¿Ja mäkätä chokabe ye käme?

Bárbara * nämene bati ye ngwane jondron jatani tuin köböre ie, aune ñäkä nämene niarai nämene ruin ie. Mräkätre krütani yebe nämene blite nämene niere. Niara bätä muko kwe Joaquín jatani kukwe känene tärä känti blitata choka yebätä, aune jatani kukwe mike gare kwin carta tarot yebiti. Rabai ngwian bökäne ye namani gare ietre carta tarot yebiti aune ye erere namani bare. Sribi nuain nämene kwetre yebiti jatani ngwian ganainne bäri. Bati, carta ye mikani gare ietre ni nibu töi käme rükai känti, aune ja kriemikadre ño kwetre ye mikani gare ietre arato.

NITRE ruäre tä nütüre ja mäkä chokabe ye nuain nämene kirabe, akwa ye erere nuainta kä nengwane arato. Kä jökrä känti nitre tä jondron ngwen jabätä ja kriemikakäre o dre rakaikä ja känenkäre ye tä niken ngwentari sukia ie. Täräkwata kädekata Focus sribeta Alemania, yekänti kukwe ne tikani “Lucifer y las computadoras” känti niebare: “Internet yebiti nitre kwati töi mikata ja mäke chokabe”.

¿Ja mäkätä chokabe yebätä Biblia tä dre niere? Kukwe ye rabai gare mäi angwane ye käkwe mä mikai töbike.

¿Biblia tä dre niere?

Ngöbökwe kukwe biani juta Israel ie yekänti niebare krörö: “Nitre ne erere ñaka tädre mun ngätäite: [...] ni sukiare, ni ja di käräkä choka ie, ni kukwe ngwarbe mikaka era jai, ni kwrare, ni ngürün kite ni madabätä, ni nänkä ni blitaka chokabe yekänti o ni kukwe rabai bare ja känenkäre niekä, ni kukwe ngwantarikä ni krütanina ie. Nire nire tä jondron ne nuainne ye tuin käme krubäte Jehovai” (Deuteronomio 18:10-12). ¿Ja mäkätä chokabe ye ñobätä tuin käme krubäte Ngöböi?

Kukwe namani bare kädrieni kena tä mike gare nitre kwati tä nütüre raba blite mräkätre krütani yebe, aune ja mäkätä chokabe yebiti ni krütani üai tä kukwe mike gare ietre. Iglesia bäsi jökrä tä driere nitre tä krüte ye üai tä niken kä üaire yekänti. Akwa, Biblia ñaka tä kukwe ye driere, ñakare aune tä niere: “Nitre krütanina, niaratre töi ñaka niena jire” (Eclesiastés 9:5). Tä ni krütani ye bämike ni kübien ye kwrere, ye abokän dreta nakainkä bäre ta ye ñaka gare ie (Mateo 9:18, 24; Juan 11:11-14). *  Akwa, ¿ñobätä nitre ruäre tä niere tä blite ni krütani yebe? Nitre tä kite jondron tuin köböre o metre ¿nireta kukwe ye nuainne niaratre yebätä?

¿Blita raba ni üaire yebe?

Tärä ketabokä Bibliabätä känti blitata Jesús yebätä, yekänti mikata gare niara nükani Kä tibienbätä ye ngwane blitabare kwe ni üaire yebe. Marcos 1:23, 24 tä niere “üai käme” käkwe niebare Jesús ie: “Ma gare kuin tie”. Ye erere mä gare ni üaire yei arato. Akwa, ¿dre gare mäi niaratre yebätä?

Jehovakwe angeletre kwati sribebare ni känenkri. Angeletre ye Ngöbö monsoi arato, aune kukwe keta kabrebätä niaratre ñaka ja erebe ni kä tibienbätä yebe (Job 38:4-7; Hebreos 2:6, 7). Angeletre ye dite aune töbätä krubäte, niaratre ye sribebare Ngöbö töi ye nuainkäre. Salmista käkwe kukwe ye mikani gare: “Jehová, angeletre dite krubäte mäkwe tä mä kukwei ngwen käkwe mä käikitadrekä, tätre mä kukwe nuin yebiti tätre nuainne” (Salmo 103:20).

Biblia tä mike gare angeletre ruäre jatani ja töbiti blite ni kä tibienbätä ben, Jehovakwe kukwe ükaninte kräketre yebiti ta nuainbare kwetre. ¿Ñokäre nuainbare kwetre? Ángel käkwe Adán bätä Eva ngökani ne kwe ñaka rabadre ja mäke ni ni Sribekä yebe. Ye medenbätä ángel ye kädekani Satana Diablu, niarakwe kukwe ngwarbe niebare aune ja mikani kwe Ngöbö rüere (Génesis 3:1-6).

Ye bitikäre, angeletre mada käkwe “kä kuin Ngöbö känti mikanin[te]”, aune ja ngrabare kwitani kwetre ni erere ne kwe rabadre nüne meri bä nuäre ben Kä tibienbätä (Judas 6; Génesis 6:1, 2). Angeletre ye ñaka Ngöbö kukwei mikani täte nierare, aune monsoitre namani krikri ye namani kä jürä ngwen nitre madabätä. Niaratre köböite “ni jökrä namani rüre krübäte jabe kwärikwäri kä nebtä”. Ngöbökwe ñü kri juani Noé näire nitre käme ye gatekäre. ¿Ñü kri näkäni Noé näire ye kädrie tärä mä olote? (Génesis 6:3, 4, 11-13, JK).

Kä jatani niken ñöte ye ngwane angeletre ye ja ngrabare kwitani aune nikaninta kä kwinbätä. Akwa ni ni Sribekä käkwe ñaka tuanimetre kä kwinbiti, ñakare aune juanintari mento kwe, ye abokän bämikata kitani “kä bäri iko te” kwrere (2 Pedro 2:4, 5). Angeletre käkwe ñaka ja mikani täte ye Biblia tä kädeke “chelatre” o chokalitre (Santiago 2:19, NGT). Ja mäkä chokabe ye kite angeletre käme yekri.

¿Chokalitre tö dre nuain nibätä?

Chokalitre tä blite ni kä tibienbätä ben töi mikakäre ja denkä mento Jehovabätä. Kukwe keta kabre nuainta ja mäkäkäre chokabe, nire tä kukwe ye mike täte yebiti choka tä näkwite, ne kwe Ngöbö kukwei metre ye ñaka rabadre gare ietre aune ñaka rabadre ja mäke ben.

Ketebukäre, kukwe mada mikata gare nie chokalitre yebätä. Satana, chokalitre däkien käkwe “juta kä jökräbti temen [...] amne, jändrän ütiäte krikri” ye käbämikani Jesús ie. Akwa, ¿käne Jesukwe dre nuaindre kräke? Diablukwe niebare ie: “Ma rabadi ngukudokwäbti temen ti ngwärekri käkwe ti mikadi ütiäte jae”. Erametre, Satana bätä chokalitre tö ja mikamana täte. Akwa, Jesús ñaka kukwe ye nuainbare, ñakare aune Jehová aibe mikani täte kwe (Mateo 4:8-10).

Kä nengwane chokalitre ñaka blite metre ta ni kä tibienbätä ben. Kukwe keta kabre nuainta sukiakwe yebiti ja mäkätä chokabe. ¡Mäkwe ñaka  ja ngökamana chokalitre yei! Kukwe nuainta kwetre ye ñaka tä kukwe mada mike gare nie. Chokalitre tä kö okwä mike nie ni ngökakäre, ne kwe ni ñaka rabadre Jehová mike täte. Nitre töta nemen jondron käme ye tuenmetre angwane chokalitre tä nemen nitre ye nike aune ngwen ja tare nike. Ye erere tä nemen bare mäbätä angwane, ¿mä raba ja kriemike ño chokalitre yebätä?

Ja kriemika raba ño

Mäkwe ñaka ja ngökamana; ni üaire tä blite ni kä nebätä ben ye Ngöbö rüe aune Ngöbökwe niaratre gaite (Judas 6). Niaratre ye ni ngökaka. Ni krütanina ye bä kwrere tätre ja bämike. Ja ketamuko mäkwe törba kukwe käme nuain mäbätä aune jatadre kukwe ngwarbe niere, o ni mada namani gare mäi Internet yebiti tä mä kraire küdrekäre mäbätä ye rabadre gare mäi angwane, ¿mäkwe dre nuaindre? Ye erere arato, jondron nuainta ja mäkäkäre chokabe ye tä kukwe tare mike nemen bare nibätä. Ja mäkä chokabe ye mäkwe tuanmetre jökrä. ¿Nuain raba ño?

Biblia tä dre niere ja mäkätä chokabe yebätä ye namani gare nitre nünanka kä Éfeso yei angwane, täräkwata ja tötikakäre chokabätä ye kitadrekä kwetre namani gare ietre. Biblia tä mike gare täräkwata yebätä ngwian kitaninkä krubäte kwetre, akwa täräkwata ye “kukwani jökrä kwetre ni jökrä okwäbti” (Hechos 19:19, 20). Tärä känti blitata chokabätä aune jondron sribeta ngwankäre ja kriemikäre ye raba kwen ni jökrä ie kä nengwane, aune Internet yete kukwe keta kabre mikata gare choka yebätä arato. Jondron meden raba mä töi mike ja mäke chokabe ye jökrä mäkwe dianka mento.

¿Joaquín bätä Bárbara kädrieni kena ye tä törö mäi? Carta tarot yebiti namani gare ietre ni nibu “töi käme” rükai känti, niaratre ñaka rabadre nitre ye kukwe nuin aune jondron biandre ietre ye ñaka kadre ngäbiti kwetre. Meritre testiko Jehovakwe kädekata Connie bätä Gudrun nikani Joaquín bätä Bárbara känti aune nämene kukwe kwin mike gare Ngöböbätä niebare ietre angwane niaratre käkwe kukwe nuani. Biblia tä dre niere ja mäkätä chokabe yebätä ye meritre nibu käkwe mikani gare ietre. Ye bitikäre, Joaquín bätä Bárbara käkwe ja tötika Bibliabätä kani ngäbiti.

Nitre ye käkwe ja töi mikani ñaka ja mäketa chokabe. Arato, nitre testiko Jehovakwe käkwe mikani gare ietre chokalitre rabai rubun kräketre. Yete ja känenkäre, Joaquín bätä Bárbara yebätä kukwe jatani nakainkä aune namani ja tare nike krubäte chokalitre kisete. Kä nämene kite drüne ye ngwane kä jürä nämene nemen niaratre yebätä, ye medenbätä ju mada känänbare kwetre jai nünankäre, angwane ja namani ruin kwin ietre. Kukwe tare ben ja tuani kwetre ye ngwane kukwe nieta Filipenses 4:13 käkwe niaratre dimikani, texto ye tä niere: “Ti die mikaka, köböire ti raba jändrän jökrä nuene”. Niaratre käkwe ja töi mikani ye nuainne ye köböire Jehovakwe kukwe kwin mikani nemen bare bätätre, ye bitikäre chokalitre ñaka niaratre nikabare jankunu. Kä nengwane, Joaquín bätä Bárbara tätre Ngöbö Jehová mike täte kä jutobiti.

Biblia tä niere nire nire törba Jehová tuai kukwe kwin mike nemen bare ja kräke ye rabadre kukwe ne nuainne: “Bika tidrä Ngöböbtä munkwe. Amne munkwe nünanka dite jabtä rükäre diablu Satana rüere angwane, gitiadi munbtä. Krötö känime Ngöbö ken munkwe amne Ngöbökwe krötadi känime mun ken” (Santiago 4:7, 8). Ja mäkätä chokabe ye mä törba tuainmetre angwane Ngöbö Dite krubäte raba mä dimike nuainne. Joaquín bätä Bárbara yebätä kukwe namani bare ye tä nüketa törö ietre angwane kukwe nieta Salmo 121:2, yei tätre tö ngwen, texto ye tä niere: “Jehová ti dimikaka”.

[Nota]

[Kukwe nieta página 11]

Ja mäkätä chokabe ñaka tä nitre tuenmetre ja mäke Ngöböbe

[Kukwe nieta página 12]

“Krötö känime Ngöbö ken munkwe amne Ngöbökwe krötadi känime mun ken.” (SANTIAGO 4:7, 8)