mikai iglesia keta kabre mikata täte kä jökräbiti tibien ye rüere. Biblia tä gobrantre ye kete jondron nire kri krubäre yebätä, aune meri tä täkäni jondron nire ye tröbiti ye abokän iglesia ngwarbe bämikata (Apocalipsis 17:3, 15-18). Jondron nire kri krubäre käkwe iglesia ngwarbe tä ja bien Ngöbö mike täte ye gaite angwane Ngöbö töita ño ye mikai nemen bare kwetre.

Apóstol Juan käkwe kukwe ye bämikani krörö: “Krotu krä jätä [...] aune ni jändrän [nire] kri krübäte kwrere turi makwe ye abko mätä rabai kri meri bti kä ngwarbe yebtä angwane, meri juandi ngwarbe amne meri mikadite kaibe bütiere kwe. Erere arato, meri ye ngätä kwetadi jökrä kwetre amne kroko kiakia abko kukwadi jökrä ñukwäte kwetre. Dre nuendre, ie Ngöbö tö namani, erere mikani kwe niaratre töite” (Apocalipsis 17:16, 17).

Ketamäkäre. Iglesia keta kabre ngwarbe gaite ye bitikäre Satanakwe gobrantre kä nebätä mikai kukwe kainkä nitre Jehová mikaka täte yebätä (Apocalipsis 7:14; Mateo 24:21).

¿Ye matai ño mäbätä?

Mä ñaka tä ja tötike Bibliabätä angwane kukwe rakaikä kädrieta nete ye ñaka rabai metre mä kräke. Akwa, kukwe ye köböra nemen bare ie tö ngwan raba metre. Kukwe keta kabre niebare Bibliabätä abokän erere namanina bare ye tä mike gare kukwe mada jökrä rabai bare täte. *

¿Ñobätä nitre testiko Jehovakwe tä tö ngwen rü “Ngöbö Di Kri Jändrän Jökrä Nuenkrä” ye nibira no aune ñaka jürä ngwandre jabätä? Mäkwe kukwe ye mika gare jai arato. Mäkwe dre nuaindre ne kwe mä tädre siba Jehovakwe nitre kriemikai ye ngätäite, niaratre mikadre gare mäi Biblia yebiti mäkwe ribe ietre (Apocalipsis 16:14). Kukwe ye rükai gare mäi angwane mäkwe töbikai metre kukwe rakaikä ja känenkäre yebätä.

[Nota]

[Kukwe nieta página 8]

Nitre testiko Jehovakwe tä kukwe driere ye niebare Bibliabätä, ¿raba ruin mäi?