¿Nitre tä dre niere Armagedón yebätä?
¿Nitre tä dre niere Armagedón yebätä?
“Nitre gobranka krikri ükakröba jökrä kä kädianta Armagedón hebreore ye känti.” (APOCALIPSIS 16:16)
¿ARMAGEDÓN nieta ye ngwane dreta nüke mä töite? ¿Mätä nemen töbike kukwe tare rabai bare kä jökräbiti tibien yebätä? Kukwe Armagedón ye nieta batibe Bibliabätä, akwa jondron bätäkä sribebare kukwe mikakäre gare aune nitre ji ngwanka iglesiate tä blite käre kukwe yebätä.
¿Nitre tä kukwe niere Armagedón yebätä ye erere Biblia tä driere? Kukwe ye mikadre gare jai ye ütiäte krubäte. ¿Ñobätä? Kukwe metre rabadre gare mäi angwane kä jürä ñaka rabai mäbätä, mä rabai tö ngwen kukwe kwin yei aune mäkwe töbikai kwin Ngöbö yebätä.
Kukwe ketamä nieta Armagedón yebätä aune dre drieta Bibliakwe kukwe yebätä ye mäkwe mika gare jai.
1. NITRE TÄ KUKWE TARE NUAINNE YE ABOKÄN ARMAGEDÓN.
Nitre kukwe mikaka gare aune nitre kukwe känänkä, tä niere nitre tä kukwe tare mike nemen bare ye meden gärätä Armagedón. Ñodre, Armagedón ye ketani rü kri nuainbare bobu yebätä. Arato, jondron bätäkä sribebare kukwe mikakäre gare yete nie nämene Estados Unidos bätä Unión Soviética käkwe bomba kri krubäte kitadre jai kwärikwäri rükäre angwane “armagedón nuclear” rabadre bare. Kukwe keta kabre nuainta abokän tä Kä tibien juen ngwarbe ye kädekata “armagedón climático” abokän tä nitre ja tötikaka krikri mike töbike krubäte kä nengwane.
¿Dre mikata gare kukwe yebiti? Tätre mike gare Kä tibien aune jondron jökrä sribebare ye tä gare ni kä nebätä yei. Gobrantre ñaka ja töi mikai kukwe ye ükete angwane kä tibien ne juain ngwarbe kärekäre.
¿Dre drieta Bibliakwe? Ngöbökwe ñaka nitre tuainmetre Kä tibien juen ngwarbe. Biblia tä mike gare Jehovakwe * Kä tibien “ñaka sribebare ngwarbekäre”, ñakare aune “sribebare kwe nünankäre” (Isaías 45:18). Ñaka nitre tuainmetre kwe Kä tibien ne juen ngwarbe, “nire nire käta kä temen ne juen ngwarbe abko [niarakwe] juandi ngwarbe” (Apocalipsis 11:18).
2. KUKWE TARE NEMEN BARE YE ABOKÄN ARMAGEDÓN.
Juta ruäre yekänti nitre kukwe mikaka gare tätre niere kukwe tare tä nemen bare ye abokän Armagedón. Ñodre, kä 2010 yete “‘Armagedón’ nakaninkä kä Haití yekänti” niebare. Dobo kri nakaninkä ye ngwane nitre tare nikabare, nitre kwati krütani aune jondron nikani ngwarbe krubäte juta yete. Nitre kukwe mikaka gare aune nitre película sribekä tätre niere kukwe namani bare ye erere rabai bare ja känenkäre. Ñodre, jondron kri mobe matadre Kä tibien nebätä angwane kukwe tare rabadre bare ye abokän tätre kädeke Armagedón.
¿Dre mikata gare kukwe yebiti? Armagedón ye ngüba ñaka aune batibe rakaikä, ni kri kia murie ketadi yete aune ñaka ja kriemika raba jire chi kukwe tare yebätä.
¿Dre drieta Bibliakwe? Armagedón ye ñaka nuaindi ni jökrä murie ketakäre, ñakare aune yebiti nitre käme aibe gaite. Biblia tä käbämike gwäune “ni käme ye ñaka rabaira” (Salmo 37:10).
3. NGÖBÖKWE KÄ NE GAITE ARMAGEDÓN YEBITI.
Nitre kwati kukwebätä kätä nütüre nitre ruäre töi kwin käkwe rüdi nitre töi käme yebe aune mrä mada Kä tibien ne juain ngwarbe. Meri sribikä Princeton Survey Research Associates käkwe kukwe ngwantaribare nitre nünanka Estados Unidos yei, aune nitre 40% tä nütüre Kä tibien ne gaite “rü Armagedón yebiti”.
¿Dre mikata gare kukwe yebiti? Ni ñaka sribebare nünankäre kärekäre Kä tibien nebätä, aune kä tibien ne ñaka sribebare ne kwe tädre kärekäre. Ni krütadre yekäre Ngöbökwe ni sribebare.
¿Dre drieta Bibliakwe? Ngöbökwe “kä tibien ye ükaninte kwin, ñaka gaite jire, ñakare aune tädi kärekäre” (Salmo 104:5). Biblia tä niere: “Nitre kukwe kwin nuainkä ye aibe kwe kä tibien ye rabai, aune nünandi kärekäre te kwetre” (Salmo 37:29).
Kukwe jene jene nieta Armagedón yebätä, ye erere Biblia ñaka tä driere. Ye medenbätä, ¿kukwe meden abokän metre?
[Nota]
^ párr. 9 Biblia tä mike gare Ngöbö kä Jehová.
