▪ Kä tibien ne gaite köbö 21 octubre kä 2011 nitre ruäre namani nütüre. Akwa ye erere ñaka namani bare. Ni nünanka kä Estados Unidos kädekata Harold Camping käkwe kukwe niebare ye erere ñaka nakaninkä. Niarakwe niebare köbö 21 mayo kä 2011, Ngöbökwe kukwe ükadite ni kä tibienbätä ben. Dobo kri rakaikä, ye bitikäre sö rikai krärike ta angwane kä tibien ne gaite, ye rabai bare köbö 21 octubre niebare kwe.

Kä tibien ne tädi käre, Ni ni Sribekä ñaka kä tibien ne gaite. Niara Kukwei tä niere: “Mäkwe kä tibien sribebare ne kwe tädre kärekäre” (Salmo 119:90).

Nitre ruäre ñäkäkä Bibliabätä ñan tä kukwe ye mike era jai aune tätre nütüre Kä tibien ne kukwai. Tätre niere 2 Pedro 3:7, 10 tä kukwe ye mike gare. Texto ye tä niere krörö: “Kä käinta amne kä tementa nita tuen mtare [...] amne, nitre kukwe nuenkä kämekäme Ngöbö rüere, ye abko Ngöbökwe gadikä ñukwä jutrabti kä käinta amne kä tementa noko ngöi jökrä, abkokäre Ngöbö tä kä ngibiare mtare. Akwa batibe ni gokä tä nüke, ye kwrere jire ni Dänkien köböi rükai. Köbö ye näire ñukwä jutra rabadi kri krübäte abko ngö rabadi juuu, käkwe kä käinta se gadikä jökrä. Erere arato, [...] jändrän jökrä tä kä nebtä, se abko rukwadi jökrä ñukwä jutrate kä temen noko ngöi jökrä”. ¿Apóstol Pedro käkwe kukwe niebare ye erere rakaikä metre?

Ñakare. Kukwe ye rakaikä metre akräke, tärä mada tikani Pedrokwe aune texto mada Bibliabätä rabadre kukwe ye arabe niere. Kukwe nieta texto yebätä ye rabadre bare metre akräke, nitre tä ja ngwen käme ye köböite kä kwin, muke aune jondron jökrä tä kä kwinbiti, ye kukwai jökrä. Jondron käme tädre ju mäkwe yete, ye mä törbadre diainkä angwane, ¿mä raba ju mäkwe ye kukwe? Ñakare. Ye erere arato Jehovakwe ñaka Kä tibien ne gaite angeletre ruäre käkwe ja mikani rüere ye köböite.

Ne madakäre, Kä tibien ne gaite akräke Jesukwe kukwe niebare ye ñaka rabai bare. Niarakwe niebare: “Nire nire ñan tä bike kri ni mda mda okwäbti [...] kä rabadi nuäre btä, ñobtä ñan angwane Ngöbökwe kä temen ne biandi ie” (Mateo 5:5; Salmo 37:29). Ni rüne käkwe ju kwin sribedre mräkätre kwe kräke biti raba kukwe ngise, ¿raba ruin mäi? (Salmo 115:16.) Ni ñaka raba kukwe ye erere nuainne. Jehová ni Sribekä aune niara ni Rün ni tarekä krubäte, aisete ñaka raba kukwe ye nuainne (Salmo 103:13; 1 Juan 4:8).

Tärä 2 Pedro 3:7, 10 yekänti apóstol Pedro käkwe nitre kä nebätä kukwe käme nuainkä ye ketani kä tibien yebätä. Ngöbökwe kukwe ükaite nitre kä nebätä ben, ye niarakwe ketani Ñü kri näkäni tibien Noé näire yebe (2 Pedro 3:5, 6). Ñü kri näkäni tibien ye ngwane nitre käme aibe murie ketani. Akwa, Noé, mräkätre kwe aune Kä tibien ye ñaka ganinte. Arato, texto ye arabebätä Pedro nämene gobran kä nebätä ye kete kä kwinta yebätä. Ye medenbätä, nitre käme, nitre ñaka tö ja töi kwitai aune gobrantre ye jökrä gaite, aune Gobran Ngöbökwe ye rabai gobrane täte (Daniel 2:44).

¿Kä tibien ne gaite? Ñakare. Nitre kukwe käme nuainkä ketata kä tibien yebätä ye abokän gaite. Akwa, Kä tibien ne aune nitre Ngöbö mikaka täte ye abokän täi kärekäre (Proverbios 2:21, 22).