¿NGÖBÖTA nitre niara mikaka täte tarere metre? Jän, ni tare krubäte kwe. Ngöböta ni tarere ye mikakäre gare jai nikwe töbikadre niarakwe kukwe niebare yebätä. Jehová töi ño ye tä mike gare nie Biblia yebiti. Ñodre, ani töbike kukwe nieta Isaías 49:15 yebätä.

Jehovakwe kukwe bämikani tärä Isaías yebätä, tä mike gare niara tä nitre niara mikaka täte tarere krubäte. Niara ara tä ngwentari: “¿Ni meyere raba monso kwe ye käi kwitekä jabiti aune monso kwe ñaka nemen tuin bobre ie?”. Kukwe ngwantarita nebiti mikata gare ni meyere ñan raba monso kwe käi kwitekä jabiti, ñobätä ñan aune niara tä monso kwe buke dibire rare aune mantre jetebe. Jehovakwe kukwe ngwantariba tä kukwe ütiäte mike gare.

¿Ñobätä ni meyere tä monso kwe buke aune monso tä dre dre ribere jai ye erere nuainne kräke? ¿Ñaka ngetradrekä kwe abokän gäre? Ñakare. Ni meyere jökrä bäsi “monso kwe ye nemen tuin bobre ie”. Kukwe hebreore “nemen tuin bobre” ye abokän kwita raba “ni mada tä nemen ruintari tare nie” (Éxodo 33:19; Isaías 54:10). Arato tä mike gare, ni mada abokän ñan raba jondron nuainne ja kräke ye tä nemen tuin bobre nie aune nita nemen ja töi mike kwin kräke. Ni meyere tä monso chi kwe tarere, ye medenbätä töita biarebe monso kwe dimikakäre aune ni mada ñaka raba niara töi kwite.

Akwa, ruäre ngwane monso ie mröta nemen ye ngwane meye ñaka nemen töibikaire. Jehová abokän tä niere: “Ni meyere raba monso kwe käi kwitekä jabiti”. Kä nengwane, nitre kwati ñaka ni mada tarere (2 Timoteo 3:1-5). Ruäre ngwane ni meyere ñaka tä monso kwe ngübare kwin, tä küdrerebätä aune monsota nemen kwe angwane tä tuenmetre kaibe. Ni kukwe Bibliabätä mikaka gare käkwe kukwe niebare Isaías 49:15 yebätä: “Ni meyere ye abokän ngite yebätä ruärekänti töita nemen ñaka kwin. Ni kä nebätä töi raba nemen ni mada tarebätä, akwa ñan raba nuainne kärekäre”.

Jehová abokän tä mike gare metre nie “tikwe ñaka mä käi kwitaikä jabiti”. Jehovakwe kukwe ngwantaribare Isaías 49:15 yekänti ye nibira gare bäri kwin nie. Ñaka nämene jerekäbe kukwe bämike, ñakare aune kukwe yebiti Jehová nämä mike gare niara ñaka raba nuainne ni meyere ye erere. Ni meyere ja mike ngite raba monso chi kwe ñaka ngübare kwin, Jehová abokän tä nitre niara mikaka täte mike tuin bobre jai aune tä dimike. Ye medenbätä, ni kukwe Bibliabätä mikaka gare kädrite kena tä mike gare Isaías 49:15 tä driere “Ngöböta ni tarere krubäte, kukwe ne erere nie ñaka mada Bibliabätä kukwe tikani Hebreore yekänti”.

Jehovata ni tarere krubäte aune “ni tuin bobre ie” tä nemen gare nie angwane ye tä ni töi mike jäme (Lucas 1:78). Niara tä niere: “Tikwe ñan ma mikadrete jire chi kaibe amne, tikwe ñan kä mikadrekä jire chi mabtä” (Hebreos 13:5). ¿Mä raba nökrö ño niara ken ye mä törba mikai gare jai?